Pohl ntingihedi: “Pwe nin duwen kosonnedo, I melahr ong kosonnedo, pwe I en momour ong Koht.”​—Kal. 2:19.

Dahme Pohl ntingihedi kin dokedoke ire kesempwal ehu me e kawehwehiong mwomwohdiso kan nan kahnimw en Kalesia nan Rom. Ekei Kristian ko ahnekidahr madamadau en sounpadahk likamw kan. Irail pwukat kin padahngki me pwehn komourla, emen anahne kapwaiada Kosonned en Moseso, ahpw mehlel me pid sirkumsais. Ahpw Pohl ese me Koht solahr kupwurki me pwoson kan en sirkumsaisla. E kawehwehda mwahu duwen met oh kasansalehda me padahk ko likamw, oh e kakehlakahda pwoson en rie Kristian ko me kin pwoson sapwellimen Sises Krais meirong en pweipwei sapahlo.​—Kal. 2:4; 5:2.

Paipel mahsanih ni sansal me ni emen eh mehla, e sohte kin kehn mehkot. (Ekl. 9:5) Ni Pohl eh koasoia: “I melahr ong kosonnedo,” met wehwehki me e solahr mi pahn Kosonned en Moseso. Pohl kamehlele me sang ni eh pwoson meirong en pweipwei sapahlo, e kin “momour ong Koht.”

“Pwe nin duwen kosonnedo,” ahn Pohl irairo wekila. Ia duwen? E ahpwtehn kawehwehda me “aramas kin pwungla rehn Koht, kaidehn sang ni eh idawehn audepen kosonned, ahpw ihte sang ni eh pwoson Sises Krais.” (Kal. 2:16) Eri, Kosonnedo kapwaiada mehkot me uhdahn kesempwal. Pohl kawehwehda ong mehn Kalesia ko: “E kapatapatohng pwe dihp en sansalda, lao kadaudok me inowo wiawihkihda pahn pwarodo.” (Kal. 3:19) Ei, Kosonnedo uhdahn kasansalehda me aramas dipan oh soh unsek kan sohte kak kapwaiada Kosonnedo ni unsek, eri irail anahne meirong ehu me uhdahn unsek me pahn wiawi pak ehute. Eri, Kosonnedo kin kahluwalahng aramas akan ‘kadaudoko,’ me iei Krais. Sang ni emen eh kin pwoson Sises Krais, e kak pwungla rehn Koht. (Kal. 3:24) Pohl pwunglahr rehn Koht, pwehki nin duwen kosonnedo, e pwungki oh pwosonla Sises. Eri, Pohl “melahr ong kosonnedo” oh uhd “momour ong Koht.” E solahr mi pahn manaman en Kosonnedo, ahpw pahn manaman en Koht.

Pohl kasalehda soangen madamadauohte nan nah kisinlikowo ong mehn Rom ko. E koasoia: “Riei ko, kumwail pil mehsangehr Kosonnedo pwehki kahlap en Krais . . . Kitail saledeksangehr Kosonnedo pwehki atail mehsang dahme kin salihkitaildi.” (Rom 7:4, 6) Nan iren Paipelo oh pil nan Kalesia 2:19 kasalehda me Pohl sohte koasoakoasoia duwen emen eh kin mehla pwehki dipe kan pahn Kosonnedo. Ahpw e koasoakoasoia duwen emen eh kin saledekla. Ih oh pil meteikan duwehte ih solahr mi pahn manaman en Kosonnedo. Irail saledeklahr pwehki arail pwoson sapwellimen Krais pweipwei sapahlo.