1. Dahme kahrehda kitail perenki oh pohlki me kitail wia Sounkadehdehn Siohwa kei?

KITAIL uhdahn perenki oh pohlki me kitail wia Sounkadehdehn Siohwa kei! Kitail sapwellimen Siohwa aramas, oh kitail kin kadehdehda me kitail sapwellime sounkadehde kei sang ni atail kin kalohk oh padahkihong meteikan duwen ih. Kitail perenki atail kak sewese emen me “ahneki mohngiong mwahu en ale mour soutuk” en pwosonla padahk mehlel. (Wiewia 13:48) Kitail ahneki soangen pepehmohte me Sises sapwellimanki. E ketin “direkihla peren oh sapwellimen Koht manaman” ni sapwellime tohnpadahk ko ar padahkihong ih soahng mwahu kan me wiawihong irail nan kalohk.​—Luk 10:1, 17, 21.

2. Ia duwen atail kak kasalehda me kitail kin uhdahn kesempwalki atail doadoahk en kalohk?

² Kitail kin uhdahn kesempwalki atail doadoahk en kalohk. Wahnpoaron Pohl kangoangehki Timoty: “Kanakanahieng pein kowe oh omw padahk kan.” E pil kapatahiong: “Ni omw pahn wia met, ke pahn doarehla pein kowe oh pil irail kan me kin rong uhk.” (1 Tim. 4:16) Atail doadoahk en kalohk kin doarehla mouren aramas. Kitail kin kanakanaiehng pein kitail pwehki kitail towe mehlel kei en Wehin Koht. Kitail men ahnsou koaros mwekid ni ahl me pahn wahdo kaping ong Siohwa oh pahrekiong rongamwahwo me kitail kin kalohki. (Pil. 1:27) Kitail kin kasalehda me kitail “kanakanahieng atail padahk” sang ni atail kin kaunopada mwahu ong kalohk oh peki sapwellimen Siohwa sawas mwohn atail kalohk ong meteikan.

3. Aramas koaros kin perenki rong rongen Wehio? Menlau kihda ehu karasaras.

³ Mendahki kitail kin wia uwen atail kak en kalohk ong meteikan, aramas tohto nan atail wasahn kalohk ele sohte kin nohn men rong rongamwahu en Wehio. Medewehla mehn kahlemeng  en Brother Georg Lindal me kelehpw kalohk nan wasa tohto nan Iceland nan pahr 1929 lel 1947. E kihla pwuhk kid kid kei, ahpw sohte emen me wiahla Sounkadehdehn Siohwa. E ntingihedi: “Ekei aramas mwomwen uhwong padahk en Paipel, ahpw pali laud en irail sohte perenki rong.” Misineri kei me kesepwil sang sukuhl en Kilead kohla wasao oh sewese doadoahko, ahpw irail pil kalohk erein sounpar tohto ahpw sohte me perenki rong. Kedekedeo, mwurin sounpar duwau, ekei tohn sahpwo inoukihong Siohwa arail mour oh papidaisla. *

4. Ia pahn atail pepehm ni aramas akan ar sohte mwekidki rongamwahwo?

⁴ Kitail kin nsensuwedla ni aramas akan ar sohte men onop Paipel. Ele atail pepehm duwehte ahn Pohl, me pehm “pahtou laud oh medek me sohte kin tokedi” pwehki pali laud en mehn Suhs ko sohte kamehlele me Sises iei Mesaiao me inoupe mie. (Rom 9:1-3) Mwein ke kin onop Paipel rehn emen. Ke kin doadoahk laud pwehn wia sounpadahk mwahu men oh ke kin kalapw kapakapki noumw tohnsukuhlo. Ahpw e sohte kin kapwaiada dahme e kin sukuhlki oh ke anahne uhdihsang onop reh. De mwein sohte emen me ke onop reh papidaisla. Ia duwe, met omw sapwung, oh Siohwa sohte ketin kupwurki omw doadoahk en kalohko? Nan iren onop wet kitail pahn sapengala peidek riau: (1) Dahme kadehdehda me atail doadoahk en kalohk kin pweida? (2) Dahme kitail en kasik ni atail kalohk ong meteikan?

5. Dahme kahrehda atail doadoahk ong Siohwa sohte kin ahnsou koaros pweida ni ahl me kitail mwahuki?

⁵ Paipel mahsanihki emen me kin wia kupwuren Koht: “Re kin pweida mwahu ni soahng koaros me re kin wia.” (Mel. 1:3) Ahpw, met sohte wehwehki me soahng koaros me kitail kin wia ong Siohwa pahn pweida ni ahl me kitail mwahuki. Atail mour oh mouren meteikan kin “diren apwal” pwehki atail soh unsek. (Sohp 14:1) Patehng met, irail kan me kin uhwong kitail kin ele ekei pak kauhkitaildihsang atail kalohk ni ahl me kitail kin kalapw wia. (1 Kor. 16:9; 1 Des. 2:18) Eri ia duwen Siohwa eh kin ketin koasoanehdi ma atail doadoahk en kalohk kin pweida? Medewehla ekei kaweid oh ire mehlel en Paipel kan me sapengala peidek wet.

