1. Soangen sawas dah me riatail lih Kristian kan kin kihda nan sapwellimen Siohwa pwihn, ahpw kahpwal dah kan me tohtohn irail kin lelohng? (Menlau kilang kilel ni kilin Kahn Iroir wet.)

IA UWEN atail kalahnganki me mie riatail lih Kristian tohto nan mwomwohdiso me kin doadoahk laud! Karasepe, irail kin iang pasapeng nan mihting kan oh iang kalohk. Ekei kin iang sawas en apwalih Wasahn Kaudok, oh re kin kasalehda arail nsenohki iengarail Kristian teikan. Ei uhdahn, re kin lelohng kahpwal kan. Ekei kin apwalih arail pahpa de nohno kan me mahlahr. Ekei kin lelohng uhwong kan sang peneinei. Oh pil ekei wia nohno kiripw kei me kin doadoahk laud pwehn apwalih neirail seri kan.

2. Dahme kahrehda kitail anahne nantihong en kin utung riatail lih Kristian kan?

² Dahme kahrehda kitail anahne utung riatail lih Kristian kan? Pwehki wiewiahn sampah sohte kin kalapw kihong lih akan wahu me re warohng en ale. Pil patehng, Paipel kin kangoange kitail en kin utung irail. Karasepe, wahnpoaron Pohl peki rehn mwomwohdiso en Rom ren kasamwo Pihpe oh “kihong ih soangen sawas sohte lipilipil me e anahne.” (Rom 16:1, 2) Ni ahnsou me Pohl wia Parisi men, e wia kisehn pwihn en aramas me kin kamehlele me lih akan sohte katepe oh kin wiahiong irail met. Ahpw, mwurin eh wiahla emen Kristian, e kin kahlemengih Sises oh kin kadek oh wauneki lih akan.​—1 Kor. 11:1.

3. Ia sapwellimen Sises wiewia ong lih akan, oh ia duwen eh kin ketin kilengwohng lih akan me kin wia kupwuren Koht?

³ Sises kin ketin wauneki lih koaros. (Sohn 4:27) E sohte kin ketin kilengwohng lih akan duwehte me kaunen mehn Suhs ko ni eh mwehio kin wia. Ni mehlel, ehu dikseneri en Paipel koasoia: “Sohte pak ehu me Sises mahsanih mehkot me sohte kasalehda wahu ong lih akan.” Ahpw, Sises kin ketin kasalehda wahu tohrohr ong lih akan me kin wia kupwuren Semeo. E ketin ekerkin irail rie lih oh me irail iangete ohl ako me e ketin wiahki kisehn sapwellime peneinei.​—Mad. 12:50.

4. Dahme kitail pahn koasoipene nan iren onop wet?

 ⁴ Sises kin ahnsou koaros ketin onopada pwehn sewese lih akan me kin papah Koht. E ketin kasalehiong irail me re kesempwal ong ih oh ketin uhkin irail. Kitail pahn koasoiapene ia duwen atail kak alasang Sises oh kasalehda atail nsenohki riatail lih Kristian kan.

5. Dahme kahrehda ekei lih Kristian kin apwalki diar werek mwahu me re anahne?

⁵ Kitail koaros, lih oh ohl Kristian, anahne wia werek mwahu ong emenemen. Ahpw, ekei pak lih Kristian kan kin apwalki diar soangen werek mwahu me re anahne. Dahme kahrehda? Tehk dahme ekei koasoia. Emen sister me adaneki Jordan * nda, “Pwehki I sohte pwopwoud, I kin kalapw medewe me sohte ei pwukoa nan mwomwohdiso oh I sohte uhdahn wia kisehn mwomwohdiso.” Kristen, pioneer men me keseula ehu wasa pwehn kalaudehla eh doadoahk en kalohk nda, “Ni omw kin ahpwtehn keseula nan ehu mwomwohdiso, ele ke kin pehm me ke kelekelehpw.” Ekei riatail ohl Kristian kan ele kin ahneki soangen pepehmohte. Irail kan me kin mi rehn arail peneinei me kaidehn Sounkadehdehn Siohwa kei ele pehm me re mwomwen tohrohrasang irail oh pil ni ahnsowohte pehm me re kin kelekelehpw nan mwomwohdiso. Ekei lih Kristian kan kin ele pehm me re kelekelehpw pwehki ar soumwahu oh sohte kak kohkohsang imwarail, de pwehki re anahne apwalih tohn arail peneinei me soumwahu. Annette koasoia, “I sohte kak kohla iang werekiong riei Kristian kan pwehki ngehi me kin apwalih ei nohnohu.”

