1-2. (a) Nin duwen me Lepin Padahk 16:31 mahsanih, ia duwen atail pahn kilengwohng riatail Kristian mah kan? (b) Peidek dah kan me kitail pahn sapengala nan iren onop wet?

MIE wasahn mwemweit ehu nan Arkansas nan Wehin Amerika me ke kak diar daimon nan pwehlo. Ahpw, daimon pwukat saikinte kamwakelda mwahu pwehn netila. Kahrehda, me tohto me kin alu wasao sehse me daimon kei mwo oh kin alu daulih.

² Duwehte daimon ko, riatail Kristian mah kan uhdahn kesempwal. Mahsen en Koht kapahrekiong arail moangepwet kapwat lingan ehu. (Wadek Lepin Padahk 16:31; 20:29) Ahpw kitail kakete sohte pohnese irail me kesempwal pwukat. Ni me pwulopwul kan ar wehwehki me me mah kan kesempwal, irail kin alehdi soahng ehu me kesempwal sang en kepwehpwehla. Nan iren onop wet, kitail pahn sapengala peidek siluh: Dahme kahrehda Siohwa ketin wiahki me mah lelepek kan aramas kesempwal kei? Dahme kahrehda riatail Kristian mah kan kin kesempwal nan sapwellimen Siohwa pwihn? Dahme kitail kak sukuhlkihsang arail mehn kahlemeng?

3. Nin duwen me Melkahka 92:12-15 mahsanih, dahme kahrehda me mah lelepek kan kesempwal ong Siohwa?

³ Siohwa Koht kin ketin kesempwalki me mah lelepek kan. E ketin mwahngih dahme uhdahn mi loalarail, oh ketin mwahngih oh kesempwalki arail irair kaselel kan. E kin ketin kupwurperenki ni me mah kan ar kin ehukihong me pwulopwul kan soangen erpit me re alehdi sang ni arail kin papah Koht ni lelepek erein sounpar tohto. (Sohp 12:12; Lep. Pad. 1:1-4) Siohwa pil kin ketin kesempwalki arail kin dadaurete. (Mal. 3:16) Mie arail kahpwal kan nan arail mour, ahpw re kin kolokolete  arail pwoson Siohwa. Arail koapworopwor ong ahnsou kohkohdo kehlailsang ni arail tepin esehla padahk mehlel. Oh Siohwa ketin poakohng irail pwehki re kin pousehlahte kalohki mwareo “ni ar mahlahr.”​—Wadek Melkahka 92:12-15.

4. Dahme kak kangoange riatail Kristian mah kan?

⁴ Ma ke mahmahla, kamehlele me Siohwa ketin tamataman doadoahk me ke wiadahr mahso. (Ipru 6:10) Ke kin ngoangki utung doadoahk en kalohk, oh met kin kaperenda Samatailo nanleng. Ke kin dadaur pahn kahpwal kan, pil iangahki kahpwal kan me kin uhdahn kansensuwedihiukala. Ke kin peikiong oh uhki koasoandi pwung kan en Paipel, oh ni lelepek, apwalih pwukoa kesempwal kan nan sapwellimen Siohwa pwihn oh kaiahne meteikan. Ke wia uwen omw kak en peipeian wekidekla tohto nan sapwellimen Siohwa pwihn. Ke kin utung oh kangoange meteikan me kin kihong pali laud en arail ahnsou nan doadoahk en kalohk. Siohwa Koht uhdahn ketin poakohng uhk pwehki omw loalopwoat. E ketin inoukihda me e “sohte kin likidmeliehla sapwellime aramas loalopwoat akan.” (Mel. 37:28) E ketin inoukihong uhk me e ‘pahn kin apwahpwalih iuk lao ke likeilapala oh moangepwetala.’ (Ais. 46:4) Eri dehr kin medewe me pwehki ke mahlahr, ke solahr kesempwal nan sapwellimen Siohwa pwihn. Ke uhdahn kesempwal!

