1. Dahme kahrehda ekei aramas warohng ale wahu, oh dahme kitail pahn sukuhlki nan iren onop wet?

 IA DUWEN atail kin kasalehda atail wauneki aramas akan? Kitail kin wia met ni atail kin kasalehda atail kesempwalki oh kahkahki irail. Kitail kin kalapw wauneki irail kan me kin wia soahng kan me kahrehiong irail en warohng ale wahu de irail kan me ahneki pwukoa kesempwal. Nan iren onop wet, kitail pahn sukuhlki Ihs me kitail anahne wauneki oh dahme kahrehda.

2, 3. (a) Dahme kahrehda Siohwa me keieu warohng sapwellimanki wahu? (Menlau kilang tepin kilel.) (b) Ihs Sihmpwulo me kileldi nan Kaudiahl 5:13, oh dahme kahrehda kitail anahne wauneki ih?

² Kaudiahl 5:13 mahsanih me Mehmeno “me ketiket nan mwoale” oh “Sihmpwulo” warohng sapwellimanki wahu. Mehmeno “me ketiket nan mwoale” iei Siohwa. Nan Kaudiahl irelaud 4, tohnleng kan kasalehiong kitail ehu kahrepen Siohwa, “me ketin ieias poatopoat,” eh ketin warohng sapwellimanki wahu. Re nda: “Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros,  oh pwehki kupwuromwien, me mehkoaros mihmiehki oh momourki.”​—Kaud. 4:9, 11.

³ “Sihmpwulo” me kileldi nan Kaudiahl 5:13 iei Sises Krais. Ia duwen atail ese met? Ni ahnsou me Sises ketiket sampah, aramas akan kin ekerkin ih “Sihmpwul en Kohto me kin ketikihsang dipen sampah koaros. ” (Sohn 1:29) Met uhdahn wia kahrepe mwahu ehu en wauneki ih. Ihs nanpwungen nanmwarki kan me kupwurki mehkihla sapwellime kan nin duwen pweinen pweipwei sapahl ehu? Sises warohng sapwellimanki wahu pwehki ih me “Nanmwarkien nanmwarki kan, oh Kaun en kaun akan.” (1 Tim. 6:14-16) Ele ke ahneki soangen pepehmohte me tohnleng kehlail kid kid kei ahneki ni arail koulki: “Sihmpwul me kamakamalahro warohng sapwellimanki manaman, kepwe, erpit, roson, wahu, lingan, oh kaping!”​—Kaud. 5:12.

4. Dahme kahrehda e wia elen loalokong kitail en wauneki Siohwa oh Krais?

⁴ Sohn 5:22, 23 mahsanih me Siohwa ketin idihadahr Krais pwehn wia sounkadeik en aramas koaros. Met iei uhdahn kahrepeo kitail en wauneki Sises. Oh ni atail wia met, kitail pil kin wauneki Siohwa. Kitail kak ahneki mour soutuk ni atail pilada en wauneki Sises oh Semeo.—Wadek Melkahka 2:11, 12.

5. Dahme kahrehda aramas koaros warohng ale wahu?

⁵ Koht ketin wiahda aramas “rasehng ih.” (Sen. 1:27) Met wehwehki me pali laud en aramas akan ahneki koahiek en kasalehda soangen irair kaselel kohte me Koht sapwellimanki. Karasepe, aramas akan kak kasalehda limpoak, kadek, oh pepehm en poakehla meteikan. Aramas akan pil kepikipikda en mie kadeikpen loalarail, me iei koahiek en ese dahme pwung de sapwung, mehlel de likamw, konehng de sohte konehng. (Rom 2:14, 15) Pali laud en aramas akan kin perenki soahng kan me mwakelekel oh kaselel oh men ehuong meteikan ni popohl. Met sohte kapwuriamwei, pwehki Siohwa iei Koht en minimin oh popohl. E sansal me aramas koaros kepikipikda ahneki koahiek en kahlemengih Siohwa ni soangen ahl kei. Pwehki kahrepe wet, re warohng ale wahu.​—Mel. 8:5.

6, 7. Ia duwen Sounkadehdehn Siohwa kan ar weksang me tohto?

⁶ Kitail ese me kitail anahne wauneki aramas teikan, ahpw ele e pahn apwal ong kitail en ese ia duwen oh ia uwen atail en kasalehiong irail wahu. Met pwehki pali laud en aramas soh unsek kan kin uhdahn mwekidki madamadau en ahn Sehdan sampah. Aramas tohto kin wiahki meteikan me re nohn kesempwal. Re sohte wauneki aramas teikan ni ahl me Siohwa ketin kupwurki, ahpw re kin nohn wauneki irail de wiahki irail koht kei. Ele re kin alasang mwomwen likou oh wiewiahn kaun en politik oh pelien lamalam kan, sounmwadong kan, sounwia kasdo kan, oh aramas ndand teikan.

