1. Nin duwen me Madiu 24:9 mahsanih, dahme kahrehda kitail en dehr pwuriamweiki ma sampah wet kin kailongki kitail?

SIOHWA ketin kapikkitailda en kasalehda limpoak ong meteikan oh men irail en poakohng kitail. Eri ni meteikan ar kin kailongki kitail, kitail kin medekla oh mwein pil masepwehk. Karasepe, sister men me adaneki Georgina sang Iurope, nda: “Ni ahnsou me I sounpar 14, ei nohnou kin kailongki ie pwehki ei kin papah Siohwa. I uhdahn nsensuwedla oh pehm me I kelehpwla, oh tepida medewe me kaidehn ngehi aramas mwahu men.” * Brother men me adaneki Danylo ntingihedi: “Ni sounpei kan ar wokihie, kanamenekeie, oh nda me re pahn keme ie pwehki ngehi emen Sounkadehdehn Siohwa, I kin masepwehkada oh namenekla.” Soangen kailok wet kin kamedekeikitailla, ahpw met sohte kapwuriamwei. Sises ketin kohpada me meteikan pahn kin kailongki kitail.​—Wadek Madiu 24:9.

2-3. Dahme kahrehda meteikan kin kailongki sapwellimen Sises tohnpadahk kan?

² Sampah wet kin kailongki sapwellimen Sises tohnpadahk kan. Dahme kahrehda? Pwehki duwehte Sises, kitail “kaidehn kisehn sampah.” (Sohn 15:17-19) Eri mendahki kitail kin wauneki koperment kan en aramas, kitail sohte pahn uhki palien politik kan, kasarawih pilaik, de iang koulki koul en arail wehio. Kitail kin kaudokiong Siohwa kelehpw. Kitail kin utung sapwellimen Koht pwuhng en kaunda aramas, ahpw Sehdan oh ‘nah kan’ kin kahmahmki me Koht sapwellimanki pwuhng wet. (Sen. 3:1-5, 15) Kitail kin kalohki me Wehin Koht kelehpw me pahn kamwahwihala kahpwal kan en aramas, oh me wehi wet pahn kereniong kasohrehla  koaros me kin uhwong. (Dan. 2:44; Kaud. 19:19-21) Rohng wet wia rongamwahu ehu ong me aktikitik kan ahpw ong me suwed kan, e wia rohng suwed ehu.​—Mel. 37:10, 11.

³ Meteikan pil kin kailongki kitail pwehki kitail kin peikiong sapwellimen Koht kosonned kan. Dahme Koht ketin mahsanih duwen me pwung oh sapwung kin uhdahn weksang dahme aramas en sampah wet kin ndahki dahme pwung oh sapwung. Karasepe, aramas tohto sohte kin medewe me e sapwung en wia soangen tiahk samin kan me Koht ketin kasohrehkihla Sodom oh Komora! (Sud 7) Pwehki kitail kin peikiong kosonned en Paipel kan me pid soangen tiahk pwukat, aramas tohto kin kapailoke oh nda me kitail kin kadeik aramas me weksang kitail!​—1 Pit. 4:3, 4.

4. Soangen irair dah kan me kak kakehlaka kitail ni aramas akan ar kailongki kitail?

⁴ Dahme kak sewese kitail en dadaur ni aramas akan ar kailongki oh kanamenekeikitail? Kitail en ahneki pwoson laud me Siohwa pahn ketin sewese kitail. Duwehte mehn sansar ehu, atail pwoson kak “kakunkihla nein me suwedo arep kisiniei kan koaros.” (Ep. 6:16) Ahpw kitail anahne wia laudsang en ihte pwoson. Kitail pil anahne limpoak. Dahme kahrehda? Pwehki limpoak “sohte kin mwadang lingeringerda.” E kin wa katoutou koaros oh dadaur pahn soangen kamedek koaros. (1 Kor. 13:4-7, 13) Met kitail pahn kilang ia duwen limpoak ong Siohwa, limpoak ong riatail Kristian kan, oh limpoak ong atail imwintihti kan eh sewese kitail en dadaur pahn kailok.