5. Ire dahieu me me mah kan anahne tamataman?

⁵ Me mah kan kak kihda sawas ni ahl tohto nan sapwellimen Siohwa pwihn. Mendahki irail ele sohte kehlail duwehte mahso, irail ahneki soangen koahiek tohto me re sukuhlki sangete mahs kohdo. Siohwa kak pousehlahte ketin doadoahngkin irail ni ahl tohto, duwehte dahme mehn kahlemeng en mahso oh met kasalehda.

6-7. Menlau kihda karasaras en me mah kan nan Paipel me Siohwa ketin kapaiahda pwehki ar kin papah ih ni loalopwoat.

⁶ Kitail kak diarada mehn kahlemeng mwahu kan nan Paipel duwen irail me lelepek kan me kin papahte Siohwa ni arail mahlahr. Karasepe, Moses kereniong sounpar 80 de daulih ni eh tepida papah Siohwa nin duwen soukohp  oh wiliepen Israel. Ni Daniel eh sounpar 90 samwa, Siohwa ketin doadoahngkihte ih nin duwen soukohp men. Oh wahnpoaron Sohn ele sounpar 90 samwa ni ahnsou me Koht ketin doadoahngki ih en ntingihada pwuhken Kaudiahl.

⁷ Mie me lelepek tohto teikan me aramas sohte nohn ese duwen irail, oh ele re kakete pohnsehsehla irail. Ahpw, Siohwa kin ketin mwahngih duwen irail oh kin ketin katingih irail pwehki arail loalopwoat. Karasepe, Paipel sohte nohn koasoia duwen ohl ‘pwung oh poadidio’ Simion. Ahpw, Siohwa ketin mwahngih duwen ihs ih oh ketikihong ih pwais kaselel en kilang seri pwelelo Sises oh kohpada duwen serio oh eh nohnou. (Luk 2:22, 25-35) Pil medewehla duwen liohdi soukohpo Ana. E sounpar 84 ahpw e kin “ahnsou koaros kohla ni tehnpas sarawio.” Siohwa ketin kapaiahda ih pwehki e kin kaukaule kohla ni tehnpas sarawio oh e ketin mweidohng ih en kilang seri pwelelo Sises. Siohwa kin uhdahn ketin kesempwalki Simion oh Ana.​—Luk 2:36-38.

8-9. Soangen sawas dah me liohdi kan kin pousehlahte wiahda?

⁸ Nan atail ahnsou, mie me mah lelepek tohto me kin wia mehn kahlemeng mwahu ong me pwulopwul kan. Medewehla mehn kahlemeng en Sister Lois Didur. E sounparte 21 ni ahnsou me e tepida papah nin duwen pioneer tohrohr men nan Canada. Mwurin mwo, ih oh eh pwoudo John wia pwukoahn sounapwalih me kin seiloak erein sounpar tohto. Mwuhr, ira kin papah nan Pedel en Canada daulih sounpar 20. Ni ahnsou me Lois sounpar 58, ih oh John alehdi luhk en kohla papah nan Ukraine. Dahme ira pahn wia? Ira pahn medewe me ira nohn mahla pwehn papah nan ehu sahpw tohrohr? Soh, ira ale pwukoau, oh John idihdida en iang Pwihn me Kin Apwalih Ohpis en Sounkadehdehn Siohwa kan wasao. Sounpar isuh mwurin mwo, John mehla, oh Lois pilada en mihmihte wasao. Met, Lois sounpar 81, e kin papahte Siohwa ni lelepek nan Pedel en Ukraine oh irail kin uhdahn poakohng ih.

⁹ Ele meteikan sohte kin nohn tehk liohdi kan me duwehte Lois mwurin arail pwoud kan mehla, ahpw liohdi pwukat uhdahn kesempwalte. Siohwa kin ketin kesempwalki sister kan me kin utung arail pwoud erein sounpar tohto, oh ahnsou wet kin pousehlahte papah ih ni loalopwoat. (1 Tim. 5:3) Patehng met, irail wia mehn kahlemeng mwahu ong me pwulopwul kan.

