NAN kisin kahnimw ehu en Gujarat, India, ahn John pahpao papidaisla nin duwen Sounkadehdehn Siohwa men mwohnte pahr 1960. Ahpw John, rie pwutak riemen oh serepein silimen oh pil arail nohno wia mehn Kadolik uhdahn poadidi kei. Pwehki met, re kin uhdahn uhwong pwoson en arail pahpao.

Rahn ehu, ahn John pahpao peki ih en wahla envelope ehu rehn kompoakepah men nan eh mwomwohdiso. Ahpw nimenseng en rahno, John lekehdi sendin peho ni eh songosong en kihsang pweinen diromwkang ehu. Ahpw e men peikiong eh pahpao, eri e alehte lepin likou kis oh pirehiong ni ohlao me ntahdier oh mwesel kohla pwehn wahla envelope-o.

Ni John eh lella wasao, kompoakepahn eh pahpao eh pwoudo, me wia emen Sounkadehdehn Siohwa, ale envelope-o. Liho kilangada ohlao ni sendin pehn John oh idek ma e kak sawas. E wahdo kisin kakon kis me audaudki wini oh band aid kan. Ih eri kamwakelehda ohlao ni sendin pehn John oh kidimkihla band aid. Mwuhr e wiahda nimen John tea me karakar. Erein ahnsowo pwon, liho kin koasoakoasoiong John ni kadek duwen Paipel.

Pwehki kadek en liho, ahn John madamadau duwen Sounkadehde kan tepida wekila. John eri idek rehn liho peidek riau duwen dahme Sounkadehdehn Siohwa kan kin kamehlele me weksang dahme Kadolik kan kin kamehlele. E idek ma Sises iei Koht oh ma Kristian kan anahne kapakap ong Mery. Sistero ese lokaiahn Gujarati oh kak sapengala ahn John peidek ko. E kasalehiong John pasapeng kan sang Paipel oh kihong nah kisin pwuhko “Rohngamwahu Wet en Wehio.”

Mwuhr, ahnsou me John wadek kisin pwuhko, e esehda me dahme e wadwadeko iei padahk mehlel. E kohla rehn eh padreo oh idek reh peidek riauo. Padreo inenen lingeringerda oh katehki John Paipel ehu oh wer nda: “Ke wialahr Sehdan! Kasalehiong ie ia wasa nan Paipel me nda Sises kaidehn Koht. Kasalehiong ie ia wasa me e nda me ken dehr kaudokiong Mery. Kasalehiong ie!” John inenen pwuriamweikihla me padreo kak wia soangen mwekido. E ndaiong padreo me e soh mwahn pahn pwurehng pedolong nan ehu imwen sarawi en Kadolik. Oh e kapwaiada dahme e ndao!

John tepida onop rehn Sounkadehde kan, pwungki padahk mehlel, oh tepida papah Siohwa. Kedekedeo, ekei kisehn eh peneineio pil wia duwehte. Mpen sounpar 60 mwurin mwo, lipwen ohlao ni sendin pehn John kin katamankihongete ih duwen mwekid en kadek me kahrehiong ih en doadoahngki erein eh mour ong papah Siohwa.​—2 Kor. 6:4, 6.