1. Dahme Siohwa ketin wiahionguhkehr?

IA DUWEN omw wiahla emen sounkadehdehn Siohwa? Keieu, mwein ke tepin rong rongamwahwo sang rehn omw pahpa nohno, sang iengomw tohndoadoahk de iengomw tohnsukuhl men, de sang ni doadoahk en kalohk ihmw lel ihmw. (Mark 13:10) Eri, emen doadoahngki ahnsou laud oh nanti laud pwehn onop Paipel rehmw. Erein onopo, ke poakohngala Siohwa oh sukuhlki me e ketin poakohng uhk. Siohwa ketin kakerenihiukalahng padahk mehlel, oh met pwehki ke wiahlahr emen sapwellimen Sises Krais tohnpadahk, ke ahneki koapworopwor en mour kohkohlahte. (Sohn 6:44) Ke uhdahn kalahnganki me Siohwa ketin doadoahngki emen en padahkihong uhk padahk mehlel oh me E ketin pwungki ken wiahla emen Sapwellime ladu.

2. Dahme kitail pahn koasoiapene nan iren onop wet?

² Pwehki met kitail eselahr padahk mehlel, kitail ahneki pwais kaselel en sewese meteikan ren iang kitail keid nan ahl me kolahng mour. Ele e kin mengei ong kitail en kalohk ihmw lel ihmw, ahpw ele e kin apwal ong kitail en idek rehn emen ma e men onop Paipel rehtail, de e kin apwal en wia onop en Paipel rehn emen. Ih met omw pepehm? Ma ei, ele ke kak diarada ekei kaweid kan nan iren onop wet me pahn sawas. Kitail pahn koasoiapene dahme kin kamwakid kitail en sewese aramas akan ren wiahla tohnpadahk. Kitail pahn pil koasoiapene ia duwen atail kak powehdi kahpwal kan me kak kahrehiong kitail en pweiek en wia onop en Paipel. Keieu, kitail pahn koasoiapene dahme kahrehda kitail anahne wia kaidehn ihte sounkalohk kei ahpw pil sounpadahk en rongamwahwo.

3. Dahme kahrehda kitail kin kalohk?

³ Ni ahnsou me Sises ketiket nin sampah, e ketin kehkehlingkihong sapwellime tohnpadahk ko ren wia doadoahk ehu me pidada soahng riau. Keieu, e mahsanihong irail en kalohki rongamwahu en Wehio, oh ketin kasalehiong irail ia duwen arail pahn wia met. (Mad. 10:7; Luk 8:1) Karasepe, Sises mahsanihong sapwellime tohnpadahk ko dahme re pahn wia ma aramas akan men rong rohng en Wehio, oh dahme re pahn wia ni aramas ar sohte men rong. (Luk 9:2-5) E pil ketin kawehwehda me sapwellime tohnpadahk kan pahn kalohk ong aramas tohto oh wasa tohto ni eh mahsanih me irail pahn “kadehde ong tohnwehi koaros.” (Mad. 24:14; Wiewia 1:8) Sohte lipilipil ma aramas akan pwungki de sohte pwungki rohngo, Sises ketin kehkehlingkihong sapwellime tohnpadahk kan ren padahkihong aramas akan duwen Wehin Koht oh dahme Wehi wet pahn kapwaiada.

4. Nin duwen me Madiu 28:18-20 mahsanih, dahme kitail anahne pil wia likin kalohki Wehio?

⁴ Ia keriau en kehkehlik me Sises ketikihong sapwellime tohnpadahk ko ren wia? E mahsanihong sapwellime tohnpadahk ko ren padahkihong aramas akan en peikiong soahng koaros me e ketin kehkehlingki. Ele ekei aramas nda me Sises ketin kehkehlingki me doadoahk en kalohk oh padahk ongete tepin Kristian ko. Ahpw met mehlel? Soh. Sises ketin kasalehda me doadoahk kesempwal wet pahn pousehlahte wiawi leledo nan atail ahnsou, “lao lel ni kaimwiseklahn koasoandi en mwehio.” (Wadek Madiu 28:18-20.) Ele Sises ketikihda kehkehliko ahnsou me e pwarohng sapwellime tohnpadahk tohtohsang 500. (1 Kor. 15:6) Oh nan kaudiahlo me e ketikihong Sohn, e ketin kasalehda me e kupwurki sapwellime tohnpadahk kan koaros ren sewese meteikan ren esehla duwen Siohwa.​—Kaud. 22:17.