6. Dahme kitail kak sukuhlki sang Luk 10:38-42 duwen Sises eh ketin sewese Mery oh Marda?

⁶ Sises kin ketin werekiong lih akan me kin papah Koht, oh ketin wia kompoakparail mwahu men. Medewehla eh nanpwungmwahu rehn Mery oh Marda, me wia lih kiripw kei. (Wadek Luk 10:38-42.) Sang sapwellime mahsen oh wiewia, Sises sohte kin ketin kahrehiong ira en soansuwedda ni ara kin mi reh. Karasepe, Mery sohte per ni eh mwohndi ni aluweluwen Sises ko. * Oh ni Marda eh pwunodkihda Mery eh sohte sewese ih kaunopada mwenge, e sohte suwedki patohwanohng Sises eh madamadau. Erein arail mihmihpene ahnsowo, Sises ketin sewese lih riemen pwukat en esehda ire kesempwal ehu. Oh e ketin kasalehda me e nsenohki lih riemeno oh riara ohlo, Lasarus, sang ni eh ketin mwemweitla rehrail ekei ahnsou. (Sohn 12:1-3) Eri ni ahnsou me Lasarus soumwahuda, Mery oh Marda ese me Sises pahn ketin sewese ira.​—Sohn 11:3, 5.

7. Ia ehu ahl me kitail kak kangoange riatail lih Kristian kan?

⁷ Ong ekei lih Kristian kan, mihting kin wia ahnsou mwahu ong irail en werekiong iangarail tohnkaudok kan. Eri kitail men doadoahngki soangen ahnsou ko en kasamwo irail, koasoiong irail, oh kasalehda atail nsenohkin irail. Jordan, me kitail koasoiapene mwoweo, nda, “E uhdahn kangoange ie ni ahnsou me meteikan kin kapingahki ei pasapeng kan nan mihting, koasoanehdi en iang ie kalohk, de kasalehda arail nsenohkin ie ni soangen ahl kei.” Kitail anahne kasalehiong riatail lih Kristian kan me irail kesempwal ong kitail. Kia nda, “Ma I sohte iang ehute mihting, I ese me ekei pahn textih ie oh idek ma I mwahu. Met kasalehiong ie me riei Kristian kan kin nsenohkin ie.”

8. Ni ahl dah teikan me kitail kak kahlemengih Sises?

⁸ Duwehte Sises, kitail kak wiahda ahnsou pwehn werekiong riatail lih Kristian kan. Ele kitail kak luke iraildo ni imwatail ong kisin mwenge de ong mwemweit. Ni atail wia met, kitail  anahne tehk mwahu me dahme kitail kin nda kin kangoange irail. (Rom 1:11, 12) Elder kan anahne ahneki soangen madamadauohte me Sises sapwellimanki. Sises mwahngih me en wia emen me kiripw pahn kakete apwal ong ekei. Ahpw e ketin kasalehda ni sansal me en emen eh peren mehlel sohte pahn kohsang eh pwopwoudida de naineki seri. (Luk 11:27, 28) Peren mehlel kin kohsang omw kin mwohneki mahs sapwellimen Siohwa doadoahk.​—Mad. 19:12.

9. Dahme elder kan kak sewesehki lih Kristian kan?

⁹ Elder kan anahne wiahki lih Kristian kan duwehte riarail de inarail me kin papah Siohwa. (1 Tim. 5:1, 2) Elder kan kin pweida ni ar kin wiahda ahnsou pwehn koasoiong riarail lih Kristian kan mwohn de mwurin mihting kan. Kristen nda: “Emen elder tehkada me I kin uhdahn kedirepw oh men ese ia mwomwen ei koasoandi. I uhdahn kalahnganki eh nsenoh.” Ni ahnsou me elder kan kin kaukaule wiahda ahnsou pwehn koasoiong riarail lih Kristian kan, re kasalehda me irail kin nsenohkin irail. * Annette me kitail koasoiapene mwoweo, kasalehda ehu kahrepen e mwahu en kaukaule koasoiong elder kan. E nda: “I kin esehla mwahu irail, oh irail kin eseiehla. Eri, ni ahnsou me mie ei kahpwal, e kin mengeiong ie en peki sawas rehrail.”

