1. Dahme kahrehda Siohwa sohte kin ketin kapahrekihong kitail meteikan?

SIOHWA sohte kin ketin kupwurki me soahng koaros oh aramas koaros en duwepenehte. Kitail ese met pwehki e ketin kapikada soangsoangen tuhke tohto, mahn tohto, oh pil aramas. Emenemen kitail wekpeseng. Eri Siohwa sohte kin ketin kapahrekihong kitail meteikan. E kak ketin kasawih dahme mi nan atail mohngiong. (1 Sam. 16:7) E pil kin ketin mwahngih atail kehl, atail luwet kan, oh pil mwomwen atail tikida. Oh e sohte kin ketin kasik laudsang me kitail kak patohwanohng. Kitail anahne alasang Siohwa sang ni atail kin kilangwohng pein kitail ni ahlohte me e kin ketin wia. Eri kitail pahn ahneki “madamadau pwung,” de madamadau toupahrek duwen pein kitail.​—Rom 12:3.

2. Dahme kahrehda e sohte mwahu en kapahrekihong kitail meteikan?

² Kitail kak sukuhlkihsang mehn kahlemeng mwahu en meteikan. Karasepe, ele kitail ese riatail Kristian men me kin uhdahn koahiek nan doadoahk en kalohk. (Ipru 13:7) Kitail kak sukuhlkihsang reh ia duwen atail kak kamwahwihala atail kalohk. (Pil. 3:17) Ahpw mie wekpeseng en kin kahlemengih ahn emen mehn kahlemeng mwahu oh kapahrekihong uhk ih. Ma kitail kin kapahrekihong kitail meteikan, kitail kakete peiriniong irail, mworusala, oh pehm me sohte katepatail. Nin duwen me kitail sukuhlki nan iren onop en mwoweo, ma kitail kin song en mwahusang riatail Kristian kan, met pil kak kauwehla atail nanpwungmwahu rehn Siohwa. Eri ni limpoak, Siohwa ketin kangoange kitail oh mahsanih: “Emenemen en kasawih pein eh wiewia kan, e ahpw pahn perenkihda pein ih, a kaidehn en kapahrekiong ih meteikan.”​—Kal. 6:4.

3. Soahng dah kan me ke wiadahr ni omw kin kaudokiong Siohwa me ke pein perenkihda?

 ³ Siohwa kin ketin kupwurki ken perenkihda soangen kekeirda koaros me ke wiahda ni omw kin kaudokiong ih. Karasepe, ma ke papidaislahr, ke kak perenkihda me ke lel mehn akadei wet! Kowe me pein wiahda pilipil wet. Ke wiahda pilipil wet pwehki omw poakohng Koht. Medewehla soahng koaros me ke wiahda sang ahnsowo lel met. Karasepe, omw perenki omw wadawad en Paipel oh wia pein omw onop kin laudla? Audepen omw kapakap kan kin mwahusang mahs oh kin kohsang nan mohngiong? (Mel. 141:2) Ke koahieklahr ni omw kin tepin koasoiong tohnihmw kan, oh pil koahieklahr en doadoahngki neitail sawaspen Paipel kan nan kalohk? Oh ma mie omw peneinei, ia duwe, Siohwa kin ketin seweseiuk en wia ohl pwopwoud mwahu men, lih pwopwoud mwahu men, oh pahpa oh nohno mwahu men? Ke kak uhdahn perenki soangen wekidekla pwukat koaros me pein kowe wiadahr.

4. Dahme kitail pahn koasoiapene nan iren onop wet?

⁴ Kitail kak sewese meteikan en perenkihda dahme irail kin wiewia pwehn kamwahwihala arail kin kaudokiong Siohwa. Kitail pil kak sewese irail en uhdihsang kapahrekihong pein irail meteikan. Nan iren onop wet, kitail pahn kilang ia duwen pahpa nohno kan ar kak sewese neirail seri kan, ia duwen pwopwoud kan ar kak sawaspene, oh ia duwen elder kan oh pil meteikan ar kak sewese riarail Kristian kan. Oh kitail pil pahn koasoiapene ekei iren Paipel kan me kak sewese emenemen kitail en wiahda mehn akadei kan me kitail kak lel.

