1. Ire kesempwal dahieu me Sises mahsanih duwe ni kaimwiseklahn pwohng me e ketiket rehn sapwellime tohnpadahk ko?

NI KAIMWISEKLAHN pwohng me e ketiket rehn sapwellime tohnpadahk ko, Sises mahsanih duwen limpoak kereniong pak 30. E mahsanihong sapwellime tohnpadahk kan me re anahne “poakohng emenemen.” (Sohn 15:12, 17) Arail limpoak pahn uhdahn mehlel me kahrehda meteikan en pohnese oh ese me irail uhdahn sapwellimen Krais tohnpadahk kei. (Sohn 13:34, 35) Limpoak me Sises ketin mahsanih duwe kaidehn ihte pepehm ehu; e wia irair ehu me uhdahn kehlail oh kin kasalehda tounmetei. Sises mahsanih: “Sohte emen me ahneki limpoak laudsang met, me emen en tounmeteikihla eh mour pwehki kompoakepah kan. Kumwail iei kompoakepahi ma kumwail kin wia dahme I kehkehlingkihong kumwail.”​—Sohn 15:13, 14.

2. (a) Dahme me tohto kin esehki duwen sapwellimen Koht ladu kan rahnwet? (b) Peidek dah kan me kitail pahn sapengala nan iren onop wet?

² Me tohto esehki sapwellimen Siohwa ladu kan arail limpoak mehlel oh limpoak en tounmetei, oh pil uwen laud en arail kin miniminpene. (1 Sohn 3:10, 11) E sohte lipilipil kitail mehn ia de keinek dah me kitail kohsang ie, mehnia lokaia kitail kin lokaiahki,  wasa me kitail kohsang ie, de wasa kitail tikida ie. Nan sampah pwon, sapwellimen Siohwa ladu kan kin uhdahn limpoakpene. Ele kitail kin medewe: ‘Dahme kahrehda limpoak uhdahn kesempwal rahnwet? Ia duwen Siohwa oh Sises ara kin ketin doadoahngki limpoak wet pwehn kakehlakahda kitail? Oh ia duwen atail kak kasalehda me limpoak wet kin kamweitala oh “kakehlakahda” meteikan?’​—1 Kor. 8:1.

3. Ia duwen “ahnsou apwal oh keper” pwukat ar kin kamwakid aramas akan?

³ Kitail mi nan “ahnsou apwal oh keper,” oh atail mour kin diren ‘pwunod oh apwal.’ (Mel. 90:10; 2 Tim. 3:1-5) Aramas tohto kin lokolok laud me kahrehda re men mehla. Sounpar koaros, daulih aramas 800,000 kin kemehla pein irail​—sekond 40 koaros emen kin mehla. E kansensuwed me mie ekei riatail Kristian kan me pil ahneki soangen pepehm pwukat oh kemehla pein irail.

4. Ihs irail kan nan Paipel me kasalehda me re men mehla?

⁴ Nan Paipel mahso, ekei sapwellimen Koht ladu lelepek kan kin uhdahn mworusala pwehki arail kahpwal kan me kahrehda re men mehla. Karasepe, Sohp ahneki weirek laud me kahrehda en nda: “Solahr ei koapworopwor; I pwangadahr momour.” (Sohp 7:16; 14:13) Sona uhdahn mworusala me kahrehda e nda: “Eri, Maing KAUN, komwi ketikihweisang ei mour, pwe ei mehla mwahusang ei momour.” (Sona 4:3) Soukohp Elaisa pehm me uhdahn solahr eh koapworopwor me kahrehda e nda: “Maing KAUN . . . komw ketin ale ei mour.” (1 Nan. 19:4) Ahpw Siohwa ketin poakohng ladu loalopwoat pwukat oh kupwurki ren mour. E sohte ketin kadeik irail pwehki arail ahneki pepehm pwukat. Ahpw, e ketin sewese irail en pwurehng kakairada arail ineng en men mour pwe ren kak doulahte papah ih ni lelepek.