5. Ia duwen sapwellimen Sises limpoak ong Semeo eh kakehlaka ih?

⁵ Ni pwohngo mwohn sapwellime imwintihti kan kemehla ih, Sises mahsanihong sapwellime tohnpadahk loalopwoat ko: “I poakohng Sahmo, [eri] I kin wia nin duwen Sahmo eh ketin kehkehlingkihong ie I en wia.” (Sohn 14:31) Pwehki Sises ketin poakohng Siohwa, e kak ketin dadaur pahn kahpwal kan. Atail limpoak ong Siohwa kak sewese kitail ni ahlohte.

6. Nin duwen me Rom 5:3-5 mahsanih, ia ahn sapwellimen Siohwa ladu kan ar pepehm ni arail kin dadaur pahn kailok en sampah wet?

⁶ Limpoak ong Koht kin ahnsou koaros sewese sapwellimen Siohwa ladu kan en dadaur pahn kalokolok. Karasepe, ni ahnsou me mwoalen kopwung lapalap en mehn Suhs ko ndaiong wahnpoaron ko en uhdihsang kalohk, limpoak ong Koht kamwakid irail en “peikiong Koht nin duwen kaun emen, a kaidehn aramas.” (Wiewia 5:29; 1 Sohn 5:3) Limpoak laud wet ong Koht pil kin sewese riatail Kristian kan rahnwet ren kolokolete arail lelepek ni ar lelohng kalokolok sang koperment kehlail oh lemei kan. Ni sampah wet eh kin kailongki kitail, kitail sohte kin mwoarosala, ahpw kitail kin peren.​—Wiewia 5:41; wadek Rom 5:3-5.

7. Dahme kitail pahn wia ni tohn atail peneinei kan ar uhwong kitail?

⁷ Ni pein atail peneinei ar uhwongada kitail, met kak wia soahng ehu me keieu apwal en dadaur pah. Ni arail esehda me kitail men sukuhlki duwen Siohwa, ekei irail ele medewe me dahme kitail sukuhlki pitihkitaildi. Ekei irail mwein medewe me kitail sahliellahr. (Pil kilang Mark 3:21.) Mwein irail pil kin uhwongada kitail ni lemei. Kitail en dehr pwuriamweikihla soangen uhwong wet. Sises mahsanih: “Ni mehlel, tohn imwen emen pahn wia eh imwintihti.” (Mad. 10:36) Ei mehlel, sohte lipilipil dahme atail peneinei kan kin medewehki kitail, kitail sohte kin kailongki irail. Weksang met, ni atail limpoak ong Siohwa eh kin laudla, atail limpoak ong aramas akan pil kin laudla. (Mad. 22:37-39) Ahpw kitail sohte pahn uhdihsang peikiong kosonned oh kaweid en Paipel kan pwehn kaperendahte meteikan.

8-9. Dahme sewese emen sister en kesihnenda teng mendahki uhwong laud?

 ⁸ Georgina, me kitail koasoiapene mwoweo, kak kesihnenda teng mendahki uhwong laud sang eh nohnou. Georgina nda: “Ngehi oh nohno tepida onop Paipel rehn Sounkadehde kan. Ahpw mwurin sounpwong weneu ni ei tepida iang towehda mihting kan, nohno tepida uhwong ie. I diarada me e kin koasoiong irail me kesehla oh uhwongada kaudok mehlel oh kin doadoahngki dahme re nda ni eh lokaiaiong ie. E pil kin kanamenekeie, waik pitenmoangei, padikpene tepinwerei, oh kesehla nei sawasepen Paipel kan. Mwurin ei sounpar 15, I papidaisla. Nohno song en kauhdi ei papah Siohwa sang ni eh waiehla nan ihmw ehu me serepein teikan kin mi ie, ekei irail kin doadoahngki wini en kasahliel kan oh wiahda tiahk lemei. E kin uhdahn apwal en dadaur pahn uhwong, ahpw mehlel ma e kohsang rehn emen me uhdahno pahn poakohng oh apwalih iuk.”

