1. Menlau kawehwehda dahme wiawi ni ahnsou me Sises tepin wiahda sapwellime manaman.

 MEDEWEHLA dahme wiawi ni kaimwiseklahn pahr 29 ni ahnsou me Sises ketin tapiada sapwellime doadoahk en kalohk. Sises oh ineo, Mery, oh ekei sapwellime tohnpadahk kan lukohng kamadipw en kapwopwoud ehu nan Kena, kisin kahnimw ehu paliepeng en Nasaret me Sises ketin tikida ie. Mery kompoakepahnki peneineio oh mwein e sewesewese irail kan me kohdo ni kapwopwoudo. Ahpw erein kamadipwo, kahpwal ehu pwarada me kakete kanamenekihala peneineio oh pwopwoud pwulopwulo—wain ko nekila. b Mwein me iang towehda kamadipwo tohtohsang me peneineio kasik. Mery mwadangete kohla rehn nah pwutako oh nda: “Solahr nimarail wain.” (Sohn 2:1-3) Dahme Sises ketin wia? E ketin wia mehkot kapwuriamwei—e ketin wekidala pihl ong “wain mwahu.”—Sohn 2:9, 10.

2-3. (a) Manaman dah kan me Sises ketin wiahda? (b) Ia duwen atail kak paiekihda atail koasoiapene sapwellimen Sises manaman kan?

² Sises ketin wiahda manaman tohto erein sapwellime doadoahk en kalohk. c E ketin doadoahngki sapwellime manaman kapwuriamwei pwehn sewese aramas kidkid kei. Karasepe, nan sapwellime manaman riau kohte—katungoale ohl 5,000 oh mwuri ohl 4,000—ele pidada aramas tohtohsang 27,000 ma kitail  kapatahiong lih oh seri kan me pil iang mi wasao. (Mad. 14:15-21; 15:32-38) Nan ahnsou riau ko, Sises pil ketin kamwahwihala me soumwahu tohto. (Mad. 14:14; 15:30, 31) Medewehla ia uwen pokono ar pwuriamweikihla manaman me Sises ketin doadoahngki pwehn kamwahwihala oh kamwenge irail!

³ Rahnwet, kitail kak sukuhlki soahng tohto sang sapwellimen Sises manaman kan. Nan iren onop wet, kitail pahn koasoiapene ekei mehn kasukuhl me manaman ko kak padahkihong kitail pwehn kalaudehla atail pwoson. Mwuri, kitail pahn koasoiapene ia duwen atail kak alasang sapwellimen Sises aktikitik oh poakehla meteikan ni eh ketin wiahda manaman kan.

4. Sapwellimen Sises manaman kan kin padahkihong kitail duwen ihs?

⁴ Sapwellimen Sises manaman kan sohte kin kihdahte mehn kasukuhl kan duwen ih, ahpw pil duwen Semeo pwehn kakehlaka atail pwoson. Met pwehki Siohwa me kin ketin kahrehda manaman kan en kak wiawi. Wiewia 10:38 padahkihong kitail: “Duwen Koht eh ketin keiekihdi sapwellime manaman oh ketikihong [Sises] kehl, oh e kin ketiketseli nan sahpwo, ketin wiewia me mwahu oh kamwahwihala irail me kin lokolok pahn manaman en Tepil, pwehki Koht kin ketin ieiang ih.” Pil tamataman me soahng koaros me Sises mahsanih oh wiahda—iangahki manaman kan—e kasalehda ni unsek dahme Semeo kin ketin medewe oh pehm. (Sohn 14:9) Tehk mehn kasukuhl siluh me kitail kak sukuhlkihsang sapwellimen Sises manaman kan.

