1. Dahme Mahsen en Koht padahkihong kitail?

KITAIL kak diar sawas ong kahpwal sohte lipilipil, met pwehki Siohwa iei atail Sounkaweid Lapalap. (Ais. 30:20, 21) Sapwellime Mahsen kin padahkihong kitail soahng koaros me kitail anahne pwehn “uhdahn koahiekla oh onopadahr ni unsek ong doadoahk mwahu koaros.” (2 Tim. 3:17) Ni atail kin mourki padahk kan en Paipel, kitail kin loalokong sang irail kan me kin nda me kitail anahne mourki “erpit en sampah wet.”​—1 Kor. 3:19; Mel. 119:97-100.

2. Dahme kitail pahn tehkpene nan iren onop wet?

² Nin duwen me kitail pahn kilang, erpit en sampah wet kin kalapw kamwakid atail ineng roporop kan. Eri kitail kak apwalki en soikala madamadau oh wiewia en irail kan me wia kisehn sampah wet. Pwehki kahrepe mwahu wet, Paipel mahsanih: “Kumwail kanahieng pwe emen de lidipihekin kumwail erpit en sampah oh widing mwahl nin duwen tiahk en aramas, nin duwen madamadau oh tiahk en sampah wet.” (Kol. 2:8) Nan iren onop wet, kitail pahn tehkpene ia duwen aramas akan ar tepida kamehlele likamw riau me Sehdan padahngki. Nan ehuehu ire pwukat, kitail pahn kilang dahme kahrehda erpit en sampah wet wia mehkot pweipwei oh ia duwen erpit en Mahsen en Koht uhdahn mwahusang dahme sampah wet kin kihda.

3-4. Wekidekla dah kei duwen ahn aramas madamadau me pid tiahk kan me wiawi nan Wehin Amerika tepidahn pahr 1900 samwa?

³ Nan Wehin Amerika, tepidahn pahr 1900 samwa, wekidekla laud wiawi me pid ahn aramas madamadau duwen wia nsenen pwopwoud. Mwohn ahnsowo, aramas tohto kin kamehlele me wia nsenen pwopwoud kin wiawihte nanpwungen me pwopwoud kan oh e wia ire ehu me aramas sohte anahne koasoiaseli. Dahme irail kamehlele sohla wiawi, oh soangen madamadau me soahng koaros mweimwei kin uhd tohtohla.

 ⁴ Nanpwungen pahr 1920 oh 1929, ahn aramas akan ar madamadau oh wiewia ong nsenen pwopwoud wekila laud. Emen sounroporop nda: “Kasdo, sipai, koul, oh pwuhk kan, oh pelien pesines tepida kasalehda mehn kamweit kan duwen tiahk me pid wia nsenen pwopwoud.” Erein sounpar ko, mwomwen ekei ar kin kahlek kahrehiong aramas akan en medemedewe duwen wia nsenen pwopwoud oh likou kan me irail likawih tepida sohla konehng. Nin duwen me Paipel kohpada ni imwin rahn akan, aramas akan pahn “nsenkihte wia nsenarail.”​—2 Tim. 3:4.

5. Dahme wiawihong ahn sampah madamadau me pid tiahk kan sang pahr 1960 samwa?

⁵ Nan pahr 1960 samwa, madamadau en mihmihpene ahpw sohte pwopwoud, ohl mwahuki ohl de lih mwahuki lih, oh mengeilahn mweipeseng en pwopwoud kin wie tohtohla. Soangsoangen mehn kamweit tohto kin kalaudehla arail kasalehda soahng kan me pid wia nsenen pwopwoud. Ia imwilahn mepwukat koaros? Emen sounnting en pwuhk nda me mie imwila kansensuwed tohto ni aramas akan ar sohla idawehn koasoandi kan me pid tiahk. Karasepe, peneinei kan me pahpa nohno sohte kin mihmihpene de emen rehra kohkohsang peneineio, oh me kin nsensuwed laud de me sohte kak uhdihsang kilang kilel de kasdo suwed, oh soangen kahpwal teikan me duwehte met, kin kohsang “madamadau en aramas tohto ahnsou wet ar solahr kesempwalki koasoandi en dahme pwung oh sapwung ong tiahk me pid wia nsenen pwopwoud.” Tohtohlahn soumwahu suwed, me duwehte AIDS, iei pil ehu mehn kadehde me erpit en sampah pweipwei.​—2 Pit. 2:19.

