“Ngehi aramas emen me namenek,” Sara * koasoia, “oh I sohte kin likih pein ngehi. Eri I kin soansuwed ni ei kin mi rehn aramas me sohte kin namenek en koasoi de wia dahme re men wia. Ahpw I kin nsenamwahu ni ei kin mi rehn aramas me kin mpahi oh aktikitik. I kin kak koasoiaiong soangen aramaso ei pepehm oh ei kahpwal kan. Kompoakepahi keren kan kin mpahi oh aktikitik.”

En Sara koasoio kasalehda me ma kitail kin mpahi, meteikan pahn men kompoakepahnkin kitail. Mpahi pil kin kaperenda Siohwa. Sapwellime Mahsen kangoangehkin kitail: “Kumwail pwuhriong nan limpoak me kin mwekidki . . . mpahi.” (Kol. 3:12) Dahkot mpahi? Ia duwen Sises kin ketin kasalehda mpahi? Oh ia duwen irair wet eh kak sewese atail mour en nsenamwahu?

Mpahi irair ehu me kin kahrehiong omw wia emen me kin meleilei. Aramas mpahi men kin kadek ong meteikan, e kin meleilei ni mehkot eh kin kalingeringerih.

Lepin lokaiahn Krihs ong “mpahi” kin kadoadoahk ong kawehwehda duwen oahs lawalo men me kin mandala. Mendahki oahso mandahlahr, e sohte luwetala. E kehkehlailte. Pil duwehte, aramas mpahi men sohte luwet. Ahpw e kehlail. Dahme kahrehda kitail kak ndahki met? Pwehki aramaso kak kaunda eh soh unsek kan oh ahnekihte popohl rehn meteikan.

Ele kitail kin medewe, ‘Ngehi kaidehn aramas mpahi men.’ Kitail kin mi nan sampah ehu me aramas akan kin ngihtehtehki dahme re mwahuki oh meteikan sohte kin kanengamah, eri ele kitail kin apwalki en kasalehda mpahi. (Rom 7:19) Eri, e kesempwal en kakairada mpahi, oh sapwellimen Siohwa manaman pahn sewese kitail en kolokolete mpahi. (Kal. 5:22, 23) Dahme kahrehda kitail en nantihong kakairada mpahi?

Aramas kin perenki me mpahi. Duwehte me Sara koasoia, kitail kin men patehng aramas mpahi men. Sises ketin wia mehn kahlemeng mwahu en aramas mpahi oh kadek. (2 Kor. 10:1) Pil seri kan me sohte nohn ese ih kin men karanihala ih.​—Mark 10:13-16.

Mpahi kin pere kitail pil iangahki irail me kin karanih kitail. Ma kitail kin mpahi, kitail sohte pahn mwadangete nsensuwedla de mwehlda.  (Lep. Pad. 16:32) Kitail sohte pahn kamedekihala meteikan, iangahki irail me kitail poakohng, eri kitail sohte pahn nsensuwedkihla. Oh meteikan pahn paiekihda met pwehki kitail pahn kaunda atail pepehm oh wiewia kan oh sohte kamedekihala irail.

Mendahki e sapwellimanki pwukoa laud oh tohto, Sises kin ketin kasalehda opampap ong meteikan. Me tohto nan ahnsowo kin ahneki kahpwal kan, oh re kin anahne mehn kamweit. Ia uwen arail nsenamwahula ni Sises eh mahsanihong irail: “Kohdo rehi, . . . pwe I me opampap oh mohngiong karakarahk”!​—Mad. 11:28, 29.

Ia duwen atail kak sukuhlki en mpahi duwehte me Sises ketin wia? Kitail kin onopki Mahsen en Koht pwehn sukuhlki ia sapwellimen Sises wiewia ong aramas oh dahme e kin ketin wia nan ahnsou apwal kan. Eri, ni atail kin lelohng kahpwal kan me kin apwal en kasalehda mpahi, kitail en nantihong alasang Sises. (1 Pit. 2:21) Tehk soahng siluh me sewese Sises en ketin mpahi.

Sises kin ketin aktikitik. Sises mahsanih me e kin ketin “opampap oh mohngiong karakarahk.” (Mad. 11:29) Paipel mahsanih irair riau pwukat pwehki mpahi kin kereniong duwehte aktikitik. (Ep. 4:1-3) Dahme kahrehda?

Aktikitik kin sewese kitail en dehr keh lingeringer. Dahme Sises ketin wiewia ni meteikan ar kin kauwehki me e “mehwo” oh “kin mwahuki nim wain”? E ketin kasansalehda me met likamw sang ni sapwellime wiewia, oh ni mpahi mahsanih me “erpit kin dehdehda sang ni wiewia.”​—Mad. 11:19.

Ma mie me koasoi ni soh lamalam duwen wasa ke tikida, soangen aramas dahmen kowe, de wasa ke kohsang, ke sou pahn nantihong en apwalihala met ni mpahi? Peter, elder Kristian men nan South Africa koasoia: “Ni ei kin mwehlkihda dahme emen nda, I kin pein idek rehi, ‘Dahme Sises pahn ketin wia?’” E pil koasoia: “I sukuhlki en dehr keh lingeringer.”

Sises mwahngih ahn aramas akan soh unsek. Sapwellimen Sises tohnpadahk ko kin men wia dahme pwung, ahpw pwehki arail soh unsek, re sohte kin kalapw wia met. Karasepe, nipwongo mwohnte Sises ketin pwoula, Piter, Seims, oh Sohn sohte iangih Sises pepehd nin duwen me e ketin peki ren wia. Sises ketin kasalehda me e mwahngih dahme kahrehda re meirla ni eh mahsanih “mehlel, mohngiong me ngoang, ahpw paliwar me luwet.” (Mad. 26:40, 41) Pwehki e mwahngih me re soh unsek, Sises sohte ketin engiengda pahn sapwellime wahnpoaron ko.