5. Dahme kamwakid Sises en ketin wiahda manaman kan? (Madiu 20:30-34)

⁵ Keieu, Sises oh Semeo uhdahn ketin poakohng kitail. Erein eh ketiket nin sampah, Sises ketin kasalehda uwen laud en sapwellime limpoak ong aramas akan sang ni eh doadoahngki sapwellime manaman kapwuriamwei pwehn sewese irail me lokolok kan. Ehu ahnsowo, ohl maskun riemen peki en ketin sewese ira. (Wadek Madiu 20:30-34.) Tehk me Sises ketin “poakeirahla” oh eri ketin kamwahwihirahla. Wasaht, lepin lokaiahn Krihs me kawehwehdiong “poakeirahla” kin dokedoke pepehmo me emen kin ahneki ni eh uhdahn poakehla meteikan. Soangen pepehm laud wet iei limpoak me Sises ketin kasalehiong aramas akan, me pil kamwakid ih en ketin kamwenge me duhpeklahr oh kamwahwihala me tokutok kan. (Mad. 15:32; Mark 1:41) Kitail kak uhdahn kamehlele me Siohwa, Koht en “kupwurkalahngan,” oh sapwellime Ohlo uhdahn ketin poakohng kitail oh kupwurtoutoukihla atail kin lokolok. (Luk 1:78; 1 Pit. 5:7) Ira uhdahn ketin kupwurki ketikihsang kahpwal kan koaros me kin kahpwalihala aramas akan!

6. Manaman dah me Koht ketikihong Sises?

⁶ Keriau, Koht ketikihong Sises manaman en kamwahwihala ahn aramas akan kahpwal koaros. Ni Sises eh ketin wiahda manaman kan, e kadehdehda me e kak ketin kamwahwihala kahpwal koaros me kitail sohte kak pein kamwahwihala. Karasepe, e sapwellimanki manaman en kasaledekikitailsang kahpwal kan me kitail sohsohki sang dihp, oh pil soahng koaros me dihp kin kahrehda, me iangahki soumwahu oh mehla. (Mad. 9:1-6; Rom 5:12, 18, 19) Sapwellime manaman kan kadehdehda me e kak ketin kamwahwihala “soangsoangen” soumwahu oh pil kaiasada me melahr kan. (Mad. 4:23; Sohn 11:43, 44) Patehng met, e sapwellimanki manaman en kauhdi melimel laud kan oh kasaledekihasang aramas akan ngehn suwed kan. (Mark 4:37-39; Luk 8:2) Ia uwen eh mwahu en ese me Siohwa ketikihong soangen manaman wet rehn sapwellime Ohlo!

7-8. (a) Dahme kitail kak uhdahn kamehlele pwehki sapwellimen Sises manaman ko? (b) Manaman dah me ke kasikasik nan sampah kapwo?

 ⁷ Kesiluh, kitail kak uhdahn kamehlele me inoupen soahng mwahu kan pahn kaundahn Wehin Koht pahn pweida. Manaman kan me Sises ketin wiahda ni ahnsou me e ketiket nin sampah padahkihong kitail dahme e pahn ketin wia nan sampah pwon nin duwen Nanmwarki en Wehin Koht nanleng. Medewehla dahme pahn kereniong wiahiong kitail pahn kaundahn Krais. Kitail pahn ahneki roson mwahu unsek pwehki e pahn ketikihsang soangen soumwahu koaros me aramas kin lokolongki. (Ais. 33:24; 35:5, 6; Kaud. 21:3, 4) Kitail sohte pahn duhpekla de lokolongki kahpwal en melimel, rerrer en sahpw, de ilok laud ape. (Ais. 25:6; Mark 4:41) Kitail pahn ahneki peren laud ni atail kasamwo irail kan me kitail poakohng sang nan “sousoun kataman kan.” (Sohn 5:28, 29) Manaman dah me ke kin keieu kasikasik nan sampah kapwo?

⁸ Ni Sises eh ketin wiahda manaman kan, e ketin kasalehda aktikitik oh poakehla meteikan—soangen irair kan me kitail anahne alasang. Kitail pahn koasoiapene karasaras riau, tepida sang ni kamadipw en kapwopwoudo nan Kena.