⁷ Kristian mehlel kan ese me e pahn sapwung en nohn wauneki aramas akan ni ahl wet. Nanpwungen aramas koaros sangete mahs leledo ahnsou wet, Sises kelehpw me ketin kasalehda mehn kahlemeng unsek ong kitail en alasang. (1 Pit. 2:21) Kitail anahne tamataman me “aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.” (Rom 3:23) Sohte aramas emen me warohng kitail en kaudokiong. Ni atail kin kawauwih aramas akan nohn daulihala, met kin kansensuwedihala Siohwa.

8, 9. (a) Ia ahn Sounkadehdehn Siohwa kan ar madamadau ong kaun en koperment kan? (b) Soangen ahnsou dah me kitail sohte kin peikiong kaun pwukat?

⁸ Mie ekei aramas me warohng ale wahu pwehki arail pwukoa. Karasepe, medewehla duwen kaun en koperment kan oh dahme re kin wiahiong uhk. Re kin kihda sawas pwe wasa  kan en sohte keper oh pil kin apwalihala anahn en tohn arail wasa. Mie kamwahu tohto me kin kohsang arail doadoahk. Wahnpoaron Pohl nda me kitail anahne wiahki kaun en koperment pwukat nin duwen kaun kei me ahneki “pwungen wehi kan.” E pil nda me kitail anahne idawehn arail kosonned kan: “Kumwail kihong irail amwail daksis kan; kumwail pwainohng irail amwail daksis en moahng oh daksis en amwail dipwisou kan; oh kumwail wauneki irail koaros.”​—Rom 13:1, 7.

⁹ Nin duwen Sounkadehdehn Siohwa kan, kitail kin wia uwen atail kak en kasalehda wahu ong kaun en koperment kan. Ei mehlel, tiahk en sahpw koaros kin wekpeseng, eri dahme kaun kan kin kasik sang kitail ele kin wekpeseng nan ehuehu sahpw. Ahpw, kitail kin peikiong kaun en koperment kan ni arail kin wia arail doadoahk. Ahpw, ma re ndaiong kitail en wia mehkot me kak kahrehiong kitail en sapeikiong Siohwa, kitail sohte kak wia met. Nan soangen irair pwukat, kitail kin peikiong oh kawauwih Siohwa a kaidehn aramas.​—Wadek 1 Piter 2:13-17.

10. Ia duwen sapwellimen Siohwa ladu kan mahsie ar wia mehn kahlemeng mwahu ong kitail rahnwet?

¹⁰ Kitail kak sukuhlki mehn kahlemeng en sapwellimen Siohwa ladu kan mahsie, me kin kasalehda arail wauneki koperment oh kaun kan. Sosep oh Mery wia mehn kahlemeng mwahu. Ni mehn Rom kan ar men ese aramas depe me kousoan nan sahpwo, Sosep oh Mery seiloakla nan Pedleem pwe ira en iang ntingdi mendahki Mery kereniong neitik. (Luk 2:1-5) Wahnpoaron Pohl pil wia mehn kahlemeng mwahu en emen me wauneki kaun akan. Ni ahnsou me aramas akan karaunehki me e wiahda mehkot sapwung, e kasalehda wahu oh doarehla pein ih mwohn Nanmwarki Erod Akripa oh Pestus, me wia kepina en Sudia me mi pahn kaundahn Rom.​—Wiewia 25:1-12; 26:1-3.

11, 12. (a) Dahme kahrehda kitail sohte kin kasalehda wahu tohrohr ong kaunen pelien lamalam kan? (b) Dahme wiawi ni Sounkadehde men nan Austria eh kasalehda wahu ong sounpolitik men?

¹¹ Ahpw ia duwen kaun en pelien lamalam akan? Kitail anahne kasalehiong irail wahu tohrohr? Kitail kin kasalehiong irail wahu me kitail pil kin kasalehiong meteikan. Ahpw e pahn sapwung en kasalehiong irail wahu tohrohr, mehnda ma re pil kasik. Dahme kahrehda? Pwehki pelien lamalam likamw kan sohte kin padahngki dahme mehlel duwen Koht oh sapwellime Mahseno, Paipel. Sises ketin kauwe sounpadahk en kaudok likamw kan oh mahsanih me re mwalaun oh wia kaun suwed kei. (Mad. 23:23, 24) Weksang met, e sohte pahn sapwung en kasalehda wahu tohrohr ong kaun en koperment kan. Re kin ekei pak sewese kitail pwehki atail kin wia met.

