1. Dahme kahrehda Sises patohwan peki rehn Siohwa en ketin sinsile sapwellime tohnpadahk ko?

NI KAIMWISEKLAHN pwohngo me Sises ketiket sampah, e ketin medemedewe duwen kahpwal kan me sapwellime tohnpadahk kan pahn lelohng. Pwehki e ketin poakohng sapwellime tohnpadahk ko, Sises patohwan peki rehn Semeo en “ketin sinsile irail pwehki me suwedo.” (Sohn 17:14, 15) Sises mwahngih me mwurin eh ketidahla nanleng, Sehdan me Tepil pahn pousehlahte uhwong koaros me kin men papah Siohwa. Eri e sansal me sapwellimen Siohwa aramas akan anahne Siohwa en ketin pere irail.

2. Ia duwen atail kak kamehlele me Siohwa pahn ketin sapengala atail kapakap kan?

² Siohwa ketin sapengala ahn Sises kapakapo pwehki E ketin poakohng Sapwellime Ohlo. Ma kitail kin wia uwen atail kak pwehn kaperenda Siohwa, e pil pahn ketin poakohng kitail, oh e pahn ketin sapengala atail kapakapki sawas oh perepatail. Nin duwen Tapwin peneinei men me kin nsenoh, Siohwa pahn ketin pousehlahte apwalih sapwellime seri kan ni limpoak. Siohwa iei Sahm limpoak men. Kahrehda e pahn ketin pousehlahte apwalih sapwellime seri kan. Ma e sohte ketin wia met, met pahn kihsang wahupen mwareo, de kak kauwehla adamwahu en mwareo.

3. Dahme kitail anahnehki perepatail sang rehn Siohwa rahnwet?

³ Kitail anahne Siohwa en ketin pere kitail ahnsou wet laudsang mahs. Sehdan lekdeksangehr nanleng oh “inenen lingeringer kowahlap.” (Kaud. 12:12) E kahrehiongehr ekei aramas en medewe me ni arail kin kaloke kitail, “re kin papah Koht.” (Sohn 16:2) Meteikan, me sohte kin kamehlele Koht, kin kaloke kitail pwehki kitail weksang aramas akan nan sampah wet. Sohte lipilipil dahme kahrehda aramas akan kin kaloke kitail, kitail sohte kin masak. Dahme kahrehda? Pwehki Paipel mahsanih: “Kauno me lelepek, oh e pahn ketin kakehlaka oh pereikumwailsang me suwedo.” (2 Des. 3:3) Ia duwen Siohwa eh kin ketin pere kitail? Kitail  pahn koasoiapene soahng riau me e ketikihong kitail.

4. Nin duwen me Episos 6:13-17 mahsanih, dahme Siohwa ketikihda pwehn pere kitail?

⁴ Siohwa ketikihda tehtehn mahwen kan ong kitail me kak pere kitail sang ahn Sehdan uhwong kan. (Wadek Episos 6:13-17.) Tehtehn mahwen pwukat sang rehn Koht kehlail oh uhdahn kadoadoahk! Kitail anahne pousehlahte doadoahngki ehuehu tehtehn mahwen pwukat ma kitail men en pere kitail. Dahme ehuehu tehtehn mahwen ko kin karasaraskihong? Kitail pahn koasoiapene ehuehu soahng pwukat.

5. Dahme kateng en mehlelo kin karasaraskihong, oh dahme kahrehda kitail anahne doadoahngki?

⁵ Kateng en me mehlel kin karasaraskihong padahk mehlel kan me dierek nan Mahsen en Koht, Paipel. Dahme kahrehda kitail anahne doadoahngki kateng wet? Pwehki Sehdan iei “semen likamw.” (Sohn 8:44) E liklikamwki erein sounpar kid kid kei oh e pitihdier “sampah pwon”! (Kaud. 12:9) Ahpw padahk mehlel kan en Paipel kin pere kitail sang eh likamw kan. Ia duwen atail kin pwuhriong kateng en me mehlelo? Kitail kin wia met sang ni atail kin sukuhlki dahme mehlel duwen Siohwa, sang ni atail kin kaudokiong ih oh kaudongki “sapwellime manaman oh mehlel,” oh sang ni atail kin mehlel ni soahng koaros.​—Sohn 4:24; Ep. 4:25; Ipru 13:18.

