1. Dahme Siohwa ketin mweidohng kitail en wia?

SIOHWA ketin mweidohng kitail en pilada mwomwen atail en mour. E ketin padahkihong kitail ia duwen atail en wiahda pilipil mwahu, oh ketin sewese kitail en pweida ni atail wiahda pilipil kan me kin kaperenda ih. (Mel. 119:173) Ni atail kalaudehla atail kapwaiada erpit me kohsang Mahsen en Koht, atail wiahda pilipil kan pahn pil mwahula.​—Ipru 5:14.

2. Kahpwal dah me kitail kakete lelohng mwurin atail wiahda pilipil ehu?

² Pil ni atail wiahda pilipil loalokong ehu, ele kitail kin apwalki kanekehla dahme kitail tapihadahr. Medewehla karasaras pwukat: Brother pwulopwul men koasoanehdi en wadekala Paipel pwon. E kin pweida ni e wia met erein wihk kei ahpw e uhdi pwehki kahrepe kan. Sister men koasoanehdi en papah nin duwen pioneer men, ahpw e kin kapwakapwande iahd me e pahn tepida. Pwihn en elder kan wiahda pilipil ehu en kalaudehla arail mwemweitla rehn tohn arail mwomwohdiso ahpw mwurin sounpwong tohto irail saikinte kapwaiada. Irair pwukat wekpeseng, ahpw mie mehkot me irail ahnekipene. Irail saikinte kapwaiada pilipil kan me re wiahda. Tepin Kristian kan nan Korint pil lelohng soangen irairohte. Tehk dahme kitail kak sukuhlkihsang irail.

3. Pilipil dahieu me mehn Korint ko wiahda, ahpw dahme wiawi?

³ Mpen pahr 55, mehn Korint kan wiahda pilipil kesempwal ehu. Irail esehda me riarail Kristian kan nan Serusalem oh Sudia lokolongki kahpwal kan oh semwehmwe oh me mwomwohdiso teikan kin kihpene sawas en mwohni pwehn sewese irail. Mehn Korint ko kadek oh koasoanehdi me irail pil men sewese Kristian  semwehmwe kan, eri irail idek rehn wahnpoaron Pohl ia duwen arail kak sawas. E kadaralahng mwomwohdiso iren kaweid kan oh idihada Taitus en sewese kihpene mwohni kan me irail pahn sawaskihda. (1 Kor. 16:1; 2 Kor. 8:6) Ahpw sounpwong kei mwuri, Pohl esehda me mehn Korint ko sohte wia dahme irail nda. Imwilahn met, arail kisakis ko sohte kaunopada mwahu mwohn ahnsou me e pahn wisiklahng Serusalem iangahki sawas en mwohni kan sang mwomwohdiso teikan.​—2 Kor. 9:4, 5.

4. Me sansalda nan 2 Korint 8:7, 10, 11, dahme Pohl kangoange mehn Korint ko en wia?

⁴ Mehn Korint ko wiahda pilipil mwahu ehu, oh Pohl kapinga irail pwehki arail pwoson kehlail oh arail kin uhdahn men kadek. Ahpw e pil kangoange irail en kanekehla dahme irail tapihadahr. (Wadek 2 Korint 8:7, 10, 11.) Dahme irail lelohng padahkihong kitail me Kristian lelepek kan pil kak apwalki en kapwaiada dahme re piladahr en wia.

5. Peidek dah kei me kitail pahn sapengala?

⁵ Duwehte mehn Korint ko, ele e kin apwal ong kitail en kapwaiada atail pilipil kan. Dahme kahrehda? Pwehki soh unsek, ele kitail kin kapwakapwande iahd kitail en kapwaiada. De ele mehkot me kitail sohte kasik pwarada me kahrehiong kitail en apwalki kapwaiada dahme kitail koasoanehdi en wia. (Ekl. 9:11; Rom 7:18) Ia duwen atail kak tehksapahl pilipil ehu oh ese ma kitail anahne wekidala? Oh ia duwen atail kak tehk mwahu me kitail kanekehla dahme kitail tapihadahr?

6. Ni ahnsou dah me kitail anahne wekidala pilipil ehu?

⁶ Mie pilipil kesempwal kei me kitail sohte pahn wekidala. Karasepe, kitail kin kolokolete pilipil me kitail wiahda en papah Siohwa, oh kitail kin koasoanehdi teng en lelepek ong atail pwoud. (Mad. 16:24; 19:6) Ahpw ele kitail anahne wekidala ekei pilipil. Dahme kahrehda? Pwehki atail irair kan kin wekila. Dahme kak sewese kitail en wiahda pilipil me keieu mwahu?

