1. Soangen kahpwal dah kan me sapwellimen Siohwa aramas akan ele kin lelohng?

MIE kahpwal laud ehu me ke lelohng? Ele emen nan mwomwohdiso kamedekeiukala. (Seims 3:2) De mwein iengomw tohndoadoahk de tohnsukuhl kapailokeiuk pwehki ke kin papah Siohwa. (1 Pit. 4:3, 4) De tohn omw peneinei kin song en kauhiukdihsang omw towehda mihting kan de koasoiaiong meteikan dahme ke kin kamehlele. (Mad. 10:35, 36) Ma kahpwal ehu uhdahn laud, ke kakete pehm me e pahn keieu mwahu ken uhdihsang papah Siohwa. Ahpw ke kak kamehlele me sohte lipilipil soangen kahpwal dah me ke lelohng, Siohwa pahn ketikihong uhk erpit pwe ken wiahda pilipil mwahu kan, oh kehl pwehn dadaur pahn kahpwalo.

2. Nin duwen me Rom 15:4 mahsanih, ia duwen wadawad en Paipel eh kak sewese kitail?

² Nan sapwellime Mahsen, Siohwa ketikihda ni oaritik koasoipen aramas soh unsek kan duwen arail kin dadaur pahn kahpwal kan. Dahme kahrehda? Pwe kitail en kak sukuhlki arail mehn kahlemeng kan. Ih met me Siohwa ketin kamwakid wahnpoaron Pohl en ntingihedi. (Wadek Rom 15:4.) Ni atail wadek koasoipen aramas pwukat, e kak kangoange kitail oh kihong kitail koapworopwor. Ahpw pwe kitail en paiekihda, kitail anahne wia laudsang ihte wadek Paipel. Kitail anahne mweidohng iren Paipel kan en wekidala mwomwen atail madamadau oh pepehm. Karasepe, dahme kitail kak wia ma kitail anahne kaweid ong kahpwal ehu me kitail ahneki? Kitail kak wia soahng pahieu pwukat: (1) Kapakap, (2) Medewehla, (3) Doudouloale, oh (4) Kapwaiada. Kitail pahn koasoiapene dahme kin pidada  ehuehu soahng pwukat. * Eri kitail pahn doadoahngki soahng pwukat pwehn sukuhlki soahng kan me wiawihong Nanmwarki Depit oh wahnpoaron Pohl.

3. Mwohn omw tepida wadek Paipel, dahme ke anahne wia, oh dahme kahrehda?

³ (1) Kapakap. Mwohn omw tepida wadek Paipel, peki rehn Siohwa en ketin seweseiuk en kilang ia duwen omw kak paiekihda dahme ke wadek. Karasepe, ma ke rapahki kaweid pwehn apwalihala kahpwal ehu, peki rehn Siohwa en ketin seweseiuk diar kaweid oh ire mehlel kan nan Paipel me kak seweseiuk en pilada dahme ke pahn wia.​—Pil. 4:6, 7; Seims 1:5.

4. Dahme kak seweseiuk en medewehla dahme uhdahn wiawi nan koasoipen Paipel ehu?

⁴ (2) Medewehla. Siohwa ketikihong kitail koahiek en kak medewehla soahng kan. Pwehn seweseiuk en medewehla dahme uhdahn wiawi nan koasoipen Paipel ehu, song medewehla dahme wiewiawi oh me kowe iei aramaso me ke wadewadek. Song kilang soahng kan me e kilang oh pehm soangen pepehmohte me e ahneki.

5. Ia wehwehn doudouloale, oh ia duwen omw kak wia met?

⁵ (3) Doudouloale. En doudouloale kin wehwehki en medemedewe kanahieng dahme ke wadek oh ia duwen omw kak doadoahngki. E kin seweseiuk ken kadokepene ire kan oh wehwehki mwahu dahme ke wadewadek. Ma ke wadek Paipel oh sohte doudouloale, e pahn duwehte omw kilikilang pwoasel (jigsaw puzzle) ehu pohn tehpel ehu ahpw sohte kakonehpene. Doudouloale kin duwehte omw kakonehpene pwoaselo pwe ken kak kilang kilelo pwon. Pwehn seweseiuk en doudouloale, ke kak pein idek oh pil sapengala soangen peidek pwukat: ‘Dahme aramaso nan koasoipen Paipelo wia pwehn powehdi eh kahpwalo? Ia duwen Siohwa eh ketin sewese ih? Ia duwen ei kak doadoahngki mehn kasukuhl kan me I sukuhlki pwehn sewese ie dadaur pahn kahpwal kan?’