6. Ia wehwehn en perehki mwaremwaratail kan perehpen pwung, oh dahme kahrehda kitail anahne doadoahngki?

⁶ Perehki mwaremwaratail kan perehpen pwung. Met kin karasaraskihong sapwellimen Siohwa koasoandi pwung kan. Dahme kahrehda kitail anahne pwuhriong perehpen mwaremwaratail? Duwehte perehpen mwaremwaren sounpei men eh kin pere eh mohngiongo, atail perehki mwaremwaratail perehpen pwung pahn pere kitail sang soahng suwed kan en sampah wet me kakete kauwehla atail mohngiong, de soangen aramas dah kitail. (Lep. Pad. 4:23) Siohwa ketin kasik me kitail en poakohng ih oh papah ih sang ni atail mohngiong unsek. (Mad. 22:36, 37) Eri Sehdan kin song en kauhkitaildihsang papah Siohwa sang mohngiongitail unsek ni eh kin kahrehiong kitail en poakohng soahng kan en eh sampah me Siohwa kin ketin kalahdeki. (Seims 4:4; 1 Sohn 2:15, 16) Oh ma met sohte kin pweida, e pahn kin kaloke kitail oh song en kahrehiong kitail en wia mehkot me kin kansensuwedihala Siohwa.

7. Ia duwen atail kin perehki mwaremwaratail perehpen pwung?

⁷ Kitail kin perehki mwaremwaratail perehpen pwung sang ni atail peikiong sapwellimen Siohwa koasoandi kan ong dahme pwung oh sapwung oh sang ni atail kin mour pahrekiong koasoandi ko. (Mel. 97:10) Ele ekei kin medewe me sapwellimen Siohwa koasoandi kan kin katikala atail saledek. Ahpw ma kitail uhdihsang doadoahngki kaweid en Paipel kan nan atail mour, kitail pahn duwehte sounpei men me kihsang eh mehn pere mwaremwareo nan werengen mahwen ehu pwehki e medewe me e nohn toutou. Ia uwen met eh pahn wia tiahk pweipwei! Ahpw ma kitail poakohng Siohwa, sapwellime kehkehlik kan, “sohte apwal” ahpw e wia perepatail.​—1 Sohn 5:3.

8. Ia wehwehn en pwuhriong nan atail suht pwehn onopadahng lohki rongamwahwo?

⁸ Pohl pil kangoange kitail en pwuhriong nan suht pwe kitail en onopadahng lohki rongamwahu en popohl. Met wehwehki me kitail anahne ahnsou koaros onopada en kalohki rongamwahu en Wehio. Ni atail kin padahkihong meteikan dahme Paipel mahsanih, pein atail pwoson kin kehlailla. Kitail kin ale mehn kangoang ni atail kin kilang uwen sapwellimen Siohwa aramas akan nan sampah pwon ar kin isaneki ar ahnsou mwahu en kalohk sohte lipilipil wasa re mi ie. Karasepe, irail kin kalohk wasahn arail doadoahk de imwen sukuhl, kalohk ihmw lel ihmw de wasahn pesines kan, ni arail kin kohla netinet, ni arail kin  mwemweitla rehn arail peneinei kan me kaidehn Sounkadehde kei, de koasoiong aramas akan me re ese. Ma masepwehk me kahrehda kitail uhdihsang kalohk, kitail pahn duwehte sounpei men me kihsang eh suhto erein mahweno; neho pahn mengei en ohla. Oh e pahn apwal ong ih en pere pein ih ni emen eh pahn peiong ih, oh e sohte pahn kak idawehn koasoandi kan me eh kauno koasoanehdi.

9. Dahme kahrehda kitail anahne wa mehn sansar laud en pwoson?

⁹ Mehn sansar laud en pwoson kin karasaraskihong atail pwoson Siohwa. Kitail pwoson me e pahn ketin kapwaiada sapwellime inou kan koaros. Pwoson wet pahn sewese kitail en “kakunkihla nein me suwedo arep kisiniei kan koaros.” Dahme kahrehda kitail anahne wa mehn sansar laud wet? Pwehki e kin pere kitail pwe padahk likamw kan en irail me kesehla oh uhwongada kaudok mehlel en dehr pitihkitaildi oh pwe kitail en sohte mworusala ni aramas akan ar kin kauwe dahme kitail kin kamehlele. Ma kitail sohte pwoson, kitail sohte pahn ahneki kehl en peikiong Siohwa ni meteikan ar kasonge kitail en sapeikiong ih. Ahpw ahnsou koaros me kitail sohte kin wia mehkot me Siohwa sohte ketin kupwurperenki nan wasahn doadoahk de wasahn sukuhl, atail pwoson kin pere kitail. (1 Pit. 3:15) Ehuehu ahnsou me kitail sohte alehda doadoahk ehu me pweimwahu ahpw sohte pahn mweidohng kitail  en wia uwen atail kak ni atail papah Siohwa, atail pwoson kin pere kitail. (Ipru 13:5, 6) Oh ehuehu ahnsou me kitail kin papah Siohwa mendahki uhwong, atail pwoson kin pere kitail.​—1 Des. 2:2.

