1. Nin duwen me Eklesiasdes 7:20 mahsanih, ire mehlel dahieu me Nanmwarki Solomon kasalehda?

 NANMWARKI Solomon ntingihedi: “Sohte aramas emen nin sampah me kin wia me pwung ahnsou koaros oh sohte sapwungala pak ehu.” (Ekl. 7:20) Met uhdahn mehlel! Kitail koaros aramas dipan kei. (1 Sohn 1:8) Kitail koaros anahne mahk sang rehn Koht oh sang rehn meteikan.

2. Ia atail pepehm ni kompoakepatail keren men eh mahkohng kitail?

² Ele ke taman ahnsou ehu me ke kansensuwedihada kompoakepahmw keren men. Ke men kapwungala oh kamwahwihala nanpwungamwa, eri ke uhdahn peki mahk reh. Ia omw pepehm ni ahnsou me kompoakepahmwo mahkohng uhk? Nsenamwahula? Ei uhdahn, oh ke pil peren!

3. Dahme kitail pahn koasoiapene nan iren onop wet?

³ Kitail men Siohwa en ketin wia kompoakepatail me keieu keren, ahpw ekei pak kitail kin nda de wia soahng kan me kin kansensuwedihala ih. Ahpw, dahme kahrehda kitail kak kamehlele me Siohwa ketin kupwurki mahkohng kitail? Ia wekpeseng en ni Siohwa eh kin ketin mahkohng emen oh ni atail kin mahkohng emen? Oh ihs me Koht kin ketin mahkohng?

4. Dahme kahrehda kitail kak kamehlele me Siohwa ketin kupwurki mahkohng kitail?

⁴ Paipel kamehlelehiong kitail me Siohwa ketin kupwurki mahkohng kitail. Ni ahnsou me Siohwa ketin kawehwehiong Moses duwen pein ih ni Nahna Sainai, E ketin poaronehla tohnleng men en ndaiong: “Ngehi, KAUN-O, Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel. I kin  kapwaiada ei inou ong me ngeder, oh kin mahkohng me suwed kan oh me dipan akan.” (Eks. 34:6, 7) Siohwa iei Koht emen me ketin kadek oh kalahngan, me kin ahnsou koaros kupwurki mahkohng me dipan akan me koluhla.​—Neh. 9:17; Mel. 86:15.

5. Nin duwen me Melkahka 103:13, 14 mahsanih, dahme Siohwa ketin wia pwehki eh uhdahn ketin mwahngih duwen kitail?

⁵ Pwehki ih me Sounkapikpatail, Siohwa ketin mwahngih soahng koaros duwen kitail. E kapwuriamwei en medewe me Siohwa kin ketin mwahngih soahng koaros duwen emenemen aramas nin sampah. (Mel. 139:15-17) Eri e kak ketin mahsanih atail soh unsek koaros me kitail sohsohki sang atail pahpa nohno. E pil ketin mwahngih dahme kin wiawi nan atail mour me kahrehiong kitail en wiahla soangen aramas dah kei rahnwet. Eri, dahme met kamwakid ih en ketin wia? E kamwakid ih en ketin kasalehda mahk kalahngan ong kitail.​—Mel. 78:39; wadek Melkahka 103:13, 14.

6. Ia duwen Siohwa eh ketin kadehdehda me e kupwurki mahkohng kitail?

⁶ Siohwa ketin kadehdedahr me e ketin kupwurki kasalehda mahk. E ketin mwahngih me pwehki dahme tepin ohlo wiahda, kitail koaros dipan oh pahn ehu rahn mehla. (Rom 5:12) Sohte mehkot kitail kak wia pwe kitail de meteikan en dehr wiahda dihp oh mehla. (Mel. 49:7-9) Ahpw, atail Koht limpoako ketin poakeikitailla oh ketin wia mehkot pwehn kapitkitailla. Dahme e ketin wia? Sohn 3:16 kasalehda me Siohwa ketin poaronehdo sapwellime Iehroso pwehn pwoukinkitailla. (Mad. 20:28; Rom 5:19) Sises ketin pwoula, a kaidehn kitail, pwehn kapitala koaros me kin pwoson ih. (Ipru 2:9) E uhdahn kamedek ong Siohwa ni eh ketin mahsanih sapwellime Ohl kompoakeo eh lelohng weirek laud oh kamakamala ni ahl kanamenek ehu! Siohwa sohte pahn ketin mweidohng sapwellime Ohlo en mehla ma E sohte kupwurki mahkohng kitail.

