EMENEMEN kitail mwahuki meteikan en medewe me kitail aramas mwahu men. Ahpw e sohte mengei en wia aramas mwahu men nan sampah wet. Aramas tohto “sohte pahn kin poakohng me mwahu.” (2 Tim. 3:3) Ele irail kin idawehn dahme pein irail medewe me pwung de sapwung, ni arail nda me “me suwed me mwahu oh me mwahu me suwed.” (Ais. 5:20) E pil sohte mengei ong kitail en kin wia aramas mwahu pwehki dahme wiawihong kitail mahso ele kin kamwakid kitail en ahneki madamadau sapwung oh pwehki atail soh unsek. Eri kitail pil ahneki soangen madamadau me duwehte ahn Anne, * me kin papah Siohwa sounpar tohto, me nda: “I kin apwalki kamehlele me I kak wia aramas mwahu men.”

E kaperen me kitail koaros kak kakairada irair en kamwahu! E wia ehu kisehn wahn sapwellimen Koht manaman, oh sapwellime manaman kehlailsang madamadau sapwung me aramas akan ahneki de atail soh unsek de pil dahme wiawihong kitail mahso. Kitail pahn koasoiapene dahkot kamwahu oh sukuhlki ia duwen atail kak kalaudehla atail kasalehda irair wet.

Kamwahu kin pidada tiahk mwahu oh wiahda me mwahu me sohte suwed de samin kis iang. Aramas mwahu men kin ahnsou koaros rapahki ahl akan en sewese meteikan oh wia soahng mwahu kan ong irail.

Ele ke kin kilang me ekei kin men wia soahng mwahu kan ong arail peneinei oh kompoakparail kan. Ahpw ia duwe, atail wiewia mwahu pahn uhdi wasaht? Ni mehlel, sohte emen rehtail kak wia me mwahu ni unsek ahnsou koaros. Paipel mahsanih: “Sohte aramas emen nin sampah me kin wia me pwung ahnsou koaros oh sohte sapwungala pak ehu.” (Ekl. 7:20) Wahnpoaron Pohl nda ni mehlel: “I ese me sohte mehkot mwahu loalei, me iei udukei; pwe I kin inengieng wia me mwahu.” (Rom 7:18) Eri e sansal me kitail anahne sukuhlkihsang Siohwa me ketin wia Utupen kamwahu koaros ma kitail men kakairada irair wet.

Siohwa Koht ketin koasoanehdi dahme mwahu. Me pid Siohwa, Paipel mahsanih: “Ia uwen omwi kupwur mwahu, ia uwen omwi kupwur kadek! Komw ketin padahkihong ie sapwellimomwi kosonned kan.” (Mel. 119:68) Kitail tehkpene soahng riau me pid sapwellimen Siohwa kupwur mwahu me mi nan iretikitik wet.

Siohwa ketin kupwur mwahu. Kamwahu kin wia kisehn sapwellimen Siohwa irair mwahu, kahrehda e sohte kak ketin wia mehkot suwed. Tehk dahme wiawi ni Siohwa eh ketin mahsanihong Moses: “I pahn kasalehiong uhk ei lingan koaros.” Siohwa ketin kasalehiong Moses sapwellime lingan iangahki sapwellime kupwur mwahu. Moses rongada ngihl ehu me kawehwehda sapwellimen Siohwa lingan ni ahl wet: “Ngehi, KAUN-O, Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel. I kin kapwaiada ei inou ong me ngeder, oh kin mahkohng me suwed kan oh me dipan akan” ahpw e uhdahn pahn ketin kaloke me dipan kan. (Eks. 33:19; 34:6, 7) Ire wet kasalehda ni sansal me Siohwa ni unsek ketin kupwur mwahu ni soahng koaros. Mendahki Sises me keieu ketin kasalehda irair mwahu wet nin duwen aramas emen, e kak  mahsanih: “Sohte emen me mwahu, pwe Kohtete.”​—Luk 18:19.