10. Dahkot lisoarop en komour, oh dahme kahrehda kitail anahne doadoahngki?

¹⁰ Lisoarop en komour iei koapwoaropworo me Siohwa ketikihong kitail. Koapworopwor wet iei me e pahn ketin katingih koaros me kin wia kupwure, oh mehnda ma kitail mehla, e pahn ketin kaiaskitailda. (1 Des. 5:8; 1 Tim. 4:10; Taitus 1:1, 2) Duwehte lisoarop ehu me kin pere moangen sounpei men, koapworopwor en komour pahn pere atail koahiek en madamadau. Ni ahl dah? Koapworopwor wet kin sewese kitail en medemedewehte sapwellimen Koht inou kan oh pil sewese kitail en dehr nohn pwunodki atail kahpwal kan. Ia duwen atail kin doadoahngki lisoarop wet? Kitail kin wia met sang ni atail kin tehk mwahu me atail pepehm kin pahrekiong sapwellimen Koht pepehm. Karasepe, kitail sohte kin koapworopworki kepwe kan me pahn sohrala, ahpw kitail kin koapworopworki Koht.​—Mel. 26:2; 104:34; 1 Tim. 6:17.

11. Dahkot kedlahs en sapwellimen Koht manaman, oh dahme kahrehda kitail anahne doadoahngki?

¹¹ Kedlahs en sapwellimen Koht manaman iei Mahsen en Koht, Paipel. Kedlahs wet ahneki manaman en kasansalehda soangen likamw koaros oh en kasaledekihala aramas akan sang padahk likamw oh tiahk keper kan. (2 Kor. 10:4, 5; 2 Tim. 3:16, 17; Ipru 4:12) Kitail kin sukuhlki en doadoahngki mwahu kedlahs wet sang ni atail kin wia pein atail onop Paipel oh sang ni atail ale kaiahn sang sapwellimen Koht pwihn. (2 Tim. 2:15) Patehng tehtehn mahwen ko, Siohwa ketikihong kitail pil ekei mehn perepatail kehlail. Dah kei mwo?

12. Dahme kitail pil anahne, oh dahme kahrehda?

¹² Sounpei koahiek men ese me e sohte kak pweida ma e kelehpw mahweniong karis en sounpei laud ehu oh kana; e anahne sawas sang ienge sounpei kan. Duwehte met, kitail sohte kak kana ma kitail kelehpw pelianda Sehdan oh nah kan; kitail anahne sawas sang riatail Kristian kan. Siohwa ketikihda sounpei rar rar kei me kak sewese kitail. Irail iei ‘riatail kan koaros’ nan sampah pwon.​—1 Pit. 2:17.

13. Nin duwen me Ipru 10:24, 25 mahsanih, ia duwen atail mihting kan eh kin sewese kitail?

¹³ Ehu ahl me kitail kin alehdi sawas iei sang ni atail kin iang towehda mihting kan. (Wadek Ipru 10:24, 25.) Kitail koaros kin mworusala ekei pak. Ni ahnsou me met kin wiawi, mihting kan kak kangoange kitail. Pasapeng kan me riatail Kristian kan kin kihda kin kangoange kitail. Padahk en Paipel kan oh kamwomwada kan me re kin wia kin kamwakid kitail en pousehlahte papah Siohwa. Oh atail kin koasoiong meteikan mwohn oh mwurin mihting kin kangoange kitail. (1 Des. 5:14) Patehng met, atail mihting kan kin kihong kitail ahnsou mwahu en sewese meteikan, oh met kin kahrehiong kitail en peren. (Wiewia 20:35; Rom 1:11, 12) Atail mihting kan pil kin sewese kitail ni ahl teikan. E kin sewese kitail en kamwahwihala mwomwen atail kalohk oh padahk. Karasepe, kitail sukuhlki en doadoahngki mwahu sawaspen Paipel kan nan neitail Koakon en Kasukuhl. Eri kaunopada mwahu ong mihting kan en mwomwohdiso. Erein mihtingo, rong kanahieng. Mwurin mihtingo, doadoahngki dahme ke sukuhlki. Ni omw wia soahng pwukat, ke pahn wiahla “sounpei mehlel men en Krais Sises.”​—2 Tim. 2:3.