5. Nin duwen me Episos 6:4 mahsanih, dahme pahpa nohno kan en dehr wia?

⁵ Pahpa nohno kan anahne kanahieng en dehr kapahrekihpene neirail seri kan, de kasik seri men en wia laudsang dahme e kak wia. Ma pahpa nohno kan kin wia met, irail kak kahrehda serio en mworusala. (Wadek Episos 6:4.) Sister men me adaneki Sachiko * nda: “Ahi sounpadahk kan kin kasik me I en mwahusang iengei tohnsukuhl kan. Patehng met, nohno kin men ien pweida nan sukuhl pwe ahi sounpadahk kan oh ahi pahpao, me kaidehn emen Sounkadehdehn Siohwa, en ahneki madamadau pwung duwen sapwellimen Siohwa aramas akan. Ni mehlel, e men ien kin deng 100 nan des kan, ahpw met sohte kak wiawi. I neksangehr sukuhl erein sounpar tohto, ahpw ekei pak, I kin ahnekihte  pepehm me Siohwa sohte kin ketin kupwurperenkin ie, mehnda ma I kin wiewia ei kak koaros.”

6. Dahme pahpa nohno kan kak sukuhlkihsang Melkahka 131:1, 2?

⁶ Ehu mehn kasukuhl kesempwal ong pahpa nohno kan iei me dierek nan Melkahka 131:1, 2. (Wadek.) Nanmwarki Depit koasoia me e solahr “pwunodki soahng kesempwal akan,” de soahng kan me e sohte kakohng. Eh aktikitik kin kihong ih “onepek oh popohl.” Dahme pahpa nohno kan kak sukuhlkihsang dahme Depit nda? Pwehn kasalehda aktikitik, irail en dehr kin kasik laudsang dahme pein irail kak wia, de pil kasik laudsang dahme neirail seri kan kak wia. Pahpa nohno kan kak sewese neirail serio en pehm me e kesempwal sang ni ara kin pohnese dahme serio kak wia oh dahme e sohte kak wia, oh eri wiahda mehn akadei kan me e kak lel. Sister men me adaneki Marina koasoia: “Ahi nohnou sohte kin kapahrekihong ie riei meh silimen ko de seri teikan. E padahkihong ie me koaros kin ahneki koahiek kan me wekpeseng, oh me emenemen kitail kin kesempwal ong Siohwa. Pwehki dahme e ndao, I sohte kin kapahrekihong ie meteikan.”

7-8. Ia duwen ohl pwopwoud men eh kak kasalehda me e wauneki eh pwoudo?

⁷ Ohl pwopwoud Kristian men anahne wauneki eh pwoud. (1 Pit. 3:7) Met kin pidada en kin tehk kanahieng eh anahn akan. Karasepe, ohl pwopwoud men kin kasalehda me e wauneki eh pwoudo sang ni eh kin uhdahn kesempwalki ih. E sohte kin kasik laudsang me eh pwoudo kak wia. Oh e sohte pil kin kapahrekihong eh pwoudo lih teikan. Ma ohlo kin wia met, ia pahn ahn liho pepehm? Sister men me adaneki Rosa pwoudiki ohl emen me kaidehn Sounkadehdehn Siohwa. Ohlo kin kalapw kapahrekihong Rosa lih teikan. Eh lokaia kamedek ko kin kahrehiong Rosa en mworuskihla pein ih oh medewe me sohte emen poakohng ih. Rosa nda, “I kin anahne emen en kin ahnsou koaros katamankihong ie me Siohwa kin ketin kesempwalkin ie.” Weksang met, ohl pwopwoud Kristian men kin wauneki eh pwoudo. E ese me eh wia met pahn wia kamwahu ong eh nanpwungmwahu rehn eh pwoudo oh pil eh nanpwungmwahu rehn Siohwa. *

