1. Dahme kahrehda Sounkadehdehn Siohwa kan wia aramas peren kei? (Menlau kilang tepin kilel.)

SOUNKADEHDEHN SIOHWA KAN wia aramas uhdahn peren kei. Sohte lipilipil wasa re kin patpene ie, ma ni mihting ehu, ni mihting tohrohr ehu, de ni arail mwengepene, irail kin koasoakoasoi oh kokouruhrpene. Dahme kahrehda re kin uhdahn peren? Kahrepe keieu iei re ese Siohwa, “Koht me peren.” Re kin papah ih oh song en kahlemengih ih. (1 Tim. 1:11; Mel. 16:11) Siohwa iei Utupen peren, eri e kupwurki kitail en peren, oh e pil ketikihda kahrepe tohto pwe kitail en peren.​—Deud. 12:7; Ekl. 3:12, 13.

2, 3. (a) Ia wehwehn en ahneki peren? (b) Dahme kahrehda e kak apwal en ahneki peren?

² Ia duwen kowe? Ke kin peren? En peren kin wehwehki en ahneki pepehm mwahu, en nsenamwahuki omw mour de kin uhdahn peren. Paipel kasalehda me irail kante me kin ahneki nanpwungmwahu rehn Siohwa me kak uhdahn peren. Ahpw nan sampah rahnwet, e kak apwal en ahneki peren. Dahme kahrehda?

³ E kak apwal en ahneki peren ni ahnsou me kitail kin lelohng irair kapwunod kan, duwehte ni emen me kitail poakohng eh mehla  de piskenla, ni ahnsou me pwopwoud ehu mweipeseng, de ahnsou me sohla atail doadoahk en mwohni. E pil kak apwal en ahneki peren ni ahnsou me sohte meleilei mi nan peneinei pwehki re kin kalapw uhpene, ni iengatail tohndoadoahk de tohnsukuhl ar kapailoke kitail, de ni atail kin lelohng kalokolok de selidi nan imweteng pwehki kitail kin papah Siohwa. De ele atail roson en paliwar luhluwetala, de kitail ahnekihda soumwahu laud, de pil nsensuwed laud. Ahpw tamataman me Sises Krais, “me ketin peren oh ihete me Kaun Manaman,” kin kupwurki kamweitala aramas oh kahrehiong irail en peren. (1 Tim. 6:15; Mad. 11:28-30) Nan sapwellime Kapahrek en Pohn Dohl, Sises ketin kasalehda soangen irair kei me kak sewese kitail en peren mendahki kahpwal tohto me kitail ahneki pwehki atail mihmi nan ahn Sehdan sampah.

4, 5. Dahme kitail kak wia pwe kitail en peren oh doulahte pereperen?

⁴ Dahme Sises tepin mahsanih uhdahn kesempwal. E mahsanih: “Meid pai irail me kin pohnese me irail anahne Koht, pwe arail wehi iei Wehin nanleng.” (Mad. 5:3) Ma kitail pohnese me kitail anahne Koht, kitail wehwehki me kitail kin anahne esehla ih oh kitail kin anahne sapwellime sawas oh kaweid. Ia duwen atail kin kasalehda met? Sang ni atail kin onopki Paipel, peikiong sapwellime kehkehlik kan, oh wiahki atail kaudokiong ih me keieu kesempwal nan atail mour. Atail wiewia mepwukat pahn sewese kitail en peren. Atail pwoson me sapwellimen Koht inou kan pahn pweida ahnsou keren pahn kehlailla. Oh “koapworopwor kaperen” me kitail diar nan Paipel pahn sewese kitail en dadaur ni ahnsou me mie atail kahpwal.​—Taitus 2:13.

⁵ Ma kitail men ahneki peren sohte lipilipil dahme kin wiawi nan atail mour, kitail anahne pousehlahte kakehlakahda atail nanpwungmwahu rehn Siohwa. Wahnpoaron Pohl ntingihedi: “Kumwail en pereperenki Kauno ahnsou koaros. I pahn pil pwurehng nda, Kumwail pereperen!” (Pil. 4:4) Pwe kitail en wia kompoakepahn Siohwa keren men, kitail anahne erpit sang reh. Paipel mahsanih: “Meid kaperen ong aramas me kin loalokongla​—oh dehdehkihla. Irail kan me loalokonglahr kin pereperen; kupwurokong pahn kihong irail mour.”​—Lep. Pad. 3:13, 18.