Wiepen nin limen Siohwa kan kin mwahu. Kamwahu kin sansalda ni soahng koaros me Koht kin ketin wia. Paipel mahsanih: “E kin kupwur mwahu ong aramas akan koaros oh kin ketin kalahngan ong wiepen nin lime kan koaros.” (Mel. 145:9) Sapwellimen Siohwa kupwur mwahu kin toupahrek. E ketikihong aramas mour oh soahng koaros me irail anahne. (Wiewia 14:17) Sapwellime kupwur mwahu kin sansalda ni eh kin ketin mahkohng kitail. Sounmelkahkao nda: “Komwi me kupwur mwahu oh diren mahk ong kiht.” (Mel. 86:5) Kitail kak kamehlele me Siohwa “sohte kin ketin soikala mehkot mwahu sang irail me kin kapwaiada me pwung.”​—Mel. 84:11.

Kitail kapikipikda rasehng Koht, eri kitail kak wia aramas mwahu kei oh pil kak wia me mwahu. (Sen. 1:27) Mahsen en Koht kangoange sapwellime ladu kan en “esehla wia me pwung.” (Ais. 1:17) Ahpw ia duwen atail kak sukuhlki en kapwaiada irail kaselel wet? Kitail tehkpene ahl siluh me kitail kak wia met.

Keieu, kitail kak kapakapki sapwellimen Koht manaman, me kak sewese Kristian kan en kakairada irair en kamwahu. (Kal. 5:22) Ei, sapwellimen Koht manaman kak sewese kitail en sukuhlki en poakohng dahme mwahu oh soikala dahme suwed. (Rom 12:9) Ni mehlel, Paipel mahsanih me Siohwa kak ketin ‘katengeikitaildi pwe kitail en koasoia oh wia dahme mwahu.’​—2 Des. 2:16, 17.

Keriau, kitail anahne wadek Mahsen en Koht. Ni atail wia met, Siohwa kak ketin kasukuhlih kitail ni “elen wiewia mwahu koaros” oh kakoahiekihala kitail “ong doadoahk mwahu koaros.” (Lep. Pad. 2:9, NW; 2 Tim. 3:17) Atail mohngiong duwehte kohpwa en soahng kaselel kan. Ni atail kin wadek Paipel oh doudouloale, kitail kin kihong soahng mwahu kan nan mohngiongitail, me duwehte atail kin audehkihda kohpwa ehu soahng kan me pahn sewese kitail mwuhr.​—Luk 6:45; Ep. 5:9.

Kesiluh, kitail kin wia uwen atail kak pwehn “kahlemengih dahme mwahu.” (3 Sohn 11) Kitail kak diar mehn kahlemeng pwukat nan Paipel pwehn alasang. Ni mehlel, Siohwa oh Sises ketin wia mehn kahlemeng me keieu mwahu. Ahpw kitail pil kak tehk meteikan me pil kin wia me mwahu. Kitail kak tamanda duwen Dapida oh Parnapas. (Wiewia 9:36; 11:22-24) Ke kak paiekihda ara mehn kahlemeng ma ke onopki dahme Paipel koasoiahki duwen ira. Ni omw onopki duwen ira, tehk dahme ira wia pwehn sewese meteikan. Medemedewe ia duwen omw kak tiengla mwowe oh sewese ekei nan omw peneinei de mwomwohdiso. Oh tehk mwahu ia duwen meh riemeno ara paiekihda ara wia aramas mwahu kei. Ke pil kak duwehte ira.

Kitail pil kak medewe duwen aramas akan rahnwet me kin wia dahme mwahu. Karasepe, medewehla elder kan me kin doadoahk laud nan mwomwohdiso me kin  ‘poakohng me mwahu.’ Kitail pil kak medewehla duwen sister lelepek kan me ni lokaia oh sang arail mehn kahlemeng kin wia “sounpadahk en me mwahu.” (Taitus 1:8; 2:3) Sister men me adaneki Roslyn nda: “Mie kompoakepahi men me kin nanti laud pwehn sewese oh kangoange meteikan nan mwomwohdiso. E kin medewe duwen arail irairo oh kin kalapw kihong irail kisin kisakis kan de sewese irail ni ahl teikan. I wiahki ih aramas uhdahn mwahu men.”

Siohwa ketin kangoange sapwellime aramas akan en “nantihong wiewia dahme pwung.” (Eimw. 5:14) Atail wia met kaidehn ihte pahn kahrehiong kitail en poakohng sapwellime koasoandi pwung kan ahpw en pil kakehlakahda atail en mwekidki wia dahme mwahu.

