1-2. Soangen kahpwal dah kan me Sounkadehde tohto ahneki?

WAHNPOARON Pohl kangoange Timoty, oh pil Kristian koaros, en kapwaiada arail doadoahk en kalohko ni unsek. (2 Tim. 4:5) Eri kitail koaros kin idawehn ahn Pohl kaweid oh wia uwen atail kak nan sapwellimen Koht doadoahk. Ahpw ekei pak e kin apwal. Tohtohn riatail Kristian kan kin uhdahn anahne eimah pwe ren iang kalohk. (2 Tim. 4:2) Karasepe, medewehla riatail Kristian kan me kin kousoan nan sahpw kan me ekei atail doadoahk de atail doadoahk koaros kin keinapwidi. Irail kin iang kalohk mendahki irail ese me re kakete selidi!

² Sapwellimen Siohwa aramas akan anahne dadaur pahn soangsoangen kahpwal kan me kakete kamworusihirailla. Karasepe, me tohto anahne doadoahk erein awa tohto pwehn ihte apwalihala anahn en arail peneinei kan. Irail men kalaudehla arail doadoahk en kalohk, ahpw lel ni imwin wihk kan, irail pwangadahr. Ekei kin kak wia soahng keite pwehn papah Siohwa pwehki re kohwahki soumwahu de mahlahr, de ekei pil sohte kak pedoisang nan imwarail. Pil ekei kin ahnsou koaros pehm me re sohte kesempwal rehn Siohwa. Mary, * sister men sang Middle East, nda: “I anahne doadoahk laud pwehn kaunda ei pepehm en mworus, oh met kin kahrehiong ie en uhdahn pwangada. Mwuhr I kin nsensuwedla pwehki e kin kihsang ei ahnsou oh kehl ong kalohk.”

3. Dahme kitail pahn koasoiapene nan iren onop wet?

³ Sohte lipilipil soangen kahpwal dah me kitail ahneki, Siohwa kak ketikihong kitail kehl me kitail anahne pwehn pousehlahte papah ih ni uwen atail kak. Mwohn atail pahn koasoiapene ia duwen Siohwa eh kak ketin sewese kitail, kitail pahn tehkpene ia duwen eh ketin sewese Pohl oh Timoty en kapwaiada ara doadoahk en kalohk mendahki kahpwal kan.

4. Kahpwal dah kan me Pohl ahneki?

⁴ Pohl ahneki kahpwal tohto. E kin uhdahn anahne sapwellimen Siohwa sawas ni eh imwintihti kan kin keme, salihedi, oh song en kemehla ih. (2 Kor. 11:23-25) Pohl sohte suwedki nda me ekei pak e anahne doadoahk laud pwehn powehdi eh pepehm en mworus. (Rom 7:18, 19, 24) E pil ahneki soumwahu ehu, de “kisin tek kis” ni paliwere, me e uhdahn men Koht en ketikihsang.​—2 Kor. 12:7, 8.

5. Dahme Pohl kak wiahda mendahki kahpwal kan me e ahneki?

⁵ Siohwa ketikihong Pohl kehl pwe en kapwaiada eh doadoahk en kalohk mendahki kahpwal koaros me e ahneki. Medewehla dahme Pohl wiahda. Karasepe, erein eh wie sensel nan ihmw ehu nan Rom, e kin kalohk ni eimah ong kaunen mehn Suhs kan, oh mwein ong irail lapalap akan en nan kopermento. (Wiewia 28:17; Pil. 4:21, 22) E pil kalohk ong tohtohn irail silepen nanmwarkien Rom kan, oh pil irail koaros me kin mwemweitdo reh. (Wiewia 28:30, 31; Pil. 1:13) Ni ahnsowohte, Koht ketin doadoahngki Pohl en ntingihada kisinlikou kan me sewese Kristian mehlel kan mahso oh pil sewesewesehte irail ahnsou wet. Oh ahn Pohl mehn kahlemeng kakehlakahda mwomwohdiso en Rom, me kahrehda rie Kristian ko en “eimahiong kalohki mahsen en Koht ni soh masak.” (Pil. 1:14) Mendahki Pohl sohte kak wia uwen me e men wia, e kin wia uwen eh kak, oh met “imwikihla pweidahn rongamwahwo.”​—Pil. 1:12.