14. Ia pil ehu sawas me kitail ahneki?

¹⁴ Kitail pil kin ale sawas sang tohnleng kehlail rar rar kei. Medewehla dahme emente tohnleng kak wia! (Ais. 37:36) Met uhd medewehla dahme karis en tohnleng kehlail ehu pahn kak wia. Sohte aramas emen de ngehn suwed men kak pelianda sapwellimen Siohwa karis kehlailo oh kana. Siohwa uhdahn ketin  manaman. Eri ni eh kin ketin ieiang kitail, kitail pahn ahnsou koaros kehlailsang irail kan me kin uhwong kitail, sohte lipilipil ia uwen tohtohn irail. (Sounkopwung 6:16) Kitail kak uhdahn kamehlele me met mehlel! Medewehla irail koaros me kak sewese iuk ni omw kin mworusala pwehki mehkot me iengomw tohndoadoahk, iengomw tohnsukuhl, de kisehmw me sohte kin papah Siohwa nda de wia. Tamataman me kaidehn kowe kelehpw nan mahwen wet. Ke kin ideidawehn sapwellimen Siohwa kaweid, eri e pahn ketin sewese iuk.

15. Nin duwen me Aiseia 54:15, 17 mahsanih, dahme kahrehda sohte emen kak kauhdi sapwellimen Koht aramas akan sang kalohk?

¹⁵ Sampah wet me mi pahn manaman en Sehdan ahneki kahrepe tohto en kailongki kitail. Kitail sohte kin utung wiewiahn politik kan oh sohte kin iang mahwen. Kitail kin kalohki mwaren Koht, kalohki me sapwellime Wehio kelehpw me kak wahdo meleilei, oh kitail kin peikiong sapwellime koasoandi pwung kan. Kitail kin kadehdehiong aramas akan me kaunen sampah wet sounlikamw oh sounkamaramas men. (Sohn 8:44) Oh kitail kin pakairki me ahn Sehdan sampah wet pahn kereniong sohrala. Ahpw Sehdan oh ienge kan sohte pahn kauhdi atail doadoahk en kalohk. Kitail pahn pousehlahte kapinga Siohwa ni soangen ahl koaros me kitail kak! Mendahki Sehdan uhdahn kehlail, e saikinte kak kauhdi rongamwahu en Wehio en lella rehn aramas koaros nin sampah. Met kak wiawi pwehki Siohwa kin ketin pere kitail.​—Wadek Aiseia 54:15, 17.

16. Ia duwen Siohwa eh pahn ketin doarehla sapwellime aramas akan erein kahn kamakam kowahlapo?

¹⁶ Dahme pahn wiawi mwuhr? Erein kahn kamakam kowahlapo, Siohwa pahn ketin perei kitail ni ahl kapwuriamwei riau. Keieu, e pahn ketin doarehla sapwellime ladu loalopwoat kan ahnsou me e pahn ketin kahrehiong nanmwarki kan en sampah ren kasohrehla Papilon Lapalap, pwihn en pelien lamalam likamw koaros. (Kaud. 17:16-18; 18:2, 4) Keriau, e pahn ketin doarehla sapwellime kan ni eh pahn ketin kasohrehla nan Armakedon soahng koaros me luhwehdi nan ahn Sehdan sampah.​—Kaud. 7:9, 10; 16:14, 16.

17. Ia duwen atail kak paiekihda atail mihmi karanih Siohwa?

¹⁷ Ni atail kin mihmi karanih Siohwa, sohte mehkot me Sehdan kak wiahiong kitail me pahn kauwehla kitail kohkohlahte. Ni mehlel, ih me pahn sohrala kohkohlahte. (Rom 16:20) Eri pwuhriong nan tehtehn mahwen ko koaros, oh doulahte doadoahngki! Dehr kelehpw pelianda Sehdan oh eh sampah. Sewese riomw Kristian kan. Oh idawehn sapwellimen Siohwa kaweid. Ma ke wia met, ke kak kamehlele me Semomw limpoako nanleng pahn ketin kakehlaka oh pere iuk.​—Ais. 41:10.