Mandy iei sister men me mahso kin tehk ahn meteikan sapwung, ahpw met e kin nantihong en alasang sapwellimen Sises mehn kahlemeng en mpahi. E koasoia, “I kin song en tamataman me aramas koaros soh unsek oh ien kin kilangete ahn aramas irair mwahu kan, nin duwen me Siohwa kin ketin wia.” Ia duwe, Sises eh ketin kilengwohng soh unsek en aramas pil kak sewese iuk en kasalehda mpahi ong meteikan?

Sises kin mweidohng Siohwa en ketin apwalihala. Ni Sises eh ketiket nin sampah, e ketin dadaurete pahn wiewia sapahrek. Aramas kan kin lemelemehk suwed ih, mwamwahliki, oh kaloke. Mendahki met, e kin ketin pousehlahte opampap pwehki e ketin “mweidala pein ih ong Meno me kin ketin kadeikada ni pwung.” (1 Pit. 2:23) Sises ketin mwahngih me Semeo nanleng pahn ketin apwalih ih oh apwalihala wiewia sapahrek ni ahnsou me konehng.

Ma kitail lingeringerkihda wiewia sapahrek ehu oh pelianda, met pahn kahrehiong atail mour nan apwal. Ihme kahrehda Paipel katamankin kitail: “Pwe lingeringer en aramas sohte kin wahdo sapwellimen Koht pwung.” (Seims 1:20) Mehnda ma mie kahrepen atail en lingeringer, pwehki atail sohte unsek, kitail kakete mwekid ni ahl sapwung.

Sister men nan Sehmen me adaneki Cathy kin medewe, ‘Ma ke sohte kin uhki pein uhk, sohte me pahn wia met.’ Ahpw ni eh sukuhlki en likih Siohwa, eh madamadau wekila. E nda, “Met I solahr pahn kin anahne onopada pwehn uhki pein ngehi, I kin mwekid ni mpahi pwehki I ese me Siohwa pahn ketin kamwahwihala soahng suwed koaros nin sampah.” Ma mie pak emen wiahiong uhk me sapwung,  alasang sapwellimen Sises mehn kahlemeng en likih Koht pil pahn sewese iuk en kolokolete omw mpahi.

Sises ketin kasansalehda ma kitail men peren, kitail anahne en mpahi. E mahsanih: “Meid pai irail me mpahi.” (Mad. 5:5) Tehk ia duwen mpahi eh sawas nan soangen irair kan me kileldi pah.

Ma mie kahpwal nan pwopwoud ehu, mpahi kak kamwahwihala. Robert, brother men sang Australia, koasoia: “I kin nda soahng kamedek kan ong ei pwoudo ni ei sohte medewe. Ahpw ni ahnsou me ke nda mehkot ni lingeringer, ke sohte kak mwomwehda me ke sohte ndahla soahng kamedeko. I uhdahn nsensuwedkihla ni ei kilang me I kamedekihala laud ei pwoudo.”

“Kitail koaros kin sapwungala pak tohto” nan atail lokaia, oh atail koasoi ni soh madamadau kak kauwehla popohl nan mouren pwopwoud. (Seims 3:2) Nan soangen irair pwukat, mpahi kak sewese kitail en kolokolete popohl oh kaunda lowatail.​—Lep. Pad. 17:27.

Robert nanti laud pwehn kakairada meleilei oh mpahi. Ia imwilahn met? E koasoia: “Rahnpwukat, ni sawehwe eh kin pwarada nanpwungen ngehi oh ei pwoudo, I kin nantihong en rong kanahieng, koasoi ni mpahi, oh dehr mweidohng ien lingeringerda. Ei nanpwungmwahu rehn ei pwoudo uhdahn mwahula.”

Mpahi kin sewese kamwahwihala atail ehuong meteikan. Pali laud en aramas me kin keh lingeringer malaulau kompoakparail. Ahpw mpahi kin sewese kitail en ‘popohl nanpwungatail oh nantihong kolokol ehupene.’ (Ep. 4:2, 3) Cathy me kitail koasoiapene mwoweo nda, “Ni ei kin mpahi, I kin perenki werekiong meteikan, mendahki e kin apwal en ehuong ekei.”

Mpahi kin kahrehda popohl loalatail. Paipel kin kadokepene “erpit sang powe” oh mwakelekel oh popohl. (Seims 3:13, 17) Aramas mpahi men kin “nan kapehd meleilei.” (Lep. Pad. 14:30) Martin, me kin nanti laud pwehn kakairada irair en mpahi, esehda met ni eh nda, “Met I solahr kin ngihtehtehki soahng kan en wiawi ni ahl me I mwahuki, oh I kin nsenamwahuki eh mie popohl loalei.”

Mehlel, ele kitail kin anahne nanti laud pwe kitail en mpahi. Emen brother nda: “Ni mehlel leledo rahnwet, ekei pak I kin uhdahn lingeringerda.” Ahpw Siohwa, me kin ketin kangoange kitail en mpahi, pahn ketin sewese kitail nan soangen apwal wet. (Ais. 41:10; 1 Tim. 6:11) E kak ketin ‘kanekehla atail kaiahn’ oh kak ketin ‘kakehleikitailda.’ (1 Pit. 5:10) Kedekedeo, duwehte wahnpoaron Pohl, kitail kak kahlemengih “sapwellimen Krais mpahi oh kadek.”​—2 Kor. 10:1.