6. Nin duwen me 2 Korint 12:9, 10 mahsanih, dahme sewese Pohl en kapwaiada eh doadoahk en kalohk?

⁶ Pohl wehwehki me soahng koaros me e wiahda nan sapwellimen Siohwa doadoahk kin kohsang sawas en sapwellime kehl, a kaidehn sang pein eh kehl. E nda me sapwellimen Koht kehl ‘kin unsekla ni eh kin luwet.’ (Wadek 2 Korint 12:9, 10.) Siohwa ketin doadoahngki sapwellime manaman en ketikihong Pohl kehl en kapwaiada eh doadoahk en kalohk ni unsek, mendahki kalokolok, selidi, oh kahpwal teikan me e ahneki.

7. Kahpwal dah kan me Timoty anahne powehdi pwehn kapwaiada eh doadoahk en kalohk?

⁷ Timoty, iengen Pohl me pwulopwul sang iho, pil kin likih sapwellimen Koht kehl pwehn kapwaiada eh doadoahk en kalohk. E kin iang Pohl nan eh seiloak kan en misineri. Pohl pil kadar ih nan seiloak teikan pwehn mwemweitla oh kangoange mwomwohdiso kan. (1 Kor. 4:17) Ele Timoty kin pehm me e sohte warohng  wia mepwukat. Mwein ihme kahrehda Pohl ndaiong ih: “Dehr mweidohng emen en kilengdiong uhk.” (1 Tim. 4:12) Erein ahnsou ko, Timoty pil ahneki kisin tek kis ni paliwereo, de e “kin kalapw soumwahu.” (1 Tim. 5:23) Ahpw Timoty ese me sapwellimen Siohwa manaman me inenen kehlail pahn kihong ih kehl me e anahne pwehn kalohki rongamwahwo oh pil papah rie Kristian kan.​—2 Tim. 1:7.

8. Ia duwen Siohwa eh kin ketin kakehlaka sapwellime aramas akan rahnwet?

⁸ Rahnwet, Siohwa ketikihong sapwellime aramas akan “kehl me laudsang dahme aramas ahneki” pwe irail en kak pousehlahte papah ih ni lelepek. (2 Kor. 4:7) Kitail pahn koasoiapene soahng pahieu me Siohwa ketikihda me pahn kakehlaka oh sewese kitail en kolokolete atail lelepek ong ih: kapakap, Paipel, riatail Kristian kan, oh atail doadoahk en kalohk.

9. Ia duwen kapakap eh kak sewese kitail?

⁹ Kapakap kin kakehlaka kitail. Nin duwen me Episos 6:18 mahsanih, Pohl kangoange kitail en kapakap ong Koht “ahnsou koaros.” Koht kin ketin sapeng atail kapakap kan sang ni eh ketin sewese kitail. Jonnie, brother men me kin kousoan Bolivia, pehm soangen sawas wet ni ahnsou me e lelohng kahpwal kei. Eh pwoudo oh pil eh pahpa oh nohno soumwahuda laud ahnsou tehieu. E uhdahn apwal ong Jonnie en wia soahng koaros me e anahne wia pwehn apwalih irail meh silimeno. Eh nohnou mehla, oh mwurin ahnsou werei, eh pwoudo oh eh pahpao mwahula. Ni eh koasoiahda ahnsou apwalo, Jonnie nda: “Ni ei kin uhdahn pwunodada laud, e kin ahnsou koaros sawas ma I kapakap ong Siohwa oh kawehwehiong ei pepehm kan.” Siohwa ketikihong Jonnie kehl me e anahne pwehn dadaurete. Ronald, emen elder nan Bolivia, esehda me eh nohnou ahneki kanser. Eh nohnou mehla sounpwong ehu mwuri. Dahme sewese ih en dadaurete erein ahnsou apwalo? E nda: “Ni ei kin kapakap ong Siohwa, I kin padahkihong ih audepen ei pepehm koaros. I ese me e ketin mwahngih duwen ngehi laudsang meteikan ar wehwehkin ie, pil laudsang ei wehwehki pein ngehi.” Ekei pak, ele kitail medewe me kitail sohte kak dadaur pahn atail kahpwal kan, oh ele sehse dahme kitail pahn nda nan atail kapakap. Ahpw Siohwa ketin luke kitail en kapakap ong ih mehnda ma e apwal ong kitail en kawehwehda ia atail pepehm.​—Rom 8:26, 27.

10. Nin duwen me Ipru 4:12 mahsanih, dahme kahrehda e uhdahn kesempwal kitail en wadek Paipel oh doudouloale dahme kitail wadek?