6. Dahme kahrehda kitail anahne doadoahngki dahme kitail sukuhlki?

⁶ (4) Kapwaiada. Sises mahsanih me ma kitail sohte kin kapwaiada dahme kitail sukuhlki, kitail pahn duwehte ohl emen me kauwada imwe pohn pihk. E kin doadoahk laud, ahpw sohte katepe. Dahme kahrehda? Pwehki ma melimel ehu oh lapake lel imweo, ihmwo pahn mweredi. (Mad. 7:24-27) Pil duwehte, ma kitail kapakap, medewehla, oh doudouloale, ahpw sohte kapwaiada dahme kitail sukuhlki, e pahn sohte katepe. Eri ni atail lelohng kahpwal de kalokolok, atail pwoson sohte pahn uhdahn kehlail. Ahpw, ni atail kin onop oh kapwaiada dahme kitail sukuhlki, kitail kin wiahda pilipil mwahu kan, atail popohl kin laudla, oh atail pwoson pil laudla. (Ais. 48:17, 18) Ni atail doadoahngki soahng pahieu pwukat me kitail koasoiapene, kitail pahn kilang dahme kitail kak sukuhlkihsang koasoipen Nanmwarki Depit.

7. Koasoipen ihs nan Paipel me kitail pahn koasoiapene met?

⁷ Mie pak me kompoakepahmw men de omw peneinei kamedekeiukala? Ma ei, ke pahn paiekihda ma ke onopki dahme Nanmwarki Depit wia ni ahnsou me nah ohlo Apsalom kamedekihala ih oh song en wiahla nanmwarki.​—2 Sam. 15:5-14, 31; 18:6-14.

8. Dahme ke kak wia pwehn ale sawas sang rehn Siohwa?

⁸ (1) Kapakap. Ni omw medewe duwen koasoipen Paipelo, padahkihong Siohwa ia omw pepehm ong soahng suwedo me wiawihong uhk. (Mel. 6:6-9) Padahkihong ih ia uhdahn  omw pepehm. Mwuri, peki Siohwa en ketin seweseiuk kilang kaweid oh ire mehlel kan me kak seweseiuk ni omw song en apwalihala kahpwalo.

9. Dahme wiawi nanpwungen Depit oh Apsalom?

⁹ (2) Medewehla. Medewehla dahme wiawi ni ahnsowo, oh dahme wiawihong Nanmwarki Depit. Nein Depit ohlo Apsalom kin doadoahk laud erein sounpar tohto pwehn kahrehiong aramas akan en poakohngala ih. (2 Sam. 15:7) Ni ahnsou me Apsalom pehm me ahnsowo iei ahnsou mwahu, e kadarala lipoahrok kei nan Israel pwon pwe ren kamwakid aramas akan en wiahkihla ih arail nanmwarki. E pil kahrehiong emen nein Depit sounkaweid oh kompoakepah keren, Ahidopel, en iangala ih oh uhwongada Depit. Apsalom wiahkihla pein ih nanmwarki, oh song en koledi oh kemehla Depit, me ele uhdahn soumwahu ahnsowo. (Mel. 41:1-9) Depit esehda dahme Apsalom wiewia oh tangasang Serusalem. Mwuhr, nein Apsalom sounpei ko mahweniong nein Depit sounpei ko. Irail luhs, oh nein Depit ohlo Apsalom kamakamala.

10. Dahme Nanmwarki Depit kakete wia?

¹⁰ Mwuhr, medewehla en Depit pepehm ni ahnsou me soahng pwukat koaros wiawihong ih. E poakepoake Apsalom oh likih Ahidopel. Ahpw, ira koaros pangala ih. Ira uhdahn kamedekihala ih oh pil song en kemehla. Depit kakete medewe me kompoakepah teikan iangalahr Apsalom, oh e kakete sohla likih irail. E kakete medemedewehte pein ih oh song en kelehpw tangasang sahpwo. De e kak uhdahn mworusala douluhl. Ahpw Depit sohte wia soahng pwukat. E powehdi kahpwalo. Dahme kahrehda e kak wia met?

11. Dahme Depit wia nan irair apwalo?

¹¹ (3) Doudouloale. Kaweid dah kan me ke kak sukuhlkihsang met? Sapengala peideko, “Dahme Depit wia pwehn sewese ih?” Depit sohte mweidohng eh pwunod en kahrehiong ih en mwadangete wiahda pilipil sapwung kan. E pil sohte uhdahn masepwehkada me kahrehda e sohla kak koasoanehdi dahme e pahn wia. Ahpw, e kapakapohng Siohwa oh peki sawas. E pil peki sawas sang kompoakepah kan. Oh e mwadangete kapwaiada dahme e koasoanehdi en wia. Mendahki e uhdahn medekla, Depit sohte uhdihsang likih meteikan, oh e sohte kolokol kailok. E pousehlahte likih Siohwa oh kompoakepah kan.

