1, 2. Ia duwen Paipel eh kohpada uwen tohtohlahn sapwellimen Siohwa aramas akan?

 NAN sampah pwon, mie pwihn ehu me towe kan kin poakohng Siohwa oh men papah ih. Aramas pwukat iei Sounkadehdehn Siohwa kan. Mendahki irail soh unsek oh kin wiahda sapwung, Siohwa kin ketin doadoahngki sapwellime manaman pwehn kaweid sapwellime aramas akan. Kitail pahn tehkpene ekei ahl me e kin ketin kapaiada irail.

² Nan pahr 1914, me malaulaute me kin kaudokiong Siohwa. Ahpw Siohwa ketin kapaiada doadoahk en kalohko. Pwehki met, aramas rar rar kei sukuhlkier padahk mehlel en Paipel oh wiahla sapwellime Sounkadehde kan. Me pid kekeirda laud wet, Siohwa ketin mahsanih: “Peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me KAUN-O!” (Ais. 60:22) Rahnwet kitail kak kilang ni sansal me kokohp wet pweidahr. Sapwellimen Siohwa aramas akan rasehng wehi lapalap ehu. Ni mehlel, mie wehi tohto me towe  kan malaulau sang uwen tohtohn sapwellimen Siohwa aramas akan.

3. Ia duwen sapwellimen Koht ladu kan ar kasalehda limpoak?

³ Ni imwin rahn pwukat, Siohwa ketin sewese sapwellime kan pwe ren kakehlakahda arail poakohng emenemen. “Koht iei limpoak,” oh re kin alasang ih. (1 Sohn 4:8) Sises ketin kehkehlingkihong sapwellime tohnpadahk kan ren ‘poakpene nanpwungarail.’ E pil mahsanihong irail: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Nan atail ahnsou, sapwellimen Siohwa ladu kan kin kasalehda arail limpoakpene pil ni ahnsou me wehi kan kin mahwenpene. Karasepe, nan Mahwen Keriau en Sampah, mpen aramas limedep limerar (55 million) kamakamla. Ahpw sapwellimen Siohwa aramas akan sohte kemehla emen nan mahweno. (Wadek Maika 4:1, 3.) Met sewese irail en “sohte . . . pwukoahki” mehlahn aramas.​—Wiewia 20:26.

4. Dahme kahrehda e wia mehkot kapwuriamwei me sapwellimen Siohwa aramas akan kin wie tohtohla?

⁴ Sapwellimen Koht aramas akan kin wie tohtohla mendahki mie arail imwintihti kehlail men, Sehdan. Iei ih “koht suwed en sampah wet.” (2 Kor. 4:4) Sehdan kin kaunda palien koperment kan nan sampah, pil palien nuhs kan, oh e kin doadoahngki mepwukat pwehn song en kauhdi doadoahk en kalohki rongamwahwo. Ahpw e sohte kak kauhdi doadoahk wet. Sehdan ese me eh ahnsou mwotomwotalahr, eri e kin nannanti en kauhdi kitail sang atail en kaudokiong Siohwa.​—Kaud. 12:12.

5. Dahme kahrehda mie ahnsou me ekei kakete kamedekihala kitail? (Menlau kilang tepin kilel.)

⁵ Sapwellimen Koht ladu kan sukuhlki me e uhdahn kesempwal en poakohng Koht oh aramas. Sises mahsanih: “‘Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’” (Mad. 22:35-39) Ahpw, Paipel kasalehda me aramas koaros ipwidi sohte unsek pwehki dipen Adam. (Wadek Rom 5:12, 19.) Eri mie ahnsou me ekei nan mwomwohdiso kakete nda de wia mehkot me kin kamedekihala kitail. Ni ahnsou me met wiawi, dahme kitail pahn wia? Ia duwe, atail limpoak ong Siohwa pahn kehkehlailte? Kitail pahn loalopwoatohng ih oh sapwellime aramas akan? Paipel padahkihong kitail duwen ekei sapwellimen Siohwa ladu kan me nda de wia soahng kei me kamedekihala meteikan. Kitail pahn tehkpene dahme kitail kak sukuhlkihsang dahme wiawiong irail.