¹² Emen me wia met iei Dr. Heinrich Gleissner, me wia emen sounpolitik nan Austria. Erein Mahwen Keriau en Sampah, Nazi kan salihedi ih. Ni eh iangada kisa ieu me kohkohlahng ni imweteng ehu, e tuhwong Leopold Engleitner, me wia Sounkadehde eimah men sang Austria. Ni wahu, Brother Engleitner kawehwehda duwen dahme e kin kamehlele ong Dr. Gleissner, me wie rongorong kanahieng. Ni ahnsou me mahweno uhdi, Gleissner kin kalapw doadoahngki eh manaman nin duwen sounpolitik men pwehn sewese Sounkadehde kan nan Austria. Ele ke ese duwen ekei karasepe teikan en soahng mwahu kan me wiawi pwehki Kristian kan ar kasalehda arail wauneki kaunen koperment kan.

13. Ihs me uhdahn warohng ale wahu sang kitail, oh dahme kahrehda?

¹³ Riatail Kristian kan warohng ale wahu sang kitail. Ahpw mehlel ong irail kan me kin tiengla mwowe, duwehte elder kan, sounapwalih kan  me kin seiloak, Pwihn me Kin Apwalih Ohpis en Sounkadehdehn Siohwa kan, oh pil Pwihn me Kin Apwalih Mwomwohdiso nan Sampah Pwon. (Wadek 1 Timoty 5:17.) Irail koaros kin apwalihala anahn en sapwellimen Koht aramas akan, oh Paipel kin kahdanekin irail “kisakis en aramas akan.” (Ep. 4:8, NW) Eri e wia kahrepe mwahu ehu kitail en wauneki irail, sohte lipilipil mehnia sahpw re kohsang ie, kasukuhl dah me re ale, ma aramas wiahki irail lapalap de soh, de ia uwen mwohni me re naineki. Tepin Kristian kan kasalehda mehn kahlemeng mwahu ong kitail. Re kin wauneki ohl akan me kin tiengla mwowe, oh rahnwet kitail pil kin wia duwehte. Ni ahnsou me kitail kin mi rehn ohl pwukat, kitail sohte kin wiahki me irail tohnleng kei. Ahpw kitail kin wauneki irail pwehki arail doadoahk laud oh re pil aktikitik.​—Wadek 2 Korint 1:24; Kaudiahl 19:10.

14, 15. Ia duwen elder kan ar weksang tohtohn kaunen pelien lamalam kan?

¹⁴ Soangen elder pwukat kin duwehte sounsilepen sihpw aktikitik kan. Re sohte men aramas akan en wiahkin irail aramas ndand kei. Eri re uhdahn weksang kaunen pelien lamalam tohto en rahnwet oh pil ni mwehin Siseso. Sises mahsanih duwen kaunen pelien lamalam pwukat: “Re kin mwahuki mwohd lempahntamw ni kamadipw kan oh mwohndi nan dewen me lapalap akan nan sinakoke kan. Re kin anahne aramas en poaridi oh rahnmwahwih irail nan wasahn pokon kan.”​—Mad. 23:6, 7.

¹⁵ Elder kan kin peikiong dahme Sises mahsanih: “Kumwail dehr kin men aramas akan en kin ekerkin kumwail ‘Sounpadahk,’ pwe kumwail koaros kin wia pirien ehu, oh amwail sounpadahk metehmen. Kumwail dehr pil ekerki emen nin sampah ‘Sahm,’ pwe Samamwail metehmen me ketiket nanleng. Kumwail dehr pil ngoangki aramas akan en wiahkin kumwail arail ‘Kaun,’ pwe amwail kaun metehmen, iei Mesaia. Eri, me keieu lapalap rehmwail, ih me pahn wia amwail sounpapah. Pwe me kin aklapalap pahn tikitikla; oh me kin aktikitik pahn lapalapala.” (Mad. 23:8-12) Ni elder en mwomwohdiso kan nan sampah pwon ar kin kasalehda aktikitik oh peikiong dahme Sises mahsanih, riarail Kristian kan pahn poakohng oh wauneki irail.