9. Dahme Sises ketin wia ni kamadipw en kapwopwoudo? (Sohn 2:6-10)

⁹ Wadek Sohn 2:6-10. Ni ahnsou me sohla wain ni kamadipw en kapwopwoudo, ia duwe,  Sises anahne ketin wia mehkot? Soh. Sohte kokohp ehu kohpada me Mesaiao pahn ketin doadoahngki eh manaman pwehn wiahda wain. Ahpw medewehla ia pahn omw pepehm ma sohla pihl de wain ni omw kapwopwoudo. Ele Sises ketin poakehla peneineio, ahpw mehlel pwopwoud kapwo, oh e sohte kupwurki irail en namenekla. Eri, e ketin wiahda manamano me kitail koasoiapene nan tepin iren onop wet. E ketin wekidala kalon en pihl 103 ong wain me keieu mwahu. Ele e ketin wiahda soangen uwen laud en waino pwe pwopwoudo en kak doadoahngki mwuhr, de kakete netikihla pwehn sewese ira. Ia uwen pwopwoud kapwo ara kalahnganki met!

10. Ia ekei oaritik kesempwal kan me kileldi nan pwuhken Sohn irelaud 2? (Menlau pil kilang kilel.)

¹⁰ Medewehla ekei oaritik kesempwal kan me kileldi nan pwuhken Sohn irelaud 2. Ke tehk me Sises sohte ketin audehiong pihl nan sah ko? E sohte kupwurki meteikan en tehk ih, ahpw e mahsanihong ladu ko en audehda sah ko. (Iretikitik 6, 7) Oh mwurin eh wekidohng pihlo wain, pein Sises sohte ketiki ekis waino pwehn ketikihla rehn kaunen kamadipwo. Ahpw e mahsanihong ladu ko en wia met. (Iretikitik 8) E sohte ketikihda ehu kepin waino mwohn meteikan oh suweiki, ‘Kumwail song mahs ekis waine me I ahpwtehn wiahda!’

11. Dahme kitail kak sukuhlkihsang sapwellimen Sises manaman?

¹¹ Dahme kitail kak sukuhlkihsang Sises eh ketin wekidohng pihl wain? Kitail sukuhlki duwen aktikitik. Sises sohte ketin suweiki duwen manamano. Ni mehlel, e sohte kin ketin suweiki soahng koaros me e ketin wia. Ahpw ni aktikitik, e kin pwurupwurehng patohwanohng Semeo lingan oh kaping koaros. (Sohn 5:19, 30; 8:28) Ma kitail alasang Sises oh kasalehda aktikitik, kitail sohte pahn suweiki soahng kan me kitail wiahda. Sohte lipilipil dahme kitail kak wia nan sapwellimen Siohwa doadoahk, kitail en suweiki kaidehn pein kitail, ahpw duwen atail Kohto me kitail ahneki pwais kaselel en papah. (Ser. 9:23, 24) Kitail anahne patohwanohng wahu me e ketin warohng sapwellimanki. Kitail sohte kak wiahda mehkot mwahu ma sohte sawas sang rehn Siohwa.—1 Kor. 1:26-31.

12. Ia pil ehu ahl me kitail kak alasang sapwellimen Sises aktikitik? Menlau kihda ehu karasaras.

¹² Tehk pil ehu ahl me kitail kak alasang sapwellimen Sises aktikitik. Medewehla karasaras wet: Elder men doadoahngki ahnsou laud pwehn sewese sounsawas pwulopwul men en kaunopada eh tepin kapahrek ong wehipokon. Pwehki eldero sewese ih, brother pwulopwulo wia padahk mwahu me mwomwohdisou perenki rong. Mwurin mihtingo, mie me kohdo rehn eldero oh nda: ‘Ahn brothero padahko uhdahn mwahu e?’ Ia duwe, eldero anahne nda: ‘Ei, ahpw I doadoahngki ahnsou laud pwehn sewese ih’? De ni aktikitik, e pahn nda: ‘Ei uhdahn. I pohlkihda eh wia met’? Ni atail kin aktikitik, kitail sohte anahne ale kapingpen atail wia soahng mwahu kan ong meteikan. Ahpw kitail kin itarki atail ese me Siohwa ketin mwahngih oh kesempwalki dahme kitail kin wia. (Pil kilang Madiu 6:2-4; Ipru 13:16) Eri, kitail kin kaperenda Siohwa ni atail kin alasang Sises oh kasalehda aktikitik.—1 Pit. 5:6.