7. Ihs ekei aramas nan Paipel me Siohwa ketin mahkohng?

⁷ Paipel kasalehda mehn kahlemeng mwahu tohto en irail kan me Siohwa ketin mahkohng. (Ep. 4:32) Ihs me ke medewehda? Ele ke medewe duwen Nanmwarki Manase. Ohl suwed menet wiahda dihp laud mwohn  silangin Siohwa. E kin kaudokiong Koht likamw akan oh kangoange meteikan en pil wia duwehte. E kemehla pein nah seri kan oh meirongkihong koht likamw kan. E pil wia laudsang met ni eh kihlong sansal en koht likamw men nan sapwellimen Siohwa tehnpas sarawio. Paipel mahsanihki ih: “E wiahda dihp lapalap ong KAUN-O oh kahngiangihadahr.” (2 Kron. 33:2-7) Ahpw, ni ahnsou me Manase uhdahn koluhla, Siohwa ketin mahkohng. Koht pil ketin mweidohng ih en pwurehng wiahla nanmwarki. (2 Kron. 33:12, 13) Ele ke pil medewehda duwen Nanmwarki Depit me wiahda dihp laud mwohn silangin Siohwa, me iangahki kamwahl oh kamaramas. Ahpw, ni Depit eh wehkada dipe ko oh uhdahn koluhla, Siohwa pil ketin mahkohng. (2 Sam. 12:9, 10, 13, 14) Eri, kitail kak kamehlele me Siohwa kin ketin kupwurki mahkohng kitail. Oh kitail pil pahn kilang me ni Siohwa eh kin ketin kasalehda mahk, e sohte duwehte ni aramas ar kasalehda mahk.

8. Dahme kahrehda sapwellimen Siohwa mahk siksang koaros?

⁸ Siohwa iei “Sounkopwung en sampah pwon.” (Sen. 18:25) Sounkopwung mwahu men anahne wehwehki mwahu kosonned. Siohwa me iei atail “Sounkopwung,” oh e ketin wehwehki mwahu kosonned pwehki ih me “Sounwiahda Kosonned.” (Ais. 33:22, NW) Sohte me uhdahn ese dahme pwung oh sapwung duwehte Siohwa. Dahme sounkopwung mwahu men pil anahne? E anahne ese ire mehlel kan koaros duwen irair ehu mwohn eh wiahda pilipil. Eri Siohwa me Sounkopwung keieu mwahu, pwehki e kin ahnsou koaros ketin mwahngih ire mehlel kan koaros.

9. Ire dah kan me Siohwa ketin mwahngih ni eh kin pilada en mahkohng emen de soh?

⁹ Weksang aramas me wia sounkopwung, Siohwa kin ahnsou koaros ketin mwahngih ire mehlel koaros duwen irair ehu. (Sen. 18:20, 21; Mel. 90:8) E sohte kin ketin kopwung sang ni dahme aramas kin kilang de rong. E uhdahn ketin mwahngih irair en emen pwehki mwomwen aramaso eh wiawihda, mwomwen eh tikida, wasa me e kohsang, sukuhl me e ale, oh mwomwen eh madamadau oh pepehm. Siohwa pil kin ketin mwahngih mohngiong en aramas. E ketin wehwehki mwahu dahme kahrehda emen kin wia soahng ehu. Sohte mehkot me kak rirsang silangin Siohwa. (Ipru 4:13) Eri ni Siohwa eh kin ketin mahkohng aramas emen, met pwehki e ketin mwahngih ire mehlel koaros duwen ahn aramaso irair.

10. Dahme kahrehda kitail kak nda me sapwellimen Siohwa kadeik kin ahnsou koaros pwung oh pahrek? (Deuderonomi 32:4)

¹⁰ Sapwellimen Siohwa kadeik kan kin ahnsou koaros pwung oh pahrek. E sohte kin ketin lipilipilki aramas. Siohwa sohte kin ketin mahkohng emen pwehki e masamwahu, kepwehpwe, ndand, de e ahneki soangen koahiek tohto. (1 Sam. 16:7; Seims 2:1-4) Sohte me kak idingkihong Siohwa en ketin wia mehkot de pwainohng en ketin wia mehkot. (2 Kron. 19:7) Ni ahnsou me e kin ketin engiengda, e sohte kin ketin mweidohng met en kamwakid sapwellime pilipil kan. (Eks. 34:7) Siohwa ketin wia Sounkopwung keieu mwahu pwehki e ketin mwahngih soahng koaros duwen kitail oh atail irair.​—Wadek Deuderonomi 32:4.

