1. Peidek dahieu me kitail kak idek rehtail?

KE KIN pwunodkihda omw medewe duwen soahng kan me pahn kereniong wiawi, duwehte kasohralahn pelien lamalam likamw kan, uhwong sang Kok en Makok, oh mahwen en Armakedon? Mie pak ke kin pein idek rehmw, ‘I pahn kolokolete ei lelepek ni ahnsou me soahng kamasepwehk pwukat pahn wiawi?’ Ma ke kin medewe duwen soahng pwukat, atail koasoiapene dahme Sises mahsanih nan iren Paipel me iren onop wet poahsoankihda pahn seweseiuk. Sises mahsanihong sapwellime tohnpadahk ko: “Kumwail dehr nsensuwed. Kumwail kasalehda amwail pwoson.” (Sohn 14:1) Pwoson kehlail pahn seweseiuk en dadaurete sohte lipilipil dahme pahn wiawi ni ahnsou kohkohdo.

2. Ia duwen atail kak kakehlakahda atail pwoson, oh dahme kitail pahn koasoiapene nan iren onop wet?

² Ma kitail medewe dahme kitail kin wia ahnsou wet ni atail lelohng soahng kan me pahn kasonge atail pwoson, kitail pahn ese dahme kitail pahn wia pwehn kakehlaka atail pwoson. Ma kitail medewe duwen met, kitail pahn diarada wasa kan me kitail anahne kakehlakahla atail pwoson. Ehuehu ahnsou me kitail kin powehdi kasongosongo, atail pwoson kin kehlailla. Met pahn sewese kitail en dadaur pahn kahpwal kan me pahn wiawi. Nan iren onop wet, kitail pahn koasoiapene irair pahieu me sapwellimen Sises tohnpadahk ko lelohng me kasalehda me irail anahne kalaudehla arail pwoson. Kitail pahn pil koasoiapene ia duwen atail kak dadaur pahn soangen kahpwal ko rahnwet oh ia duwen soahng pwukat kak kaunopkitailda ong dahme pahn wiawi ni ahnsou kohkohdo.

3. Nin duwen me Madiu 6:30, 33 mahsanih, ire kesempwal dahieu duwen pwoson me Sises ketin kasansalehda?

³ Tapwin peneinei men kin men apwaliheki eh pwoudo oh nah  seri kan kanarail mwenge, arail likou, oh arail wasahn kousoan. E sohte mengei en wia met ni ahnsou apwal pwukat. Nan ekei irair, riatail Kristian kan sohla arail doadoahk, oh mendahki irail kin nannanti laud irail sohte kin diarada ehu. Ekei anahne soikala soangen doadoahk kan me Kristian kan sohte konehng wia. Nan soangen irair pwukat, kitail anahne pwoson laud me Siohwa pahn ketin tehk mwahu me kitail alehdi dahme kitail anahne ong atail peneinei. Sises ketin kasalehda met ni sansal ong sapwellime tohnpadahk ko nan sapwellime Kapahrek en Pohn Dohl. (Wadek Madiu 6:30, 33.) Ni atail uhdahn kamehlele me Siohwa sohte pahn ketin likidmeliehla kitail, kitail pahn kak medemedewehte atail en papah Siohwa. Oh ni atail kilang Siohwa eh ketin apwaliheki atail anahn kan, kitail pahn karanihala ih oh atail pwoson pahn kehlailla.

4-5. Dahme sewese peneinei ehu ni arail kin pwunodki ia duwen arail pahn alehdi dahme re anahne?

⁴ Medewehla duwen ehu peneinei sang Venezuela me kilang duwen Siohwa eh ketin sewese irail ni ahnsou me irail kin pwunodki ia duwen arail pahn alehdi dahme re anahne pwehn mour. Mwoweo, peneinei en Castro kin kadoahkihada neirail mwohni sang ni arail doadoahk nan arail mwetuwelo. Ahpw, ohl kei me wa kesik kohdo oh kihsang sapwarailo oh pwakihirailsang wasao. Pahpao, me adaneki Miguel, koasoia: “Met se kin doadoahk nan kisin sahpw kis me se pekihda sang rehn emen. Rahn koaros I kin tepte peki rehn Siohwa en ketikihda dahme se anahne ong rahno.” Mouren peneinei wet uhdahn apwal, ahpw pwehki irail uhdahn pwoson me Samatail limpoako pahn kak ketikihda dahme re anahne ehuehu rahn, peneinei en Castro kin kaukaule iang towehda mihting kan oh pil iang kalohk. Irail kin mwohneki mahs Wehio nan arail mour, oh Siohwa kin ketikihda dahme re anahne.