Pwe kitail en wia dahme mwahu ong meteikan, kitail sohte anahne wiahda soahng kapwuriamwei kan de kihong irail soahng kan me pweilaud. Karasepe, sounmahlen men sohte pahn mahlenihada mahlen ehu doadoahngkihte lipwen litepw ehu de riaute, ahpw e pahn doadoahngki lipwen litepw tikitik tohto pwehn mahlenihada mahlen ehu. Duwehte met, atail mwahu kak sansalda sang atail kin kihda sawas tohto.

Paipel kangoange kitail en “onopadahng” wia soahng mwahu kan. (2 Tim. 2:21; Taitus 3:1) Ni atail kin tehk kanahieng irair en meteikan, ele kitail kak diar ahl akan en wia “dahme mwahu pwe en kakehlakahda” mehn mpatail kan. (Rom 15:2) Ele met kak pidada atail en sapankihong meteikan dahme kitail ahneki. (Lep. Pad. 3:27) Ele kitail kak luke emen en iang kitail mwenge de werekpene pwehn kangoange emenemen. Ma kitail ese me emen soumwahu, kitail kak kadaralahng ih ehu kisinlikou, mwemweitla reh, de koasoiong ih nan delepwohn. Ei, kitail kak rapahki ahl tohto pwehn nda “me mwahu kante pwe en wia mehn kakehlaka ni ahnsou me anahn pwe en mwahu ong me kin rongorong kan.”​—Ep. 4:29.

Duwehte Siohwa, kitail kin rapahki ahl akan pwehn wia mwahu ong aramas koaros. Ihme kahrehda kitail sohte kin lipilipilki aramas akan. Ehu ahl me keieu mwahu en wia met iei en kalohki rongamwahu en Wehio ong koaros. Nin duwen me Sises ketin kehkehlikihong kitail, kitail kin rapahki ahl akan en wia mwahu ong irail kan me ele kin kailongkin kitail. (Luk 6:27) E sohte sapwung en kadek oh wia dahme mwahu ong meteikan, pwehki “sohte kosonned ehu me uhwong mepwukat.” (Kal. 5:22, 23) Pwehki atail wiewia mwahu mendahki uhwong kan de kahpwal kan, ele met kak kahrehiong meteikan en esehla padahk mehlel oh kapinga Koht.​—1 Pit. 3:16, 17.

Paipel mahsanih: “Aramas mwahu pahn ale ketingpen ar wiewia kan.” (Lep. Pad. 14:14) Ia ekei keting pwukat? Ni atail kin wia dahme mwahu ong meteikan, arail wiewia ong kitail pil pahn mwahu. (Lep. Pad. 14:22) Mendahki ma ahn meteikan ar wiewia ong kitail sohte mwahu, kitail en doulahte wia dahme mwahu ong irail. Imwilahn met irail kakete wekidala arail madamadau, oh arail wiewia ong kitail pahn mwahula.​—Rom 12:20, ntp.

Tohto kak kadehdehda ia duwen arail paiekihda arail wia dahme mwahu oh sohla wia me suwed. Tehk dahme wiawihong Nancy. E nda: “I tikida wia aramas emen me sohte kin nsenohki mehkot, ahneki mour samin, oh sohte wauneki meteikan.” E pil nda: “Ahpw ni ei kin sukuhlki oh kapwaiada sapwellimen Koht koasoandi en dahme mwahu, I tepida nsenamwahula. Ahnsou wet I kakehr wauneki pein ngehi.”

Kahrepe keieu mwahu kitail en kakairada irair en kamwahu iei pwehki atail wia met kin kaperenda Siohwa. Mendahki ma meteikan sohte kilang dahme kitail wia, Siohwa ketin mwahngih. E ketin mwahngih atail madamadau oh wiewia mwahu koaros. (Ep. 6:7, 8) Ia duwen eh kin ketin katingih kitail? Paipel mahsanih: “KAUN-O kin ketin kupwurperenki aramas mwahu.” (Lep. Pad. 12:2) Eri kitail en pousehlahte kakairada irair en kamwahu. Siohwa ketin inoukihda “lingan oh wahu oh popohl ong aramas koaros me kin wia dahme mwahu.”​—Rom 2:10.