1. Dahme kahrehda Siohwa ketin warohng kitail en poadidiong ih kelehpw?

SIOHWA ketin warohng kitail en poadidiong ih kelehpw pwehki ih me Sounkapikpatail oh me ketikihong kitail mour. (Kaud. 4:11) Ahpw, mie keper ehu. Mehnda ma kitail kin poakohng oh wauneki Siohwa, mie kasongosong kan me kak kahrehiong kitail en sohla poadidiong ih kelehpw nin duwen me e ketin warohng. Kitail anahne wehwehki ia duwen met eh kak wiawi. Keieu, kitail pahn tehkpene ia wehwehn en poadidiong Siohwa kelehpw.

2. Nin duwen me Eksodus 34:14 (NW) mahsanih, dahme kitail pahn wia ma kitail kin poadidiong Siohwa kelehpw?

² Nan Paipel, atail en poadidiong Koht kin wehwehki en ahneki limpoak laud ong ih. Ni atail kin poadidiong Siohwa kelehpw, kitail pahn kaudokiong ih kelehpw. Kitail sohte pahn mweidohng emen de mehkot en wiliandi ih.​—Wadek Eksodus 34:14, NW. *

3. Dahme kahrehda kitail ahneki kahrepe mwahu en poadidiong Siohwa?

³ Mie kahrepe mwahu kan me kitail kin poadidiong Siohwa. Kahrepe mwahu pwukat poahsoankihda ire mehlel kan me kitail sukuhlki duwen ih. Kitail kin kalahnganki sapwellime irair kaselel kan. Kitail kin ese oh pwungki dahme e ketin kupwurperenki oh kalahdeki. Kitail kin wehwehki oh utung dahme e ketin kupwurki ong kitail. Kitail kalahnganki me e ketin mweidohng kitail en wia kompoakepah. (Mel. 25:14) Soahng koaros me kitail sukuhlki duwen Sounkapikpatailo kin kahrehiong kitail en karanihala ih.​—Seims 4:8.

4. (a) Dahme Tepilo kin doadoahngki pwehn kaluwetehla atail kin poadidiong Siohwa? (b) Dahme kitail pahn tehkpene nan iren onop wet?

⁴ Tepilo kin kakaun koasoandi en sampah wet, oh e kin doadoahngki  met pwehn kahrehiong aramas akan en wiahkihla soahng kan me re men ahneki en keieu kesempwal nan arail mour oh pil apwalki pelianda ineng pwukat. (Ep. 2:1-3; 1 Sohn 5:19) Eh mehn akadei iei en kahrehiong kitail en poakohng soahng teikan pwe kitail en dehr poadidiong Siohwa kelehpw. Kitail pahn tehkpene ahl riau me e kak wia met. Keieu, e kin kasonge kitail en men kepwehpwehla, oh keriau, e kin song en kahrehiong kitail en wiahda pilipil sapwung kan me pidada mehn kamweit.

5. Dahme kahrehda kitail anahne kanahieng kitail en dehr tepida poakohngala mwohni?

⁵ Kitail koaros kin men en itar kanatail mwenge, ahneki likou me mwahu, oh wasa mwahu ehu en kousoan. Ahpw, kitail anahne kanahieng kitail en dehr tepida poakohngala mwohni. Me tohto me wia kisehn ahn Sehdan sampah kin “poakohng mwohni” oh soahng kan me mwohni kak pwainda. (2 Tim. 3:2) Sises mwahngih me sapwellime tohnpadahk kan pahn kakete kakairada soangen limpoak wet. Sises mahsanih: “Sohte emen kak liduwih soumas riemen; pwe e pahn kailongki emen ahpw poakohng meteio, de e pahn loalopwoatohng emen ahpw mwamwahliki meteio. Kumwail sohte kak liduwih Koht oh Kepwe.” (Mad. 6:24) Emen me kin kaudokiong Siohwa ahpw ni ahnsowohte doadoahngki laud eh ahnsou oh kehl pwehn songosong en kepwehpwehla kin duwehte emen me kin songosong en papah soumas riemen. E sohte pahn poadidiong Siohwa kelehpw.