⁵ Erein ahnsou apwalo, Miguel oh eh pwoudo Yurai, kin medemedewehte duwen Siohwa eh ketin apwalih irail. Ekei pak, Siohwa kin ketin doadoahngki riarail Kristian kan en kihda soahng kan me re anahne de pil sewese Miguel en diarada eh doadoahk. Pil ekei pak, Siohwa kin ketin doadoahngki ohpis en Sounkadehdehn Siohwa kan en kihong irail ekei soahng kan me irail anahne. Siohwa sohte ketin likidmeliehla irail. Pwehki met, irail kilang arail pwoson eh kehlailla. Mwurin eh koasoiahda duwen Siohwa eh ketin sewese irail, neira serepein keieu laudo, Yoselin, koasoia: “E uhdahn kangoange ie en kilang duwen Siohwa eh ketin sewesei kiht. E wia kompoakepahi oh I uhdahn kamehlele me e pahn ahnsou koaros ketin sewese ie.” E pil koasoia: “Kasongosong kan me se lelohng nin duwen peneinei ehu, kaunopkihtda ong kasongosong apwal kan me pahn kohdo.”

6. Ia duwen omw kak kakehlakahla omw pwoson ni ahnsou me ke ahneki kahpwal en mwohni?

⁶ Ke ahneki kahpwal en mwohni? Ma ei, met wia ahnsou apwal ehu ong uhk. Ahpw ke kak doadoahngkihte soangen ahnsowo pwehn kakehlakahla omw pwoson. Kapakap ong Siohwa oh wadek sapwellimen Sises mahsen kan me kileldi nan Madiu 6:25-34 oh doudouloale. Medewe duwen mehn kahlemeng kan en atail ahnsou me kin kadehdehda me Siohwa  kin ketin apwalih irail kan me kin soupisengki arail papah ih. (1 Kor. 15:58) Ma ke wia met, e pahn kakehlailihala omw pwoson me Semomwo nanleng pahn ketin seweseiuk duwehte eh ketin sewese meteikan me pil ahneki soangen kahpwalohte me ke ahneki. E ketin mwahngih dahme ke anahne, oh ia duwen eh pahn ketin seweseiuk. Ni omw kilang duwen Siohwa eh ketin seweseiuk nan omw mour, omw pwoson pahn kehlailla pwe ken kak dadaur pahn kahpwal laud kan me pahn wiawi.​—Apak. 3:17, 18.

7. Nin duwen me Madiu 8:23-26 kasalehda, ia duwen “lapalahn melimel ehu” eh kasonge en tohnpadahk ko pwoson?

⁷ Ni ahnsou me Sises oh sapwellime tohnpadahk ko lelohng melimel ehu nansed, Sises ketin doadoahngki ahnsowo pwehn sewese irail en kilang wasa kan me re anahne kakehlakahla arail pwoson. (Wadek Madiu 8:23-26.) Melimelo uhdahn kehlail me kahrehda ilok ko tepida audehda pwohto, ahpw Sises wie seiseimwok. Ni ahnsou me tohnpadahk ko masepwehkada oh pangenda ih oh peki en ketin sewese irail, Kauno ketin idek rehrail: “Dahme kumwail nohn masepwehngki? Kumwail me pwoson tikitik.” Tohnpadahk ko me masepwehkada anahne wehwehki me Siohwa kak ketin pere Sises oh pil irail kan me iang ih. Ia mehn kasukuhlo? Pwoson kehlail kak sewese kitail en dadaur pahn melimel kehlail kan de kahpwal laud kan me duwehte melimel.

8-9. Ia duwen ahn Anel pwoson lelohng kasongosong, oh dahme sewese ih?

