Siohwa Kin Ketin “Nsenohkin” Uhk
DAHME kahrehda ke kak kamehlele me met mehlel oh me Siohwa uhdahn ketin nsenohkin uhk? Ehu kahrepe iei Paipel me mahsanih met. Keieun Piter 5:7 mahsanih: “Kumwail mweidohng ih amwail pwunod koaros, pwehki eh kin ketin apwahpwalih [“nsenohkin,” NW] kumwail.” Mie mehn kadehde me Siohwa Koht kin ketin nsenohkin uhk?
KOHT KIN KETIKIHDA DAHME ARAMAS ANAHNE
Siohwa ketikihda mehn kahlemeng mwahu ni eh kin ketin kadek oh sapan
Koht sapwellimanki soangen irair kaselel kan me ke kin men kompoakepahmw keren kan en ahneki. Irail kan me kin kadekpene oh kasalehda sapan kin kalapw wiahla kompoakepah keren kei. Nin duwen atail kilang, rahn koaros Siohwa kin ketin kadek oh sapan ong aramas. Karasepe, e “kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.” (Mad. 5:45) Ia kamwahupen ketipin oh keteu? Likin kamwahu teikan, Koht ketikihda mepwukat pwehn ‘ketikihong kitail mwenge, oh pil audehkihda nan mohngiongitail kan peren.’ (Wiewia 14:17) Ei, Siohwa kin ketin kupwurki me sampah wet en kihda mwenge tohto, oh pil soahng teikan me kin kaperenda kitail likin mwenge iou.
Eri, dahme kahrehda me tohto kin duhpekla? Met pwehki kaun akan kin kalapw nsenohkihte alehdi manaman laud nan palien koperment oh pil wiahda mwohni ong pein irail ahpw sohte kin nsenohki kamwahwihala mouren aramas. Siohwa pahn kereniong ketikihsang kahpwal en noahrok wet sang ni eh pahn ketin wiliankihdi koasoandi en koperment kan Wehin nanleng me sapwellime Ohlo me Nanmwarki. Ni ahnsowo, sohte me pahn duhpekla. Ahpw ahnsou wet, Koht kin ketin apwahpwalih sapwellime Mel. 37:25) Met sou wia kasalepen eh kin ketin nsenohkin kitail?
ladu lelepek kan. (SIOHWA KIN KETIN KARONGE KITAIL AHNSOU KOAROS
Siohwa ketikihda mehn kahlemeng mwahu ni eh kin ketin karonge kitail ahnsou koaros
Kompoakepah mwahu men kin mie eh ahnsou ong uhk. Ele erein ahnsou laud kumwa kin koasoakoasoia dahme kumwa koaros kin perenki wia. Oh kompoakepah mwahu men pahn rong kanahieng ni omw padahkihong ih duwen omw kahpwal oh pwunod kan. Ia duwe, Siohwa kin ketin wia met? Ei, uhdahn! E kin ketin karonge atail kapakap kan. Kahrehda, Paipel kin kangoange kitail en “poadidiong kapakap ahnsou koaros.”—Rom 12:12; 1 Des. 5:17.
Ia uwen laud en ahnsou me Siohwa kin kupwurki karonge atail kapakap kan? Ehu karasaras sang Paipel pahn sapengala met. Mwohn Sises ketin pilada sapwellime wahnpoaron ko, e ketin “wie loulou, wasa lao rahnpeseng.” (Luk 6:12) Nan sapwellime kapakap, ele Sises ketin doudouloale sapwellime tohnpadahk ko me tohto, adarail, arail koahiek oh luwet kan, oh patohwan peki rehn Semeo en ketin sewese ih pilirailda. Ahnsou me ketipino dakada rahno mwuri, e mwahngiher me e piladahier me keieu koahiek pwehn wia sapwellime wahnpoaron kei. Siohwa, Sounkaronge kapakap kan, kin kupwurperenki karonge koaros me kin kapakapohng ih ni mehlel. (Mel. 65:2) Mehnda ma emen kin doadoahngkihla ahnsou laud en kapakapki kahpwal laud ehu, Siohwa sohte kin ketin tetehk ia uwen werei.
