NAN sampah pwon, elder kan kin kesempwalki arail pwukoa me re ahneki nanpwungen sapwellimen Koht aramas akan. Re wia kapai ehu ong kitail koaros! Ahpw me keren, mie wekidekla ehu me wiawihda. Iei me elder mah kan en kihong ekei arail pwukoa laud ong elder pwulopwul kan. Ni ahl dah?

Wekidekla kapw wet kasalehda me sounapwalih me kin seiloak kan oh sounpadahk kan ong sukuhl en atail doadoahk en uhdihsang soangen pwukoa pwukat ni ahnsou me re lel sounpar 70. Oh pil, elder kan me sounpar 80 pahn uhd kihong elder pwulopwul kan soangsoangen pwukoa teikan me re ahneki, duwehte sounapwalih Pwihn me Kin Apwalih Ohpis en Sounkadehdehn Siohwa kan de wia soun koasoanehdi pwihn en elder kan nan arail mwomwohdiso. Ia duwen elder mah pwukat ar mwekidki wekidekla wet? Re kasalehda loalopwoat ong Siohwa oh sapwellime pwihn!

Ken, me papah kereniong sounpar 49 nin duwen emen sounapwalih en Pwihn me Kin Apwalih Ohpis en Sounkadehdehn Siohwa kan, nda: “I uhdahn pwungki pilipil wet. Ni mensengohte  me I esehda duwen met, I patohwan kapakap ong Siohwa oh kasalehda duwen anahnepen brother pwulopwul men en uhd pwukoahki doadoahk me I kin wiao.” En Ken eh mwekidki met pil duwehte ahn me lelepek mah kan nan sampah pwon. Ahpw, pwehki re perenki papah riarail kan, mie ekei me ekis nsensuwedki wekidekla wet.

Esperandio, me wia emen soun koasoanehdi pwihn en elder kan nan eh mwomwohdiso, nda: “I ekis nsensuwedla.” Ahpw e pil nda, “I anahne ahnsou laud en apwalihala ei roson me wie susuwedla.” Eri, kitail kak kasik me Esperandio pousehlahte papah Siohwa ni lelepek oh wia kapai ehu nan eh mwomwohdiso.

Ahpw ia duwen sounapwalih kan me kin seiloak me wereila nan doadoahk wet ahpw uhd wia soangen pwukoa tohrohr kan? Allan, me papah nin duwen sounapwalih me kin seiloak men erein sounpar 38, nda, “Ni ahnsou me I esehda duwen met, I uhdahn pwuriamweila.” Ahpw, e pohnese duwen kamwahu kan en kaiahne brother pwulopwul kan ong doadoahko, oh e pousehlahte papah Koht ni lelepek.

Russell, me papah erein sounpar 40 nin duwen sounapwalih me kin seiloak oh sounpadahk ong sukuhl en atail doadoahk, nda me nin tapio ih oh eh pwoudo ekis nsensuwedla. E nda: “Se uhdahn kesempwalki pwais kaselel wet oh pehm me at roson en madamadau oh paliwar kehlailte pwehn pousehla.” Russell oh eh pwoudo kin doadoahngki ara koahiek oh dahme ira sukuhlki pwehn sewese ara mwomwohdiso, oh met kin kaperenda sounkalohk kan me kin iang ira papah.

Mehnda ma ke saikinte ahneki soangen pepehm pwukat, 2 Samuel ele pahn seweseiuk en wehwehki irail kan me ahneki pepehm pwukat.

Medewehla duwen ahnsou me nein Nanmwarki Depit pwutako Apsalom uhwongada eh kaunda. Depit tangasang Serusalem kohlahng Mahanaim, ni palimese en Pillap Sordan. Wasao Depit oh irail kan me iangala ih anahnehda soahng kei me pahn sewese irail. Ke tamataman dahme wiawi?

Ohl kadek silimen sang wasao wahdo peht kan, soangsoangen mwenge kan, oh kepwehn mwenge kan me anahn. Emen ohl ako iei Parsilai. (2 Sam. 17:27-29) Ni ahnsou me uhwong me Apsalom wiao uhdi, Depit kakehr pwurala Serusalem, oh Parsilai kahrehla ih ni Pillap Sordan. Depit kangoange Parsilai en iang ih kohla Serusalem. Nanmwarkio nda me e pahn sewesehkin Parsilai mwenge, mendahki Parsilai “inenen kepwehpwe” oh sohte pahn anahne met. (2 Sam. 19:31-33) Depit ele men Parsilai en mi re nan Serusalem pwe en kak paiekihda ahn Parsilai kaweid mwahu kan pwehki e koahieklahr ni soahng tohto. E uhdahn pahn wia pai kaselel ehu en kousoan oh doadoahk nan tehnpas en nanmwarkio!

Pwehki e aktikitik oh kin pohnese eh irairo, Parsilai kawehwehda me e sounpar 80. E pil idek: “I kak wehwehki dahme mwahu oh suwed?” (2 Sam. 19:35, NW) Ia wehwehn met? Parsilai ele kakairada irair en erpit erein eh mour. Oh  e kin kakete kihda kaweid mwahu, duwehte me “me mah kan” me mwuhr wiahiong Nanmwarki Reopoham. (1 Nan. 12:6, 7; Mel. 92:12-14; Lep. Pad. 16:31) Eri dahme Parsilai nda duwen ese dahme mwahu oh suwed ele kin dokedoke eh irairo pwehki eh mahlahr. E nda me eh mahlahr kauwelahr eh kin kak songada mwenge oh rong wasa. (Ekl. 12:4, 5) Ihme kahrehda Parsilai kangoange Depit en wahda mwahnakapwo Simam, ele nein Parsilai pwutak, kohla Serusalem.​—2 Sam. 19:36-40.