16. Dahme kahrehda kitail anahne pousehlahte doadoahk laud pwehn kasalehda wahu?

¹⁶ Ele kitail anahne ahnsou laud en sukuhlki ia duwen atail en wauneki meteikan. Met pil mehlel ong tepin Kristian kan. (Wiewia 10:22-26; 3 Sohn 9, 10) Ahpw mie katepen atail wia met. Ni atail kin wauneki meteikan ni ahl me  Siohwa ketin kupwurki kitail en wia, kitail pahn ale kapai tohto.

17. Ia ekei kamwahu kan me kohsang atail wauneki irail kan me ahneki manaman?

¹⁷ Ni atail kin kasalehda wahu ong irail kan me ahneki manaman nan atail wasa, re kin uhki atail pwuhng en kalohk. Ele re pahn ahneki madamadau pwung ong atail doadoahk en kalohk. Met me wiawi sounpar kei samwalahro nan Sehmen ni ahnsou me pioneer men me adaneki Birgit kohla ni ahn nah serepeino kesepwilo. Sounpadahk ko ndaiong Birgit me re perenki me mie seri en Sounkadehde kan nan arail sukuhlo erein sounpar tohto. Re medewe me seri en Sounkadehde kan kin kahrehiong sukuhlo en wia wasa ehu me uhdahn mwahu. Birgit ndaiong irail, “Nait seri kan kin ale kasukuhl en idawehn sapwellimen Koht koasoandi kan me pid tiahk mwahu, oh met pil iangahki arail en kasalehda wahu ong sounpadahk kan oh kahkahki irail.” Emen sounpadahk nda me ma seri koaros duwehte Sounkadehde kan, e pahn mengei en kasukuhlih irail. Re ahneki madamadau pwung ong seri en Sounkadehde kan me kahrehda wihk kei mwuri, emen sounpadahk ko towehda mihting tohrohr ehu.

18, 19. Dahme kitail anahne tamataman ni atail kin kasalehda wahu ong elder kan?

¹⁸ Kaweid oh ire mehlel kan me dierek nan Mahsen en Koht kak sewese kitail en wehwehki ia duwen atail en wauneki elder kan nan mwomwohdiso. (Wadek Ipru 13:7, 17.) Kitail kak oh anahne kapingahki irail arail doadoahk laud. Ni atail kin peikiong kaweid me re kin kihda, met pahn sewese elder kan en papah ni peren. Paipel mahsanih me kitail pil anahne alasang arail pwoson. Ahpw met sohte wehwehki me kitail anahne ni oaritik alasang mwomwen ahn elder “lapalap” men eh kin likou, lokaia, oh padahk. Ma kitail wia met, ele e pahn mwomwen me kitail kin idawehn aramas akan a kaidehn Krais. Kitail en dehr manokehla me elder kan pil duwehte kitail me sohte unsek.

¹⁹ Ni atail kin wauneki elder kan oh sohte wiahkin irail aramas ndand kei, met pahn sewese irail. Ia duwen? E pahn mengei ong irail en kolokol arail irair en aktikitik oh soikala medewe me re mwahusang meteikan de medewe me dahme re wia kin ahnsou koaros pwung.

20. Ia duwen atail kin wauneki meteikan eh wia kamwahu ehu ong kitail?

²⁰ Atail kin kasalehda wahu ong meteikan kin sewese kitail en soikala wia aramas roporop kei oh sewese kitail en kolokol atail irair en aktikitik ni meteikan ar kin kasalehda me re kesempwalki kitail. E pil wia mehn perepatail pwehki e kin sewese kitail en dehr dipekelekel ma emen me kitail wauneki wia mehkot me kansensuwedihala kitail. Pil ehu kamwahu iei e kin sewese kitail en miniminiong sapwellimen Siohwa pwihn. Pwihn wet sohte kin kasalehda wahu me nohn daulihala ong aramas sohte lipilipil, mehnda ma aramas ako kin de sohte kin kaudokiong Koht.

21. Kapai dahieu me keieu kesempwal me pid atail kin kasalehiong meteikan wahu?

²¹ Kapai keieu kesempwal me pid atail kin kasalehiong meteikan wahu iei me kitail kin kaperenda Koht ni atail kin wia met. Kitail pahn wia dahme e kupwurki kitail en wia oh kitail pahn kolokol atail lelepek ong ih. Siohwa kak ketin sapeng Sehdan, me nda me sohte emen kak lelepek. (Lep. Pad. 27:11) Pali laud en aramas akan nin sampah sohte wehwehki ia duwen arail en wauneki meteikan ni ahl me pwung. Kitail uhdahn kalahnganki me kitail ese ia duwen atail en kasalehda wahu ni ahl me Siohwa kupwurki!