6. Ia duwen madamadau en sampah duwen wia nsenen pwopwoud eh wia mehkot me Sehdan mwahuki?

⁶ Mwomwen ahn sampah wet madamadau duwen wia nsenen pwopwoud iei me Sehdan mwahuki. E perenki kilang aramas akan en wia kauwe sapwellimen Koht kisakis en wia nsenen pwopwoud oh sohla wauneki sapwellime kisakis en pwopwoud. (Ep. 2:2) Ma aramas kin wiewia tiahk samin me pid wia nsenen pwopwoud, irail kin kasalehda me irail sohte kesempwalki kisakis en naineki seri me Siohwa ketikihong aramas akan. Irail pil kakete sohte kak iang mour kohkohlahte.​—1 Kor. 6:9, 10.

7-8. Dahme kahrehda dahme Paipel padahngki duwen wia nsenen pwopwoud uhdahn mwahusang madamadau en sampah?

⁷ Aramas akan me kin pwungki erpit en sampah kin kauwe koasoandi kan en Paipel me pid dahme pwung oh sapwung, oh kose me koasoandi pwukat wia mehkot me apwal en kapwaiada. Aramas pwukat ele kin idek, ‘Dahme kahrehda  Koht ketin kapikada kitail en ahneki ineng en wia nsenen pwopwoud ahpw mahsanihong kitail en dehr wia met?’ Irail kin idek peidek wet pwehki madamadau sapwung me dene ma aramas men wia mehkot, a ren wia. Ahpw dahme Paipel mahsanih weksang met. Paipel mahsanih me kitail sohte anahne peikiong ineng koaros me kitail ahneki, ahpw kitail ahneki koahiek en pelianda wia dahme suwed. (Kol. 3:5) Patehng met, Siohwa ketikihda kisakis en pwopwoud, koasoandi ehu me pwopwoud kan en kak kaitarala arail ineng en wia nsenen pwopwoud ni ahl ehu me konehng. (1 Kor. 7:8, 9) Ni ahl wet, pwopwoud ehu kak perenki wia met oh sohte ahneki pepehm en koluhla de pwunod me kin kalapw kohsang tiahk samin.

⁸ Weksang erpit en sampah, Paipel kin padahkihong kitail madamadau pwung duwen nsenen pwopwoud. E padahngki me wia nsenen pwopwoud kak wia mehkot kansenamwahu. (Lep. Pad. 5:18, 19) Ahpw, Paipel mahsanih: “Emenemen kumwail anahne ese ia duwen eh pahn kaunda pein paliwere ni sarawi oh wahu, ahpw kaidehn ni ineng kehlail en wia nsenen pwopwoud ni mehwo duwehte aramas akan me sohte kin ese Koht.”​—1 Des. 4:4, 5.

9. (a) Ia duwen sapwellimen Siohwa aramas akan ni tepidahn pahr 1900 samwa ar ale sawas en idawehn erpit en Mahsen en Koht? (b) Kaweid erpit dahieu me sansalda nan 1 Sohn 2:15, 16? (c) Nin duwen me ntingdi nan Rom 1:24-27, soangen tiahk samin dah kan me kitail anahne pelianda?