5. Dahme kahrehda riatail Kristian kan uhdahn anahne atail limpoak ahnsou wet?

⁵ Rahnwet, tohto riatail Kristian kan kin dadaur pahn kapwunod laud oh anahne atail limpoak. Ekei kin lelohng kalokolok de aramas akan kin kapailoke irail. Meteikan kin mi nan irair me aramas akan kin lidere de lipahnede irail ni arail wasahn doadoahk. De re kin pwang pwehki re kin doadoahk ahnsou werei de re ahneki doadoahk kan me kin kahrehiong irail en pwunod laud. Meteikan pil ahneki kahpwal laud kan nan peneinei. Mwein re pwoudiki emen me sohte kin papah Siohwa oh kin kalapw kauwe irail. Pwehki mepwukat oh kahpwal teikan, ekei kin pehm me solahr arail kehl oh kakete tepida medewe me re sohte kesempwal. Ihs me kak sewese irail?

6. Ia duwen sapwellimen Siohwa limpoak eh kin kakehlakahda sapwellime ladu kan?

⁶ Siohwa ketin kamehlelehiong sapwellime ladu kan me e ketin poakohng irail ahnsou wet oh pahn poakohng irail kohkohlahte. Medewehla ahn mehn Israel kan arail pepehm ni Siohwa eh ketin mahsanihong irail: “I . . . kasempwalkin uhk, oh . . . poakohng uhk oh waunekin uhk,” oh “Ke dehr masak​—pwe I kin ieiang uhk”! (Ais. 43:4, 5) Kitail ese me Siohwa kin ketin kesempwalki emenemen kitail. * Paipel inoukihda: “Sapwellime manaman kin kahrehiong en powehdi. KAUN-O pahn ketin kupwurperenkin uhk.”​—Sep. 3:16, 17.

7. Ia duwen sapwellimen Siohwa limpoak eh duwehte limpoak en nohno men? (Menlau kilang tepin kilel.)

 ⁷ Siohwa ketin inoukihda me e pahn ketin kakehlakahda oh kansenamwahwih sapwellime aramas akan sohte lipilipil soangen kahpwal dah me re ahneki. E ketin kasalehiong irail sapwellime pepehm ni eh mahsanih: “Kumwail pahn rasehng seri men me ine kin apwahpwalih, tupwutupwenge, oh limlimpoakohng. I pahn kansenamwahwihkumwailla.” (Ais. 66:12, 13) Medewehla kisin seri men eh sohte kin per ni eh nohno kin weuwa de mwadong ong ih! Siohwa uhdahn ketin poakohng uhk oh kupwurki ken dehr perki mehkot. Dehr peikasalki me ke uhdahn kesempwal rehn Siohwa.​—Ser. 31:3.

8, 9. Ia duwen sapwellimen Sises limpoak eh kak kakehlakahda kitail?

⁸ Iet pil ehu kahrepe kitail ese me Siohwa ketin poakohng kitail. Paipel mahsanih: “Iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Sapwellimen Sises meirong kadehdehda me e pil ketin poakohng kitail, oh limpoak wet kin kakehlakahda kitail. Paipel mahsanih me “kahpwal de weikek” pil sohte kak “katohreikitailsang limpoak en Krais.”​—Rom 8:35, 38, 39.

⁹ Ekei pak mie kahpwal kan me kin kaluwetehla paliwaratail de loalatail de kihsang atail peren ni atail kin papah Siohwa. Ahpw atail kin tamataman ia uwen Krais eh ketin poakohng kitail, met kak kihong kitail kehl en dadaurete. (Wadek 2 Korint 5:14, 15.) Met kin kahrehiong kitail en men doulahte momour oh papah Siohwa. Sapwellimen Sises limpoak kak kauhdi kitail sang atail en men mehla, mehnda ma kitail kin lokolongki kalokolok kan, soahng kansensuwed kan, kapwunod kan, de kahpwal en melimel de rerrer en sahpw ape.

10, 11. Ihs me pwukoahki kakehlakahda riatail Kristian kan me mworusala? Menlau kawehwehda.