6. Mehn kasukuhl dahieu me kitail kak sukuhlkihsang dahme Sises mahsanihong mwomwohdisohn Laodisia?

⁶ Kerenlahng ni imwiseklahn mwehin tepin Kristian ko, tohnmwomwohdiso kan nan kahnimw en Laodisia suweiki: “I kepwehpwe oh alehdahr kepwe tohto oh sohte anahne  mehkot.” Ahpw mwohn silangin Siohwa oh Sises, re wia aramas “paisuwed, kompoake, semwehmwe, maskun oh kilisou” kei. Sises ketin panawih irail, kaidehn pwehki arail kepwehpwe, ahpw pwehki arail poakohng mwohni kauwelahr arail nanpwungmwahu rehn Siohwa. (Kaud. 3:14-17) Ma kitail tehkada me kitail tepidahr poakohngala mwohni, kitail anahne mwadang kapwungala atail madamadau. (1 Tim. 6:7, 8) Ma kitail sohte wia met, kitail pahn pil tepida poakohngala soahng teikan oh Siohwa sohte pahn ketin kupwurperenki atail kaudok. E ketin “kupwurki aramas en poadidiong ih kelehpw.” (Deud. 4:24, NW) Ia duwen mwohni eh kak wiahla mehkot me uhdahn kesempwal nan atail mour?

7-9. Dahme ke sukuhlkihsang dahme wiawihong elder men me adaneki David?

⁷ Medewehla duwen David, emen elder me kin doadoahk laud oh kousoan nan Wehin Amerika. E nda me e wia tohndoadoahk men me kin pwerisek. Kompani me e doadoahkohngo kihong ih doadoahk ehu me inenen mwahu oh pil mwohni laud, oh nan sahpwo pwon, ih me keieu mai ong wia doadoahko. David nda: “Ni ahnsowo, I kin medewe me keting pwukat wia kapai kei sang Siohwa.” Ahpw ia duwe, met mehlel?

⁸ David tepida kilang me eh doadoahko kin kahrehiong eh nanpwungmwahu rehn Siohwa en luwetala. E nda: “Ni mihting kan en mwomwohdiso oh pil nan kalohk, I kin medemedewe duwen kahpwal kan nan doadoahk. I kin koadoahkihada mwohni laud, ahpw ei pwunod kin lalaudla, oh ei mouren pwopwoud pil mi nan kahpwal.”

⁹ David ese me e anahne pilada dahme keieu kesempwal ong ih. E nda: “I koasoanehdi teng en kapwungala ei irairo.” David men wekidala koasoandi en eh doadoahko, oh e padahkihong eh kauno duwen dahme e men wia. Ia imwilahn  met? Kompanio kihsang ih nan doadoahko! Dahme e wia? E nda: “Rahnohte mwuri, I audehda nei doaropwehn iang kaukaule wia sawaspen pioneer.” Pwehn apwalih ira, David oh eh pwoudo tepida wia doadoahk en kamwakel. Mwurin ahnsou kis, David tepida pioneer, oh eh pwoudo kedekedeo iangala ih wia doadoahk en pioneer. Pwopwoud wet pilada en wia doadoahk en mwohni me me tohto sohte kin men wia, ahpw soangen doadoahk wet kaidehn me keieu kesempwal ong ira. Mehnda ma pweinara tikitikla ni uwen eisekis ehu en me ira kin wiahda mwoweo, ehuehu sounpwong ira kin alehdi uwen me itar pwehn pwainla ara anahn kan. Ira men mwohneki mahs Siohwa nan ara mour, oh ira esehla mwahu me e kin ketin nsenohki irail kan me kin mwohneki mahs Wehio.​—Mad. 6:31-33.

10. Ia duwen atail kak pere mohngiongitail?

¹⁰ Sohte lipilipil ma neitail mwohni tikitik de laud, kitail anahne pere mohngiongitail. Ia duwen? Dehr kakairada ineng en kepwehpwehla. Oh dehr mweidohng omw doadoahk en mwohni en wia mehkot me keieu kesempwal ong uhk sang omw pahn papah Siohwa. Ia duwen omw kak ese me met kin wiawihong uhk? Mie ekei peidek me ke kak pein idek rehmw: ‘I kin kalapw medewe duwen ei doadoahko ni ahnsoun mihting de kalohk? I kin kalapw pwunodki ma nei mwohni pahn itar ong ahnsou kohkohdo? Mwohni oh kepwe kan kin kahrehda kahpwal nanpwungen ngehi oh ei pwoudo? I pahn men ahneki doadoahk en mwohni ehu me me tohto sohte perenki wia ma met pahn mweidohng ien ahneki ahnsou laud en papah Siohwa?’ (1 Tim. 6:9-12) Ni atail medemedewe peidek pwukat, kitail en tamataman me Siohwa ketin poakohng kitail oh e ketin inoukihong irail kan me kin poadidiong ih: “I sohte pahn mweisang uhk oh I sohte pahn keseiukala.” Ihme kahrehda wahnpoaron Pohl ntingihedi: “Amwail mour en saledeksang limpoak en mwohni.”​—Ipru 13:5, 6.