⁹ Erein tepidahn pahr 1900 samwa, sapwellimen Siohwa aramas akan sohte kin pitida pahn madamadau en irail kan me “solahr arail pepehm en namenek.” (Ep. 4:19) Irail kin nantihong kapwaiada sapwellimen Siohwa koasoandi kan. Kahn Iroir (lokaiahn wai) en May 15, 1926 koasoia me “ohl emen de lih emen anahne mwakelekel nan eh madamadau oh wiewia, ahpw mehlel ni ara kilangwohng emenemen.” Mendahki dahme kin wiewiawi nin sampah, sapwellimen Siohwa aramas akan kin idawehn erpit en Mahsen en Koht. (Wadek 1 Sohn 2:15, 16.) Ia uwen atail kalahnganki Mahsen en Koht! Kitail pil kalahnganki me Siohwa kin ketikihda padahk mehlel kan ni ahnsou me konehng pwehn sewese kitail en dehr pitida pahn madamadau en sampah me pid tiahk samin. *​—Wadek Rom 1:24-27.

10-11. Dahme Paipel mahsanih me pahn wiawi ni imwin rahn akan?

¹⁰ Paipel mahsanih me erein imwin rahn akan, aramas pahn “poakohngete pein irail.” (2 Tim. 3:1, 2, ntp.) E sohte kapwuriamwei me sampah wet kin kangoange soangen madamadau en roporop wet. Ehu pwuhk en dikseneri koasoia me erein pahr 1970 samwa, soangen “pwuhk kan me kin kaweid emen en ahneki mour me pweida mwahu kin uhdahn tohtohla.” Ekei pwuhk kin “kangoange sounwadawad kan en esehla oh pwungki oh kawauwih pein irail.” Karasepe, tehk dahme ehu pwuhk koasoia: “Poakohng pein uhk pwehki kowe me keieu kaselel oh kaperen sang koaros.” Pwuhko koasoia me aramas emen en pein pilada mwomwen eh tiahk oh en wia dahme e medewe me pwung oh mengei ong ih.

¹¹ Mie pak me ke rong duwen met? Sehdan kangoange Ihp en wia duwehte. E nda me Ihp kak “duwehla Koht, . . . esehla dahme mwahu oh dahme suwed.” (Sen. 3:5) Rahnwet, me tohto kin medewe me re mwahusang meteikan oh re medewe me sohte emen​—pil kaidehn Koht—​kak padahkihong irail dahme pwung oh dahme sapwung. Karasepe, madamadau wet kin sansalda ahpw mehlel sang ni mwomwen aramas akan ar kin kilangwohng mouren pwopwoud.

12. Soangen madamadau dahieu me sampah wet ahneki duwen pwopwoud?

 ¹² Paipel kaweid ohl oh lih pwopwoud kan en wauneki emenemen oh inou en pwopwoud. E kangoange pwopwoud kan en koasoanehdi teng en mihmihpene, ni eh mahsanih: “Ohl emen pahn kin mweikihsang seme oh ine oh ehukihong eh pwoud, pwe ira en kin wiahla ehu.” (Sen. 2:24) Ahpw, irail kan me kin mwekidki erpit en sampah kin kangoange madamadau me weksang met, oh koasoia me emenemen ohl de lih pwopwoud en medemedewehte pein eh anahn kan. Ehu pwuhk duwen mweipeseng koasoia me nan ekei sahpw, ni aramas akan ar kin pwopwoudida irail kin wiahda inou ehu mwohn meteikan me irail pahn kapwaiada inou wet erein arail mour. Me tohto wekidala lepin lokaia kan nan inowo en nda me irail pahn wia pwopwoud ehu erein arail pahn limpoakpene. Pwehki aramas akan sohte kin medewe me kapwopwoud mehkot poatopoat, peneinei kan kin tepida tohrohrpeseng oh me tohto kin uhdahn medengkihla met. E uhdahn sansal me madamadau en sampah ong pwopwoud wia mehkot pweipwei.