⁹ Dahme sewese Georgina en dadaurete? E nda: “Ni rahno me nohno tepida uhwong ie, I ahpwtehn kanekehla ei wadekala Paipel pwon. Met I uhdahn kamehlele me I diaradahr padahk mehlel, oh pehm me I uhdahn karanihala Siohwa. I kin kalapw kapakap ong ih, oh e kin ketin karonge ie. Ni ahnsou me I mi nan ihmw me serepein teikan kin mi ieo, sister men luke ie en kohla ni imweo oh se kin onopkipene Paipel. Erein ahnsowo, riatail Kristian kan kin kakehlaka ie. Irail wiahkiniehla kisehn arail peneinei. E uhdahn sansal me Siohwa kin ketin kehlailsang irail kan me kin uhwong kitail, sohte lipilipil ihs irail.”

10. Dahme kitail kak likih me atail Koht Siohwa pahn ketin wia ahnsou koaros?

¹⁰ Wahnpoaron Pohl ntingihedi me sohte mehkot kak “katohreikitailsang sapwellimen Koht limpoak me mi rehn Krais Sises atail Kaun.” (Rom 8:38, 39) Mehnda ma kitail ele kin lokolok erein ahnsou kis, Siohwa pahn ahnsou koaros ketin ieiang kitail pwehn ketin kansenamwahwih oh kakehlaka kitail. Oh nin duwen me koasoipen Georgina kasalehda, Siohwa pil kin ketin sewese kitail sang ni eh ketin doadoahngki riatail Kristian kan nan mwomwohdiso.

11. Ia duwen limpoak me Sises mahsanih nan Sohn 15:12, 13 eh pahn sewese sapwellime tohnpadahk kan? Menlau kihda ehu karasaras.

¹¹ Ni pwohngo mwohn Sises eh pwoula, e ketin katamankihong sapwellime tohnpadahk ko ren limpoakpene nanpwungarail. (Wadek Sohn 15:12, 13.) E mwahngih me limpoak en tounmetei pahn sewese irail en miniminpene oh dadaur pahn kailok en sampah. Medewehla mehn kahlemeng en mwomwohdiso en Deselonika. Sangete  ahnsou me e wiawihda, towe kan kin lelohng kalokolok. Ahpw Kristian ko wiahla mehn kahlemeng mwahu ni arail kin dadaur ni lelepek oh kasalehda limpoak. (1 Des. 1:3, 6, 7) Pohl kangoange irail en pousehlahte kasalehda limpoak, pil ‘kalaudehla arail kin wiewia met.’ (1 Des. 4:9, 10) Limpoak pahn kamwakid irail en kansenamwahwih me pahtoula kan oh sewese me luwet kan. (1 Des. 5:14) Irail idawehn ahn Pohl kaweid kan, pwehki nan nah keriaun kisinlikowo me e ntingihedi sounpar ehu mwuhr, Pohl kak ndaiong irail: “Limpoak en emenemen kumwail koaros kin lalaudla nanpwungamwail.” (2 Des. 1:3-5) Arail limpoak sewese irail en dadaur pahn kahpwal oh kalokolok kan.