10. Mehn kahlemeng mwahu dah me Tony wiahda?

¹⁰ Me mah lelepek tohto me kin mi nan wasahn me mah pil kesempwal. Karasepe, brother men me adaneki Tony kin mi nan soangen wasa ko ahnsou wet. E papidaisla nan Pennsylvania, Wehin Amerika nan August 1942 ni eh sounpar 20. Mwurinte eh papidaisla, koperment en wasao padahkihong ih en iang  sounpei. Pwehki eh sohte dukiong, e selidi erein sounpar riau elep. Ih oh eh pwoudo Hilda apwalihada seri riemen nan padahk mehlel. Nan sounpar ko, Tony papahier nan mwomwohdiso siluh nin duwen soun koasoanehdi pwihn en elder kan oh sounapwalih en mihting tohrohr kan. E kin wia padahk en mihting kan oh wia onop en Paipel nan imweteng. Met e sounpar 98, ahpw e sohte uhdihsang papah Siohwa. E kin doulahte wia uwen eh kak en iang ienge Kristian kan nan eh mwomwohdisou papah Siohwa!

11. Ia duwen atail kak kasalehda me kitail kesempwalki irail kan me kin mi nan wasahn me mah kan?

¹¹ Ia duwen atail kak kasalehda atail wauneki me mah kan me kin mi nan wasahn me mah kan? Ma kak, elder kan kak sewese irail en iang de rong mihting kan oh kalohk. Kitail kak kasalehda atail nsenohkin irail sang ni atail mwemweitla rehrail de koasoiong irail nan video chat. Kitail men uhdahn tehk mwahu me mah kan me ele kin mi soangen wasa pwukat me dohsang arail mwomwohdisou. Kitail anahne kanahieng en dehr manokehla me mah pwukat. Ekei irail ele apwalki de sohte medewe me e konehng en koasoia duwen irail. Ahpw, kitail pahn uhdahn paiekihda ma kitail wiahda ahnsou en idek rehrail peidek oh rong ni arail koasoia duwen arail peren ni ar kin papah nan sapwellimen Siohwa pwihn.

12. Dahme kitail kak diarada rehn riatail Kristian kan nan atail mwomwohdiso?

¹² Ele kitail pahn pwuriamweikihla atail esehda duwen mehn kahlemeng mwahu en me mah lelepek kan nan atail mwomwohdiso. Sister men me adaneki Harriette, kin papah Siohwa ni lelepek sounpar tohto nan eh mwomwohdisou nan New Jersey, Wehin Amerika. Ih eri keseula oh mihla rehn nah serepeino. Kristian kan nan eh mwomwohdiso kapwo kin wiahda ahnsou pwehn esehla ih, oh irail esehda me mie soahng mwahu tohto me e kak ehukihong irail. E kin kangoange irail sang ni eh koasoiahda eh doadoahk en kalohk ni ahnsou me e tepin esehla padahk mehlel nan 1920 samwa. Ni ahnsou ko, e kin wahda nan piroas ahnsou koaros me e kin kohla kalohk pwe e kakete selidi. Ni mehlel, pak riau nan 1933, e selidi oh mihmihki nan imweteng wihk ehu. Eh pwoudo kaidehn emen Sounkadehdehn Siohwa, ahpw e kin utung ih. Ni ahnsou me Harriette selidi, eh pwoudo kin apwalih neira seri silimeno. Kitail anahne wauneki riatail Kristian mah lelepek kan me duwehte Harriette!