10. Dahme kak sewese lih Kristian kan en ahneki peren?

¹⁰ Kitail koaros, ohl oh lih, kin pweida mwahu ni meteikan ar kin pohnese atail koahiek kan oh kalahnganki doadoahk me kitail kin wia. Ahpw, ma sohte me kin kalahnganki mwomwen atail kin doadoahngki atail koahiek de doadoahk me kitail wiahda, kitail kin mworusala. Abigail, pioneer men me sohte pwopwoud, nda me ekei pak e pehm me sohte me kin pohnese ih. E nda: “Aramas sohte uhdahn ese ie. Re esehte riei ko de ei pahpa nohno oh me I peneineiki irail. Ekei pak I kin pehm me sohte me kin tehk ie.” Ahpw tehk dahme emen sister me adaneki Pam nda. Nin doken eh wiahte emen me kiripw, e kin papah nin duwen misineri men erein sounpar tohto. Kedekedeo, e pwurala imweo pwehn apwalih eh pahpao oh eh nohnou. Met e sounpar 70 samwa, oh wiahte emen pioneer. Pam nda: “Dahme kin keieu sewese ie iei ni ahnsou me meteikan kin ndahng ie me re kalahnganki dahme I kin wia.”

11. Ia duwen Sises eh ketin kasalehda me e ketin kalahnganki lih akan me kin iang ih kalohk?

¹¹ Lih lelepek kan kin papah Sises “sang ni ar doadoahngki ar dipwisou kan” oh e kin uhdahn ketin kalahnganki arail sawas. (Luk 8:1-3) E sohte ketin mweidohngete irail en ahneki pwais kaselel en papah ih ahpw e pil ketin padahkihong irail padahk kesempwal kan duwen kupwuren Koht. Karasepe, e ketin padahkihong irail me e pahn ketin pwoula oh iasada. (Luk 24:5-8) E ketin kaunopada lih pwukat, duwehte me e ketin wiahiong wahnpoaron ko, ong kahpwal kan me re pahn lelohng. (Mark 9:30-32; 10:32-34) Oh pil ni wahnpoaron ko ar tangasang Sises ahnsou me e ketin selidi, ekei lih ako me kin sewese ih mihte reh ni eh pahn kereniong pwoula ni tuhkehn kalokoloko.​—Mad. 26:56; Mark 15:40, 41.

12. Doadoahk dah me Sises ketikihong lih akan?

¹² Mie doadoahk kesempwal me Sises ketikihong lih akan. Karasepe, lih ako me kin papah Koht me tepin kadehdehda sapwellime iasada. E mahsanihong lih pwukat ren padahkihong wahnpoaron ko me e ketin iasadahr sang mehla. (Mad. 28:5, 9, 10) Ele lih akan pil mi mwo ni ahnsou me tohnpadahk ko keikihdi sapwellimen Koht manaman ni Pendekos pahr 33. Ma ei, ele irail pil iang alehdi manaman kapwuriamwei en lokaiahki soangsoangen lokaia kan oh padahkihong meteikan duwen “sapwellimen Koht doadoahk kapwuriamwei kan.”​—Wiewia 1:14; 2:2-4, 11.

13. Dahme lih Kristian kan kin wiewia rahnwet, oh ia duwen atail kak kasalehda atail kalahnganki dahme re kin wia?

¹³ Riatail lih Kristian kan konehng en ale kaping pwehki soahng koaros me re kin wia nan sapwellimen Siohwa doadoahk. Doadoahk wet kin pidada kauwada oh pil apwalih wasahn kaudok kan. Re kin iang pwihn kan me kin doadoahngki ehu lokaia tohrohr kalohk, oh iang sawas nan Pedel kan. Re kin iang sawas kamwahwihala wasa kan me melimel de kahpwal teikan kauwehla, sawas kawehwehdi neitail sawaspen Paipel kan, oh papah nin duwen pioneer oh misineri kan. Duwehte brother kan, riatail lih Kristian kan kin iang sukuhl en pioneer, Sukuhl ong Sounkalohki Wehio kan, oh Sukuhl en Kilead. Pil patehng, irail kin sewese arail pwoud kan en kak kapwaiada arail pwukoa kan koaros nan mwomwohdiso oh pil nan sapwellimen Siohwa pwihn. Brother pwukat wia “kisakis kei” oh kin wia soahng tohto pwehn sewese meteikan. Ahpw e pahn uhdahn apwal ren wia met ma arail pwoud kan sohte utung irail. (Ep. 4:8) Ke kak medewe ahl akan pwehn utung riatail lih Kristian pwukat nan doadoahk me re kin wia?

