Ke Kin Mweidohng Sounwiapatail Lapalapo en Ketin Kaiahne Iuk?
“Kumwail kin mihmi nin limei kat duwehte pwehl nan pehn sounwia dahlo.”—SER. 18:6.
KOUL KAN: 60, 22
1, 2. Dahme kahrehda Koht ketin wiahki Daniel “ohl kesempwal mehlel” men, oh ia duwen atail kak kasalehda peik duwehte Daniel?
NI AHNSOU me mehn Suhs ko kalipilipala Papilon, re pedolong nan kahnimw ehu me diren sansal kan oh aramas ako kin kaudokiong ngehn suwed kan. Ahpw, mehn Suhs lelepek kan, duwehte Daniel oh kompoakepah meh silimeno, sohte mweidohng mehn Papilon kan en kawekila irail. (Dan. 1:6, 8, 12; 3:16-18) Daniel oh kompoakepah ko pwungki Siohwa en ketin wia Sounwiaparail oh kin pousehlahte kaudokiong ih kelehpw. Mendahki Daniel mi nan wasa suwed ehu pali laud en eh mour, sapwellimen Koht tohnlengo ndaiong ih me e wia “ohl kesempwal mehlel” men.—Dan. 10:11, 19, NW.
2 Mahso, sounwia sah men ele kin wiahiong pwehlo en wiahla soangen mwomw ehu. Rahnwet, tohnkaudok mehlel kan ese me Siohwa iei Kaun en lahng oh sampah oh ketin sapwellimanki manaman en kaiahne wehi kan. (Wadek Seremaia 18:6.) Koht pil sapwellimanki manaman en kaiahne emenemen kitail. Ahpw, Siohwa sohte kin ketin idingkihong emenemen kitail en wekila. E kupwurki kitail en men mweidohng ih en ketin kaiahne kitail. Nan iren onop wet, kitail pahn sukuhlki ia duwen atail kak pousehlahte duwehte pwehl mwuterek nin limen Koht. Kitail pahn koasoiapene peidek siluh pwukat: (1) Ia duwen atail kak soikala kasalehda soangen irair kan me kakete kahrehiong kitail en duwehla pwehl kekeluwak oh soikala sapwellimen Koht kaweid? (2) Ia duwen atail kak kakairada irair kan me kak sewese kitail en kolokolte atail peik oh duwehte pwehl mwuterek? (3) Ia duwen pahpa nohno Kristian kan ar kak peikiong Koht ni arail kin kaiahne neirail seri kan?
SOIKALA IRAIR KAN ME KAKETE KAHREHIONG OMW MOHNGIONG EN KEPTAKAILA
3. Irair dah kan me kak kahrehiong atail mohngiong en keptakaila? Menlau kihda ehu karasaras.
3 Lepin Padahk 4:23 mahsanih: “Kanahieng omw madamadau, pwe omw madamadau kan kin kahrehda mwomwen omw mour.” Pwe atail mohngiong en dehr keptakaila, kitail anahne soikala irair suwed kan duwehte pohnmwahso, wiewia dihp, oh sohte ahneki pwoson. Ma kitail sohte kanahieng, mepwukat kak kahrehiong kitail en sohla peik oh pil uhwongada Koht. (Dan. 5:1, 20; Ipru 3:13, 18, 19) Ih met me wiawihong Nanmwarkien Suda, Usaia. (Wadek 2 Kronikel 26:3-5, 16-21.) Nin tapio, Usaia kin peik oh ahneki nanpwungmwahu rehn Koht, eri Koht ketikihong ih kehl. Ahpw “ni ahnsou me Usaia kehlaillahr, e ahpw aklapalapala.” E uhdahn pohnmwahsohla me kahrehda e song en isik warpwohmwahu nan tehnpas sarawio mendahki samworo kan kelehpw me konehng wia met. Ni ahnsou me samworo ko padahkihong ih me dahme e wiao sapwung, Usaia uhdahn lingeringerda! Siohwa ketin kanamenekihala nanmwarki pohnmwahso menet, oh e wiahla ohl tokutok men lao e mehla.—Lep. Pad. 16:18.
4, 5. Dahme kak wiawi ma kitail sohte soikala pohnmwahso? Menlau kihda ehu karasaras.