6. Ia duwen Siohwa eh ketin koasoanehdi ma atail doadoahk en kalohk ong ih pweida?

⁶ Siohwa kin ketin tehk mwahu atail kin nannanti oh sohte uhdi. Siohwa kin ketin kupwurperenki atail kin kalohk ni ngoang pwehki atail kin poakohng ih, mehnda ma aramas akan sohte men rong. Pohl ntingihedi: “Pwe Koht me pwung oh e sohte pahn ketin meliehla amwail doadoahk oh duwen amwail kin poakohng mware sang ni amwail kin papah aramas sarawi kan leledo ahnsou wet.” (Ipru 6:10) Siohwa kin ketin tamataman atail doadoahk oh atail limpoak, mehnda ma sohte atail onop en Paipel me papidaisla. Eri, dahme Pohl ndaiong mehn Korint ko pil kak kadoadoahk ong uhk: “Amwail doadoahk me pid Kauno, kaidehk mehkot  mwahl,” mehnda ma omw doadoahk laud sohte kin pweida mwahu ni ahl me ke mwahuki.​—1 Kor. 15:58.

7. Dahme kitail kak sukuhlkihsang dahme wahnpoaron Pohl ndahki eh doadoahk en kalohko?

⁷ Wahnpoaron Pohl wia misineri mwahu men, oh e wiahda mwomwohdiso kapw kan nan kahnimw tohto. Ahpw ni ekei aramas ar kauwe Pohl oh nda me e sohte wia sounpadahk mwahu men, e sohte koasoia ia uwen tohtohn aramas me e sewese en wiahla Kristian. Ahpw, Pohl ntingihedi: “I kin doadoahk laudsang irail.” (2 Kor. 11:23) Duwehte Pohl, kitail anahne tamataman me dahme keieu kesempwal ong Siohwa iei me kitail en doadoahk laud oh dehr uhdi.

8. Dahme kitail anahne tamataman duwen arail doadoahk en kalohk?

⁸ Atail doadoahk en kalohk kin kaperenda Siohwa. Sises ketin poaronehla sapwellime tohnpadahk isiakan ko ren kalohki duwen Wehio, oh mwurin arail kalohko, irail “pwurodo ni peren.” Dahme kahrehda irail uhdahn peren? Irail nda: “Ngehn suwed kan pil kin peikiong kiht ni at kin doadoahngki mwaromwi.” Ahpw Sises ketin kapwungala arail madamadau ni eh mahsanihong irail: “Kumwail dehr perenkihda ngehn akan ar kin peikiong kumwail, ahpw perenkihda adamwail kan eh ntingdier nanleng.” (Luk 10:17-20) Sises mwahngih me irail sohte pahn ahnsou koaros ahneki soangen pweida mwahwo nan arail doadoahk en kalohk. Kitail sehse ia uwen tohtohn aramas me sapwellimen Sises tohnpadahk ko koasoiong oh mwuhr wiahla Kristian kei. Tohnpadahk ko anahne wehwehki me peren sohte kin kohsangete aramas ako ar rong irail. Arail peren keieu laud pahn kohsang arail ese me Siohwa ketin kupwurki arail doadoahk laud.

9. Nin duwen me Kalesia 6:7-9 mahsanih, dahme pahn wiawi ni atail dadaurete nan atail doadoahk en kalohk?

⁹ Ma kitail kin dadaurete nan atail doadoahk en kalohk, kitail pahn alehdi mour soutuk. Ni atail kin wia uwen atail kak koaros en kalohki oh padahki rongamwahwo, kitail pil kin “kamwarak ong kamwahupen sapwellimen Koht manaman” sang ni atail mweidohng manaman wet en kaweid atail mour. Ma kitail sohte uhdi de “pwangahkihda,” Siohwa ketin inoukihda me e pahn ketikihong kitail mour soutuk, mehnda ma sohte emen me kitail sewese papidaisla.​—Wadek Kalesia 6:7-9.