14. Pwehki dahme Melkahka 68:11 mahsanih, dahme elder kan me ahneki erpit kin wia?

¹⁴ Elder kan me ahneki erpit kin wehwehki me riatail lih Kristian kan wia tohndoadoahk “ngeder” kei me kin perenki doadoahk oh me kin  kalapw wia sounkalohk uhdahn koahiek kei en rongamwahwo. (Wadek Melkahka 68:11.) Eri elder kan kin rapahki ahl akan pwe ren paiekihda arail koahiek. Abigail, me kitail koasoiapene mwoweo, kin kalahnganki ni brother kan ar kin idek reh dahme e diarada me mwahu ong en tapiada koasoi ong aramas nan wasahn kalohk. E nda, “Met kahrehiong ie en kilang me mie doadoahk kesempwal me Siohwa ketikihong ie en wia nan sapwellime pwihn.” Pil patehng, elder kan kin pohnese me lih mah lelepek kan kin koahiek en sewese riatail lih Kristian pwulopwul kan nan ar kahpwal. (Taitus 2:3-5) Ei, e uhdahn konehng kitail en poakohng oh kalahnganki riatail lih Kristian kan!

15. Ahnsou dah kan me sister kan ele anahne emen en uhki irail?

¹⁵ Ekei pak, riatail lih Kristian kan anahne emen en uhki irail ni ahnsou me re kin lelohng kahpwal tohrohr ehu. (Ais. 1:17) Karasepe, riatail liohdi de riatail lih Kristian men me mweisang eh pwoudo kakete anahne emen en wia wiliepe de koasoiki ih oh sewese apwalihala ekei pwukoa kan me mwoweo eh pwoudo kin wia. Sister mah men ele anahne sawas pwehn koasoiong toahkte kan. De pioneer sister men me kin wia ekei doadoahk nan sapwellimen Siohwa pwihn ele anahne emen en uhki ih ma meteikan kauwe pwehki eh sohte kin kalapw iang kalohk duwehte me pioneer teikan kin wia. Ia duwen atail pil kak sewese riatail lih Kristian kan? Kitail pahn pil pwurehng koasoiapene sapwellimen Sises mehn kahlemeng.

16. Nin duwen me kileldi nan Mark 14:3-9, ia duwen Sises eh ketin uhki Mery?

¹⁶ Sises kin ketin mwadang en uhki rie lih kan me kin papah Koht ni meteikan ar sohte wehwehki irail. Karasepe, e ketin uhki Mery ni ahnsou me Marda kauwe ih. (Luk 10:38-42) Oh e pil pwurehng ketin uhki Mery ni ahnsou me meteikan kauwe pwehki ar medewe me e wiahda pilipil sapwung. (Wadek Mark 14:3-9.) Sises mwahngih en Mery mwekid oh kapingahki ih, mahsanih: “E wiahiong ie mehkot mwahu. . . . E wiahdahr uwen me e kak.” E pil ketin kohpada me en Mery eh kadeko pahn lohkseli “wasa koaros me rongamwahu pahn lohkseli ie nin sampah pwon,” duwehte dahme iren onop wet wiewia ahnsou wet. E kapwuriamwei me Sises mahsanih me rongamwahwo pahn lohkseli nan sampah pwon ni eh ketin kapingahki ahn Mery wiewia kadeko! Ia uwen eh mahsen ko kakehlakahda Mery mwurin meteikan ar kadeik ih ni sapwung!