⁸ Ohl pwopwoud men me kin wauneki eh pwoud kin kapinga ih, kamehlelehiong me e poakohng ih, oh kesempwalki. (Lep. Pad. 31:28) Ih met me ahn Katerina, me kitail koasoia mwoweo, eh pwoudo kin wia. E kin sewese Katerina ni ahnsou kan me Katerina pehm me e sohte mwahu duwehte meteikan. Ni ahnsou me Katerina tikitik, eh nohnou kin kalapw kauwe ih oh kapahrekihong ih serepein teikan, pil iangahki kompoakepah kan. Pwehki met, Katerina tepida kapahrekihong ih meteikan oh doulahte wia met pil mwurin eh iangala padahk mehlel. Ahpw eh pwoudo, me wia Kristian men, kin sewese ih en powehdi irair wet oh kakairada madamadau pwung duwen pein ih. Katerina koasoia: “E kin poakohng ie, kapingahkin ie soahng mwahu kan me I wiahda, oh kapakapkin ie. E pil kin katamankihong ie sapwellimen Siohwa irair kaselel kan oh sewese ie en kapwungala ei madamadau sapwung kan duwen pein ngehi.”

9-10. Ia duwen elder limpoak kan ar sewese sister men en dehr kin kapahrekihong ih meteikan?

⁹ Ia duwen elder kan ar kak sewese irail kan me kin kalapw kapahrekihong irail meteikan? Medewehla dahme wiawihong sister men me adaneki Hanuni. Ni ahnsou me e tikitik, sohte me kin kalapw kapinga ih. E nda: “I kin namenek oh kin medewe me seri teikan mwahusang ie. I tepida kapahrekihong pein ngehi meteikan  sangete ni ahnsou me I tikitik.” Pil mwurin eh iangala padahk mehlel, Hanuni kin doulahte kapahrekihong ih meteikan. Met kahrehiong ih en pehm me dahme e kin wiahda nan mwomwohdiso sohte kesempwal. Ahpw met, e wia pioneer peren men. Dahme sewese ih en wekidala eh madamadau?

¹⁰ Hanuni koasoia me e ale sawas sang elder kadek kan. Irail padahkihong ih me e kesempwal nan mwomwohdiso, oh kapingahki ih eh mehn kahlemeng mwahu. E ntingihedi: “Ekei pak elder kan kin peki ie en kangoange ekei sister kan me anahne sawas. Soangen pwukoa pwukat kin kahrehiong ie en pehm me mie katepei. I taman ni elder kan ar kalahnganki ei kangoange ekei sister pwulopwul kan. Irail eri wadekohng ie 1 Deselonika 1:2, 3. Met kahrehiong ie peren laud! Pwehki limpoak en elder pwukat, met I eseier me I kesempwal nan mwomwohdiso.”

11. Ia duwen atail kak sewese irail kan me “nan kapehd tikitiklahr,” nin duwen me Melkahka 34:18 mahsanih?

¹¹ Wadek Melkahka 34:18. Siohwa kin uhdahn ketin nsenohki irail kan me “nan kapehd tikitiklahr.” Kitail koaros, kaidehn ihte elder kan, kak kangoange riatail Kristian kan. Ehu ahl me kitail kak kangoange irail iei sang ni atail kasalehiong irail me kitail uhdahn nsenohkin irail. Siohwa ketin kupwurki kitail en kasalehiong irail me e uhdahn ketin poakohng irail. (Lep. Pad. 19:17) Kitail pil kak sewese riatail kan sang ni atail kin aktikitik oh dehr suweiki atail koahiek kan. Kitail sohte men kahrehiong meteikan en kin tetehk kitail pwehki kitail sohte men irail en peiriniong kitail. Ahpw kitail men doadoahngki atail koahiek oh dahme kitail ese pwehn kangoange emenemen.​—1 Pit. 4:10, 11.