6. Ia duwen Ilai eh sohte panawih nah pwutak ko?

⁶ Karasepe, Ilai wia samworo lapalap en Israel, ahpw nah pwutak riemeno kin sapeikiong sapwellimen Siohwa kosonned akan. Paipel mahsanih: “Nein Ilai pwutak ko inenen mwersuwed. Ira sohte mwahn kin nsenohki KAUN-O.” (1 Sam. 2:12) Ilai ese me nah pwutak ko kin wiewia soahng kan me uhdahn suwed. Mendahki met, e sohte panawih ira nin duwen me konehng. Siohwa lao ketin kaloke Ilai oh nah pwutak riemeno. Oh mwuhr, e sohla ketin mweidohng kadaudoken Ilai ko ren papah ih nin duwen samworo lapalap kei. (1 Sam. 3:10-14) Ma ke mi ni mwehin Ilaio oh ese me e kin mweidohng nah pwutak ko en wia soahng suwed kan, ke pahn dipekelekelki? Ia duwe, irairo pahn kaluwetala omw pwoson Siohwa oh imwikihla omw uhdihsang papah ih?

7. Ia duwen Depit eh dipada laud, oh dahme Koht ketin wia?

 ⁷ Depit ahneki irair kaselel kan oh ihme kahrehda Siohwa uhdahn ketin poakohng ih. (1 Sam. 13:13, 14; Wiewia 13:22) Ahpw Depit pil wiahda mehkot uhdahn suwed. Ahnsou me Uraia kohla mahwen, Depit wendi rehn ahn Uraia pwoudo, Padsipa, oh Padsipa liseianda. Depit sohte men emen en ese dahme e wiahdao. Ih eri kadarala pahngok ehu ong Uraia pwe en kohdo oh tuhwong ih oh e song en kangoange Uraia en kohla imweo. Depit men Uraia en wendi rehn Padsipa pwe aramas akan en medewe me Uraia iei pahpahn serio. Ahpw Uraia sohte kohla imweo. Depit eri koasoanehdi me Uraia pahn kamakamla ni mahweno. Pwehki dihp laud me e wiahda, Depit oh eh peneineio lelohng lokolok me uhdahn laud. (2 Sam. 12:9-12) Ahpw Siohwa ketin kalahngan oh mahkohng ih. E ketin mwahngih me Depit kin men wia dahme pwung. (1 Nan. 9:4) Ma ke mihmi ahnsowo, ia pahn omw pepehm ong dahme Depit wiahdao? Ia duwe, ke pahn uhdihsang omw papah Siohwa?

8. (a) Ia duwen wahnpoaron Piter eh sohte kapwaiada eh inowo? (b) Mwurin sapwung me Piter wiahdao, dahme kahrehda Siohwa ketin doadoahngkihte ih?

⁸ Sises ketin pilada Piter en wia emen wahnpoaron. Ahpw mendahki met, ekei pak Piter kin nda de wia soahng kan me sohte pwung. Karasepe, Piter nda me e sohte mwahn pahn kesehla Sises mehnda ma meteikan koaros wia met. (Mark 14:27-31, 50) Ahpw mwurin Sises ketin selidi, wahnpoaron ko koaros, iangahki Piter, kesehla ih. Mwuhr, pak siluh, Piter kahmahmkihla me e ese Sises. (Mark 14:53, 54, 66-72) Ahpw, Piter uhdahn nsensuwedkihla dahme e wiahdao. Eri Siohwa ketin mahkohng oh ketin doadoahngkihte ih. Ma kowe emen tohnpadahk ko ahnsowo oh ese dahme Piter wiahdao, ke pahn pousehlahte likih Siohwa?

9. Dahme kahrehda ke likih me Siohwa pahn ahnsou koaros ketin wia dahme pwung oh pahrek?

⁹ Sang karasaras pwukat, kitail kak kilang me ekei sapwellimen Siohwa ladu kan kin wiahda soahng suwed kan oh uhdahn kamedekihala meteikan. Ma met wiawi rahnpwukat, dahme ke pahn wia? Ke pahn uhdihsang iang mihting  kan de pil kesehla douluhl Siohwa oh sapwellime aramas akan? De ke pahn pohnese me Siohwa kin ketin mahk kalahngan oh ele kin ketin awiawih aramaso en koluhla? Ahpw ele mie ekei pak me emen wiahda dihp laud ehu oh sohte koluhkihla dahme e wiahdao. Ia duwe, ke pahn likih me Siohwa ketin mwahngih duwen met oh me e pahn ketin kapwungala ni ahnsou me konehng? E pil kakete ketikihsang aramaso nan mwomwohdiso ma met anahn. Ke kamehlele me Siohwa pahn ahnsou koaros ketin wia dahme pwung oh pahrek?

