Emen sounkalohk me saikinte papidais nan Armenia me ede Haykanush, diarada passport ehu karanih imweo. Nan passporto, mie debit card kei oh uwen mwohni laud ehu. E ndaiong eh pwoudo, me pil wia sounkalohk men me saikinte papidais, duwen dahme e diaradao.

Pwopwoud wet ahneki kahpwal laud me pid mwohni oh mie ara pweipwand. Ahpw re pilada en wahla mwohnio ni adres me kilel nan passporto. Ohl me naineki passporto oh eh peneineio pwon uhdahn pwuriamweikihla met. Haykanush oh eh pwoudo kawehwehda me ira kin mehlel pwehki dahme ira sukuhlkihsang Paipel. Ira eri doadoahngki ahnsowo pwehn padahkihong peneineio duwen Sounkadehdehn Siohwa kan oh kihong neirail ekei pwuhk.

Peneineio men kisekisehki Haykanush mwohni ahpw e sohte ale. Rahno mwuri, ahn ohl me naineki passporto eh pwoudo mwemweitla rehn Haykanush oh eh pwoudo ni imwarao, oh pwehn kasalehda uwen eh kalahnganki dahme ira wiao, e ngihtehte oh kihong Haykanush daimon rihng ehu.

Duwehte peneineio, aramas tohto pahn pwuriamweiki wiewiahn mehlel me Haykanush oh eh pwoudo kasalehda. Ahpw ia duwen Siohwa? Ia sapwellime madamadau ong ara kin mehlel? Mie katepen ara kin mehlel?

Pasapengpen peidek pwukat sohte apwal. Dahme kahrehda? Pwehki sapwellimen Koht ladu kan ese me en alasang sapwellime irair kaselel kan kin kesempwal ong ih sang daimon, kohl, de kepwe teikan. Ei, dahme Siohwa kin ketin medewe me kesempwal weksang dahme pali laud en aramas akan kin kesempwalki. (Ais. 55:8, 9) Oh sapwellime ladu kan kin medewe me arail nantihong en alasang sapwellime irair kaselel kan uhdahn kesempwal.

Kitail kak kilang duwen met sang dahme Paipel mahsanihki duwen en ahneki dehde oh loalokong. Lepin Padahk 3:13-15 mahsanih: “Meid kaperen ong aramas me kin loalokongla-oh dehdehkihla. Met me mwahusang silper, pwe me katep laud ong uhk sang kohl. Kupwurokong kesempwal sang mehlel takai kesempwal kan; sohte mehkot me ke pahn mwahuki me kak pahrekiong kesempwal en kupwurokong.” Eri e sansal me Siohwa ketin kesempwalki irair pwukat laudsang kepwe kesempwal koaros.

Ahpw ia duwen wiewiahn mehlel?

Siohwa kin ketin mehlel. E “sohte kin ketin likamw.” (Taitus 1:2) Oh e ketin kamwakid wahnpoaron Pohl en ntingkihlahng Kristian en Ipru ko ni mwehin tepin Kristian ko: “Kumwail woneweite kapakapkin kiht. Se pepehm me nan kapehdit me uhdahn mwakelekel, pwehki at kin men wia dahme pwung ahnsou koaros.”​—Ipru 13:18.

Sises Krais ketikihda mehn kahlemeng mwahu duwen en kin mehlel. Karasepe, ni ahnsou me Samworo Lapalap Kaiapas nda, “Ni mwaren Koht ieias, komwi en kahukihong kiht ma iei komwi Mesaiao, Sapwellimen Koht?” Sises ketin kasalehda ni mehlel me ih iei Mesaiao. Sises ketin mahsen ni mehlel mendahki eh mwahngih me Tohn Mwoalen Kopwung Lapalap ko kakete karaunehki ih aramas lahlahwe men oh me met kakete imwikihla eh kamakamla.​—Mad. 26:63-67.

Ahpw ia duwen kitail? Kitail pahn kin kolokolte atail mehlel nan soangen irair kan me wiewiahn likamw kakete wahdohng kitail paiamwahu?

E kak apwal en kin mehlel ni imwin rahn pwukat ni me tohto ar kin “roporop ong pein irail” oh “mehwo.” (2 Tim. 3:2) Ni ahnsou me kahpwal en mwohni pwarada de apwal en diar doadoahk, e kin mengei ong me tohto en pirap, mwersuwed, de wia soangen mwekid likamw teikan. Soangen madamadau wet inenen rek me kahrehda me tohto en leme me ihte elen paiamwahula iei en kin likamw. Pil ekei Kristian kin wiahda pilipil suwed kan oh pwehki “noahrok,” re sohla adamwahu nan mwomwohdiso.​—1 Tim. 3:8; Taitus 1:7.