12. Dahme Siohwa ketin wia pwehn sewese Depit?

¹² Ia duwen Siohwa eh ketin sewese Depit? Ma ke wia roporop, ke pahn sukuhlki me Siohwa ketikihong Depit kehl me e anahne pwehn dadaur pahn kahpwalo. (Mel. 3:1-8, nting kan me mi pohn irelaudo) Siohwa ketin kapaiahda pilipil kan me Depit wiahda. Oh e ketin sewese kompoakepahn Depit loalopwoat ko nan arail mahwen pwehn pere arail nanmwarkio.

13. Ia duwen omw kak alasang Depit ma emen uhdahn kamedekeiukala? (Madiu 18:15-17)

¹³ (4) Kapwaiada. Pein idek rehmw, ‘Ia duwen ei kak alasang Depit?’ Ke anahne mwadang en mwekid pwehn apwalihala omw kahpwalo. Ma konehng irairo, ke kak idawehn sapwellimen Sises kaweido de doadoahngki kaweid oh ire mehlel en kaweido. (Wadek Madiu 18:15-17.) Ahpw dehr mwadang en wiahda pilipil kan ni ahnsou me ke lingeringer. Ke anahne kapakapohng Siohwa pwehn ketikihong uhk meleilei oh erpit me ke anahne pwehn apwalihala kahpwalo. Ke dehr sohla likih kompoakepahmw kan. Ahpw, ale sawas sang rehrail. (Lep. Pad. 17:17) Keieu kesempwal, idawehn kaweid me Siohwa ketikihong uhk nan sapwellime Mahsen.​—Lep. Pad. 3:5, 6.

14. Soangen irair dah kan me 2 Timoty 1:12-16; 4:6-11, 17-22 kak kangoange iuk?

¹⁴ Ia duwe, omw peneinei kin uhwong uhk  pwehki ke kin papah Siohwa? De ke kin kousoan nan sahpw ehu me keinapwihdi ekei doadoahk de doadoahk koaros me sapwellimen Siohwa aramas akan kin wia? Ma ei, omw wadek 2 Timoty 1:12-16 oh 4:6-11, 17-22 kak kangoange iuk. * Pohl ntingihedi iretikitik pwukat ni ahnsou me e mi nan imweteng.

15. Dahme ke kak peki rehn Siohwa?

¹⁵ (1) Kapakap. Mwohn omw wadek iretikitik pwukat, padahkihong Siohwa duwen omw kahpwalo oh ia omw pepehm. Kasalehda ia uhdahn pepehm. Eri peki rehn Siohwa en ketin seweseiuk en esehda kaweid oh ire mehlel kan duwen koasoipen dahme wiawihong Pohl pwe ken ese dahme ke pahn wia.

16. Dahme wiawihong Pohl?

¹⁶ (2) Medewehla. Medewehla me kowe me mi nan ahn Pohl irairo. E mi nan imweteng ehu nan Rom. E selidier mwoweo, ahpw met e uhdahn kamehlele me e pahn kamakamala. Ekei ienge ko tangasang ih, oh e uhdahn pwangada.​—2 Tim. 1:15.

17. Dahme Pohl kakete wia?

¹⁷ Pohl kak medemedewehte dahme wiawi mahso, oh medewe me ma e sohte wiahla Kristian ngoang men, e sohte pahn selidi. E pil kakete lingeringerda pahn ohl ako nan Eisia me tangasang ih, oh e kakete sohla likih kompoakepah teikan. Ahpw Pohl sohte wia soahng pwukat. Dahme kahrehda e kamehlele me kompoakepah kan pahn loalopwoatohngete ih oh me Siohwa pahn ketin katingih ih?

18. Dahme Pohl wia nan irair apwal wet?

¹⁸ (3) Doudouloale. Sapengala peideko, “Ia duwen Pohl eh sewese pein ih?” Mendahki Pohl ese me e pahn kereniongehr mehla, e sohte manokehla me e uhdahn kesempwal en kalinganahla Siohwa. Oh e pousehlahte medewe ia duwen eh kak kangoange meteikan. E likih Siohwa sang ni eh kin kaukaule kapakap. (2 Tim. 1:3) Pohl sohte medemedewehte duwen rie Kristian ko me tangasang ih. Ahpw, e nda me e uhdahn kalahnganki mwomwen kompoakepah kan ar kin utung oh sewese ih ni limpoak. Patehng met, Pohl pousehlahte onopki Mahsen en Koht. (2 Tim. 3:16, 17; 4:13) Me keieu kesempwal, e uhdahn kamehlele me Siohwa oh Sises ketin poakohng ih. Ira sohte ketin kesehla ih, oh ira pahn ketin katingiheki eh kin papah ni loalopwoat.