10. Dahme Sises ketin mwahngih duwen sapwung laud me Sudas Iskariot oh Piter wiahda?

¹⁰ Nan Paipel, kitail wadek duwen me tohto me kin kolokol arail loalopwoatohng Siohwa oh sapwellime aramas akan mendahki meteikan nanpwungarail kin wiahda sapwung laud. Sises ketin wia mehn kahlemeng me keieu mwahu. Mwurin eh ketin kapakap pwohng ehu pwon oh peki sawas sang Semeo, e ketin pilada wahnpoaron 12 ko. Ahpw mwuhr, emen rehrail, Sudas Iskariot, pangala ih. Wahnpoaron Piter pil nda me e sehse ihs Sises. (Luk 6:12-16; 22:2-6, 31, 32) Mendahki wahnpoaron ko kansensuwedihala Sises, e sohte ketin engiengda pahn sapwellimen Siohwa aramas ako de pil pahn Siohwa. Ahpw, Sises ketin mihmi karanih Semeo oh pousehlahte papah ih ni loalopwoat. Pwehki met, Siohwa ketin katingih ni eh ketin kaiasada oh mwuhr ketin kesepwilda ih pwehn wiahla Nanmwarki en Wehin nanleng.​—Mad. 28:7, 18-20.

11. Dahme Paipel kohpada duwen sapwellimen Siohwa ladu kan nan ahnsou pwukat?

¹¹ Sapwellimen Sises mehn kahlemeng kin padahkihong kitail en loalopwoatohng Siohwa oh sapwellime aramas akan. Kitail ahneki kahrepe mwahu kan en wia met. Kitail kak kilang me Siohwa kin ketin kaweid sapwellime ladu kan ni imwin rahn pwukat. E kin ketin sewese irail ren kalohki padahk mehlel sampah pwon, oh irail kelehpw me kin wiewia doadoahk wet. Irail pil kin uhdahn miniminpene oh peren pwehki soahng kan koaros me Siohwa kin ketin padahkihong irail. Siohwa ketin mahsanihki irail: “Re pahn kokoulki ar peren.”​—Ais. 65:14.

12. Ia duwen atail en kilangwohng soh unsek en meteikan?

¹² Kitail pil kin uhdahn peren pwehki Siohwa kin ketin kaweid oh sewese kitail en wia soahng mwahu tohto. Weksang met, aramas akan nan ahn Sehdan sampah sohte ahneki koapworopwor mehlel ong ahnsou kohkohdo. Ia uwen eh pahn wia elen soaloalokong oh sapahrek en kesehla Siohwa oh sapwellime aramas akan ihte pwehki emen nan mwomwohdiso wiahda de nda mehkot me sohte pwung! Ahpw, kitail anahne kolokolte atail loalopwoatohng Siohwa oh idawehn sapwellime kaweid. Kitail pil anahne sukuhlki ia duwen atail pahn kilangwohng de mwekidki soh unsek en meteikan.

13, 14. (a) Dahme kahrehda kitail en kanengamahiong emenemen? (b) Inou dahieu me kitail men tamataman?

¹³ Dahme ke pahn wia ma emen riomw Kristian nda de wia mehkot me kamedekihukala? Paipel kihda kaweid wet: “Kanengamahiong omw lingeringer; pwe aramas pweipwei me kin mwakar.” (Ekl. 7:9) Kitail koaros soh unsek oh kin wiahda sapwung. Eri, kitail sohte kak kasik me riatail Kristian kan pahn ahnsou koaros nda de wia me pwung. Oh e sohte pahn mwahu ong kitail en medemedewehte arail sapwung kan. Ma kitail wia met, kitail kakete sohla peren ni atail papah Siohwa. Suwed sang met, atail pwoson ih kakete luwetala, oh kitail kakete kohkohla sang sapwellime pwihn. Eri, kitail solahr  kak papah Siohwa de ahneki koapworopwor en mi nan sapwellime sampah kapwo.