10. Dahme kahrehda ekei kin rong ni atail kin kalohk ong irail oh ekei sohte kin?

¹⁰ Mwomwen aramas akan ar kin mwekidki padahk mehlel kin kohsang dahme mi nan mohngiongirail. Sises ketin kawehwehda met nan sapwellime karasaras en sounkamwarako me kamwerehdi werentuhke nan soangsoangen pwehl, ahpw werentuhkehute me pwupwudi nan pwehl mwahwo me pweida. (Luk 8:5-8) Sises ketin karasaraskihong pwehl ko mwomwen mohngiong en aramas akan ar kin mwekidki “mahsen en Koht.” (Luk 8:11-15) Duwehte sounkamwarako, kitail sohte kak idingkihong mehkot en keirda nan mohngiong en aramas me kitail kalohk ong. Atail pwukoa iei en pousehlahte kamwerehdi weren Wehio. Nin duwen me wahnpoaron Pohl koasoia, “emenemen pahn ale ketingpe nin duwen eh doadoahk,” kaidehn nin duwen imwilahn eh doadoahko.​—1 Kor. 3:8.

11. Dahme kahrehda Siohwa ketin kupwurperenkihda ahn Noha kalohk mendahki aramas akan ar sohte rong ih? (Menlau kilang kilel ni kilin Kahn Iroir wet.)

¹¹ Nan poadopoad, sapwellimen Siohwa ladu tohto kin kalohk ong aramas akan me sohte kin men rong. Karasepe, Noha wia “sounkalohki pwung,” men erein sounpar 40 de 50. (2 Pit. 2:5) Ele e kasik me aramas akan pahn rong ih, ahpw Siohwa sohte ketin mahsanih me met pahn wiawi. Ni eh ketin mahsanihong Noha en kauwada warihmwo, Koht ketin mahsanih: “Ke  pahn pedolong nan warihmwo, kowe, noumw pwutak kan, omw pwoudo, oh en noumw pwutak kan ar pwoud kan.” (Sen. 6:18) Oh ni Siohwa eh ketin mahsanihong ia uwen laud en warihmwo, Noha ele esehda me aramas malaulaute me pahn rong ih pwehki sohte dewerail nan warihmwo. (Sen. 6:15) Kitail ese me sohte emen rong Noha. (Sen. 7:7) Ia duwe, Siohwa ketin medewe me Noha sohte pweida nan kalohk? Uhdahn soh! Siohwa uhdahn ketin kupwurperenkihda Noha pwehki ni lelepek, Noha wia dahme Siohwa ketin mahsanihong en wia.​—Sen. 6:22.

12. Ia duwen soukohp Seremaia eh ahneki peren nan eh doadoahk en kalohk mendahki aramas akan uhwong oh sohte men rong ih?

¹² Soukohp Seremaia pil kalohk daulih sounpar 40 mendahki aramas akan sohte rong oh kaloke ih. E uhdahn mworuskihla ni sounuhwong ko ar kasarowe oh kamwamwahlihala me kahrehda e medewe en uhdihsang eh pwukoau. (Ser. 20:8, 9) Ahpw e sohte wia met! Dahme sewese ih en pousehlahte ahneki peren nan eh doadoahk en kalohk? E kin medemedewehte ire kesempwal riau. Keieu, mahsen en Koht me Seremaia padahkihong aramas ako kin pidada “ahnsou kohkohdo kan me irail kasikasik.” (Ser. 29:11) Keriau, Siohwa ketin pilada Seremaia en wia wiliepe oh padahkihong aramas akan Sapwellimen mahsen. (Ser. 15:16) Kitail pil kin lohkihong aramas akan rohng en koapworopwor oh duwen mwaren Siohwa nin duwen sapwellime Sounkadehde kei. Ni atail kin medemedewehte ire riau kesempwal pwukat, kitail kak diar peren mendahki ma aramas akan rong kitail de soh.

13. Dahme kitail sukuhlkihsang sapwellimen Sises karasaraso nan Mark 4:26-29?

¹³ Aramas emen kin anahne ahnsou laud pwehn kakairada pwoson. Sises ketin padahki ire mehlel wet nan sapwellime karasaraso duwen sounkamwarako me kin meir. (Wadek Mark 4:26-29.) Mwurin sounkamwarako kamwerehdi werentuhke ko, irail kin ekisekis kekeirda oh sounkamwarako sohte kak wiahiong ren mwadang keirda. Ele ke pil anahne ahnsou reirei mwohn omw kilang noumw tohnsukuhl en Paipelo kapwaiada dahme e kin sukuhlki. Duwehte soumwet men eh sohte kak wiahiong eh tuhke ko en mwadang keirda ni uwen me e mwahuki, kitail pil sohte kak kahrehiong pwoson en neitail tohnsukuhlo en mwadang keirda ni uwen me kitail mwahuki. Eri dehr mworusala de uhdi ma re pwand en kekeirda. Duwehte soumweto, kitail anahne kanengamah oh awih lao neitail tohnsukuhlo pilada en papah Siohwa.​—Seims 5:7, 8.