Madamadau me Parsilai kasalehda kin duwehte madamadau me pid me mah kan en uhd kihong me pwulopwul kan pwukoa kan, nin duwen me kitail koasoia mwoweo. E sansal me nan atail ahnsou, dahme anahn kin pidada laudsang irair oh koahiek en brother men, duwehte me Parsilai kasalehda. Mie anahnepen en pohnese ni mehlel dahme keieu mwahu ong elder lelepek kan me kin papah nan sampah pwon.

Brother aktikitik mah pwukat kak kilang me sapwellimen Siohwa pwihn pahn kehlailda oh kekeirda ni ahnsou kohkohdo ma brother pwulopwul kan kak apwalih pwukoa kan me brother mah kan wiahier ahnsou werei. Pali laud en ahnsou, brother mah kan iei me kin kaiahnehda brother pwulopwul kan, duwehte Parsilai eh ele kaiahnehda nah pwutako, oh wahnpoaron Pohl eh kaiahnehda Timoty. (1 Kor. 4:17; Pil. 2:20-22) Brother pwulopwul pwukat kadehdehda me met irail wia “aramas akan nin duwen kisakis kei,” me kak sewese “kauwada paliwar en Krais.”​—Ep. 4:8-12; pil kilang Nempe 11:16, 17, 29.

Me tohto nanpwungen sapwellimen Koht aramas akan nan sampah pwon me kihong me pwulopwul kan arail pwukoa kan kakehr isaneki ahnsou mwahu en wia pwukoa kapw kan de kalaudehla arail doadoahk ong Siohwa.

Marco, me wia emen sounapwalih me kin seiloak erein sounpar 19, nda: “Ei irair kapwo mweidohng ie en nantihong sewese ahn sister kan nan at mwomwohdiso arail pwoud me sohte iang padahk mehlel.”

Geraldo, me wia emen sounapwalih me kin seiloak erein sounpar 28, nda: “At mehn akadei kapw kan kin pil pidada en sewese irail kan me solahr kin iang kalohk oh towehda mihting oh pil katohtohla at onop en Paipel kan.” E koasoia me met ih oh eh pwoudo kin onop Paipel rehn aramas 15 oh tohto irail kan me solahr kin iang kalohk oh towehda mihting tepidahr towehda mihting kan.

Allan, me kitail koasoia mwoweo, nda: “Met se kakehr kihong pali laud en at ahnsou ong soangsoangen wiepen doadoahk en kalohk kan. Se kin perenki wia doadoahk en kalohk ong wehipokon, wasahn pesines kan, oh kalohk ong mehn mpat kan, oh mehn mpat riemen kohdohier ni at Wasahn Kaudok.”

Ma kowe brother koahiek oh loalopwoat men oh ke alehdi pwukoa kapw ehu nanpwungen sapwellimen Koht aramas, mie pil ehu ahl tohrohr me ke kak sawas. Ke kak utung sapwellimen Siohwa doadoahk sang ni omw kin ehukihong brother pwulopwul kan nan omw mwomwohdiso dahme ke esehlahr. Russell, me kitail koasoia mwoweo, nda: “Siohwa kin ketin kaiahne oh doadoahngki brother pwulopwul koahiek kan. Arail padahk oh apwalih tohnmwomwohdiso ni ngoang kin wia kamwahu ehu ong kitail koaros!”​—Menlau kilang koakon me oaralape “ Sewese Brother Pwulopwul kan en Pweida nan Arail Koahiek kan.”

Ma ke ahpwtehn alehdi ehu pwukoa kapw, kolokolete omw madamadau pwung. Omw doadoahk laud kamwakidehr mohngiong en aramas tohto, oh ke kak pousehlahte wia met. Me tohto poakohng uhk oh re pahn pil doulahte poakohng uhk.

Kesempwal sang met, Siohwa ketin mwahngiher omw kin doadoahk laud. E sohte pahn ketin ‘meliehla omw doadoahk oh duwen omw kin poakohng mware sang ni omw kin papah aramas sarawi kan leledo ahnsou wet.’ (Ipru 6:10) Mahsen  pwukat kamehlelehiong kitail koaros me sapwellime inou kin pidada laudsang ihte atail doadoahk kan mwoweo. Siohwa uhdahn ketin kesempwalkin uhk oh sohte pahn ketin manokehla omw kin papah ih mwoweo oh omw pousehlahte wiewia met leledo ahnsou wet pwehn kaperenda ih!

Ia duwen ma kaidehn kowe me omw pwukoa kan wekidekla nin duwen me kitail koasoiapenehier? Irair wet pil kin pidada kowe. Ni ahl dah?

Ma ahnsou wet ke ese brother lelepek mah men me eh pwukoa wekidekla, ke kak paiekihda eh koahiek oh soahng tohto me e esehlahr erein ahnsou werei. Ale kaweid oh peki iren sawas kan sang reh. Oh tehk mwahu duwen eh kin doadoahngki ni loalopwoat eh koahiek kan nan eh pwukoa kapwo.

Mehnda ma kowe me mah men me kin papah ni ahl kapw ehu de brother de sister men me kak paiekihda koasoandi wet, tamataman me Siohwa ketin kesempwalki loalopwoat en irail kan me kin papah ih ahnsou werei oh me kin pousehlahte wiewia met.