⁸ Medewehla duwen sister kiripw men sang Puerto Rico me adaneki Anel, me eh pwosono kehlailla pwehki e lelohng kahpwal laud ehu. Eh kahpwalo iei melimel laud ehu. Eh kahpwalo tepida nan pahr 2017 ni ahnsou me Hurricane Maria kauwehla imweo. Pwehki melimel laudo, e sohla doadoahk. E koasoia: “Erein ahnsou apwal ko, I kin uhdahn pwunod. Ahpw I sukuhlki en likih Siohwa sang ni ei kin kapakap oh sohte mweidohng pwunod laud en kauhdi ie sang dahme I anahne wia.”

⁹ Anel pil koasoia soahng ehu me pil sewese ih en powehdi eh kahpwalo, me iei peik. E koasoia: “Ei idawehn kaweid kan sang sapwellimen Siohwa pwihn sewese ie en meleilei. Siohwa ketin sewese ie sang ni eh ketin doadoahngki riei Kristian kan. Irail kin kangoange ie oh pil kihong ie soahng kan me I anahne.” E pil koasoia: “Siohwa ketikihong ie laudsang me I kasik, oh ei pwoson uhdahn laudla.”

10. Dahme ke pahn wia ma ke kin lokolongki kahpwal uhdahn laud ehu?

¹⁰ Mie kahpwal laud nan omw mour? Ele ke lelohng kahpwal en melimel laud ehu de rerrer en sahpw ape. De ele ke kohwahki soumwahu laud ehu me kahrehiong uhk en mworusala oh ke sehse dahme ke pahn wia. Mwein ekei pak ke kin pwunodada, ahpw dehr mweidohng omw pwunodo en kauhiukedihsang omw likih Siohwa. Karanihala ih sang ni omw kapakap ni ngidingid. Kalaudehla omw pwoson sang ni omw doudouloale duwen ahnsou kan mwoweo me  Siohwa ketin seweseiuk. (Mel. 77:11, 12) Ke kak uhdahn kamehlele me e sohte pahn ketin likidmelieiukala.

11. Dahme kahrehda kitail anahne koasoanehdi teng en peikiong irail kan me kin tiengla mwohtail?

¹¹ Dahme pil kak seweseiuk en dadaur pahn kahpwal kan? Anel koasoia me peik. Sukuhlki en likih irail kan me Siohwa oh Sises kin ketin likih. Ekei pak, irail kan me idihdida pwehn tiengla mwohtail ele kin kihda kaweid kan me kitail medewe ehusoahng. Ahpw, Siohwa kin ketin kapaiahda atail kin peik. Kitail ese sang sapwellime Mahsen oh mehn kahlemeng en ladu lelepek kan me peik kin doarehla mour. (Eks. 14:1-4; 2 Kron. 20:17) Doudouloale soangen mehn kahlemeng pwukat. Atail wia met pahn kalaudehla atail koasoandi teng en utung koasoandi kan me sapwellimen Siohwa pwihn kin kihda ahnsou wet oh pil ni ahnsou kohkohdo. (Ipru 13:17) Eri ke sohte pahn masak kahn kamakam kowahlap me pahn kereniong leledo.—Lep. Pad. 3:25.

12. Ia duwen Luk 18:1-8 eh kadokepene pwoson oh dadaur pahn wiewia sapahrek?

¹² Sises mwahngih me wiewia sapahrek pahn kasonge en tohnpadahk ko pwoson. Pwehn sewese irail en dadaur, e ketikihda karasaras me kileldi nan pwuhken Luk. Sises mahsanih duwen liohdi men me kin pekipeki sounkopwung suwed men en mweidohng ih en alehdi pwung oh pahrek ni eh repenpwungo. Liohdio uhdahn kamehlele me sounkopwungo pahn kedekedeo sewese ih ma e pwurupwurehng peki reh. Kedekedeo, sounkopwungo kapwaiada eh pekipeko. Ia mehn kasukuhlo? Siohwa kin ahnsou koaros ketin kasalehda wiewia pahrek. Eri Sises mahsanih: “Eri, a Koht sou uhdahn pahn ketin wiahiong sapwellime kan me pilipildahr me kin likweriong ih ni rahn oh nipwong pwung pahrek?” (Wadek Luk 18:1-8.) Sises eri pil kapatahiong: “Ni ahnsou me Nein-aramas pahn ketido, e uhdahn pahn ketin diar pwoson wet nin sampah?” Ni atail kin lelohng wiewia sapahrek, kitail anahne kadehdehda sang ni atail kanengamah oh lelepek me kitail ahneki pwoson kehlail duwehte liohdio. Ma kitail ahneki soangen pwoson wet, kitail kak uhdahn kamehlele me Siohwa pahn ketin sewesei kitail. Kitail pil anahne kamehlele me kapakap uhdahn manaman. Ekei pak, atail kapakap kin pasapengla ni ahl me kitail sohte kasik.