11. Ni ahl dah me sapwellimen Siohwa mahk weksang mwomwen aramas kin mahkohng meteikan?

¹¹ Sounnting en Palien Paipel ni lokaiahn Ipru ese me sapwellimen Siohwa mahk weksang  ahn aramas. Nan ekei wasa, irail kin doadoahngki lokaiahn Ipru ehu me ehu pwuhk koasoia “kin kadoadoahk ongete mwomwen Koht eh kin ketin mahkohng me dipan akan. Lepin lokaiao sohte kasalehda mwomwen soh itar en mwomwen aramas kin mahkohng meteikan.” Siohwa kelehpw me sapwellimanki manaman en mahkohng douluhl emen me koluhla. Ia imwilahn Siohwa eh kin ketin mahkohng kitail?

12-13. (a) Dahme aramas emen pahn ahneki ni Siohwa eh ketin mahkohng ih? (b) Ia uwen werei en kamwahu kan en sapwellimen Siohwa mahk?

¹² Ni atail pwungki me Siohwa ketin mahkohng kitail, kitail kin ahneki “ahnsoun nsenamwahu,” iangahki popohl oh nsenmwakelekel. Kitail kak ahnekihte pepehm pwukat ma pein “Siohwa” ketin mahkohng kitail. (Wiewia 3:19) Ni Siohwa eh kin ketin mahkohng kitail, e ketin mweidohng kitail en pwurehng wiahla kompoakepah, oh mwomwen me kitail sohte douluhl wiahda dihp.

¹³ Mwurin Siohwa eh ketin mahkohng kitail, e sohte pahn ketin pwurehng kapwukoahki de kalokehki kitail dipatailo. (Ais. 43:25; Ser. 31:34) “Duwen mesenleng oh kepinleng ara dohpeseng,” Siohwa kin ketin kadohwaneweisang kitail dipatail kan. * (Mel. 103:12) Ni atail kin medewe uwen laud en Siohwa eh kin ketin mahkohng kitail, kitail pahn uhdahn kalahnganki oh wauneki ih. (Mel. 130:4) Ahpw ihs me Siohwa pahn ketin mahkohng?

14. Dahme kitail sukuhlki duwen Siohwa eh kin ketin pilada en mahkohng emen?

¹⁴ Kitail sukuhlkiher me Siohwa sohte kin ketin pilada ma e pahn ketin mahkohng emen de soh pwehki uwen laud en dihp me aramaso wiahda. Kitail pil sukuhlkier me nin duwen Sounkapikpatail, Sounwiahda Kosonned, oh Sounkopwung men, Siohwa kin ketin doadoahngki sapwellime erpit ni eh ketin pilada ma e pahn ketin mahkohng emen. Ahpw soahng dah kan me Siohwa kin ketin medemedewe?

15. Nin duwen me Luk 12:47, 48 mahsanih, ia ehu kahrepe me Siohwa kin ketin medemedewe?

¹⁵ Ehu me Siohwa kin ketin medemedewe iei ma me dipano ese me dahme e wiao sapwung. Sises ketin kasalehda met ni sansal nan Luk 12:47, 48. (Wadek.) Ni emen eh nsenki wia  mehkot suwed, ni eh uhdahn ese me Koht sohte ketin kupwurki dahme e wiewiao, e wiadahr dihp laud ehu. Ele Siohwa pahn ketin pilada en sohte mahkohng aramaso. (Mark 3:29; Sohn 9:41) Ahpw, kitail kak nda me ekei pak kitail ese me dahme kitail wiahdao sapwung. Kitail kak koapworopworki me Siohwa pahn ketin mahkohng kitail? Ei! Pwehki mie ehu kahrepe tohrohr me Siohwa pil kin ketin medemedewe.