7. Dahme kitail anahne kapakapki, oh dahme kahrehda?

⁷ Kapakapki erpit. Siohwa ketin kamwakid Seims en ntingihedi: “Ma emen rehmwail sohte ahneki erpit, a en usehlahte pekipeki rehn Koht, pwe e kin ketin sapankihong aramas koaros erpit.” (Seims 1:5) Kitail koaros “sohte ahneki erpit.” Eri likih Siohwa ni omw wiahda pilipil ehu oh ni omw tehksapahl pilipilo. Siohwa pahn ketin seweseiuk en wiahda pilipil mwahu kan.

8. Soangen roporop dah me kitail anahne wia mwohn atail wiahda pilipil ehu?

⁸ Wia roporop ni keneinei. Wadek Mahsen en Koht oh sawasepen Paipel kan me sapwellimen Siohwa pwihn kin kihda, oh koasoiong irail kan me ke kin likih. (Lep. Pad. 20:18) Soangen roporop wet kesempwal mwohn omw pahn wiahda pilipil en wekidala omw doadoahk, en keseula ehu wasa, de pilada sukuhl mwahu ehu me pahn kak seweseiuk nan doadoahk en kalohk.

9. Ia duwen atail pahn paiekihda ma kitail kin mehlel ong pein kitail?

⁹ Tehk mwahu kahrepen omw wiahda pilipil ehu. Kahrepen atail wia soahng kan kin kesempwal ong Siohwa. (Lep. Pad. 16:2) E ketin kupwurki kitail en kin mehlel ni soahng koaros me kitail wia. Eri ni atail wiahda pilipil kan, kitail pil men mehlel ong pein kitail oh meteikan duwen kahrepen atail wia soahng kan. Ma kitail sohte kin uhdahn mehlel, kitail pahn apwalki tengedihongete pilipil me kitail wiahdao. Karasepe, brother pwulopwul men ele koasoanehdi en wiahla pioneer men. Ahpw mwurin ahnsou kis, e apwalki wiahda awahn kalohk ong pioneer oh e sohla perenki eh kalohko. Ele e kin medewe me kahrepen eh wia doadoahk en pioneer iei pwehki e men kaperenda Siohwa. Ahpw ia duwe, kahrepen eh wia doadoahk en pioneer kakete pwehki e men kaperenda eh pahpa nohno de emen me e wauneki?

10. Dahme anahn pwehn wiahda wekidekla kan?

 ¹⁰ Medewehla duwen irair en emen tohnsukuhl en Paipel me koasoanehdi en sohla simwok. Nin tapio, e sohte simwok erein wihk ehu de riau mehnda ma e apwal, ahpw mwuhr e pwurehng simwok. E nannanti oh mwuhr e pweida! Eh limpoak ong Siohwa oh eh ineng en kaperenda Ih sewese tohnsukuhlo en powehdi eh kahpwalo.​—Kol. 1:10; 3:23.

11. Dahme kahrehda ke anahne koasoanehdi ni oaritik omw mehn akadei kan?

¹¹ Koasoanehdi ni oaritik omw mehn akadei kan. Ma ke wia met, e pahn pil mengei en kanekehla dahme ke tapihadahr. Karasepe, ele ke koasoanehdi en kalapw wadek Paipel. Ahpw ma ke sohte koasoanehdi ni oaritik ahnsou dah en wia met, ele ke sohte pahn kak kapwaiada. * De elder kan nan mwomwohdiso ehu ele koasoanehdi ren kalaudehla arail mwemweitla rehn tohnmwomwohdiso kan, ahpw mwurin ahnsou kis, irail sohte kapwaiada koasoandio. Pwe irail en kak pweida, irail kak idek peidek pwukat: “Se eseier ihs rehn riat Kristian kan me pahn uhdahn paiekihda at pahn mwemweitla rehrail? Se koasoanedier ahnsou dah me keieu konehng en mwemweitla rehrail?”

12. Dahme kitail ele anahne wia, oh dahme kahrehda?

¹² Pohnese dahme ke kak de sohte kak wia. Kitail koaros sohte ahneki ahnsou, kepwe, de kehl en wia soahng koaros me kitail men wia. Eri ken pohnese met oh toupahrek. Ma anahn, ele ke anahne wekidala pilipil ehu me ke sohte kak kapwaiada. (Ekl. 3:6) Ahpw medewehla me ke tehksapahl omw pilipilo, wiahda wekidekla kan me anahn, oh ke medewe me ke kak kanekehla dahme ke tapihadahr. Medewehla kahk limau me kak seweseiuk en kanekehla dahme ke tapihadahr.

13. Ia duwen omw kak ale kehl me anahn pwe ken kapwaiada pilipil ehu?

¹³ Kapakapki kehl en wia dahme anahn. Koht kak ketin “kakehlakahda” iuk pwe ken kapwaiada omw pilipilo. (Pil. 2:13) Eri peki rehn Siohwa sapwellime manaman pwehn kihong uhk kehl me ke anahne. Pousehlahte kapakap mehnda ma pasapengpen omw pekipeko pwand en pweida. Nin duwen me Sises mahsanih: “Kumwail pousehlahte peki, kumwail ahpw pahn ale.”​—Luk 11:9, 13.