6. Dahme kitail pil anahne wia pwe kitail en pereperen?

⁶ Ahpw pwe kitail en doulahte pereperen, e uhdahn kesempwal kitail en pousehlahte doadoahngki dahme kitail sukuhlki sang nan Paipel. Sises ketin kasalehda ni sansal uwen kesempwal en met ni eh mahsanih: “Pwehki amwail ese mepwukat, kumwail pahn peren ma kumwail kapwaiada.” (Sohn 13:17; wadek Seims 1:25.) Met kesempwal ma kitail men kaitarala atail anahn en esehla Koht oh ahneki peren kohkohlahte. Ahpw ia duwen atail kak peren mendahki mie soahng tohto me kak kihsang atail peren? Kitail kilang dahme Sises mahsanih mwuhr nan sapwellime Kapahrek en Pohn Dohl.

7. Ia duwen irail kan me kin mwahiei ar kak peren?

⁷ “Meid pai irail me kin mwahiei, pwe re pahn nsenamwahula.” (Mad. 5:4) Ele kitail kin medewe, ‘Ia duwen emen eh kak peren ma e kin mwahiei?’ Sises sohte mahmahsanih duwen koaros me kin mwahiei. Aramas suwed tohto kin mwahiei, de nsensuwed, pwehki re kin lelohng kahpwal laud “ni imwin rahn akan” me uhdahn “apwal oh keper.” (2 Tim. 3:1) Ahpw re kin medemedewehte duwen pein irail a kaidehn  duwen Siohwa, eri re sohte kin kakairada nanpwungmwahu reh, oh re sohte kak ahneki peren. Irail kan me Sises kin mahmahsanih duwe iei irail kan me kin pohnese arail anahn en esehla Koht. Irail kin mwahiei pwehki re kilang me aramas tohtohie soikalahr Koht de sohte kin mour ni ahl me Koht ketin kupwurki. Irail pil pohnese me re dipan, oh re kilang soahng suwed kan me kin wiewiawi nan sampah wet. Siohwa kin ketin mwahngih irail kan me kin uhdahn mwahiei, oh ketin kamweitirailki sapwellimen Mahsen, oh ketikihong irail peren nan arail mour.​—Wadek Esekiel 5:11; 9:4.

8. Ia duwen omw kin mpahi eh kak seweseiuk en peren?

⁸ “Meid pai irail me mpahi, pwe re pahn sohsohki sampah.” (Mad. 5:5) Ia duwen omw mpahi eh kak seweseiuk en ahneki peren? Aramas tohto kin sehse tiahk mwahu oh pil kin lemei, oh met kak kahrehda kahpwal tohto. Ahpw ni arail esehla padahk mehlel, re kin wekila oh pwuhriong nan “mour kapw.” Met re kin kasalehda “limpoak me kin mwekidki poakehla, kadek, aktikitik, mpahi oh kanengamah.” (Kol. 3:9-12) Imwilahn met, re kin ahneki popohl, nanpwungmwahu rehn meteikan, oh re kin peren. Pil ehu, Mahsen en Koht inoukihda me re pahn “sohsohki sampah.”​—Mel. 37:8-10, 29.

9. (a) Ia wehwehn Sises eh mahsanih me irail me mpahi kan pahn “sohsohki sampah”? (b) Dahme kahrehda “irail me uhdahn inengieng me pwung” kak pereperen?

⁹ Ia wehwehn Sises eh mahsanih me irail me mpahi kan pahn “sohsohki sampah”? Me keidi kan pahn sohsohki sampah ahnsou me irail pahn kaunda sampah nin duwen nanmwarki oh samworo kei. (Kaud. 20:6) Aramas rar rar teikan me sohte ahneki koapworopwor en kohdahla nanleng pahn sohsohki sampah ni Koht eh pahn ketin mweidohng irail en mihmi kohkohlahte powe. Irail pahn unsekla oh pahn ahneki popohl oh nsenamwahu. Irail pwukat oh pil me keidi kan iei irail kohte me Sises mahsanih: “Meid pai irail me uhdahn inengieng me pwung.” (Mad. 5:6) Arail inengieng me pwung pahn kaitarala ni ahnsou me Siohwa pahn ketikihsang me suwed koaros. (2 Pit. 3:13) Eri, aramas pwung kan pahn pereperen oh sohte pahn pwurehng mwahiei pwehki wiewia suwed kan.​—Mel. 37:17.

10. Ia wehwehn en kasalehda kadek kalahngan?

¹⁰ “Meid pai irail me kin kadek kalahngan, pwe re pahn diar kadek kalahngan.” (Mad. 5:7) Kadek kalahngan kin wehwehki en kasalehda limpoak, kadek, oh nsenohki pepehm en meteikan, de poakehla irail kan me kin lokolok. Ahpw kadek kalahngan kin pidada laudsang ihte pepehm ehu. Paipel padahngki me kadek kalahngan kin pidada en wiewia soahng kan pwehn sewese meteikan.