16. Dahkot koluhla, oh dahme kahrehda met kesempwal ma kitail men Siohwa en ketin mahkohng kitail?

¹⁶ Pil ehu me Siohwa kin ketin medemedewe iei ma me dipano uhdahn koluhla. Ia wehwehn en koluhla? En koluhla kin wehwehki “en wekidala madamadau oh wiewia.” E kin pidada ma aramaso pehm me e koluhla oh nsensuwedkihla soahng suwed me wiahdao, de e sohte wiahda dahme pwung me e anahne wia. Emen me koluhla kin nsensuwedla kaidehn ihte pwehki soahng suwed kan me e wiahda, ahpw pwehki e mweidohng eh nanpwungmwahu rehn Siohwa en luwetala kahrehda e wia soahng suwed kan. Tamanda me Nanmwarki Manase oh Depit wiahda dihp laud kan, ahpw Siohwa ketin mahkohng ira pwehki ira uhdahn koluhla. (1 Nan. 14:8) Ei, kitail anahne kadehdehiong Siohwa me kitail koluhla pwe Siohwa en ketin mahkohng kitail. Ahpw e sohte itar en nsensuwedkihlahte dihp me kitail wiahda. Kitail anahne wia laudsang. * Siohwa pil kin ketin medemedewe duwen met.

17. Ia wehwehn en wekila, oh dahme kahrehda e kesempwal ma kitail sohla men pwurehng wia atail dihp en mahso ko? (Aiseia 55:7)

¹⁷ Pil ehu me Siohwa kin ketin medemedewe iei ahn emen wekila. Wekila wehwehki emen anahne uhdihsang wia soahng suwed kan oh mourki mour me Siohwa ketin kupwurki. (Wadek Aiseia 55:7.) Aramaso anahne wekidala eh madamadau pwehn kak pahrekiong sapwellimen Siohwa madamadau. (Rom 12:2; Ep. 4:23) E anahne koasoanehdi teng en uhdihsang eh madamadau oh wiewia sapwung kan en mahso. (Kol. 3:7-10) Ei, atail pwoson meirong en Krais iei me kahrehda Siohwa en ketin mahkohng kitail oh kamwakeleikitailsang dipatail kan. Siohwa pahn ketin mahkohng kitail pwehki meirongo ni eh mahsanih  atail kin nantihong en wekidala atail tiahk kan.​—1 Sohn 1:7.

18. Dahme kitail koasoiapenehr duwen sapwellimen Siohwa mahk?

¹⁸ Kitail pahn ekis kousapahlih soahng kan me kitail koasoiapenehr. Nan sampah oh nanleng, Siohwa me kin keieu ketin kasalehda mahk. Dahme kahrehda kitail kak ndahki met? Keieu, e kin ahnsou koaros ketin onopada en mahk. Keriau, e ketin mwahngih soahng koaros duwen kitail. E uhdahn ketin mwahngih mwomwen atail wiawihda, oh ih me keieu warohng en ketin pilada ma kitail uhdahn koluhla. Oh kesiluh, ni Siohwa eh kin ketin mahkohng kitail, e kin ketin irisala dipatail kan koaros. Met kahrehiong kitail en ahneki nsenmwakelekel oh paiekihda sapwellime kupwuramwahu.

19. Mendahki kitail soh unsek oh pahn pousehlahte wiahda dihp, dahme kahrehda kitail kak peren?

¹⁹ Ei mehlel, kitail sohte unsek, eri kitail pahn pousehlahte wiahda dihp. Ahpw, kitail kak ale kamweit sang dahme ntingdi nan Insight on the Scriptures, Volume 2, pali 771, me koasoia: “Siohwa kin ketin kasalehda mahk kalahngan oh ketin mwahngih me sapwellime ladu kan luwet, eri irail sohte anahne nsensuwed ahnsou koaros pwehki irail soh unsek oh kin wiahda sapwung kan. (Mel. 103:8-14; 130:3) Ma irail kin wia uwen arail kak en mour pahrekiong sapwellimen Koht koasoandi kan, irail kak peren. (Pil. 4:4-6; 1 Sohn 3:19-22).” Met kin uhdahn kangoangei kitail!

20. Dahme kitail pahn koasoiapene nan iren onop en mwuhr?

²⁰ Kitail uhdahn kalahnganki me Siohwa kin ketin onopada en mahkohng kitail ni atail kin uhdahn koluhkihla dihp kan me kitail wiahda. Ahpw, ia duwen atail kak alasang sapwellimen Siohwa mahk? Ni ahl dah kan me atail kin kasalehda mahk eh duwehte sapwellimen Siohwa mahk, ahpw ni ahl dah me e wekpeseng? Dahme kahrehda e kesempwal en wehwehki wekpeseng wet? Iren onop en mwuhr pahn sapengala peidek pwukat.