¹⁴ Eri dahme kak sewese iuk en kolokol omw peren ni omw papah Siohwa ma meteikan wia mehkot me kapwunode iuk? Ahnsou koaros tamataman sapwellime inowo: “I pahn wiahda sampah kapw ehu oh lahng kapw ehu. Mehkoaros me pweidahr nan ahnsou samwalahr ako pahn manokonokla douluhl.” (Ais. 65:17; 2 Pit. 3:13) Siohwa pahn ketikihong uhk kapai pwukat ma ke kolokol omw loalopwoatohng ih.

15. Dahme Sises ketin mahsanih kitail anahne wia ma meteikan wiahda sapwung?

¹⁵ Ei mehlel, kitail saikinte mi nan sampah kapwo. Eri ma emen kamedekihala kitail, kitail anahne doudouloale dahme Siohwa kin ketin kupwurki kitail en wia. Karasepe, Sises mahsanih: “Ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan. A ma kumwail sohte pahn mahkikihong meteikan ar sapwung kan ong kumwail, eri, Samamwail me ketiket nanleng pil sohte pahn ketin mahkikihong kumwail sapwung kan me kumwail kin wiahda.” Eri ni Piter eh patohwan idek rehn Sises ma kitail anahne mahkohng meteikan “pak isuh,” Sises ketin sapeng mahsanih: “Soh e sohte itar pahn pak isipak, ahpw pahn pak isuh wad isihsek.” Sises ketin padahkihong kitail me kitail en kin men mahkohng meteikan ahnsou koaros.​—Mad. 6:14, 15; 18:21, 22.

16. Mehn kahlemeng mwahu dah me Sosep kasalehda?

¹⁶ Mehn kahlemeng en Sosep kin padahkihong kitail dahme kitail pahn wia ni meteikan ar kansensuwedihala kitail. Sosep oh rie pwutak pwulopwulo kelehpw me nein Resel ong Seikop. Pil mie nein Seikop pwutak teikan. Irail meh ehk, ahpw e kin poakohng Sosep laudsang irail koaros. Met kahrehda ren uhdahn peiriniong Sosep. Ni mehlel, uwen arail kailongki, re netikihla ih nin duwen lidu men, oh irail ko me pwainda ih wahla ih Isip. Mwurin sounpar tohto, nanmwarki en Isip kesepwilda Sosep en wiahla keriau en kaun nan sahpwo pwehki e uhdahn pwuriamweikihla doadoahk mwahu me Sosep kin wia. Mwuhr, rien Sosep pwutak ko kohla Isip pwehn pwainda mwenge pwehki lehk lapalap ehu. Ni arail kilangada Sosep, re sohte kasawihada me ih mwo, ahpw Sosep ese ihs irail. Mendahki re wiahiong ih me suwed, e sohte kaloke irail ahpw e kasonge irail pwehn diarada ma re uhdahn wekila. Ni Sosep eh esehda me re wekilahr, e ndaiong irail me iei ih riarailo, oh e kansenamwahwihala irail. Mwuhr e nda: “Sohte mehkot kumwail pahn masak. I pahn apwalih kumwail oh noumwail seri kan.”​—Sen. 50:21.

17. Dahme ke men wia ni meteikan ar wiahda sapwung?

¹⁷ Tamataman me pwehki koaros sohte unsek, ke pil kakete kansensuwedihada meteikan. Eri ma ke pohnese me ke kansensuwedihada emen, idawehn kaweid en Paipel. Peki en mahkohng uhk oh nantihong en ahneki popohl reh. (Wadek Madiu 5:23, 24.) Kitail kin mwahuki ni meteikan ar mahkohng kitail. Eri kitail en pil wia duwehte ong irail. Kolose 3:13 mahsanihong kitail: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.” Ma kitail uhdahn poakohng riatail Kristian kan, kitail sohte kak kadakadaur atail nsensuwedkihla mehkot me re wiahda mahso. (1 Kor. 13:5) Oh ma kitail mahkohng meteikan, Siohwa pahn pil ketin mahkohng kitail. Eri ni meteikan ar wiahda sapwung, kitail en kasalehda mahk duwehte Samatailo, Siohwa, me kin ketin mahkohng kitail.​—Wadek Melkahka 103:12-14.