12. Erein mahwen ehu me wiawi, ia duwen riatail Kristian kan nan ehu sahpw ar kasalehda limpoak ong emenemen?

¹² Medewehla dahme wiawihong Danylo, me kitail koasoiapene mwoweo, oh eh pwoudo. Ni ahnsou me mahwen ehu wiawi nan sahpwo oh lella ni ara kahnimwo, ira kin pousehlahte iang towehda mihting kan, iang kalohk ni uwen ara kak, oh ehukihong riara Kristian kan kanara mwenge kan. Ahpw ehu rahno, sounpei kan wisik kesik oh kohdo ni imwen Danylo. Danylo nda: “Re ndaiong ie en sohla wia emen Sounkadehdehn Siohwa. Ni ei sohte dukiong irail, irail keme ie oh mwomwehda kasikih ie ni arail kasikih daulih pohn moangeie. Mwohn arail kohkohla, re nda me re pahn pwurodo oh angkehlailih ei pwoudo. Ahpw riat Kristian ko mwadangete kihong kiht nan kisa ehu oh kadarkitala nan ehu kahnimw tohrohr. I sohte pahn manokehla limpoak en riat Kristian ko. Oh ni at lella ni kahnimwo, riat Kristian kan wasao kihong kiht kanat mwenge oh sewese ie en diarada ei doadoahk oh pil imwat! Pwehki met, se pil kak kihda wasahn kousoan ong Sounkadehde teikan me tangasang wasa me mahweno wiawi.” Koasoipen irail pwukat kin kasalehda me limpoak en Kristian kak sewese kitail en dadaur pahn kailok.

13. Ia duwen sapwellimen Koht manaman eh sewese kitail en dadaur ni atail kin papah Siohwa mehnda ma aramas akan kin kailongki kitail?

¹³ Sises mahsanihong sapwellime tohnpadahk kan ren poakohng arail imwintihti kan. (Mad. 5:44, 45) Ia duwe, met mengei? Uhdahn soh! Ahpw kitail kak wia met sang ni sawas en sapwellimen Koht manaman. Wahn sapwellimen Koht manaman kin iangahki limpoak, kanengamah, kadek, mpahi, oh kaunda pein emen. (Kal. 5:22, 23) Irair pwukat kin sewese kitail en  dadaur pahn kailok. Aramas tohto kin uhdihsang arail uhwong kitail pwehki re kin kilang arail pwoud, neirail seri, de mehn mparail kan ar kin kasalehda soangen irair pwukat. Oh tohtohn irail pil wialahr riatail Kristian kei. Eri ma ke kilang e apwal en poakohng irail kan me kin kailongkin uhk pwehki omw kin papah Siohwa, kapakapki sapwellimen Koht manaman. (Luk 11:13) Oh likih me atail peikiong Koht kin ahnsou koaros wia mehkot me keieu mwahu me kitail en wia.​—Lep. Pad. 3:5-7.

14-15. Ia duwen Rom 12:17-21 eh sewese Yasmeen en kasalehda limpoak ong eh pwoudo mendahki e kin uhwong ih?

¹⁴ Medewehla mehn kahlemeng en emen riatail Kristian lih me adaneki Yasmeen. Ni ahnsou me e wiahla emen Sounkadehdehn Siohwa, eh pwoudo medewe me Sounkadehde kan pitihedi Yasmeen, oh song en kauhdihsang eh papah Koht. Eh pwoudo kin kanameneke ih oh kangoange kisehra kan, emen kaunen pelien lamalam, oh pil sounwunahni men ren kamasak ih, oh karaunehki me e kauwehla ara mouren peneinei. Eh pwoudo pil wering oh kauwe rie Kristian ko erein ehu mihting en mwomwohdiso! Yasmeen kin kalapw sengisengki wiewia lemei me wiawihong ih.

¹⁵ Nan Wasahn Kaudoko, rien Yasmeen Kristian kan kin kansenamwahwih oh kakehlaka ih. Elder kan kin kangoange ih en doadoahngki mahsen kan me dierek nan Rom 12:17-21. (Wadek.) Yasmeen nda: “E uhdahn apwal. Ahpw I peki Siohwa en ketin sewese ie, oh I wia uwen ei kak en kapwaiada dahme Paipel mahsanih. Eri ni ei pwoudo kin kalingeringerih ie oh kesehdi pwehl nan wasahn mwengeo, I kin kamwakelehda. Ni eh kin kanamenekeie, I kin sapeng ni aktikitik. Oh ni eh kin soumwahuda, I kin apwalih.”

16-17. Dahme ke sukuhlkihsang ahn Yasmeen mehn kahlemeng?