KOHT KUPWURKI MAHKOHNG KITAIL
Siohwa ketikihda mehn kahlemeng mwahu ni eh kin ketin kupwurki mahkohng kitail
Kompoakepah mwahu kan pil kin apwalki pekmahk ekei pak. Mendahki re kompoakepahnki emenemen ahnsou werei, mie ahnsou me nanpwungarail kin ohla pwehki re nohn apwalki kasalehda mahk. Ahpw Siohwa sohte ketin duwehte irail. Paipel kangoange koaros me ahneki mohngiong mehlel en peki sapwellime mahk, pwe ‘e pahn ketin mahkohng irail ni ahl laud.’ (Ais. 55:6, 7, NW) Dahme kin kamwakid Koht en uhdahn ketin mahkohng kitail?
Pwehki sohte mehkot pahrekiong sapwellimen Koht limpoak. Uwen laud en eh ketin loalloale sampah, e ketin poaronehdo sapwellime Ohlo, Sises, pwehn doarehsang aramas dihp oh imwila suwed me dihp kin kahrehda. (Sohn 3:16) Ni mehlel, meirong en pweipwei sapahlo pil kin wia laudsang. Pwehki sapwellimen Krais meirongo, Koht kin uhdahn ketin mahkohng irail kan me e kin ketin loalloale. Wahnpoaron Sohn ntingihedi: “Ma kitail wehkadahng Koht dipatail kan, e pahn ketin kapwaiada sapwellime inou oh eh pahn ketin wiewia me pwung: eri, e pahn mahkikihong kitail atail sapwung kan koaros.” (1 Sohn 1:9) Pwehki sapwellimen Siohwa mahk, aramas kak pousehlahte ahneki nanpwungmwahu reh, oh atail ese met kin uhdahn sair mohngiongitail.
E KIN KETIN SEWESEIUK AHNSOU ME KE ANAHNE
Siohwa ketikihda mehn kahlemeng mwahu ni eh kin ketin sewese kitail ni ahnsou me kitail anahne
Kompoakepah mehlel men kin sewese meteikan ni ahnsou me irail kin anahne sawas. Ia duwe, Siohwa kin ketin wia met? Paipel mahsanih: “Ma re [sapwellimen Koht ladu kan] pahn pwupwudi, re sohte pahn wonohnte nanpwel, pwe KAUN-O pahn ketin sewese kapwourirailda.” (Mel. 37:24) Siohwa kin ketin sewese sapwellime ladu kan ni ahl tohto. Tehk dahme wiawi nan dekehn Caribbean en St. Croix.
Mie serepein pwulopwul men me ienge tohnsukuhl ko uhwongada pwehki e sohte iang kasarawi pilaiko pwehki dahme e kamehlele. Mwurin eh kapakapohng Siohwa oh peki sawas, e koasoanehdi en apwalihala ireo. Ripoht me e wia mwuhr ong eh sukuhlo kin pid kasarawi pilaik. E doadoahngki Nai Pwuhk en Poadoapoad Kan en Paipel oh kawehwehda ia duwen koasoipen Sadrak, Mihsak, oh Apedneko eh sewese ih en wiahda eh pilipilo. E nda, “Siohwa ketin doarehla mehn Ipru silimeno pwehki re sohte iang kaudokiong sansal takaio.” Ih eri idek ma mie me men naineki pwuhko. Ienge tohnsukuhl ehk emen me men naineki. Serepeino uhdahn perenda ni eh esehda me Siohwa me ketikihong ih kehl oh erpit en kihda mehn kadehde mwahu duwen ire kesempwal wet.
Ma mie pak ke kin peikasalki me Siohwa kin ketin nsenohkin uhk, doudouloale iren Paipel pwukat duwehte Melkahka 34:17-19; 55:22; oh 145:18, 19. Idek rehn Sounkadehde kan me wereilahr nan padahk mehlel duwen Siohwa eh kin ketin apwalih irail. Oh ni ahnsou me ke kin anahne sapwellimen Koht sawas, kapakapkihong ih duwen kahpwalo. Ke pahn esehda ia duwen Siohwa eh kin ketin “nsenohkin” uhk.