¹⁰ Paipel kin kakehlaka kitail. Duwehte Pohl eh likih Paipel pwehn kakehlaka oh kansenamwahwih ih, kitail pil kak wia duwehte. (Rom 15:4) Ni atail kin wadek Mahsen en Koht oh doudouloale, Siohwa kak ketin doadoahngki sapwellime manaman pwehn sewese kitail wehwehki mwahu ia duwen Paipel eh kak sewese kitail. (Wadek Ipru 4:12.) Ronald, me kitail koasoiapene mwoweo, nda: “I kalahnganki ei kin nannanti en wadek Paipel nipwong koaros. I kin doudouloale laud duwen sapwellimen Siohwa irair kaselel kan, oh pil mwomwen eh kin ketin apwalih sapwellime aramas akan. Met kin kakehlailih ie.”

11. Ia duwen Paipel eh kakehlakahda sister men me pahtoukihla eh pwoudo mehla?

¹¹ Ni atail kin doudouloale Mahsen en Koht, met kin sewese kitail en ahneki madamadau pwung ong atail kahpwal kan. Medewehla ia duwen Paipel eh sewese sister men me pahtoukihla eh pwoudo mehla. Emen elder padahkihong ih me e kak sukuhlki iren sawas mwahu kan sang eh pahn wadek pwuhken Sohp. Ni sistero eh wia met, e tepte kauwe  Sohp pwehki ahn Sohp madamadau sapwung kan. E kin pein medewehla me e ndaiong Sohp: “Sohp! Dehr medemedewehte pein omw kahpwal kan!” Ahpw mwuhr e esehda me mwomwen eh madamadau uhdahn duwehte ahn Sohp. Met sewese ih en kapwungala eh madamadau oh kakehlakahda ih pwehn dadaurete mendahki eh pahtou.

12. Ia duwen Siohwa eh kin ketin doadoahngki riatail Kristian kan pwehn kakehlaka kitail?

¹² Atail kin patehng riatail Kristian kan kin kakehlaka kitail. Pil ehu ahl me Siohwa kin ketin kakehlaka Kristian kan iei sang ni eh ketin doadoahngki iengarail tohnkaudok kan. Pohl ntingihedi me e kin men ih oh rie Kristian kan en “kangoange emenemen.” (Rom 1:11, 12) Mary, me kitail koasoiapene mwoweo, kin uhdahn kesempwalki eh kin patehng rie Kristian kan. E nda: “Siohwa kin ketin doadoahngki riei Kristian kan me uhdahn sehse duwen ei kahpwal kan. Irail kin nda mehkot kangoang de pil kadarodo kisin card, oh ih met me I uhdahn anahne. Met pil sewese ie en koasoiong sister teikan me ahneki soangen kahpwalohte oh sukuhlsang dahme re kin wia. Oh elder kan kin ahnsou koaros kahrehiong ie en pehm me riei Kristian kan nan mwomwohdiso kin uhdahn poakohng ie.”

13. Ia duwen atail kak kakehlaka emenemen ni atail mihting kan?

¹³ Ehu wasa me keieu mwahu ong kitail en kangoange emenemen iei ni atail mihting kan en mwomwohdiso. Ni omw kin kohla iang mihting, ke kak song en kakehlaka meteikan sang ni omw kin padahkihong irail me ke poakohng irail oh pil kalahnganki dahme re kin wia. Karasepe, mwohn mihting ehu, elder men me adaneki Piter ndaiong sister men me eh pwoudo sohte mi nan padahk mehlel: “E uhdahn kangoang laud en kilang omw kohdo. Ke kin ahnsou koaros kaunopada noumw seri wenemen ko ong mihting oh pil iang pasapeng.” Sistero uhdahn mwekidkihda met oh nda: “I uhdahn anahne rong soangen lokaiahn rahnwet.”

14. Ia duwen doadoahk en kalohk eh kin sewese kitail?

¹⁴ Doadoahk en kalohk kin kakehlaka kitail. Ni atail kin kalohk ong meteikan, kitail kin nsenamwahu, sohte lipilipil ma aramas akan rong de soh. (Lep. Pad. 11:25) Sister men me adaneki Stacy esehda ia duwen doadoahk en kalohk eh kak kakehlaka ih. Ni emen tohn eh peneineio eh piskenla, Stacy uhdahn nsensuwedkihla met, oh kin kalapw pein idek reh, ‘Sohte mehkot laudsang me I kak wia pwehn sewese ih?’ E uhdahn apwal ong ih en sohla medewe kahpwalo. Dahme sewese ih en nsenamwahula? Doadoahk en kalohk! Ni eh kin kalohk, e kin medewe duwen aramas akan nan eh wasahn kalohko me anahne eh sawas. E nda: “Erein ahnsowo, Siohwa ketikihong ie tohnsukuhl en Paipel men me kin mwadang en kapwaiada dahme e sukuhlki. Met uhdahn kangoange ie laud. Dahme kin keieu sewese ie nan ei mour iei doadoahk en kalohk.”

