Ekei Sounkadehde kan kin doadoahngki soahng kapw kan duwehte computer de sehlpwohn ape pwehn kapehse ong arail peneinei de Sounkadehde teikan. Ahpw Kristian koahiek men pahn tamataman kaweid wet: “Aramas me mie eh lamalam pahn kilang apwal eh kohkodohng, e pahn tangasang, ahpw aramas me sohte eh lamalam pahn wenewohng loale, oh mwuhr e ahpw pahn koluhkihla.”​—Lep. Pad. 27:12.

Kitail wehwehki me Siohwa kin ketin kupwurki pere kitail. Kahrehda, kitail sohte kin werekiong irail kan me kin kahrehda liaktohrohr, me piskenla kan, de me kin kangoange madamadau sapwung kan. (Rom 16:17; 1 Kor. 5:11; 2 Sohn 10, 11) Ekei me kin werekiong mwomwohdiso ele sohte kin peikiong kosonned kan nan Paipel. (2 Tim. 2:20, 21) Kitail kin medemedewe duwen met ni atail pilada ihs me kitail pahn kompoakepahnki. Ahpw e kak apwal en pilada kompoakepatail mwahu ma kitail kin doadoahngki messaging apps kan pwehn kapehsehiong irail.

E uhdahn kesempwal kitail en kanahieng duwen atail en pilada kompoakepatail mwahu ni atail iang pwihn laud ehu textpene. Ekei Kristian kin iang text ong pwihn kan oh mwuhr kin imwila suwed. Ia duwen riatail Kristian men eh kak kanahieng ma tohn pwihn me e iango lella meh epwiki de kid kei? Kitail sohte pahn kak ese uhdahn ihs irail koaros nan pwihno, oh ma arail pwoson uhdahn kehlail. Melkahka 26:4 mahsanih: “I sohte kin patehng aramas soh-katepe kan; sohte ahiong me liksansalamwahu kan.” Ire wet kasalehda me e wia elen erpit en kin textih irail kante me kitail ese.

Pil mehnda ma pwihn wet tikitik de malaulau, Kristian men anahne kasawih mwahu uwen laud en ahnsou me e kin doadoahngki pwehn text meteikan, oh dahme aramas ako nan pwihno kin men koasoakoasoia. Kitail en dehr medewe me kitail anahne sapengala text kan, sohte lipilipil dahme text pwukat kin pidada de ia uwen werei kitail en wia met. Wahnpoaron Pohl katamankihong Timoty duwen irail kan me pahn kin “lipahned oh kin lidere mouren meteikan.” (1 Tim. 5:13) Rahnwet, kitail kakete wia mehkot me duwehte met nan computer de sehlpwohn ape.

Sounkadehde koahiek men sohte pahn kin nda de rong rohng en kepit de pil soahng rir kan duwen Sounkadehde teikan. (Mel. 15:3; Lep. Pad. 20:19) Oh e sohte pahn pouse de rong soangen koasoi kan me uhdahn kapwuriamwei sang dahme uhdahn wiawi, de pil ripoht kan me sohte mie mehn kadehde ma mehlel. (Ep. 4:25) Mie soangen ire mwahu tohto me kin poahsoankihda Paipel oh pil ripoht kan me kitail kak likih nan neitail website, jw.org, oh pil nan prokram en JW Broadcasting^® me kin wiawi sounpwong koaros.

Ekei Sounkadehde kan kin doadoahngki text pwehn netiki, pwainda, oh pakairki soahng kan me re pahn netiki, de ma mie doadoahk en mwohni. Soahng pwukat kin pidada pesines oh sohte kin pidada atail kaudok ong Siohwa. Kristian kan me men “saledeksang limpoak en mwohni” kin pelianda kasongosong en isaneki riatail Kristian kan pwehn wiahda mwohni.​—Ipru 13:5.

Ahpw ia duwen ma kitail doadoahngki messaging apps kan pwehn peki mwohni sang meteikan pwehn kihong riatail Kristian kan me anahne sawas, de ong irail kan me lelohng kahpwal laud kan duwehte rerrer en sahpw de melimel ape? Kitail kin kalapw kasalehda limpoak ni atail kin sewese oh kangoange riatail Kristian kan. (Seims 2:15, 16) Ahpw en wia met sang ni atail text ong pwihn laud ehu pahn kakete kahpwalihala koasoandi en sawas kan me ohpis en Sounkadehdehn Siohwa en omw mwomwohdisou de elder kan nan mwomwohdiso kin kihda ong irail kan me lelohng apwal. (1 Tim. 5:3, 4, 9, 10, 16) Oh kitail pil sohte men kahrehiong aramas akan en medewe me kitail pilipilda ni ahl tohrohr ehu pwehn apwalih riatail Kristian kan.

Kitail kin inengieng wia dahme pahn kalinganahla Koht. (1 Kor. 10:31) Eri ni omw pahn pilada ma ke pahn doadoahngki messaging apps ehu, de wiepe teikan duwehte met, medewe mwahu keper kan me kakete wiawi, oh kanahieng.