14. Mehn kahlemeng dahieu me kasalehda me aramas pahn anahne ahnsou werei mwohn ar tepida rong kitail?

¹⁴ Nan ekei sahpw, e kin uhdahn werei mwohn emen papidaisla. Medewehla dahme wiawihong pirien ehu me adaneki Gladys oh Ruby Allen me pekederla nan kahnimw en Quebec * nan Canada nan pahr 1959 pwe ira en wia pioneer kei. Pwehki aramas ako wasao masak dahme mehn mparail kan oh padre kan pahn wia de nda ma re koasoiong Sounkadehde kan, eri irail sohte kin men koasoiong kitail. Gladys koasoia: “Se kin kalohk ihmw lel ihmw awa waluh rahn ehu erein sounpar riau oh sohte emen me kin koasoiong kiht! Aramas ako kin kohdo ni arail wenihmw ko, kilang kiht, oh kohkohla. Ahpw se sohte uhdi.” Kedekedeo, aramas ako tepida kadek ong kiht oh ekei tepida rong kiht. Met mie mwomwohdiso siluh nan kahnimwo.​—Ais. 60:22.

15. Dahme 1 Korint 3:6, 7 padahkihong kitail duwen doadoahk en katohnpadahk?

¹⁵ Aramas tohto anahn pwehn sewese emen en wiahla tohnpadahk. Koaros nan mwomwohdiso kak iang sewese emen en papidaisla. (Wadek 1 Korint 3:6, 7.) Karasepe, emen sounkalohk  kihdi kisin doaropwe de makasihn ehu rehn tohnihmw men me perenki rong. Sounkalohko eri diarada me e sohte kak pwurala ni ahnsou me mwahu ong aramaso, eri e peki rehn emen sounkalohk en pwurala. Sounkalohk me pwuralao tepida onop Paipel rehn aramaso. Ih eri kin luke riatail Kristian kan ren iangih kohla onop rehn aramaso. Oh mwomwen emenemen irail kin kangoange tohnsukuhlo wekpeseng. Emenemen riatail Kristian me tohnsukuhlo tuhwong pahn sewese ih en kakairada eh pwoson. Ni ahl wet, koaros me kin doadoahk laud pwehn sewese emen kak peren ni aramaso eh papidaisla.​—Sohn 4:35-38.

16. Dahme kahrehda ke kak diar peren nan omw kalohk mehnda ma ke soumwahu de sohla kehlail?

¹⁶ Ele ke sohte kak kalohk oh padahk duwehte me ke kin wia mahso pwehki omw roson sohte mwahu de ke sohla nohn kehlail. Ke kak peren pwehki dahme ke kak wia nan doadoahk en kalohk. Medewehla dahme wiahiong Nanmwarki Depit oh nah ohl ako ni ahnsou me re kapitala arail peneinei oh kapwurehdo arail kepwe ko sang rehn mehn Amalek ko. Ohl meh riepwiki me uhdahn pwangada en iang kohla mahwen, eri irail mihmi oh sile arail kepwe ko. Depit oh nah ohl ako kana nan mahweno oh wahsang dipwisou kesempwal tohto sang arail imwintihti ko. Ih eri kaweidki nah ohl ako en nehkpeseng ni pahrek dipwisou ko ong me iang mahweno oh me sohte iang. (1 Sam. 30:21-25) Koasoi pwoatet padahkihong kitail soahng ehu duwen atail doadoahk en katohnpadahk. Ele ke sohla kak wia ni uwen me ke men wia nan kalohk oh katohnpadahk. Ahpw ma ke wia uwen omw kak koaros, eri ke kak ahnekihte peren ahnsou koaros me emen me kapw esehla duwen Siohwa oh papidaisla.

17. Dahme kitail anahne kalahngankihong Siohwa?

¹⁷ Kitail kin kalahngankihong Siohwa eh kin ni limpoak ketin kilengwohng atail doadoahk ong ih. E ketin mwahngih me kitail sohte kak idingkihong aramas akan en rong kitail, de tepida kaudokiong ih. Mendahki met, e kin ketin nsenohki uwen atail kin doadoahk laud oh uwen atail poakohng ih, oh e pahn ketin katingih kitail. E pil ketin padahkihong kitail en ahneki peren sohte lipilipil doadoahk dah me kitail kak wia nan doadoahk en kalohk. (Sohn 14:12) Kitail kak uhdahn kamehlele me Koht pahn ketin kupwurperenkihte kitail ma kitail sohte uhdi!