¹⁶ Yasmeen ale ketingpen eh kasalehda limpoak ong eh pwoudo. E nda: “Ahn ei pwoudo likih ie tepida laudla pwehki e ese me I pahn ahnsou koaros koasoi mehlel. E tepida rong ie ni wahu ni at kin koasoiapene duwen pelien lamalam, oh pwungki en wiahda meleilei nan imwato. Met e kin kangoange ie en kohla iang mihting kan en mwomwohdiso. Oh met en ngehi oh ei pwoudo nanpwungmwahu uhdahn mwahula oh mie meleilei nan at peneineio. I koapworopworki me ei pwoudo pahn pwungkihla padahk mehlel oh iang ie papah Siohwa.”

¹⁷ Ahn Yasmeen mehn kahlemeng kasalehda me limpoak “kin wa katoutou koaros, . . . koapworopworki soahng koaros, oh dadaur ni soahng koaros.” (1 Kor. 13:4, 7) Kailok kak uhdahn kehlail oh kamedek, ahpw limpoak kehlailsang.  Ma kitail kin kasalehda limpoak ong meteikan, irail kakete uhdihsang uhwong kitail. Oh ni atail kin pousehlahte kasalehda limpoak, met kin kaperenda Siohwa. Ahpw mehnda ma sounuhwong kan kin pousehlahte kailongki kitail, kitail kak ahnekihte peren. Ia duwen?

18. Dahme kahrehda kitail kak ahneki peren ni meteikan ar kailongki kitail?

¹⁸ Sises mahsanih: “Meid pai kumwail ni ahnsou me aramas kin kailongkin kumwail.” (Luk 6:22) Kaidehn kitail me pilada aramas en kailongki kitail. Kitail sohte kin perenki ale kalokolok pwehki atail pwoson. Eri dahme kahrehda kitail kak ahneki perenki ni meteikan ar kailongki kitail? Medewehla kahrepe siluh pwukat. Keieu, ni atail kin dadaur, Koht kin ketin kupwurperenki kitail. (1 Pit. 4:13, 14) Keriau, atail pwoson kin mwahula oh kehlailla. (1 Pit. 1:7) Oh kesiluh, kitail pahn alehdi keting laud, me iei mour soutuk.​—Rom 2:6, 7.

19. Dahme kahrehda wahnpoaron ko perenda mwurin arail ale kamakam?

¹⁹ Mwurin Sises ketin iasada, wahnpoaron ko kehn soangen peren me e mahsanih duwe. Mwurin arail ale kamakam oh kehkehlik me irail en uhdihsang kalohk, irail uhdahn perenda. Dahme kahrehda? ‘Pwehki arail ale pwais kaselel en mwamwahlla pwehki mwaren [Sises].’ (Wiewia 5:40-42) Arail limpoak ong arail Soumaso kehlail sang arail masak kailok sang arail imwintihti kan. Oh re kasalehda arail limpoak sang ni arail “sohte uhdi” kalokalohki rongamwahwo. Tohto riatail Kristian kan rahnwet kin pousehlahte papah ni lelepek mendahki kahpwal kan. Irail ese me Siohwa sohte pahn ketin meliehla arail doadoahk oh arail poakohng mwareo.​—Ipru 6:10.

20. Dahme kitail pahn koasoiapene nan iren onop en mwuhr?

²⁰ Sampah pahn kailongki kitail lao koasoandi en mwehi wet imwisekla. (Sohn 15:19) Ahpw kitail sohte anahne masak. Nin duwen me kitail pahn kilang nan iren onop en mwuhr, Siohwa ‘pahn ketin kakehlaka oh pere’ sapwellime ladu loalopwoat kan. (2 Des. 3:3) Eri kitail en pousehlahte poakohng Siohwa, poakohng riatail Kristian kan, oh pil poakohng irail kan me kin kailongki kitail. Ni atail kin peikiong kaweid wet, kitail pahn kolokolete atail miniminpene oh atail pwoson pahn kehlail, kitail pahn kihong wahu ong Siohwa, oh kitail pahn kadehdehda me limpoak uhdahn kehlailsang kailok.