¹⁰ Siohwa pil kin ketin doadoahngki mwomwohdiso en kakehlakakitailkihda sapwellime limpoak. Ni atail kin poakohng riatail Kristian kan, kitail kin kadehdehda atail limpoak  ong Siohwa. Kitail kin wia soahng koaros me kitail kak pwehn sewese riatail Kristian kan en ese me re kesempwal oh me Siohwa ketin poakohng irail. (1 Sohn 4:19-21) Wahnpoaron Pohl ntingihedi: “Kumwail kangkangoange oh kangkakehlailih emenemen, nin duwen me kumwail kin wiewia.” (1 Des. 5:11) Kaidehn elder kante me kin wia met. Emenemen kitail kak kahlemengih Siohwa oh Sises sang ni atail kin kansenamwahwih riatail Kristian kan.​—Wadek Rom 15:1, 2.

¹¹ Ekei nan mwomwohdiso me kin lokolongki nsensuwed de pwunod laud ele anahne wini oh sawas sang irail kan me samanih duwen soangen irair pwukat. (Luk 5:31) Elder kan oh meteikan nan mwomwohdiso pohnese me kaidehn irail toahkte koahiek kei, ahpw sawas oh kamweit me re kak kihda kin uhdahn kesempwal. Koaros nan mwomwohdiso kak “kakehlaka irail kan me nan kapehd tikitik, . . . sewese me luwet akan, oh kanengamahiong aramas koaros.” (1 Des. 5:14) Kitail kin men song en wehwehki pepehm en riatail Kristian kan. Kitail anahne kanengamahiong irail oh koasoi ni ahl ehu me pahn kansenamwahwihala irail ni ahnsou me re kin mworusala. Ia duwe, ke kin song en kakehlakahda meteikan? Dahme ke kak wia pwehn kalaudehla omw kin kansenamwahwih oh kangoange meteikan?

12. Menlau kihda ehu karasaras en emen me ale kangoang sang limpoak en eh mwomwohdiso.

¹² Emen sister nan Iurop nda: “Ekei pak I kin medewehda en pein kemeiehla, ahpw mie me sewese ie. Mwomwohdiso me I iango sewese oh doareiehla. Riei Kristian kan kin ahnsou koaros uhdahn kangoange oh poakohng ie. Mendahki ekeite me ese me I kin lokolongki nsensuwed laud, ei mwomwohdiso kin ahnsou koaros sewese ie. Mie pwopwoud ehu me duwehte ei pahpa nohno. Ira kin apwalih ie mwahu, oh ira kin sewese ie ahnsou koaros.” Ei mehlel, kaidehn koaros kak kihda sawas ni ahlohte. Ahpw emenemen kitail kak wia sawas laud ong riatail Kristian kan. *

13. Dahme ke anahne wia pwehn kansenamwahwihala meteikan?

¹³ Wia emen me kin rong kanahieng. (Seims 1:19) E wia elen limpoak en rong oh wehwehki riatail Kristian men me mworusala. Song en medewehla ia pahn omw pepehm ma kowe me mi nan eh irairo. Idek soangen peidek kan me kak seweseiuk en wehwehkihla mwahu ih. E pahn kak ese ma ke uhdahn nsenohki ih, pil sang ni mwomwen mesomwen. Erein eh koasoakoasoi, kanengamah oh mweidohng en kasalehda eh pepehm kan oh dehr sopuk. Ni omw kin rong kanahieng, ke kak esehda eh pepehm kan oh kak sewese ih en likih iuk. Eri e pahn mengei ong ih en rong dahme ke pahn nda. Ni meteikan ar ese me ke uhdahn nsenohkin irail, ke kak uhdahn kansenamwahwihala irail.

14. Dahme kahrehda kitail sohte men kadeik meteikan?

¹⁴ Dehr kadeik meteikan. Emen me kin nsensuwed laud pahn ehute nsensuwedla ma e medewe me ke kin kadeik ih. Eri e pahn kak uhdahn apwal ken sewese ih. Paipel mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.” (Lep. Pad. 12:18) Mendahki kitail sohte men atail lokaia en kamedekihala emen me kin nsensuwed laud, kitail  kakete kahrehiong en medengkihla lokaia kan me kitail koasoia ni soh lamalam. Pwehn kakehlakahda ih, ke anahne kamehlelehiong me ke uhdahn nannanti en wehwehki eh irairo.​—Mad. 7:12.