Ahpw pali laud en Kristian kan kin alasang Sises. Re pohnese me arail ahneki sapwellimen Koht irair kaselel kan kin kesempwalsang soangen kepwe de pai koaros. Ihme kahrehda Kristian pwulopwul kan sohte kin mwersuwed nan arail sikeng kan pwehn alehdi deng mwahu nan sukuhl. (Lep. Pad. 20:23) En kin mehlel sohte kin ahnsou koaros imwikihla kisakis ehu, duwehte me wiawiong Haykanush. Ahpw, Koht mahsanih me en kin mehlel iei me pwung oh kin imwikihla atail en ahneki nsenmwakelekel, irair ehu me uhdahn kesempwal.

Mehn kahlemeng en Gagik kin kasalehda met. E nda: “Mwohn ei wiahla emen Kristian, I doadoahk nan kompani laud ehu. Ohl me ahneki kompanio sohte kin men pwain daksis kahrehda e kin ripohtki ekiste dahme eh kompanio kin uhdahn wiahda. I iang wia kaun emen wasao oh re kasik me ngehi oh sounwia daksiso en ‘pwungkipene’ uwen pweipwei tohrohr ehu pwe en pohnsehsehla wiewia mwersuwed kan me kompanio kin wia. Pwehki met, I adsuwedkihla ei kin likamw. Ni ahnsou me I esehla padahk mehlel, I sohla wia met, mendahki doadoahko inenen pweimwahu. Ahpw, I tapiada pein ei pesines. Oh keieun rahno, nin duwen kosonned, I kohla wiahda doaropwe kan pwe ei kompanio en kileldi oh pwainla daksis koaros.”​—2 Kor. 8:21.

Gagik nda: “Pweinen ei doadoahko met tikitikla pahrekiong elep en pweineio mahs, eri e kin apwal en apwalih ei peneineio. Ahpw, met I nsenamwahu. I ahneki nsenmwakelekel mwohn silangin Siohwa. I wia mehn kahlemeng mwahu ong nei pwutak riemeno, oh I pil kak ahneki pwais kaselel kan nan mwomwohdiso. Met ei kin mehlel kin kahrehda I en adamwahu rehn sounwia daksis kan oh pil meteikan me I kin wia pesines rehrail.”

Siohwa kin ketin poakohng irail kan me kin kapinga ih sang ni arail alasang sapwellime irair kaselel kan, iangahki en kin mehlel. (Taitus 2:10) Oh ni atail wia met, e ketin inoukihda me en ketin sewese kitail. E ketin doadoahngki Nanmwarki Depit en ntingihedi: “Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.”​—Mel. 37:25.

Dahme wiawiong lih lelepek Rud kadehdehda met. Ni loalopwoat e kin mihmihte rehn eh mwaho Naomi oh sohte kohkohsang mendahki liho eh mahlahr. Rud keseula Israel, wasa me e kak kaudokiong Koht mehlelo. (Rud 1:16, 17) E kin mehlel oh doadoahk laud pwehn rikpene dahme kin pwupwusang rehn soundondol kan, nin duwen me Kosonnedo koasoanehdi ong me semwehmwe kan. Siohwa sohte ketin likidmeliehla Rud oh Naomi duwehte eh sohte ketin likidmeliehla Depit. (Rud 2:2-18) E pil ketin wia laudsang ihte apwalih Rud. E ketin pilada Rud en wia kisehn kadaudoko me Nanmwarki Depit oh Mesaiao kohsang ie!​—Rud 4:13-17; Mad. 1:5, 16.

 Ele e uhdahn apwal ong ekei sapwellimen Siohwa ladu kan ren koadoahkihada mwohni me itar ong arail anahn kan. Re sohte kin song en rapahki ahl mengei de mwersuwed en wia met, ahpw re kin pwerisek oh doadoahk laud. Ni arail wia met, re kin kasalehda me ong irail, sapwellimen Koht irair kaselel kan, iangahki en kin mehlel, kin kesempwalsang kepwe koaros.​—Lep. Pad. 12:24; Ep. 4:28.

Duwehte Rud, Kristian kan nan sampah pwon kin kasalehda arail pwoson me sapwellimen Siohwa manaman pahn sewese irail. Irail uhdahn likih Meno me ketin inoukihda: “I sohte pahn mweisang uhk; I sohte pahn keseiukala.” (Ipru 13:5) Siohwa kin ketin pwurepwurehng kasalehda me e kak oh pil pahn ketin sewese irail kan me kin mehlel ahnsou koaros. E kin ahnsou koaros ketin kapwaiada sapwellime inou en ketikihda dahme sapwellime ladu kan kin anahne.​—Mad. 6:33.

Ei, aramas akan kin kesempwalki daimon oh pil soangen kepwe teikan. Ahpw kitail kak kamehlele me Samatailo nanleng kin ketin kesempwalki atail kin mehlel oh pil atail irair kaselel teikan laudsang douluhl takai kesempwal koaros!