13. Ia duwen kapakap eh sewese peneinei ehu me lelohng wiewia sapahrek?

¹³ Medewehla koasoipen sister men me adaneki Vero, me kin mi nan wehin Congo (Democratic Republic of Congo). Vero, eh pwoudo me sohte kin papah Siohwa, oh neira serepeino me sounpar 15, anahne tangasang arail kahnimwo ni ahnsou me sounpei kei kohdo oh kauwehla wasao. Ni arail tangatang kohla, irail lel wasa ehu me pwihnen sounpeio kauhiraildi oh nda me re pahn kemeirailla. Ni ahnsou me Vero tepida sengiseng, nah serepeino song en kameleileidi sang ni eh kin kapakap ni ngihl laud oh pwurupwurehng nda mwaren Siohwa nan eh kapakapo. Ni ahnsou me e  nek kapakap, kaunen sounpei ko idek reh: “Serepein, ihs me padahkihong uhk kapakap?” E sapeng nda: “Ei nohnou me padahkihong ie. E doadoahngki mwomwen kapakapo me mi nan Madiu 6:9-13.” Kaunen sounpeio eri nda, “Serepein, iangada omw pahpa oh nohno oh kohkohwei ni meleilei, oh omw Kohto Siohwa en ketin pere iuk!”

14. Dahme kak kasonge atail pwoson, oh dahme kak sewese kitail en dadaur?

¹⁴ Dahme wiawihong irail padahkihong kitail en dehr manokehla uwen kesempwal en kapakap. Ahpw ia duwen ma omw kapakap kan sohte mwadang pasapengla de sohte pasapengla ni ahl kapwuriamwei ehu? Duwehte liohdio nan sapwellimen Sises kapakapo, pousehlahte kapakap, oh kamehlele me atail Koht sohte pahn ketin likidmelieiukala oh me e pahn ketin sapengala omw kapakapo ni ahnsou me konehng. Pousehlahte pekipeki sapwellime manaman. (Pil. 4:13) Tamataman me ahnsou keren Siohwa pahn ketin kapaiukada uhdahn laud me kahrehda ke pahn manokehla kahpwal kan me lelohng uhk. Ni omw kin dadaur pahn kahpwal kan pwehki sapwellimen Siohwa sawas, ke pahn kehlailla oh kak dadaur pahn kasongosong kan ni ahnsou kohkohdo.​—1 Pit. 1:6, 7.

15. Nin duwen me Madiu 17:19, 20 mahsanih, soangen kahpwal dah kan me sapwellimen Sises tohnpadahk ko ahneki?

¹⁵ Sises ketin padahkihong sapwellime tohnpadahk ko me pwoson pahn sewese irail en powehdi kahpwal kan. (Wadek Madiu 17:19, 20.) Mie pak me re sohte kak kausala ngehn suwed men, mendahki ekei ahnsou irail kak wia met. Dahme kahrehda? Sises ketin kawehwehiong irail me irail anahne kalaudehla arail pwoson. Sises mahsanihong irail me ma irail ahneki pwoson laud, irail pahn kak dadaurete pahn kahpwal kan me rasehng nahna laud ehu! Rahnwet, ele kitail kin ahneki kahpwal kan me mwomwen kitail sohte kak dadaur pah.

16. Ia duwen pwoson eh sewese Geydi en dadaurete pahn pahtou laud?

¹⁶ Medewehla dahme wiawihong Geydi, sister men sang Guatemala. Eh pwoudo Edi kamakamala ni ara kohkohlahng imwarao mwurin mihting en mwomwohdiso ehu. Ia duwen ahn Geydi pwoson eh sewese ih en dadaur pahn eh pahtou laud? E koasoia: “Kapakap sewese ie en mweidohng Siohwa ei kahpwal kan, oh met kahrehiong ie en ahneki meleilei. I kilang Siohwa eh ketin apwalih ie sang ni eh ketin doadoahngki ei peneinei oh kompoakepahi kan nan mwomwohdiso. Ei soupisengki ei papah Siohwa kin katikala ei pahtou oh sewese ie en doulahte ehuehu rahn oh dehr pwunodki lakapw. Mwurin ei lelohng kahpwal wet, I sukuhlki me sohte lipilipil soangen kahpwal dah me pahn wiawihong ie ni ahnsou kohkohdo, I pahn kak dadaurete pwehki sawas sang Siohwa, Sises, oh sapwellime pwihn.”