19. Ia duwen Siohwa eh ketin sewese Pohl?

¹⁹ Siohwa ketin katamankihong Pohl me e pahn anahne dadaur pahn kalokolok pwehki ih emen Kristian. (Wiewia 21:11-13) Ia duwen Siohwa eh ketin sewese Pohl? E ketin sapengala ahn Pohl kapakap kan oh ketikihong ih kehl erein ahnsou ko. (2 Tim. 4:17) Siohwa ketin kamehlelehiong Pohl me e pahn alehdi keting me e doadoahk laud pwehn alehdi. Siohwa pil ketin doadoahngki kompoakepahn Pohl loalopwoat kan ren kihong ih sawas me anahn.

20. Ia duwen atail kak kahlemengih pwoson me Pohl kasalehda nan Rom 8:38, 39?

²⁰ (4) Kapwaiada. Pein idek rehmw, ‘Ia duwen ei kak kahlemengih Pohl?’ Duwehte Pohl, kitail anahne kasik me kitail pahn ahneki lokolok pwehki atail pwoson. (Mark 10:29, 30) Pwehn lelepekohngete Siohwa ni ahnsou me mie atail kahpwal kan, kitail anahne pousehlahte kapakap ong ih, oh pousehlahte onopki sapwellime Mahsen. Oh kitail anahne tamataman ahnsou koaros me dahme keieu kesempwal me kitail kak wia iei en kalinganahla Siohwa. Kitail kak kamehlele me Siohwa sohte douluhl pahn ketin keseikitailla oh me sohte mehkot me emen kak wia pwehn kauhdi Eh ketin poakohng kitail.​—Wadek Rom 8:38, 39; Ipru 13:5, 6.

21. Dahme sewese Aya oh Hector en powehdi kahpwal kan me ira lelohng?

²¹ Mehn kahlemeng kan nan Paipel kak sewese kitail en ahneki kehl me kitail anahne pwehn dadaur pahn irair sohte lipilipil. Karasepe, Aya pioneer men sang Sapan nda me koasoipen Sona sewese ih en sohla masak kalohk nan wehipokon. Hector, pwutak pwulopwul men sang Indonesia me eh pahpa oh nohno sohte kin papah Siohwa, nda me mehn kahlemeng en Rud sewese ih en men sukuhlki duwen Siohwa oh papah ih.

22. Dahme kak seweseiuk pwe ken uhdahn paiekihda sang ngilen sipai en Paipel kan de kairekdien oaralap kan nan “Imitate Their Faith”?

²² Ia wasa ke kak diar mehn kahlemeng kan nan Paipel me pahn kakehlaka iuk? Neitail kisin kasdo kan, ngilen sipai en wadawad en Paipel kan, oh kairekdien oaralap kan nan “Imitate Their Faith” kak sewese koasoiepen Paipel kan en mwomwen me e wiewiawi. * Mwohn omw kilang, rong, de wadek koasoipen Paipel pwukat, peki Siohwa en ketin seweseiuk pwe ken diar mehn kasukuhl kesempwal kan me ke kak doadoahngki. Medewehla me ke mi wasao me koasoipen aramaso mi ie. Doudouloale dahme sapwellimen Siohwa ladu lelepek pwukat wia oh ia duwen eh ketin sewese irail en powehdi kahpwal kan. Kowe eri doadoahngki mehn kasukuhl ko ong pein omw irairo. Kalahngankihong Siohwa sawas me e ketikihong uhk. Oh kasalehda me ke kalahnganki sawaso sang ni omw rapahki ahl kan en kangoange oh sewese meteikan.

23. Nin duwen me Aiseia 41:10, 13 mahsanih, dahme Siohwa ketin inoukihda en ketin wiahiong kitail?

²³ Sampah wet me Sehdan kin kakaun kak apwal ong kitail en dadaurete, oh ekei pak kitail kin sehsehla dahme kitail pahn wia. (2 Tim. 3:1) Ahpw kitail sohte anahne pwunod de masepwehk. Siohwa kin ketin mwahngih soangen kahpwal dah kan me kitail kin lelohng. Ni atail kin anahne sawas, e ketin inoukihda en ketin kolkinkitaildi lime palimaun kehlail. (Wadek Aiseia 41:10, 13.) Kitail uhdahn kamehlele me Siohwa pahn ketin sewesei kitail, oh Paipel kin kihong kitail kehl me kitail anahne pwe kitail en dadaur pahn kahpwal sohte lipilipil.