11. Dahme mehn kamweit kan kak wiahiong aramas?

¹¹ Siohwa ketin kupwurki kitail en ahneki mour nsenamwahu, oh mehn kamweit kan kak sewese kitail en wia met. Ni mehlel, Paipel mahsanih me “me keieu mwahu ong aramas emen en wia iei en mwenge oh nim oh pereperenki wahn eh doadoahk.” (Ekl. 2:24) Ahpw, mehn kamweit tohto nan sampah kak wia mehkot suwed ong kitail. E kak kahrehiong aramas tohto en tepida pwungki de pil poakohngala soahng kan me Mahsen en Koht sohte pwungki.

12. Nin duwen me 1 Korint 10:21, 22 mahsanih, dahme kahrehda kitail anahne pilada mwahu mehn kamweit kan?

 ¹² Kitail men poadidiong Siohwa kelehpw, eri kitail sohte kak iang mwenge ni “sapwellimen Siohwa tehpel” oh pil ni “tehpel en ngehn suwed kan.” (Wadek 1 Korint 10:21, 22.) En iang mwenge rehn emen kin kalapw wia kilelepen nanpwungmwahu keren. Ma kitail pilada mehn kamweit kan me kin utung tiahk lemei, wunahni, tiahk samin, de ineng oh madamadau suwed teikan, met wehwehki me kitail kin iang sapwellimen Koht imwintihti kan mwengepene. Imwilahn met, kitail sohte kin ihte kamedekihala kitail ahpw kitail pil kin kauwehla atail nanpwungmwahu rehn Siohwa.

13-14. Nin duwen me Seims 1:14, 15 mahsanih, dahme kahrehda kitail en kanahieng mehn kamweit kan me kitail kin pilada? Menlau kihda ehu karasaras.

¹³ Medewehla ekei ahl me mehn kamweit kan kin duwehte mwenge. Ni ahnsou me kitail kin mwenge, kitail kak pilada dahme kitail en kihong nan ewetail. Ahpw mwurin atail kadallehla mwengeo, kitail sohte kak pilada dahme mwengeo pahn wiahiong paliwaratail. Mwenge mwahu kak kahrehiong kitail en ahneki roson mwahu; ahpw mwenge suwed kak kauwehla atail roson. Atail esehda duwen met sohte pahn mwadangete sansalda, ahpw e pahn sansalda mwurin ahnsou ehu.

¹⁴ Duwehte met, ni atail kin pilada mehn kamweit kan, kitail kak pilada dahme kitail kin kihong nan atail madamadau. Ahpw mwurin met, mehn kamweit kan me kitail pilada kak kamwakid atail madamadau oh pepehm. Mehn kamweit mwahu kan kak mwahu ong kitail; ahpw mehn kamweit sohte konehng kan kak keper ong kitail. (Wadek Seims 1:14, 15.) Ele kitail sohte pahn mwadang esehda dahme mehn kamweit suwed kan kin wiahiong kitail, ahpw kedekedeo e pahn sansalda. Ihme kahrehda Paipel kehkehlikihong kitail: “Kumwail dehr pitida: Kumwail sohte kak pitih Koht. Pwe dahme aramas kin kamwarak, ih me e pahn pil dolung; pwehki me kin kamwarak ong kamwahupen ineng en uduk pahn dolung mehla sang ineng en uduk.” (Kal. 6:7, 8) Ia uwen eh kesempwal kitail en soikala mehn kamweit koaros me kin utungada soahng kan me Siohwa ketin kalahdeki!​—Mel. 97:10.