17. Menlau kihda ehu karasaras ong iahd me kitail kakete koasoiki emen sister.

¹⁷ Ke kin koasoiki riomw lih Kristian kan ni ahnsou me irail anahne? Tehk karasaras wet. Ekei sounkalohk kan kilang me emen sister me eh pwoudo kaidehn emen Sounkadehde kin kalapw pwand en kohdo ni mihting kan oh kin mwadang en kohkohla mwurin mihting. Re kin tehk me e sohte kin kalapw kahre nah seri ko. Eri irail kauwe pwehki re medewe me e anahne ngihtehtehkiong eh pwoudo en mweidohng en wahda nah seri ko en iang mihting. Ahpw dahme re sohte pohnese iei me sistero kin wiewia uwen eh kak koaros. E sohte kak uhdahn kaunda ni unsek eh koasoandi kan; oh kaidehn ih me kin uhdahn wiahda koasoandi kan ong nah seri ko. Dahme ke kak wia ma ke rong meteikan kauwe emen sister ni soangen ahl wet? Ma ke kapingahki sistero doadoahk laud koaros me e kin wia, ke kakete kauhdi meteikan sang arail kauwe ih.

18. Ni ahl dah teikan me kitail kak sewese riatail lih Kristian kan?

¹⁸ Kitail kak kasalehiong riatail lih Kristian kan uwen atail nsenohkin irail sang ni atail kihda sawas me anahn. (1 Sohn 3:18) Annette, riatailo me kin apwalih eh nohnou me soumwahu, nda: “Ekei kompoakepahi kan pahn kin kohdo  oh uhd apwalih ei nohnou erein ahnsou kis, de wahdo mwenge. Met kahrehda ien pehm me re poakohng ie oh me I wia kisehn mwomwohdiso.” Jordan pil alehdi sawas. Brother men sewese ih en esehla kamwahwihala were sidohsao. E nda: “E mwahu en ese me riei Kristian kan kin nsenohkin ie oh men ien dehr lelohng keper ni ei tangahki werei sidohsao.”

19. Ni ahl dah teikan me elder kan kak sewese lih Kristian kan?

¹⁹ Elder kan pil kin song en apwalih anahn en lih Kristian kan. Irail ese me Siohwa ketin kupwurki ren kadekohng lih Kristian kan. (Seims 1:27) Eri elder kan kin alasang Sises oh kin toupahrek. Irail kak wia met sang ni arail en dehr wiahda kosonned kan ni ahnsou me e pahn konehngete en kasalehda kadek oh wehwe. (Mad. 15:22-28) Elder kan me kin tiengla mwowe pwehn kihda sawas kin sewese lih Kristian kan en pehm me Siohwa oh sapwellime pwihn kin poakohng irail. Ni sounapwalih en pwihnen kalohk me Kia kin iango eh esehda me Kia pahn keseula ehu wasa, e mwadangete wiahda koasoandi pwe meteikan en iang sawas. Kia nda, “Met uhdahn katikala ei pwunod. Sang arail lokaiahn kangoang oh sawas mwahu kan, elder ko kasalehiong ie ni sansal me I kesempwal nan mwomwohdiso oh I sohte kin kelehpw ni ahnsou me I kin mihla nan irair apwal ehu.”

20-21. Ia duwen atail kak kasalehda me kitail kin poakohng riatail lih Kristian kan koaros?

²⁰ Ni atail kin kilangseli nan atail mwomwohdiso kan rahnwet, kitail kin kilang karasaras tohto en riatail lih Kristian pwerisek kan me warohng ale atail sawas. Nin duwen me kitail sukuhlkiher sang sapwellimen Sises mehn kahlemeng, kitail kak sewese irail sang ni atail kin werekiong irail oh eseirailla. Kitail kak kasalehda atail kalahnganki dahme re kin wia nan sapwellimen Koht doadoahk. Oh kitail kak uhkin irail ni ahnsou me anahn.

²¹ Ni kaimwiseklahn nah kisinlikowo ong mehn Rom kan, wahnpoaron Pohl koasoia ni oaritik duwen lih Kristian duwemen. (Rom 16:1, 3, 6, 12, 13, 15) Lih pwukat uhdahn alehdi kangoang ni ar rong eh rahnmwahwih oh kapinga irail. Kitail pil anahne utung riatail lih Kristian kan koaros nan atail mwomwohdiso. Ni atail wia met, kitail kasalehda me kitail kin poakohng irail oh wiahkin irail atail peneinei.