17. Dahme kitail kak wia ni atail lelohng kahpwal kan me rasehng nahna laud ehu?

¹⁷ Ia duwe, ke kin pahtouki mehlahn emen me ke poakohng? Wiahda ahnsou en kakehlakahla  omw pwoson koapworopwor en kaiasadao, sang ni omw wadek koasoipen irail kan nan Paipel me iasada sang mehla. Ke kin nsensuwedki emen tohn omw peneinei eh piskenla? Wia pein onop pwehn kadehdehiong uhk me sapwellimen Koht elen peneu iei me keieu mwahu. Sohte lipilipil soangen kahpwal dah me ke lelohng, doadoahngki ahnsowo pwehn kakehlakahla omw pwoson. Padahkihong Siohwa ia uhdahn omw pepehm. Dehr katohre pein uhk, ahpw mihmi karanih riomw Kristian kan. (Lep. Pad. 18:1) Wia soahng kan me pahn seweseiuk en dadaur, mehnda ma ke kin sengisengki dahme wiawihong uhk. (Mel. 126:5, 6) Pousehlahte iang towehda mihting kan, iang kalohk, oh wia pein omw wadawad en Paipel. Oh medemedewehte soahng kaselel kan me Siohwa ketin inoukihda en ketikihong uhk ni ahnsou kohkohdo. Ni omw kilang ia duwen Siohwa eh ketin seweseiuk, omw pwoson ih pahn kehlailla.

18. Ma ke esehda me omw pwoson sohte nohn kehlail, dahme ke kak wia?

¹⁸ Ma omw kahpwal kan mahso oh ahnsou wet kasalehda me omw pwoson sohte uhdahn kehlail, dehr nsensuwedkihla. Kilengwohng met nin duwen ahnsou mwahu ehu en kakehlakahla omw pwoson. Wia soangen pekipekohte me sapwellimen Sises wahnpoaron ko peki: “Komw ketin kalaudehla at pwoson.” (Luk 17:5) Pil ehu, medewe duwen mehn kahlemeng kan me kitail koasoiapene nan iren onop wet. Duwehte Miguel oh Yurai, tamanda ahnsou kan me Siohwa ketin seweseiuk. Duwehte nein Vero serepeino oh Anel, kapakap ngidingid ong Siohwa, ahpw mehlel ni ahnsou me ke lelohng kahpwal. Oh duwehte Geydi, pohnese me Siohwa kin ketin doadoahngki omw peneinei oh kompoakepahmw kan en kihda sawas me ke anahne. Ni omw kin mweidohng Siohwa en ketin seweseiuk en dadaur pahn kahpwal kan ni ahnsou wet, ke pahn uhdahn kamehlelehla me e pahn ketin seweseiuk en dadaur pahn kahpwal sohte lipilipil me ele pahn lelohng uhk ni ahnsou kohkohdo.

19. Dahme Sises uhdahn ketin kamehlele, oh dahme ke kak uhdahn kamehlele?

¹⁹ Sises ketin sewese sapwellime tohnpadahk ko en kilang wasa kan me irail anahne kalaudehla arail pwoson, ahpw e uhdahn ketin kamehlele me pwehki sapwellimen Siohwa sawas, irail pahn kak dadaurete pahn kasongosong kan me pahn kohdo. (Sohn 14:1; 16:33) E uhdahn ketin kamehlele me mie pokon kalaimwun ehu me pahn pitsang kahn kamakam kowahlapo pwehki arail pwoson kehlail. (Kaud. 7:9, 14) Ke pahn iang irail? Sang ni sapwellimen Siohwa sawas, ke pahn iang ma ke wia soahng koaros me ke kak wia ahnsou wet pwehn kakairada oh kakehlakahla omw pwoson!​—Ipru 10:39.