4 Ma kitail sohte soikala irair en pohnmwahso, kitail kak tepida ahneki madamadau me kitail mwahusang meteikan oh ele tepida soikala kaweid kan me kohwong kitail sang nan Paipel. (Rom 12:3; Lep. Pad. 29:1) Ih met me wiawihong emen elder me adaneki Jim. E sohte pwungki dahme elder teikan nan mwomwohdiso ndahki duwen irair ehu. Jim nda: “I ndaiong elder ko me re sohte kin kasalehda limpoak, oh I kohkohsang mihting en eldero.” Mpen sounpwong weneu mwuri, e keseula ni ehu mwomwohdiso tohrohr ahpw e sohte idihdida nin duwen elder men wasao. Jim uhdahn nsensuwedkihla met. E uhdahn kamehlele me ih me pwung oh met kahrehda en uhdihsang eh papah Siohwa oh sohla iang mihting oh kalohk erein sounpar eisek. E nda me ni ahnsowo, e pohnmwahso oh e tepida kapwukoahki Siohwa dahme wiawi. Erein ahnsou ko, brother kan kin mwemweitla reh oh song en sewese ih, ahpw Jim kin soikala arail sawas.
5 Jim nda: “I sohte kak uhdihsang ei kin medemedewehte me meteiko sapwung.” Dahme wiawihong ih kasalehiong kitail me pohnmwahso kak kahrehiong kitail en uhki atail wiewia sapwung kan. Ni ahnsou me met wiawi, kitail sohla kin duwehte pwehl mwuterek. (Ser. 17:9) Mie pak ke nsensuwedla pahn riomw Kristian men? Mie pak ke nsensuwedla pwehki ke sohla ahneki pwukoa kesempwal ehu? Dahme ke wia? Ke pohnmwahsohla, de ke esehda me popohl rehn riomw Kristian oh omw loalopwoatohng Siohwa iei me keieu kesempwal?—Wadek Melkahka 119:165; Kolose 3:13.
6. Dahme kak wiawi ma kitail kin wiewia dihp?
6 Ni emen eh kin pousehlahte wiewia dihp oh pil ekihsang meteikan dahme e wiewia, met pahn apwal ong ih en ale sapwellimen Koht kaweid. Met kak kamengeila ong ih en wia dihp. Emen brother nda me kedekedeo e sohla wiahki mehkot eh wiewia sapwung kan. (Ekl. 8:11) Emen brother tohrohr me kin kalapw kilang kilel oh kasdo suwed mwuhr nda: “I tepida ahneki madamadau en kauwe elder kan.” Dahme e kin wiao kauwehla eh nanpwungmwahu rehn Siohwa. Ni ahnsou me meteikan diarada dahme e kin wiewia, e ale sawas sang elder kan. Ei mehlel, kitail koaros sohte unsek. Ahpw ma kitail tepida kauwe meteikan de kihda kahrepe kan ong dahme kitail wia ni atail wiahda sapwung ehu ahpw sohte peki Koht en ketin mahkohng oh sewese kitail, atail mohngiong ele pahn keptakaila.
7, 8. (a) Ia duwen mehn Israel en mahs ko ar kasalehda me arail mohngiong keptakaila pwehki sohte ar pwoson? (b) Dahme kitail kak sukuhlki sang met?
7 Ni ahnsou me Siohwa ketin kapitala mehn Israel ko sang Isip, re kilang eh ketin wia manaman kapwuriamwei tohto. Mendahki met, ni arail kerenlahng Sapwen Inowo, mohngiongirail keptakaila. Dahme kahrehda? Pwehki re sohte pwoson Koht. Re sohte likih Siohwa, ahpw re tepida masepwehk oh kaulimki Moses. Re pil men pwurala Isip, wasao me re wia lidu kei! Siohwa uhdahn kupwurtoutoukihla met oh mahsanih: “Ia erein aramas pwukat ar pahn mwamwahlikin ie?” (Nemp. 14:1-4, 11; Mel. 78:40, 41) Mehn Israel pwukat mehla nan sapwtehno pwehki mohngiongirail keptakaila oh re sohte pwoson.
8 Rahnwet, kitail uhdahn kerenlahng sampah kapwo, oh atail pwoson kin lelohng kasongosong. Eri kitail anahne kasawih atail pwoson. Ia duwen atail kak tehk mwahu me atail pwoson kehlail? Kitail kak kasawih dahme Sises mahsanih nan Madiu 6:33. Pein idek rehmw: ‘Ia duwe, ei mehn akadei oh pilipil kan kin kadehdehda me I uhdahn kamehlele dahme Sises mahsanih? I sohte pahn towehda mihting kan de kalohk pwehn kalaudehla ei wiahda nei mwohni? Dahme I pahn wia ma ei wasahn doadoahko men ien doadoahngki pali laud en ei ahnsou oh kehl ong ei doadoahko? I pahn mweidohng sampah wet en wekidala ei madamadau oh ele pil kauhdi ie sang papah Siohwa?’