5. Nan 1 Korint 3:6-9, ia duwen Pohl eh kapahrekihpene doadoahk en kalohk oh padahk?

⁵ Wahnpoaron Pohl karasahiong doadoahk en katohnpadahk duwehte doadoahk en padokedi mehkot, oh e kasalehda me kitail anahne wia laudsang en kamwarakte. E katamankihong mehn Korint ko: “I kin padokedi werentuhke, Apolos kin kalamwur . . . Kumwail iei sapwellimen Koht mwaht me e kin ketin koadoahke.” (Wadek 1 Korint 3:6-9.) Kitail tohndoadoahk kei nan “sapwellimen Koht mwaht.” Eri kitail kin padokedi werentuhke ni atail kin kalohk oh kalamwuri ni atail kin padahk. (Sohn 4:35) Oh ni ahnsowohte, kitail kin pohnese me Koht me kin ketin kakairada werentuhkeo.

6. Ni atail kin padahki aramas, dahme kitail anahne sewese irail en wia?

⁶ Kitail kin raparapahki irail kan me “ahneki mohngiong mwahu en ale mour soutuk.” (Wiewia 13:48) Pwehn emenemen irail en wiahla tohnpadahk, kitail anahne sewese irail en (1) wehwehki, (2) pwungki, oh (3) kapwaiada soahng kan me re sukuhlkihsang nan Paipel. (Sohn 17:3; Kol. 2:6, 7; 1 Des. 2:13) Koaros kak sewese tohnsukuhl en Paipel kan sang ni arail kasalehiong irail limpoak oh kasamwo irail ni arail kin iang towehda mihting kan. (Sohn 13:35) Me kin wia onopo ele pil anahne doadoahngki ahnsou laud oh kehl pwehn sewese tohnsukuhl men en kesehla “soahng kan me teng oh kehlail” me e kin kamehlele de wia. (2 Kor. 10:4, 5) Ele e pahn anahne sounpwong tohto pwehn sewese emen en wiahda wekidekla kan nan eh mour pwehn kak kedekedeo lel mehn akadei en papidaisla. Ahpw en wiahda wekidekla ko uhdahn katapan.

7. Dahme kamwakid kitail en iang doadoahk en kalohk oh katohnpadahk?

⁷ Dahme kahrehda kitail kin kalohk oh katohnpadahk? Keieu, pwehki kitail poakohng  Siohwa. Ni omw kin wia uwen omw kak pwehn kapwaiada kehkehliko en kalohk oh katohnpadahk, ke kasalehda me ke poakohng Koht. (1 Sohn 5:3) Medewehla met: Omw poakohng Siohwa me kamwakiduhkehr ken kalohk ihmw lel ihmw. Kehkehlik wet mengei en peikiong? Mwein soh. Ke saloh ahnsou me ke tepin iang kalohko? Uhdahn! Ahpw ke ese me doadoahk wet iei me Sises kupwurki ken wia, oh ke peikiong kehkehliko. Eri mwurin omw kalohki erein ahnsou kis, ele ke mengeikilahr wia doadoahk en kalohk. Ahpw ia omw pepehm duwen wia onop en Paipel? E kin kahrehiong uhk ken salohda? Mweinte. Ahpw ma ke kapakapohng Siohwa oh peki en ketin seweseiuk en eimah oh idek rehn emen ma e men onop Paipel, e kak ketin seweseiuk pwe ken men katohnpadahk.

8. Nin duwen me Mark 6:34 mahsanih, dahme pil sewese kitail en men padahkih meteikan?

⁸ Keriau, limpoak ong mehn mpatail kin kamwakid kitail en padahkihong irail padahk mehlel. Karasepe, Sises oh sapwellime tohnpadahk ko uhdahn pwangada pwehki arail doadoahk laud nan kalohk. Irail anahne wasa ehu me re kak kommoal, ahpw pokon laud ehu diarirailda. Sises uhdahn ketin poakehla aramas ako oh tepida padahkihong irail “soahng tohto.” (Wadek Mark 6:34.) E ketin doadoahk laud mendahki eh ngiralahr. Dahme kahrehda? Sises mwahngih en pokono pepehm. E kupwurki sewese irail pwehki e mahsanih arail wie lokolok oh anahne koapworopwor. Rahnwet, aramas akan pil ahneki kahpwal kan oh anahne koapworopwor, mehnda ma re mwomwen peren oh itarkiher arail mour. Irail duwehte sihpw kan me sohte sileparail me pahn kaweid irail. Pohl koasoia me aramas akan me duwehte met sohte kin ese Koht oh sohte arail koapworopwor. (Ep. 2:12) Irail kekeid pohn “ahl me kolahng kasohrala”! (Mad. 7:13) Ni atail kin medewe uwen laud me aramas akan anahne esehla Koht, atail poakehla irail kin kamwakid kitail en sewese irail. Oh ahl me keieu mwahu me kitail kak sewese irail iei sang ni atail idek ma irail men kitail en onop Paipel rehrail.