15. Mehn sawas kesempwal dahieu me kitail kak doadoahngki pwehn kansenamwahwih meteikan?

¹⁵ Doadoahngki Mahsen en Koht pwehn kansenamwahwihala meteikan. (Wadek Rom 15:4, 5.) Paipel pwilisang rehn “Koht me kin ketin sewese kitail en dadaur oh ketikihong kitail kakehlepen loalatail,” eri e sohte kapwuriamwei me kitail kak diar nsenamwahu sang eh mahsen kan. Kitail pil naineki Watch Tower Publications Index (lokaiahn wai) oh Sawas ong Wia Roporop en Sounkadehdehn Siohwa kan. Mehn sawas pwukat kak sewese kitail en diar iren Paipel oh sawaspen Paipel kan me kitail kak doadoahngki pwehn kansenamwahwih oh kangoange riatail Kristian kan.

16. Irair dah kan me pahn sewese kitail en kangoange emen me kin nsensuwed laud?

¹⁶ Kasalehda limpoak oh kadek. Siohwa iei “Semen kupwurkalahngan oh Koht en kansenamwahu koaros,” oh e kin ketin kasalehda “kupwurkalahngan” ong sapwellime ladu kan. (Wadek 2 Korint 1:3-6; Luk 1:78; Rom 15:13) Pohl kasalehda mehn kahlemeng mwahu ni eh wia met pwehki e kin kahlemengih Siohwa. Ihme kahrehda e kak nda: “Se kin kadek ni at mi rehmwail, duwehte nohno men eh kin kadihdi oh apwalih mwahu pein nah seri kan. Pwehki at uhdahn poakohng kumwail, se koasoanehdi teng en kihong kumwail, kaidehn ihte rongamwahu en Koht, ahpw pil pein kiht, pwehki kumwail wialahr kompoakepaht.” (1 Des. 2:7, 8) Ni atail kin kasalehda limpoak oh kadek duwehte Siohwa, kitail kak kansenamwahwihala riatail Kristiano me kin kapakapki met!

17. Ia duwen atail pohnese dahme mehlel duwen riatail kan eh pahn sewese kitail en kangoange irail?

¹⁷ Dehr kasik riomw Kristian kan en unsek. Pohnese dahme mehlel. Ma ke kasik riomw kan en unsek, ke pahn nsensuwedla. (Ekl. 7:21, 22) Kitail men kahlemengih Siohwa, me kin ketin pohnese dahme mehlel ong soahng kan me e ketin kasik sang kitail. Eri kitail anahne kanengamahiong emenemen. (Ep. 4:2, 32) Kitail sohte men kahrehiong riatail kan en pehm me re sohte kin wia uwen arail kak de kapahrekihong irail meteikan. Ahpw, kitail men kangoange oh kasalehiong irail duwen soahng mwahu kan me re kin wiewia. Met kak sewese irail en nsenamwahu ni arail papah Siohwa.​—Kal. 6:4.

18. Dahme kahrehda kitail men kakehlakahda meteikan ni limpoak?

¹⁸ Koaros sapwellimen Siohwa ladu kan kin kesempwal ong ih oh Sises. (Kal. 2:20) Kitail uhdahn poakohng riatail Kristian kan, ihme kahrehda kitail anahne kadek ong irail. Kitail kin “rapahki soahng kan me kin kahrehda popohl oh soahng kan me kin kakehlaka emenemen.” (Rom 14:19) Ia uwen atail kin kasik mour nan Paradais, ni ahnsou me solahr mie kahrepe kan kitail en mworusala! E pahn solahr mie soumwahu kan oh mahwen. Aramas akan pahn solahr mehla pwehki dihp me re sohsohki, oh pahn solahr kalokolok, kahpwal en peneinei, de soahng kansensuwed kan nan mour. Ni imwiseklahn pahr kido, koaros pahn unsekla. Irail kan me kolokol arail lelepek lao lel kaimwiseklahn kasongosongo pahn wiahla sapwellimen Siohwa seri kan nin sampah oh pahn ahneki “saledek lingan en sapwellimen Koht seri kan.” (Rom 8:21) Eri kitail koaros en kasalehda limpoak me kin kakehlakahda oh sewese emenemen pwe kitail en kak iang mi nan sapwellimen Koht sampah kapw oh kaselelo.