Ia duwe, ke kin wadek kanahieng Kahn Iroir kan me wiawihda nan pahr me neklahro oh pahret? Eri, kilang ma ke kak sapengala peidek kan me mi pah:

Dahme kahrehda Siohwa ketin kupwurki mahwen en mehn Israel en mahs ko?

Siohwa kin ketin limpoak. Ahpw, ekei pak, e kin ketin mweidohng mahwen en wiawi ni me suwed oh lokolok ar kin wia keper ong sapwellime aramas akan. Koht kelehpw me pahn koasoanehdi ihs me pahn iang mahwen oh iahd me e pahn wiawi.​—w15 11/1, pali 3-4.

Soahng kesempwal dah kan me pahpa nohno kan kak wia pwehn kaiahnehda neirail me pwulopwul kan ren papah Siohwa?

E kesempwal me pahpa nohno kan en poakohng neirail me pwulopwul kan oh kasalehda aktikitik sang arail wiewia kan. E pil kesempwal me pahpa nohno kan en kasalehda erpit oh nantihong en wehwehki neirail me pwulopwul kan.​—w15 11/1, pali 14-16.

Soahng dah kan me kitail anahne medemedewe mwohn atail lokaia?

Pwe atail lokaia en mwahu, kitail anahne medewe (1) iahd me kitail en lokaia (Ekl. 3:7), (2) dahme kitail en nda (Lep. Pad. 12:18), oh (3) ia duwen atail pahn nda (Lep. Pad. 25:15).​—w15 12/1, pali 19-22.

Ia ekei wiepen sohte kin mehlel me Kristian kan en soikala?

Kristian mehlel kan kin soikala likamw oh karaunlikamwih meteikan. Re sohte kin koasoiahda ire kan me likamw oh mwersuwed me pahn kamedekihala meteikan, oh re sohte kin wiahda widing de pil pirap.​—wp16.1, pali 5.

Ihs irail “samworo lapalap akan” me kileldi nan Paipel?

Lepin lokaia “samworo lapalap akan” kin dokedoke irail kan me keieu kesempwal me wia kisehn samworo kan, pil iangahki irail me wia samworo lapalap mahso me aramas kihsang arail pwukoa.​—wp16.1, pali 10.

Ia pahn atail wiewia ong emen me iang tungoale pilawa oh nim wain ni Katamano?

Kristian kan sohte kin kapinga irail pwukat nohn daulihala. Emen me uhdahn wia me keidi men sohte pahn men aramas en kapinga ih nohn daulihala oh sohte pahn men pakpakairkihseli eh kenikenla mwohn silangin Koht. (Mad. 23:8-12)​—w16.01, pali 23-24.

Dahme kitail kak sukuhlkihsang ia duwen Eipraam eh wiahla kompoakepahn Koht?

Eipraam esehla duwen Koht, ele sang rehn Sehm. Oh Eipraam koahiekla sang ni eh kin kilang mwomwen sapwellimen Koht wiewia kan ong ih oh eh peneineio. Kitail pil kak song en wia duwehte.​—w16.02, pali 9-10.

Ia duwen irelaud oh iretikitik kan nan Paipel ar tepin wiawihda?

Emen sounpadahk en Paipel nan pahr 1200 ko me adaneki Stephen Langton katohrepeseng ire kan ong irelaud kei nan Paipel. Sounnting en mehn Suhs kan iei me tepin katohrepeseng ire kan ong ni iretikitik kan nan Paipel en lokaiahn Ipru, oh nan pahr 1500 samwa, emen me samanih Paipel, Robert Estienne, pil wia met ong Palien Paipel ni Lokaiahn Krihk.​—wp16.2, pali 14-15.

Ia duwe, Sehdan uhdahn kahluwahla Sises ni tehnpas sarawio pwehn kasonge ih de e kasalehiong ih kaudiahl ehu?

Kitail sohte uhdahn ese. Pwuhken Madiu 4:5 oh Luk 4:9 kakete wehwehki me Sehdan kahluwahla Sises wasao nan kaudiahl ehu de me Sises ketiket pohn kengkeng en tehnpaso.​—w16.03, pali 31-32.

Ni ahl dah kan me atail doadoahk en kalohk eh kak duwehte pwoaiken menseng?

Pwoaiken menseng kin ekisekis miehla oh e kin kansenamwahu oh kesempwal ong mour. Pwoaiken menseng kin wia kapai ehu sang rehn Koht. (Deud. 33:13) Sapwellimen Koht aramas akan arail nannanti nan doadoahk en kalohk pil kin duwehte.​—w16.04, pali 4.