13. Ia ehu kahrepe me Siohwa ketin kalahdeki aramas aklapalap kan?

¹³ Paipel mahsanih: “KAUN-O kin ketin kalahdeki koaros me kin aklapalap.” (Lep. Pad. 16:5) Dahme kahrehda Siohwa ketin kalahdeki aramas aklapalap kan? Ehu kahrepe iei me irail kan me kin kakairada oh utung madamadau en poakohng pein irail kin aklapalap duwehte Sehdan. Nna medewehla, Sehdan kamehlele me Sises​—meno me Koht ketin doadoahngki pwehn kapikada soahng koaros—​anahne poaridi oh pwongih ih! (Mad. 4:8, 9; Kol. 1:15, 16) Irail pwukat me ahneki soangen madamadau en kesempwalki pein irail kin kadehdehda me erpit en sampah wet wia mehkot pweipwei rehn Koht.

14. Ia duwen Rom 12:3 eh sewese kitail en ahneki madamadau toupahrek duwen pein kitail?

¹⁴ Paipel kin sewese kitail en ahneki madamadau toupahrek duwen pein kitail. E mahsanih me kitail en poakohng pein kitail ni ahl me konehng. Sises mahsanih: “Poakohng mehn mpomw duwen omw kin poakohng pein uhk,”  met kasalehda me kitail en toupahrek ong pein atail anahn akan. (Mad. 19:19) Ahpw, Paipel padahkihong kitail me kitail en dehr medewe me kitail kesempwalsang meteikan. Weksang met e mahsanih: “Kumwail dehr wia mehkot sang ni akamai de aklapalap, ahpw ni aktikitik, kumwail wiahki meteikan lapalapasang kumwail.”​—Pil. 2:3; wadek Rom 12:3.

15. Dahme kahrehda ke medewe me kaweid en Paipel duwen dahme kitail medewehki pein kitail kin mwahu?

¹⁵ Rahnwet, aramas tohto me meteikan nda me irail loalokong kin nda me kaweid kan en Paipel mehkot pweipwei. Irail kin nda me meteikan pahn isanekin uhk ma ke medewe me re kesempwalsang uhk. Ahpw ia imwilahn madamadau me ahn Sehdan sampah wet kin kangoange? Dahme ke kilang kin wiewiawi? Aramas roporop kan kin nsenamwahu? Irail kin ahneki peneinei nsenamwahu? Mie kompoakparail mehlel kan? Irail kin ahneki nanpwungmwahu keren rehn Koht? Sang dahme ke kilangehr, mehnia me kin imwila keieu mwahu​—idawehn erpit en sampah wet de erpit me dierek nan Mahsen en Koht?

16-17. Dahme kitail kak kalahnganki, oh dahme kahrehda?

¹⁶ Aramas me kin idawehn kaweid en irail kan me sampah wet nda me re loalokong kin duwehte sounseiloak men me peki rehn ienge sounseiloak teio kaweid ni ara salongalahr. Sises mahsanihki irail kan me dene re “loalokong” ni eh mwehio: “Sounkaweid maskun kei irail. Eri ma me maskun men kin kahre me maskun men, ira koaros pahn pwupwudiong nan pwoahr.” (Mad. 15:14) Ni mehlel, erpit en sampah wet wia mehkot pweipwei rehn Koht.

¹⁷ Kaweid erpit en Paipel kin ahnsou koaros “mwahu ong padahk, ong peneu, ong kapwungala soahng kan, oh ong kaiahn nin duwen sapwellimen Koht koasoandi pwung.” (2 Tim. 3:16) Ia uwen atail kak kalahnganki me Siohwa ketin pere kitail sang erpit en sampah wet ni eh ketin doadoahngki sapwellime pwihn! (Ep. 4:14) Padahk mehlel me e ketikihda kin kihong kitail kehl me kitail anahne pwehn tengedihongete koasoandi kan en sapwellime Mahsen. E inenen mwahu me Siohwa ketikihong kitail erpit oh kaweid me kitail kak keieu likih sang nan Paipel!