12. Dahme kahrehda aramas aktikitik kan kin men patehng Sises? (Menlau kilang kilel ni kilin Kahn Iroir wet.) 

¹² Kitail kak sukuhlki soahng tohto duwen ia pahn atail wiewia ong meteikan sang ni atail medemedewe sapwellimen Sises wiewia ong sapwellime tohnpadahk kan. Sohte aramas emen nin sampah me lapalap sang ih. Ahpw mendahki met, Sises kin ketin “opampap oh mohngiong karakarahk.” (Mad. 11:28-30) E sohte kin ketin suweiki uwen laud en sapwellime kupwurokong oh pil duwen soahng tohto me e mwahngih. Ni eh kin ketin padahki aramas akan, e kin mahsen ni lokaia mengei oh doadoahngki karasaras kan me mengei ong aramas akan en wehwehki, oh met kin sair mohngiong en me aktikitik kan. (Luk 10:21) Weksang kaunen pelien lamalam pohnmwahso ko, Sises sohte kin ketin kahrehiong aramas akan en pehm me irail sohte kesempwal rehn Koht. (Sohn 6:37) Ahpw e kin ketin wauneki irail.

13. Ia duwen sapwellimen Sises kadek oh limpoak eh sansalda sang mwomwen eh wiewia ong sapwellime tohnpadahk ko?

¹³ Sapwellimen Sises kadek oh limpoak kin sansalda sang sapwellime wiewia ong sapwellime tohnpadahk ko. E mwahngih me arail koahiek oh irair kan wekpeseng. Eri koaros sohte kak wia soangen pwukoa tehieu; de arail koahiek nan doadoahk en kalohk sohte kak pahrekpene. Ahpw e ketin kalahnganki ahn emenemen nanti koaros. Sises ketin kasalehda me e mwahngih duwen met sang ni karasaras en dalend ko. Nan karasaraso, soumaso kihong emenemen ladu ko arail doadoahk “nin duwen ahn emenemen koahiek.” Emen rehn ladu pwerisek riemeno wiahda laudsang meteio. Ahpw soumaso kapinga ira koaros ni eh nda: “Uhdahn mwahu, ladu mwahu oh lelepek men kowe!”​—Mad. 25:14-23.

14. Ia duwen atail kak alasang sapwellimen Sises wiewia ong meteikan?

¹⁴ Sises kin ahnsou koaros ketin kasalehda limpoak oh kadek ong kitail. E mwahngih me atail koahiek oh irair kan wekpeseng, oh e kin kupwurperenki ni atail kin wia uwen atail kak koaros. Kitail anahne alasang Sises. Kitail en dehr kahrehiong riatail Kristian kan en  pehm me sohte kateparail de en namenengki me re sohte kak wiahda laud duwehte meteikan. Ahpw kitail en ahnsou koaros kapinga irail pwehki arail kin wiewia uwen arail kak koaros en papah Siohwa.

15-16. Ia duwen sister men eh paiekihda eh kin wiahda mehn akadei kan me pein ih kak lel?

¹⁵ Ma mie atail mehn akadei kan nan sapwellimen Koht doadoahk, atail mour pahn kaperen oh mie katepe. Ahpw kitail anahne wiahda mehn akadei kan me pahn pahrekiong atail koahiek oh irair kan, a kaidehn ahn meteikan. Ma kitail wiahda mehn akadei kan me kitail sohte kakohng, ele kitail pahn nsensuwedla oh mworusala. (Luk 14:28) Tehk dahme wiawihong pioneer sister men me adaneki Midori.

¹⁶ Ahn Midori pahpao, me kaidehn emen Sounkadehdehn Siohwa, kin kasarowe ih sangete eh tikitik ni eh kin kapahrekihong ih rie kan oh ienge tohnsukuhl kan. Midori nda, “I pehm me sohte katepei.” Ahpw ni ahnsou me Midori laudla, e tepida ahneki madamadau pwung duwen pein ih. E koasoia: “I kin wadek Paipel rahn koaros pwe I en ahneki meleilei nan ei mohngiong, oh I kak pehm me Siohwa kin ketin poakohng ie.” Patehng met, e kin wiahda mehn akadei kan me e kak lel, oh e kin kapakapki sawas pwehn kak lel mehn akadei pwukat. Met sewese Midori en kak perenki soahng kan me pein ih kak wiahda ong Siohwa.