14. Ia duwen ire mehlelo me mi nan Lepin Padahk 21:5 eh kak seweseiuk en kapwaiada omw pilipilo?

¹⁴ Wiahda koasoandi ehu. (Wadek Lepin Padahk 21:5.) Pwe ken kanekehla doadoahk ehu me ke tapihadahr, ke anahne wiahda koasoandi ehu. Eri ke anahne doadoahk pahrekiong dahme ke koasoanehdio. Pil duwehte, ni omw wiahda pilipil ehu, ntingihedi kahk kan me ke koasoanehdi en idawehn pwe ken kapwaiada omw pilipilo. Nehkpeseng doadoahk laud ong ni doadoahk tikitik kak sewese kamengeila omw tehk wasa me ke pweida ie. Pohl kangoange mehn Korint ko en katohrehla uwen mwohni ehu me re men sawaski “ni keieun rahn en wihk koaros” ahpw kaidehn en awih oh song en kihpene mwohni kan ni ahnsou me e lella rehrail. (1 Kor. 16:2) Nehkpeseng doadoahk laud ong ni doadoahk tikitik kan pil kak seweseiuk en dehr nohn medewe me ke sohte kak kapwaiada doadoahk pwukat.

15. Mwurin omw wiahda koasoandi ehu, dahme ke kak wia?

¹⁵ Koasoandi sansal ehu me ke ntingihedi kak seweseiuk en kapwaiada omw pilipil kan. (1 Kor. 14:40) Karasepe, kaweid kohwong pwihn en elder kan en kihong emen elder pwukoahn ntingihedi ehuehu pilipil me re wiahda, iangahki ihs me pahn wia met, oh iahd me irail anahne kanekehla. Ma elder kan kin idawehn  kaweid wet, e pahn mengei ong irail en kapwaiada dahme re koasoanehdi ren wia. (1 Kor. 9:26) Ke kak wia duwehte ni omw wiahda omw koasoandi kan. Karasepe, ke kak ntingihedi dahme ke pahn wia ehuehu rahn, tepikihda dahme ke anahne wia keieu mahs nan koasoandio. Met kak seweseiuk en kaidehn ihte kanekehla dahme ke tapihadahr ahpw ken pil kanekehla doadoahk tohto ni ahnsou mwotomwot ehu.

16. Dahme kesempwal pwe ken kapwaiada omw pilipilo, oh ia duwen Rom 12:11 eh utung met?

¹⁶ Nantihong doadoahk laud. Ke anahne doadoahk laud pwe ken kapwaiada omw koasoandi oh kanekehla dahme ke tapihadahr. (Wadek Rom 12:11.) Pohl ndaiong Timoty en pousehlahte nantihong koahiekla nin duwen sounpadahk men. Kitail kak doadoahngki ahn Pohl kaweido ong soahng koaros me kitail men wia ong Siohwa.​—1 Tim. 4:13, 16.

17. Ia duwen Episos 5:15, 16 eh kak sewese kitail en wia dahme kitail koasoanehdi?

¹⁷ Doadoahngki ni loalokong omw ahnsou. (Wadek Episos 5:15, 16.) Pilada ahnsou ehu en kapwaiada omw pilipilo oh dehr wekidala ahnsowo. Soikala awih ahnsou me uhdahn mwahu en kapwaiada met; ahnsou me uhdahn mwahu kakete sohte wiawi. (Ekl. 11:4) Kanahieng ken dehr mweidohng soahng kan me sohte kesempwal en kauwehla mwahl omw ahnsou oh kehl me ke anahne pwehn wia soahng kan me keieu kesempwal. (Pil. 1:10) Ma kak, pilada ehu ahnsou me meteikan sohte pahn kedirepweiuk. Mweidohng meteikan en ese me ke anahne ahnsou pwehn medemedewe soahng kan. Medewe en kakunla noumw sehlpwohno oh kilang noumw e-mail de social media ehu ahnsou tohrohr. *

18-19. Dahme kak seweseiuk en dehr uhdihsang omw kapwaiada omw pilipil mwahu ehu mehnda ma ke lelohng kahpwal?

¹⁸ Medemedewehte duwen imwila mwahu kan. Imwilahn omw pilipil kin duwehte imwilahn seiloak ehu. Ma ke uhdahn men lel imwilahn omw seiloako, ke sohte pahn uhdi mehnda ma ahlo ritidi oh ke anahne keid nan ehu ahl tohrohr. Pil duwehte met, ma kitail kin medemedewehte imwilahn atail pilipil kan, kitail sohte pahn mwadangete uhdi ni atail lelohng kahpwal de wekidekla kan.​—Kal. 6:9.

¹⁹ E sohte kin mengei en wiahda pilipil mwahu kan, oh en kapwaiada pilipil pwukat pil kak apwal. Ahpw pwehki sapwellimen Siohwa sawas, ke kak ale erpit oh kehl me ke anahne pwehn kanekehla dahme ke tapihadahr.