9. Nin duwen me Pilipai 2:13 mahsanih, ia duwen Siohwa eh kak ketin seweseiuk?

⁹ Mwein ke kin saloh ni omw kin idek rehn emen ma e men onop Paipel rehmw, pwehki ke ese me ke anahne doadoahngki ahnsou laud en kaunopada oh wia onop. Ma ih omw pepehm en met, padahkihong Siohwa. Peki en ketin seweseiuk kakairada ineng en men diarada emen me ke kak onop Paipel reh. (Wadek Pilipai 2:13.) Wahnpoaron Sohn kamehlelehiong kitail me Koht pahn ketin sapengala atail kapakap kan me kin pahrekiong kupwure. (1 Sohn 5:14, 15) Eri, ke kak kamehlele me Siohwa pahn ketin seweseiuk en kakairada ineng en men iang katohnpadahk.

10-11. Dahme kahrehda ele kitail kin pweiek en wia onop en Paipel?

¹⁰ Kitail ese me e uhdahn kesempwal en padahk, ahpw ele met pahn apwal ong kitail en wia uwen me kitail men wia nan doadoahk en katohnpadahk. Kitail pahn koasoiapene dahme kahrehda e apwal oh ia duwen atail kak powehdi.

¹¹ Ele kitail sohte kak wia uwen me kitail men wia. Karasepe, ekei sounkalohk kan mahlahr de ahneki kahpwal en roson. Ia duwe, ke ahneki irair wet? Ma ei, medewehla ehu iren mehn kasukuhl sang dahme kitail sukuhlkihsang soumwahu lusulus en COVID-19. Kitail sukuhlki me kitail kak wia onop en Paipel doadoahngki delepwohn de tablet ape. Eri ele ke kak tapiada oh wia onop en Paipel ni imwomwo. Oh pil mie ehu kamwahupe. Ekei kin perenki onop en Paipel, ahpw re sohte kin mie ni ahnsou me riatail kan kin kalapw kalohk. Ahpw, ele irail kin mi ni imwarail kan nimenseng de nipwong. Ia duwe, ke kak wia onop en Paipel rehn emen ni ahnsou ko? Sises ketin padahk ong Nikodihmus  nipwong, ih soangen ahnsowo me Nikodihmus mwahuki.​—Sohn 3:1, 2.

12. Dahme kin kamehlelehiong kitail me kitail kak wia sounpadahk koahiek kei?

¹² Ele kitail kin medewe me kitail sohte kak wia onop Paipel. Mwein kitail medewe me kitail anahne kalaudehla dahme kitail ese de koahiek nin duwen sounpadahk men mwohn atail kak onop rehn emen. Ma ih omw pepehm met, medewehla soahng siluh me kak seweseiuk en kamehlele me ke kak onop rehn emen. Keieu, Siohwa kin ketin wiahkin uhk emen me kak padahkih meteikan. (2 Kor. 3:5) Keriau, Sises, me sapwellimanki ‘manaman koaros nanleng oh sampah,’ ketin kehkehlingkihong uhk ken padahk. (Mad. 28:18) Oh kesiluh, ke kak likih meteikan en seweseiuk. Sises likih dahme Semeo ketin padahkihong ih en koasoia, oh ke pil kak wia met. (Sohn 8:28; 12:49) Pil patehng, ke kak peki rehn omw sounapwalih en pwihn en kalohk, pioneer koahiek men, de sounkalohk koahiek men pwehn seweseiuk tapiada oh wia onop en Paipel. Ehu ahl me ke kak sukuhlki en wiahla sounkalohk mwahu men iei sang ni omw iangih emen sounkalohk pwukat ni arail wia onop en Paipel.

13. Dahme kahrehda kitail en men padahk ni ahl kan me wekilahr?

¹³ Ele kitail diarada me e apwal en doadoahngki wiepe kapw oh dipwisou kapw kan. Met, mwomwen atail kin wia onop en Paipel wekidekla. Neitail pwuhk en onop Enjoy Life Forever! kangoange kitail en kaunopada onopo oh wia onopo weksang mahs. Parakrap kan me kitail kin wadek malaulaula oh atail koasoakoasoiong tohnsukuhlo pil laudla. Ni atail kin padahk, kitail kin doadoahngki laud kisin kasdo kan oh mehn doadoahk kan, duwehte JW Library^®. Ma ke sehse ia duwen omw pahn doadoahngki, peki rehn emen me kak seweseiuk ken ese ia duwen omw pahn doadoahngki. Aramas kin men wia soahng kan me re ahnlahr wia. E sohte mengei ong kitail en tepida wia soahng kapw kan. Ahpw pwehki sapwellimen Siohwa sawas oh sawas sang meteikan, ke pahn esehda me e mengei en wiahda wekidekla kan oh pil perenkihla onop Paipel rehn aramas. Duwehte dahme emen pioneer koasoia, wiepen onop wet “kaperen ong tohnsukuhlo oh sounpadahko.”