17. Ia duwen atail kak “usehlahte onohnsapahlih [atail] elen madamadau,” oh ia imwilahn met?

¹⁷ Kitail sohte kak mwadangete wekidala mwomwen atail madamadau oh pepehm kan. Eri Siohwa ketin kangoange kitail mahsanih: “Kumwail anahne usehlahte onohnsapahlih amwail elen madamadau.” (Ep. 4:23, 24) Pwehn wia met, kitail anahne kapakap, onopki Mahsen en Koht, oh doudouloale. Kapwaiada dahme ke kin wadek, oh peki kehl sang rehn Siohwa. Sapwellime manaman pahn seweseiuk  en sukuhlki en dehr kin kapahrekihong uhk meteikan. Siohwa pahn pil ketin seweseiuk en esehda oh mwadang kihsang pepehm en peirin de pohnmwahso ma pepehm pwukat tepida kekeirda nan omw mohngiong.

18. Ia duwen mahsen kan nan 2 Kronikel 6:29, 30 ar kak kansenamwahwihiukala?

¹⁸ Wadek 2 Kronikel 6:29, 30. Siohwa ketin mwahngih dahme mi nan mohngiongitail. E pil ketin mwahngih duwen atail kin nannanti en pelian elen madamadau en sampah wet oh pil atail soh unsek kan. Ni Siohwa eh kin ketin mahsanihada atail kin nannanti en pelianda soahng pwukat, sapwellime limpoak ong kitail kin laudla.

19. Ia duwen Siohwa eh ketin karasahda sapwellime limpoak ong kitail?

¹⁹ Pwehn karasahda duwen sapwellime limpoak ong kitail, Siohwa ketin doadoahngki karasaras en nohno men me kin poakohng nah serio. (Ais. 49:15) Medewehla karasaras en nohno men me adaneki Rachel. E ntingihedi: “Nei serepeino Stephanie ipwidi mwohn sounpwongo me e uhdahn pahn ipwidi. Tepin ei kilang ih, e uhdahn tikitik oh luwet. Ahpw toahkte ko kin mweidohng ie en koledi ih rahn koaros erein tepin sounpwong me e mihmi nan imwen wini. Erein ahnsou ko, ngehi oh nei serio kin uhdahn kerenpene. Met e sounparehr weneu, ahpw paliwereo tikitik sang seri teikan me uwe ih. I uhdahn poakohng ih pwehki e kin nantihong laud en wie momour, oh e kin kahrehiong ie peren laud.” E uhdahn kansenamwahu en ese me Siohwa kin ketin poakohng kitail ni ahl wet ni eh kin ketin mahsanih atail nannanti en papah ih sang mohngiongitail unsek!

20. Dahme kahrehda sapwellimen Siohwa ladu kan kak ahneki peren?

²⁰ Pwehki ke wia emen sapwellimen Siohwa ladu, ke kesempwal nan sapwellime peneinei oh sohte emen me duweiuk. Siohwa sohte ketin kakerenihiukala reh pwehki ke mwahusang meteikan. E ketin wia met pwehki e ketin mwahngih dahme mi nan omw mohngiong oh ketin mwahngih me ke wia aramas mpahi oh aktikitik men me e kak ketin kaiahnehda. (Mel. 25:9) Ke kak uhdahn kamehlele me e kin ketin kupwurperenki omw kin wiewia omw kak koaros en papah ih. Omw lelepek oh dadaurete kin kadehdehda me ke ahneki “mohngiong mehlel oh mwahu.” (Luk 8:15) Eri pousehlahte patohwanohng Siohwa omw kak koaros. Oh ke pahn ahneki kahrepe mwahu en perenkihda “pein [kowe].”