EREIN sounpar tohto, mehn Israel kan kin toukihda mwohni pwehn utung kaudok mehlel. Ahpw lel ni mwehin Siseso, mehn Suhs ko anahne pwain soangen daksis tohto, oh met kahpwalihala arail mour.

Pwehn utung impwal sarawio oh mwuhr tehnpas sarawio, mehn Suhs me laud koaros anahne pwain elep en sekel, (drakma riau). Ni mwehin Siseso, soangen daksiso kin kadoadoahk ong dahme anahn ong meirong kan oh pil ong apwalih tehnpas sarawio me Erod kauwada. Ekei mehn Suhs ko idek rehn Piter ma Sises kin ketin pwain daksis, oh Sises mahsanih me e sohte sapwung en pwain daksis. Ni mehlel, e ketin padahkihong Piter ia wasa me e pahn diar pweinen daksiso.​—Mad. 17:24-27.

Sapwellimen Koht aramas akan ahnsowo anahne pwain pil ehu soangen daksis, me iei re anahne kihda eisek kis ehu en wahnsapwarail kan de mwohni me re kin koadoahkihada. (Lip. 27:30-32; Nemp. 18:26-28) Kaunen en pelien lamalam ko kin ngihtehtehki me aramas ako en kanahieng ni arail pwain daksis en wahntuhke koaros, pil “mint oh dil oh kumin.” Sises sohte mahsanih me e sapwung en pwain soangen daksis wet, ahpw e mahsanih me mwomwen sounpadahk oh Parisi ko ar doadoahngki kosonned me pid soangen daksiso uhdahn sapwung.​—Mad. 23:23.

Pil ni ahnsowo, mehn Suhs ko pil anahne pwain soangen daksis tohto ong mehn Rom ko me kin kaun irail. Karasepe, irail kan me sapwasapw anahne pwainki daksis en sapwarail kan mwohni de arail kepwe. Irail anahne pwainki uwen persent 20 lel 25. Pil mie ehu soangen daksis me emenemen mehn Suhs anahne pwain. Ih soangen daksis wet me Parisi ko kalelapak rehn Sises. Sises ketin kasalehda mwomwen atail pahn kilangwohng atail pwain daksis kan ni eh mahsanih: “Kumwail pwainohng Sihsar mehkan me ahn Sihsar, a ong Koht mehkan me sapwellimen Koht.”​—Mad. 22:15-22.

Pil ehu soangen daksis me aramas ako anahne pwain iei pweinen kepwe kan me kin kohlong de kohieisang nan wasa ko. Irail kin alehda pweinen daksis pwukat ni wasahn peidi en sohp kan, ni piris kan, ni kasang en ahl akan, de ni arail kin pedolong nan ehu kahnimw oh wasahn netinet kan.

Kahpwal en pwain daksis me aramas ako me mi pahn kaundahn Rom ahneki uhdahn laud. Emen soupoad en Rom, Tacitus, me mi ni mwehin kaundahn Nanmwarki Daipirius ni ahnsou me Sises ketiket sampah, nda: “Siria oh Sudia wiahda pekipek laud en katikala pweinen daksis kan pwehki e nohn apwal ong irail.”

Kahpwal pwukat pil laudla pwehki mwomwen arail kin rikada pweinen daksis kan. Mehmen me kihda mwohni keieu laud iei me pahn alehdi pwukoahn rik daksis. E uhd pahn doadoahngki ekei en kohla oh ale pweinen daksis kan sang aramas ako, oh irail pahn wiahiong wihn en daksis ko oh nainekihla. E mwomwen me mie sounrik daksis kei me kin doadoahk ong Sakies. (Luk 19:1, 2) Eri kitail kak wehwehki dahme kahrehda aramas ako kin kailongki soangen daksis wet oh pil kailongki sounrik daksis kan.