15. Dahme ke sukuhlkihsang ahn Mary koasoio?

¹⁵ Pwehki mwomwen arail irairo, ekei kin pehm me re sohte kak wia soahng tohto nan doadoahk en kalohk. Ma ke ahneki soangen pepehm wet, tamataman me Siohwa kin ketin kupwurperenki ma ke wia uwen omw kak koaros. Pwurehng medewehla mehn kahlemeng en Mary. Ni eh keseula wasa ehu me aramas akan kin lokaiahki ehu lokaia tohrohr, e pehm me e sohte kak wia soahng tohto. E nda: “Erein ahnsou kis, ihte me I kak wia iei kihda pasapeng mengei, de wadek iren Paipel ehu, de kihla kisin doaropwe nan kalohk.” E pehm me e uhdahn soakoahiek en lokaiahki lokaiao duwehte irail me mailahr ko. Ahpw e wekidala eh madamadau. E tepida wehwehkihda me Siohwa kak ketin doadoahngki ih mendahki e soakoahiek en lokaiahki lokaiao. E nda: “Dahme  Paipel mahsanih sohte uhdahn apwal, oh e kak wekidala mour en aramas.”

16. Dahme kak sewese irail kan me men iang kalohk ahpw sohte kak pedoisang nan imwarail?

¹⁶ Siohwa ketin mwahngih me ekei kitail kin men iang kalohk ahpw sohte kak pedoisang nan imwatail. Eri e kak ketin sewese kitail en kalohk ong irail kan me kin kohdo ni imwatail pwehn apwalih kitail, de ong toahkte kan oh nurse kan. Ma kitail kin kapahrekihpene dahme kitail kin wia ahnsou wet ong dahme kitail wiahda mahso, mwein kitail kin nsensuwedla. Ma kitail wehwehki ia duwen Siohwa eh kin ketin sewesewese kitail ahnsou wet, kitail pahn ahneki kehl me kitail anahne pwehn dadaur ni peren soangen kahpwal sohte lipilipil.

17. Nin duwen me Eklesiasdes 11:6 mahsanih, dahme kahrehda kitail en pousehlahte kalohk mehnda ma kitail sohte mwadang kilang imwilahn atail kalohko?

¹⁷ Kitail sehse mehnia weren padahk mehlel me pahn wosada oh keirda. (Wadek Eklesiasdes 11:6, NW.) * Karasepe, Barbara, sister men me sounpar 80 samwa kin kaukaule kalohk doadoahngki delepwohn oh nting kisinlikou. Nan ehu nah kisinlikou ko, e kihlong Kahn Iroir en March 1, 2014, me ehu oaralap ko loale koasoia “Dahme Koht Ketin Wiadahr ong Uhk?” E sohte ese me kisinlikowo lella rehn pwopwoud ehu me sohla iang wia Sounkadehdehn Siohwa. Ira alehdi oh kin pwurupwurehng wadek makasihno. Ohlo pehm me e mwomwen me Siohwa ketin mahmahsaniong ih. Pwopwoudo pwurehng tepida iang mihting oh kedekedeo ira pwurehng wiahla Sounkadehde kei mwurin ara sohla iang daulih sounpar 27. Met uhdahn wia kangoang laud ong Barbara oh kakehlakahda ih ni e kilang imwila mwahu en ehu nah kisinlikou ko!

18. Dahme kitail kak wia pwehn paiekihda sapwellimen Koht kehl?

¹⁸ Siohwa ketikihong kitail ahnsou mwahu tohto en ale sapwellime kehl. Siohwa ketikihong kitail soahng tohto, duwehte kapakap, Paipel, riatail Kristian kan, oh doadoahk en kalohk. Ni atail doadoahngki soahng pwukat, kitail kin kasalehiong ih me kitail kin likih me e kak ketin sewese kitail oh pil kupwurperenki wia met. Eri kitail en ahnsou koaros likih Samatailo nanleng me kin ketin kupwurperenki “kakehlahda irail kan me arail mohngiong kin loalopwoatohng ih.”​—2 Kron. 16:9.