9. Dahme kahrehda kitail anahne “wia keseupen” pein kitail ma kitail weweidki pwoson, oh ia duwen atail kak wia met?
9 Ma kitail sohte kin ahnsou koaros idawehn dahme Paipel mahsanih duwen werek suwed, piskenla, de mehn kamweit kan, mohngiongitail kak keptakaila. Dahme ke anahne wia ma met tepida wiawihong uhk? Ke anahne mwadang kasawih omw pwoson! Paipel mahsanih: “Kumwail kalelapak oh wia keseupen pein kumwail ma kumwail weweidki pwoson.” (2 Kor. 13:5) Ken kin mehlel ong pein kowe, oh kaukaule doadoahngki Mahsen en Koht en kapwungala omw madamadau.
DUDUWEHTE PWEHL MWUTEREK
10. Dahme kak sewese kitail en duwehte pwehl mwuterek nin limen Siohwa?
10 Pwehn sewese kitail en duduwehte pwehl mwuterek, Koht ketikihong kitail sapwellime Mahsen, mwomwohdisohn Kristian, oh doadoahk en kalohk. Ni atail kin wadek oh doudouloale Paipel rahn koaros, met kin sewese kitail en duwehte pwehl mwuterek nin limen Siohwa oh mweidohng en ketin kaiahne kitail. Siohwa ketin kehkehlikihong nanmwarki en Israel kan en ntingihedi sapwellimen Koht Kosonnedo oh wadek rahn koaros. (Deud. 17:18, 19) Wahnpoaron ko ese me en kin wadek oh doudouloale Paipel uhdahn kesempwal ong arail doadoahk en kalohk. Re doadoahngki pali kan nan Palien Paipel en Lokaiahn Ipru pak epwiki kei nan arail nting kan, oh ni ahnsou me re kin kalohk ong aramas akan, re kin kangoange aramas ako ren pil doadoahngki Paipel. (Wiewia 17:11) Ni ahlohte, kitail pil kilang me e kesempwal en wadek oh doudouloale Mahsen en Koht rahn koaros. (1 Tim. 4:15) Met kin sewese kitail en kin aktikitik, oh Siohwa pahn kak ketin kaiahne kitail.
Doadoahngki dahme Koht ketikihda pwehn sewese iuk en kin duwehte pwehl mwuterek (Menlau kilang parakrap 10-13)
11, 12. Ia duwen Siohwa eh kak ketin doadoahngki mwomwohdisohn Kristian en kaiahne kitail ong dahme kitail anahne? Menlau kihda ehu karasaras.
11 Siohwa ketin mwahngih dahme emenemen kitail anahne, oh e kin ketin doadoahngki mwomwohdisohn Kristian pwehn kaiahne kitail. Jim, me kitail koasoiapenehr mwoweo, tepida wekidala eh madamadau ni emen elder eh kasalehda eh nsenohkin ih. Jim nda: “E sohte kin kapwukoahkin ie ei irairo de kauwe ie. Ahpw, e kin ahneki madamadau pwung oh kasalehda ni mehlel eh uhdahn men sewese ie.” Mpen sounpwong siluh mwuri, eldero luke Jim en iang towehda mihting. Jim nda me tohnmwomwohdiso kasamwo ih ni kadek oh arail limpoak sewese ih en wekidala eh madamadauo. E tepida wehwehkihda me eh pepehm kan kaidehn me keieu kesempwal. Elder ko nan ahn Jim mwomwohdiso oh eh pwoudo kangoange ih, oh kedekedeo e pwurehng tepida papah Siohwa. Jim pil paiekihda eh wadek oaralap kan “Kitail Sohte Kin Kapwukoahki Siohwa” oh “Papah Siohwa ni Loalopwoat,” nan Kahn Iroir (lokaiahn wai) en November 15, 1992.
12 Kedekedeo, Jim pwurehng wiahla elder men. Sangete ahnsowo, e sewese brother teikan en kamwahwihala soangen kahpwalohte oh kakehlaka arail pwoson. E nda me e medewe me e ahneki nanpwungmwahu rehn Siohwa ahpw uhdahno soh! E koluhkihla eh mweidohng pohnmwahso en kahrehiong ih en medemedewehte sapwung en meteikan ahpw kaidehn dahme keieu kesempwal.—1 Kor. 10:12.