15. Kisakis dah me Siohwa ketikihong kitail pwehn kamweitkitailla?

¹⁵ Sapwellimen Siohwa aramas tohto kin perenki kilang JW Broadcasting^®, neitail TV station nan Internet. Sister men me adaneki Marilyn nda: “JW Broadcasting sewese ie en ahneki madamadau pwung, oh I kak kilang soahng koaros loale pwehki audepe kan koaros mwahu. Ni ahnsou me I kin kelehpwla de mworusala, I kin kilang ehu padahk de prokram en Kaudok en Nimenseng pwehn kangoange ie. Met kin kahrehiong ie en pehm me I karanih Siohwa oh sapwellime pwihn. JW Broadcasting uhdahn kawekila ei mour.” Ke kin paiekihda sapwellimen Siohwa kisakis? Patehng prokram kapw kan sounpwong koaros, JW Broadcasting kin kasalehda prokram teikan me ke kak rong de kilang, oh pil koul kan me kak kamweituhkala ahnsou sohte lipilipil.

16-17. Dahme kahrehda kitail anahne kanahieng uwen ahnsou me kitail kin doadoahngki ong mehn kamweit kan, oh ia duwen atail kak wia met?

¹⁶ Kitail anahne kanahieng dahme kitail kin pilada ong mehn kamweit oh pil uwen ahnsou me kitail kin doadoahngkihla ong met. Ma kitail sohte wia met, kitail kakete doadoahngkihla ahnsou laud ong mehn kamweit kan sang atail kin papah Siohwa. Me tohto kin apwalki koasoanehdi uwen ahnsou me re kin doadoahngki ong mehn kamweit kan. Abigail, sister men me sounpar 18, nda: “Kilang TV kin sewese ie en kommoalla mwahu ni imwin rahn kedirepw ehu.  Ahpw ma I sohte kanahieng, I kak doadoahngkihla ahnsou laud kilikilang TV.” Brother pwulopwul men me adaneki Samuel nda: “I tehkada me I kin kilang kisin kasdo mwotomwot tohto ahnsou werei nan Internet. I kin tepidahte kilang ehu, oh I sohte tehk me I doadoahngkihla awa siluh de pahieu wia met.”

¹⁷ Ia duwen omw kak koasoanehdi uwen ahnsou me ke kin doadoahngki ong mehn kamweit kan? Keieun kahk iei en kilang ia uwen ahnsou me ke kin doadoahngki ong met. Ke sou kilelehdi uwen ahnsou me ke kin doadoahngkihla erein wihk ehu? Ntingihedi pohn calendar ehu uwen awa tohto me ke kin doadoahngki pwehn kilang kasdo, rapahki soahng kan nan Internet, oh mwadongki game kan nan noumw sehlpwohn de tablet ape. Ma ke pehm me ke kin doadoahngkihla ahnsou laud, song ntingihada koasoandi ehu me ke kak pwakih. Kihong ahnsou pwehn wia dahme keieu kesempwal mahs, oh mwuhr koasoanehdi ahnsou me mie ong mehn kamweit kan. Mwurin met, peki rehn Siohwa en ketin seweseiuk en pwakih koasoandi wet. Ni ahl wet e pahn mie omw ahnsou oh kehl me ke anahne ong onop en Paipel, kaudok en peneinei, mihting kan, oh papah Siohwa nan doadoahk en kalohk oh katohnpadahk. Ke pil pahn sohla nohn suwedki uwen ahnsou me ke doadoahngki ong mehn kamweit kan.

18-19. Ia duwen atail kak kadehdehda me kitail kin poadidiong Siohwa kelehpw?

¹⁸ Mwurin eh ntingihedi duwen kaimwiseklahn ahn Sehdan sampah oh sampah kapwo me pahn kohdo, wahnpoaron Piter nda: “Kompoakepahi ko, pwehki kumwail kin awiawih mepwukat, kumwail wia uwen amwail kak pwe ni imwio en sohte mwahi kis oh sohte sapwung kis rehmwail oh kumwail en kin popohl mwohn silangin Koht.” (2 Pit. 3:14) Ni atail peikiong kaweid wet oh wia uwen atail kak en mour oh kaudok ni ahl ehu me Siohwa ketin kupwurki, kitail kadehdehda me kitail kin poadidiong Siohwa kelehpw.

¹⁹ Sehdan oh eh koasoandi pahn pousehlahte kasonge kitail en wekidala dahme kitail kin keieu kesempwalki. (Luk 4:13) Ahpw mendahki kahpwal kan me kitail kin lelohng, kitail sohte pahn mweidohng emen de mehkot en wiliandi Siohwa. Kitail kin koasoanehdi teng en patohwanohng Siohwa dahme e ketin warohng, me iei atail en poadidiong ih kelehpw!