14. Dahme kitail anahne tamataman ni atail kin kalohk nan wasahn kalohk ehu me aramas tohto sohte kin men rong, oh ia duwen 1 Korint 3:6, 7 eh kangoange kitail?

¹⁴ Ele kitail kin kalohk nan wasahn kalohk ehu me apwal en tapiada onop en Paipel. Ekei aramas sohte kin men rong dahme kitail kalohki, de uhwong. Dahme kak sewese kitail en ahnekihte madamadau pwung nan soangen wasahn kalohk duwehte met? Tamataman me irair en aramas akan kak mwadangete wekila nan sampah suwed wet, oh irail kan me sohte kin men rong pahn kedekedeo esehda me irail anahne Koht en ketin kaweid irail nan arail mour. (Mad. 5:3) Ekei me sohte kin men ale neitail pwuhk kan met kin men onop Paipel. Kitail pil ese me Siohwa iei Soumas en rahket. (Mad. 9:38) E ketin kupwurki kitail en pousehlahte padok oh kalamwuri, ahpw Ih me ketin pwukoahki kakairada. (1 Kor. 3:6, 7) Oh e uhdahn kangoang laud en tamataman me mehnda ma kitail sohte kak wia onop en Paipel ahnsou wet, Siohwa pahn ketin katingih kitail pwehki kitail song wia uwen atail kak en sewese aramas kaidehn pwehki uwen pwuhk me kitail kihong aramas de ihs me kitail onop Paipel reh. *

15. Ia sapwellimen Siohwa pepehm ni emen eh pwungki onop Paipel oh kapwaiada dahme e sukuhlki?

¹⁵ Siohwa kin ketin kupwurperenki ni emen eh kin pwungkihla padahk mehlel en Paipel oh padahkihong  meteikan dahme e sukuhlki. (Lep. Pad. 23:15, 16) Ia uwen laud me Siohwa kin ketin kupwurperenkihda ni eh mahsanih met eh kin wiewiawi rahnwet! Karasepe, mendahki soumwahu lusulus ehu me wiawi nan sampah pwon, erein pahr en kalohk 2020, onop en Paipel 7,705,765 wiawi me sewesehier aramas 241,994 en inoukihong Siohwa arail mour oh papidaisla. Oh tohnpadahk pwukat pahn uhd wia onop en Paipel oh katohtohwehla tohnpadahk kan. (Luk 6:40) Kitail kak uhdahn kamehlele me kitail kin kaperenda Siohwa ni atail kin padahkih meteikan pwe ren wiahla tohnpadahk.

16. Mehn akadei dahieu me mwahu?

¹⁶ Doadoahk en katohnpadahk kin apwal, ahpw pwehki sapwellimen Siohwa sawas, kitail kak iang doadoahk en padahkihong me kapw kan en poakohng Samatailo nanleng. Ia duwe, ke kak wiahda mehn akadei en onop Paipel rehn emen? Ele kitail pahn pwuriamweiki dahme pahn wiawi ma kitail doadoahngki ahnsou mwahu kan en idek rehn irail kan me kitail tuhwong ma re men onop Paipel rehtail. Kitail kak kamehlele me Siohwa pahn ketin kapaiahda atail doadoahk laud.

17. Ia pahn atail pepehm ma kitail kak wia onop en Paipel?

¹⁷ E wia pwais kaselel ehu en kalohk oh padahkihong meteikan padahk mehlel! Doadoahk wet kin kahrehiong kitail en uhdahn peren. Wahnpoaron Pohl me sewese mehn Deselonika tohto ren wiahla tohnpadahk, kawehwehda eh pepehm oh nda: “Ia at koapworopwor de peren de nihn en peren laud mwohn silangin atail Kaun Sises ni eh ketier? Kaidehn kumwail? Kumwail me uhdahn at lingan oh peren.” (1 Des. 2:19, 20; Wiewia 17:1-4) Me tohto rahnwet kin ahneki soangen pepehmo. Sister men me adaneki Stéphanie iangahki eh pwoudo, me sewesehier me tohto en papidaisla nda, “Sohte ehu peren duwehte at sewese aramas akan ren inoukihong Siohwa arail mour.”