Ke wadekala mwahu Kahn Iroir pwukat? Kitail kilang ma kitail kak sapengala peidek kan me kileldi pah:

Soahng pahieu dah kan me kitail kak wia pwehn kamwahwihala atail kin koul?

Kitail kak inenda mwahu ni atail kin kolada neitail pwuhken koul kan. Kitail en esingek mwahu. Ni atail kin sarapeseng oh koul, kitail pahn kak koul laud.​—w17.11, pali 5.

Dahme kitail anahne ese duwen wasa oh ahl akan en kahnimw en rukula kan nan Israel?

Mie kahnimw en rukula weneu nan Israel me ahl akan mwahu en keid ie. Aramas kak mwadang diar oh pil mwadang en lella ni wasahn ruk kan.​—w17.11, pali 14.

Dahme kahrehda sapwellimen Koht kisakis en pweinen pweipwei sapahlo me Sises ketikihda wia kisakis keieu mwahu me kitail kak alehdi?

Pweinen pweipwei sapahlo kin kaitarala atail ineng en wie momour, oh e pil kaitarala atail anahn en saledeksang dihp oh mehla. Pwehki Koht ketin poakohng kadaudok en Adam kan, e ketikihda Sises ong kitail ni atail wia aramas dipan kei.​—wp17.6, pali 6-7.

Ia duwen Melkahka 118:22 eh dokedoke iasadahn Sises?

Sises pengpengla nin duwen Mesaiao oh kamakamala. Pwe Sises en wiahla “takain pwukakeimw,” Koht anahne ketin kaiasada ih.​—w17.12, pali 9-10.

Mesenih kante me ahneki pwuhng en wiahda kadaudok me Mesaiao kohsang?

Ekei tapwin peneinei me Sises kohsang ie wia mesenih kei, ahpw ekei soh. Karasepe, Depit kaidehn nein Sehsi mesenih; ahpw Mesaiao kohsang kadaudoke kan.​—w17.12, pali 14-15.

Ia ekei kaweid en Paipel kan me pid palien roson de wini?

Pahn Kosonnedo, irail kan me ahneki soangen soumwahu ehu anahne katohrohrla. Aramas anahne duhdu mwurin arail doke aramas mehla men. Kosonnedo pil kihda kaweid ong aramas akan ren weirada pwoahr oh sarepedi arail kainen mwenge. Sirkumsais anahne wiawi ni kawaluh en rahn sang rahn me e ipwidi, oh met mwahu ong tengeteng en ntao.​—wp18.1, pali 7.

Dahme kahrehda Kristian kan en poakohng pein irail ni ahl me konehng?

Kitail en poakohng mehn mpatail kan duwehte atail kin poakohng pein kitail. (Mark 12:31) Ohl pwopwoud kan anahne “poakohng arail pwoud kan duwehte ar kin poakohng pein paliwararail kan.” (Ep. 5:28) Ahpw emen kakete poakohng pein ih ni ahl me sohte konehng.​—w18.01, pali 23.

Ia ekei kahk me kitail kak wia pwehn kakairada atail nanpwungmwahu rehn Koht?

Kitail anahne onopki Mahsen en Koht oh doudouloale oh doadoahngki dahme kitail sukuhlki. Kitail pil anahne mweidohng sapwellimen Koht manaman en kaweid atail madamadau oh mohngiong. Kitail pil anahne kalahnganki sawas sang meteikan.​—w18.02, pali 26.

Dahme kahrehda kasawih usu oh kosetipw kaidehn ahl pwung en esehda duwen ahnsou kohkohdo?

Mie kahrepe tohto, ahpw kahrepe keieu kesempwal iei Paipel irehdi soangen wiewia riau pwukat.​—wp18.2, pali 4-5.

Ia pahn atail madamadau ni meteikan ar luke kitail en iang irail mwenge?

Ma kitail alehdi luhk ehu en kohla iang meteikan mwenge, kitail anahne en kin mehlel. (Mel. 15:4) Kitail en dehr kauwehla atail inou ni eh sohte kahrepe mwahu. Me wia luhko ele doadoahk laud pwehn kaunopada mwengeo.​—w18.03, pali 18.

Dahme ohl idihdida kan kak sukuhlkihsang Timoty?

Timoty kin uhdahn nsenohki aramas oh pil kin mwohneki mahs eh nanpwungmwahu rehn Siohwa. E kin doadoahk laud nan eh papah Koht oh doadoahngki dahme e sukuhlki. E kin pousehlahte kaiahne pein ih oh koapworopworki sapwellimen Siohwa manaman. Elder kan oh pil meteikan kak alasang eh mehn kahlemeng.​—w18.04, pali 13-14.