11. Dahme karasaras en ohlen Sameriao padahkihong kitail?

¹¹ Wadek Luk 10:30-37. Sapwellimen Sises karasaras en ohlen Sameriao kawehwehda mwahu wehwehn kasalehda kadek kalahngan. Ohlen Sameriao uhdahn kasalehda pepehm en nsenoh oh poakehla, oh met kamwakid ih en sewese ohl me wie lokoloko. Mwurin Sises eh ketikihda karasaras wet, e mahsanih: “Kohwei oh wia duwehte.” Eri kitail kak pein idek rehtail: ‘I kin wiewia dahme ohlen Sameriao wia? Ni meteikan ar kin lokolok, I kin kasalehda kadek kalahngan ong irail? I kak wia laudsang me I kin wia pwehn sewese irail? Karasepe, I kak sewese me mah kan nan mwomwohdiso, liohdi kan, de seri kan me arail pahpa nohno sohte kin papah Siohwa? I kak “kaloalamwahwih irail me pahtoula” pwehn kansenamwahwihirailla?’​—1 Des. 5:14; Seims 1:27.

12. Dahme kahrehda kitail kin peren ni atail kasalehda kadek kalahngan ong meteikan?

¹² Dahme kahrehda kitail kin peren ni atail kasalehda kadek kalahngan? Ni atail kin  kasalehda kadek kalahngan ong meteikan, kitail kin kihkihwei, oh Sises mahsanih me kihkihwei pahn kahrehiong kitail en peren. Pil ehu kahrepe iei kitail ese me kitail kin kaperenda Siohwa. (Wiewia 20:35; wadek Ipru 13:16.) Nanmwarki Depit ndahki emen me kin kasalehda kadek kalahngan: ‘KAUN-O pahn ketin sinsile ih oh kolokol eh mour; e pahn ketin kaperenihada nan sahpwo.’ (Mel. 41:1, 2) Ma kitail kin kasalehda kadek kalahngan oh nsenohki pepehm en meteikan, kitail pahn pil alehdi sapwellimen Siohwa kadek kalahngan oh pahn peren kohkohlahte.​—Seims 2:13.

13, 14. Dahme kahrehda “irail me nan kapehd mwakelekel” kin peren?

¹³ Sises mahsanih: “Meid pai irail me nan kapehd mwakelekel, pwe re pahn kilang Koht.” (Mad. 5:8) Pwehn ahneki nan kapehd mwakelekel, kitail anahne kolokol madamadau oh ineng me min, de mwakelekel. Met uhdahn kesempwal ma kitail men Siohwa en ketin pwungki atail kin kaudok ong ih.​—Wadek 2 Korint 4:2; 1 Tim. 1:5.

¹⁴ Irail kan me ahneki nan kapehd mwakelekel kak ahneki nanpwungmwahu rehn Siohwa, me ketin mahsanih: “Meid pai irail kan me kamwakeledahr arail likou reirei.” (Kaud. 22:14) Ia wehwehn arail “kamwakeledahr arail likou reirei”? Ong Kristian keidi kan, met wehwehki me Siohwa kin ketin kilangwohng irail me irail mwakelekel, e pahn ketikihong irail mour nanleng me sohte kak ohla, oh re pahn pil ahneki nsenamwahu unsek kohkohlahte. Ong pokon kalaimwuno me ahneki koapworopwor en mour nin sampah, met wehwehki me Siohwa ketin mweidohng irail en wia kompoakepah pwehki e ketin kilangwohng irail nin duwen aramas pwung kei. Paipel mahsanih me “re kamwakelekidahr arail likou reirei kan oh wiahiong en pwetepwetkihla ntahn Sihmpwulo.”​—Kaud. 7:9, 13, 14.

15, 16. Ia duwen irail kan me nan kapehd mwakelekel ar kak “kilang Koht”?

¹⁵ Siohwa ketin mahsanih: “Sohte aramas emen kak kilang ie ahpw momour.” (Eks. 33:20) Eri, ia duwen irail me nan kapehd mwakelekel ar kak “kilang Koht”? Lokaiahn Krihk me kawehwehdi ong “kilang” kak wehwehki en medewehla, en wehwehki, en ese. Eri en “kilang Koht” kin wehwehki en wehwehki soangen Koht dah men ih oh poakohng sapwellime irair kaselel kan. (Ep. 1:18) Sises ketin kahlemengih ni unsek sapwellimen Koht irair kaselel kan, kahrehda e kak mahsanih: “Mehmen me kilangieier pil kilangehr Sahm.”​—Sohn 14:7-9.

¹⁶ Patehng met, kitail kin “kilang Koht” ni atail kilang ia duwen eh kin ketin sewese kitail nan atail mour. (Sohp 42:5) Kitail pil kak “kilang,” de medemedewe, soahng kaselel kan me Siohwa ketin inoukihda en wiahiong irail kan me kin kolokol nan kapehd mwakelekel oh loalopwoatohng  ih. Oh irail me keidi kan pahn uhdahn kilang Siohwa ni ahnsou me re pahn iasada oh kohdahla nanleng.​—1 Sohn 3:2.