13. Dahme kitail sukuhlki duwen kesempwalpen me mah kan nan sapwellimen Siohwa pwihn?

¹³ Riatail Kristian mah kan uhdahn kesempwal ong Siohwa oh pil nan sapwellime pwihn. Irail kilangehr duwen Siohwa eh kin ketin kapaiahda sapwellime pwihn oh pil irail ni soangsoangen ahl tohto. Re kin sukuhlki mehn kasukuhl kesempwal kan sang sapwung kan me re wiahda. Wiahki irail aramas kei me arail lokaia kak wia “poahsoan en kupwurokong,” oh eri sukuhl sang irail. (Lep. Pad. 18:4) Ma ke pahn wiahda ahnsou en esehla irail, omw pwoson kak kehlailla oh ke pahn sukuhlki soahng tohto!

14. Dahme Deuderonomi 32:7 kangoangehki me pwulopwul kan en wia?

¹⁴ Tiengla mwowe oh koasoiong me mah kan. (Wadek Deuderonomi 32:7.) Ele irail solahr kak kilang mwahu, irail kin alu wawai, oh koasoi ni ngihl tikitik. Ahpw irail men wiahte soahng kei, oh irail wiadahr “adamwahu” rehn Siohwa. (Ekl. 7:1) Tamataman dahme kahrehda Siohwa ketin kesempwalkin  irail. Pousehlahte waunekin irail. Alasang Elisa. Ni kaimwiseklahn rahn me ih oh Elaisa pahn doadoahkpene, e ngihtehtehki me en mihte rehn Elaisa. Pak siluh Elisa nda: “I sohte pahn tohrohrasang uhk.”​—2 Nan. 2:2, 4, 6.

15. Soangen peidek dah kan me kitail kak idek rehn me mah kan?

¹⁵ Kasalehda omw uhdahn nsenohki me mah kan sang ni omw idek peidek rehrail ni kadek. (Lep. Pad. 1:5; 20:5; 1 Tim. 5:1, 2) Idek soangen peidek pwukat: “Ni omw pwulopwulo, dahme kamehlelehiong uhk me ke diaradahr padahk mehlel?” “Ia duwen soahng kan me ke lelohng eh kakerenihiukala rehn Siohwa?” “Dahme seweseiuk en kolokolete omw peren nan sapwellimen Siohwa doadoahk?” (1 Tim. 6:6-8) Kowe eri rong arail koasoiahda koasoipen irail.

16. Ia duwen koasoakoasoipene eh kak wia kamwahu ong me mah oh me pwulopwul men?

¹⁶ Ni me mah men oh me pwulopwul men ara koasoipene, ira koaros pahn paiekihda. (Rom 1:12) Kumwail me pwulopwul kan pahn pil kamehlelehla me Siohwa kin ketin apwalih sapwellime ladu lelepek kan, oh me mah kan pahn pehm me mie me poakohng irail. E pahn pil perenki padahkihong uhk ia duwen Siohwa eh ketin kapaiahda ih.

17. Dahme kahrehda kitail kak nda me me mah lelepek kan kin kaselella nan pahr koaros?

¹⁷ Mwomw mwahu en emen kin sosohrala ni eh mahla, ahpw irail kan me kin loalopwoat ong Siohwa kin kaselella nan pahr koaros. (1 Des. 1:2, 3) Dahme kahrehda met mehlel? Pwehki erein sounpar tohto irail kin mweidohng sapwellimen Koht manaman en kaiahne irail oh sewese irail en kakairada irair kaselel kan. Uwen laud en atail esehla riatail Kristian mah kan, waunekin irail, oh sukuhl sang irail, ih uwen laud en atail pahn kesempwalkin irail!

18. Dahme kitail pahn koasoiapene nan iren onop en mwuhr?

¹⁸ Mwomwohdiso pahn kehlailla kaidehn ihte sang ni me pwulopwul kan ar kesempwalki me mah kan ahpw pil ni me mah kan ar kin kesempwalki me pwulopwul kan. Nan iren onop en mwuhr, kitail pahn koasoiapene ia duwen me mah kan ar kak kasalehda me irail kesempwalki me pwulopwul kan nan mwomwohdiso.