13. Doadoahk en kalohk kak sewese kitail en kakairada irair dah kan, oh ia kamwahupe kan?
13 Doadoahk en kalohk pil kak kaiahne kitail oh sewese kitail en kamwahwihala pein kitail. Ia duwen? Ni atail kin kalohki rongamwahwo, kitail anahne kasalehda soangen irair kan duwehte aktikitik oh pil wahn sapwellimen Koht manaman. (Kal. 5:22, 23) Medewehla soangen irair mwahu kan me doadoahk en kalohk sewese iuk en kakairada. Ni atail kin alasang Krais, aramas kin perenki rong dahme kitail padahngki oh arail madamadau ong kitail kak wekila. Karasepe, Sounkadehde riemen nan Australia song en kalohk ong lih emen ni imweo, ahpw liho uhdahn lingeringerda oh lemeiong ira. Ahpw, Sounkadehde riemeno rong oh kasalehda ara wauneki liho. Mwuhr, liho koluhkihla dahme e wiao oh ntinglahng ni ohpis en Sounkadehdehn Siohwa kan. E pekmahngki dahme e wiao. E nda: “I wiahda tiahk en pweipwei ehu oh pelianda aramas riemen me kin kalohki Mahsen en Koht oh song en kausirahsang mwo.” Sang dahme wiawi wasaht, kitail kak kilang kesempwalpen kasalehda kadek ni ahnsou me kitail kin kalohk. Ei, atail kalohk kin sewese meteikan, ahpw e pil kin sewese kitail en kamwahwihala pein kitail.
PAHPA NOHNO KAN ANAHNE PEIKIONG KOHT NI ARAIL KIN KAIAHNE NEIRAIL SERI KAN
14. Dahme pahpa nohno kan anahne wia ma irail uhdahn men pweida nan arail kaiahne neirail seri kan?
14 Pali laud en seri tikitik kan kin aktikitik oh men sukuhlki soahng kan. (Mad. 18:1-4) Eri e wia elen loalokong ong pahpa nohno kan en sewese neirail seri kan erein ar wie pwulopwulte en sukuhlki oh poakohng padahk mehlel. (2 Tim. 3:14, 15) Pwe pahpa nohno kan en kak pweida, pein irail anahne poakohng padahk mehlel oh doadoahngki dahme Paipel mahsanih nan arail mour. Ni pahpa nohno kan ar wia met, e pahn mengeila ong neirail seri kan en poakohng padahk mehlel. Seri kan pil pahn wehwehki me kaweid me kohsang arail pahpa nohno kin kasalehda me ira oh Siohwa kin poakohng irail.
15, 16. Ia duwen pahpa nohno kan ar pahn kasalehda ar likih Koht ma neirail seri men piskenla?
15 Mehnda ma pahpa nohno kan kin padahkihong neirail seri kan padahk mehlel, ekei seri ko kin sohla papah Siohwa de piskenla. Peneineio kin uhdahn lokolongki ma met wiawi. Emen sister nan Palieir en Aperika nda: “Ni ahnsou me riei pwutako piskenla, e mwomwen me e mehla. Met uhdahn kansensuwed!” Ahpw dahme ih oh eh pahpa nohno anahne wia? Re idawehn kaweid kan nan Paipel. (Wadek 1 Korint 5:11, 13.) Ahn sistero pahpa nohno ese me en peikiong sapwellimen Koht kaweid pahn wia kamwahu ong koaros. Oh ira pohnese me piskenla wia elen kaweid limpoak ehu sang Siohwa. Eri ira kin koasoiong neira pwutako ihte ahnsou kan me uhdahn anahn ong irair en arail peneineio.
16 Ia ahn pwutako pepehm? Mwuhr e nda: “I ese me ei peneineio sohte kailongkin ie, ahpw re kin peikiong Siohwa oh sapwellime pwihn.” E pil nda: “Ni ahnsou me ke kin uhdahn anahne peki Siohwa en sewese oh mahkohng uhk, ke kin esehda ia uwen omw anahne ih.” Medewehla ia uwen peneineio ar peren ni ahnsou me pwutako pwurodo rehn Siohwa! Ei, kitail pahn peren oh pweida mwahu ma kitail kin ahnsou koaros peikiong Koht.—Lep. Pad. 3:5, 6; 28:26.
17. Dahme kahrehda kitail en uhpah Siohwa nan atail mour, oh ia duwen met eh pahn wia kamwahu ong kitail?
17 Soukohp Aiseia kohpada me mehn Suhs ko nan Papilon pahn koluhla oh nda: “Komwi me samat, Maing KAUN. Se rasehng pwehl, a komwi sounwia sah. Komwi me ketin wiaikitada.” Re pil pahn peki rehn Siohwa: “Dehr . . . ketin kupwukupwure dipat akan kohkohlahte. Kiht me sapwellimomwi; eri, komw ketin kupwurei kiht.” (Ais. 64:8, 9) Ni atail kin aktikitik oh ahnsou koaros peikiong Siohwa, kitail pahn wiahla soangen aramas me kesempwal mehlel mwohn silangih, duwehte Daniel. Siohwa pahn ketin pousehlahte kaiahne kitail ni eh ketin doadoahngki sapwellime Mahsen, manaman, oh pwihn pwe ni ahnsou kohkohdo kitail pahn wiahla “sapwellimen Koht seri” unsek kan.—Rom 8:21.