17. Dahme kahrehda irail kan me kin wiahda popohl kin peren?

¹⁷ Mwurin met, Sises mahsanih: “Meid pai irail me kin wiahda popohl.” (Mad. 5:9) Ni atail kin tiengla mwowe oh wiahda popohl rehn meteikan, kitail kak peren. Wahnpoaron Seims ntingihedi: “Irail kan me kin wiahda popohl pahn kamwarak nan irair en popohl oh dolung wahn pwung.” (Seims 3:18) Eri ma ke nannanti en ahneki nanpwungmwahu rehn emen nan mwomwohdiso de nan omw peneinei, peki rehn Siohwa en ketin seweseiuk en wia emen me kin wiahda popohl. Eri Siohwa pahn ketikihong uhk sapwellime manaman, oh manaman wet pahn seweseiuk en kasalehda irair kaselel kan en Kristian, oh ke pahn pil peren. Sises ketin kasalehda uwen kesempwal en tiengla mwowe oh wiahda popohl ni eh mahsanih: “Eri, ma ke pahn wahla omw meirong pohn pei sarawi ehu oh wasao ke ahpw tamanda me riomw men nsensuwed pahmw, pwilikihdi omw meirong mwohn pei sarawio, oh kohwei. Keieu wiahda popohl rehn riomwo oh mwuri pwurodo oh wia omw meirong.”​—Mad. 5:23, 24.

18, 19. Dahme kahrehda Kristian kan kak peren mehnda ma re lelohng kalokolok?

¹⁸ “Meid pai kumwail ni aramas ar kin kauwe kumwail oh kaloke kumwail oh kinehda soangen suwed koaros duwen kumwail pwehki ngehi.” Ia wehwehn mahsen pwukat? Sises pil mahsanih: “Kumwail perenda oh nsenamwahula mehlel, pwe ketingpamwail me laud nanleng, pwe ih pil duwen arail kin kaloke soukohp ko mwohmwail.” (Mad. 5:11, 12) Ni wahnpoaron ko ar lelohng kamakam oh ale kehkehlik en dehr kalohk, “irail eri pedoisang nan Sanedrin, pereperen.” Mehlel, re sohte perenki ale kamakam. Ahpw re peren “pwehki arail ale pwais kaselel en mwamwahlla” pwehki mwaren Sises.​—Wiewia 5:41.

¹⁹ Rahnwet, sapwellimen Siohwa aramas akan pil kin dadaur ni peren ni arail lelohng kalokolok pwehki arail kin papah ih. (Wadek Seims 1:2-4.) Duwehte wahnpoaron ako, kitail sohte kin perenki lelohng lokolok de ale kalokolok. Ahpw ma kitail kolokolte atail lelepek ong Siohwa, e pahn ketikihong kitail eimah me kitail anahne pwehn dadaur. Medewehla dahme wiawihong Henryk Dornik oh rie pwutako. Nan August 1944, ira selidi nan imweteng (concentration camp). Irail ko me kaloke ira nda: “Se sohte kak kahrehiong ira en wia mehkot. Ara pahn kamakamala kin wadohng ira peren.” Henryk nda: “I sohte men kamakamala, ahpw en lokolok ni eimah oh wahu pwehki ei loalopwoatohng Siohwa, met kin wadohng ie peren.” E pil nda: “Ei kapakap ni ngidingid kin kahrehiong ie en karanihala Siohwa, oh e ketin kadehdehda me ih Sounsawas men me I kak likih.”

20. Dahme kahrehda kitail kin perenki papah “Koht me peren”?

²⁰ Ni Siohwa, “Koht me peren,” eh kin ketin kupwurperenkihda kitail, kitail kak ahneki peren mehnda ma kitail lelohng kalokolok, ma atail peneinei uhwong kitail, ma kitail soumwahuda, de ma kitail mahla. (1 Tim. 1:11) Kitail pil kak peren pwehki kitail uhdahn kamehlele me atail Koht, “me sohte kak ketin likamw,” pahn ketin kapwaiada sapwellime inou tohto kan me kaselel. (Taitus 1:2) Ni ahnsou me Siohwa pahn ketin wia met, kitail uhdahn sohte pahn tamataman kahpwal kan me kitail ahneki ahnsou wet. Ni mehlel, kitail sohte kak uhdahn medewehla ia uwen kaselel en mour nan Paradais oh ia uwen atail pahn peren! Ei, kitail “pahn paiamwahu oh popohl.”​—Mel. 37:11.