ONG mehn Ipru kan nan Sapwen Inowo, ehu sounpar kin tepida wadawad ni ahnsou me irail kin tepida mwetuwel oh kamwarak werentuhke, me met kitail kin kahdaneki September/October.

Aramas kak kasawihda uwen reirei en sounpwong ehu sang ni pidek en maramo, me kin reireiki rahn 29 de 30. Irail kin kasawihda uwen reirei en sounpar ehu sang ni pidek en ketipino. Ahpw pidek en maramo nan sounpar ehu, kin mwotomwotsang pidek en ketipino erein sounpar ehu. Eri irail anahne wiahda ahl ehu me wiepe riau pwukat en kak doadoahkpene. Irail kin wia met sang ni arail kapatahiong rahn kei de sounpwong ehu, ele mwohnte ehu sounpar pahn tepida. Ni ahl wet, kalendero pahn pahrekiong ahnsoun mwetuwel oh kamwarak werentuhke.

Ahpw ni mwehin Moseso, Koht ketin padahkihong mehn Israel ko me Abib de Nisan, iei me pahn wia tepin sounpwong en pahr ehu. (Eks. 12:2; 13:4) Met wehwehki nan March/April. Nan sounpwong en Nisan, mehn Israel ko pahn wia kamadipw, oh nan kamadipwo irail pahn meirongkihong Siohwa ekei tepin wahn parli kan.​—Eks. 23:15, 16.

Emen ohl saman, Emil Schürer, koasoia nan nah pwuhko The History of the Jewish People in the Age of Jesus Christ, (175 B.C.–A.D. 135) me e mengei en esehda ia duwen arail pahn kapatahiong sounpwong ehu nan kalendero. E pil koasoia: “Kamadipw en Pahsohpao, me irail anahne kasarawih nan sounpwong en Nisan (Nisan 14), ni ahnsoun maram mat, anahne ahnsou koaros wiawi mwurin rahno me reirei en rahn oh nipwong duwepenehte. Eri, ma irail esehda ni imwin pahro me Pahsohpa pahn wiawi mwohn rahno, mehn Suhs kan kin kapatahiong sounpwong ehu mwohn Nisan.”

Sounkadehdehn Siohwa kan kin idawehn koasoandi wet pwehn ese iahd me irail pahn wia Sak en Soutik en Kauno, me kin wiawi nan sounpwong en March/April oh pahrekiong Nisan 14 nan nein mehn Ipru kan kalender. Mwohn ahnsowo eh pahn wiawi, pakair kin kowohng mwomwohdiso kan koaros nan sampah pwon. *

Ahpw ia duwen mehn Ipru kan kin ese iahd me ehu sounpwong pahn nekila oh iahd me e pahn tepida? Rahnwet ke kak kilang nan kalender de kalender me mi nan noumw sehlpwohn de tablet ape pwehn ese met. Ahpw mahso nan Paipel, e sohte mengei en wia met.

Ni mwehin Nohao, sounpwong kan kin reireikihte rahn 30. (Sen. 7:11, 24; 8:3, 4) Mwuhr, nan nein mehn Ipru ko kalendero, re sohte wiahda pwehn lel rahn 30. Nan kalender en mehn Ipru ko, ehu sounpwong kin tepida ni ahnsou me irail kilang maramo pwul. Sang ahnsowo lel sounpwongo mwuri, pahn reireiki rahn 29 de 30.

Ei ahnsowo, Depit oh Sonadan koasoiapene duwen sounpwong ehu, ni ara nda: “Lakapw iei rahn Sarawien Maram Pwul.” (1 Sam. 20:5, 18) Eri e mwomwen me nan ara ahnsowo, aramas eseier mwohn sounpwong ehu eh tepida. Ia duwen men Israel men eh kin ese duwen met? Pwuhken kosonned oh tiahk en mehn Suhs kan me irail kahdaneki Mishnah, kasalehda ekei ire duwen met. E kasalehda me mwurin mehn Suhs ko pwurasang arail kalipilipala Papilon, pwihn en Sanedrino (mwoalen kopwung lapalap en mehn Suhs ko) kin iang koasoanehdi iahd me sounpwong ehu kin tepida. Erein sounpwong isuh me irail kin wia arail kamadipw kan, pwihn wet kin tuhpene ni 30 en sounpwongo. Irail ohl pwukat kin iang koasoanehdi iahd me sounpwongo mwuri pahn tepida. Ia duwen arail kin wia met?

Ohl akan me mi ni kumwukumw kan nan Serusalem, pahn kilikilang iahd me maram pwulo pahn tepida. Ni ahnsou me irail kilangada, irail pahn pakairkilahng pwihnen Sanedrino. Ni pwihn wet ar medewe me mihier mehn kadehde me irail kilangada maram pwulo, irail pahn pakairki me ehu sounpwong tepidahr. Ahpw ia duwen ma  depwek kan de toahkoi kahrehda ohl ako en sohte kak kilang maram pwulo? Irail eri pahn nda me sounpwongo pahn reireiki rahn 30 oh sounpwongo mwuri kak tepida.

Pwuhken Mishnah kin kawehwehda me irail kin pakairki dahme pwihnen Sanedrino koasoanehdi sang ni arail wiahda kisiniei kan pohn Nahnahn Olip, me karanih Serusalem. Oh ekei wasa me ile nan Israel, irail kin wiahda lapalahn kisiniei kan pwehn kihpeseng rohng wet. Ahpw nan sounpar kan mwurin mwo, irail kin kadarpeseng soun wa rohng kan. Mehn Suhs kan nan Serusalem, nan Israel pwon oh pil nan kousapw kan wasa ko kin ese iahd me ehu sounpwong kin tepida. Eri irail koaros kin wia arail kasarawi kan nan ahnsou ehute.

Nan kakoano kak seweseiuk en wehwehki sounpwong kan, kasarawi kan, oh ahnsou kan en mehn Israel ko.