13. Dahme Sises mahsanihada ni eh kerenlahng kahnimw en Nain, oh dahme e ketin wia? (Luk 7:11-15)

¹³ Wadek Luk 7:11-15. Medewehla dahme wiawi ehu ahnsowo me Sises ketin wiewia sapwellime doadoahk en kalohk. E ketin seiloakla Nain, kahnimw en Kalili me sohte dohsang Sunem, wasa me soukohp Elisa kaiasada nein lih emen nah pwutako mpen sounpar  900 mwoweo. (2 Nan. 4:32-37) Ni Sises eh kerenlahng kehlo, e mahsanihada kapar en mehla ehu me kohkohsang nan kahnimwo. Irairo uhdahn kansensuwed pwehki nein liohdi men iehros me mehla. Ahpw nohnou me pahtoula sohte kelehpw; pokon laud ehu sang nan kahnimwo iang ih. Sises ketin kauhdi kaparo oh wia mehkot kapwuriamwei ong nohnou me pahtoula—e ketin kaiasada nah pwutako! Met iei tepin kaiasada siluh ko me Sises ketin wiahda me kileldi nan pwuhken Rongamwahu ko.

14. Ia ekei oaritik kesempwal kan me kileldi nan pwuhken Luk irelaud 7? (Menlau pil kilang kilel.)

¹⁴ Medewehla ekei oaritik kesempwal kan me dierek nan pwuhken Luk irelaud 7. Ke tehk me Sises ketin “mahsanihada” nohnou me pahtoula oh eri “ketin poakehla”? (Iretikitik 13) Mwein Sises mahsanihada liohdio wie sengiseng ni eh alialu limwahn nah pwutako oh ketin poakehla. Sises sohte ketin poakehlahte nohnou; ahpw e ketin kasalehiong me e poakehla. Ni kamantik, e mahsanihong liho: “Ke dehr sengiseng.” Ih eri ketin sewese. E ketin kaiasada nein liho pwutako oh “ketikihong rehn ineo.”—Iretikitik 14, 15.

15. Dahme kitail kak sukuhlkihsang sapwellimen Sises manaman?

¹⁵ Dahme kitail kak sukuhlkihsang Sises eh ketin kaiasada nein liohdio pwutako? Kitail sukuhlki me kitail anahne poakehla irail kan me pahtou. Ei mehlel, kitail sohte kak kaiasada me melahr, duwehte me Sises ketin wia. Ahpw duwehte Sises, kitail kak kakairada irair en poakehla me pahtou kan sang ni atail kin tehk irail. Kitail kak tiengla mwowe oh kasalehda atail poakehla meteikan sang ni atail nda oh wia dahme kitail kak pwehn sewese oh kansenamwahwihirailla. d (Lep. Pad. 17:17; 2 Kor. 1:3, 4; 1 Pit. 3:8) Mehnda ma kitail nda de wia mehkot tikitik, e kak uhdahn kangoange oh kansenamwahwihirailla.

16. Nin duwen me kilelo kasalehda, dahme ke sukuhlkihsang dahme wiawihong nohno men me nah serio ahpwtehn mehla?

¹⁶ Medewehla dahme emen sister wia. Sounpar kei samwalahro ni sistero eh kokoul ni mihting en mwomwohdiso ehu, e tehkada nohno  men me mi ni sehr ko palilahsang ih wie sengiseng. Koulo koasoia duwen koapworopwor en kaiasada, oh nein nohnou serepein pwulopwulo ahpwtehn mehla. Pwehki sistero ese duwen met, e mwadangete kohla pwoalehdi nohnou oh iangih kanekehla koulo. Mwuhr, nohnou koasoia: “I pehm me ei poakohng riei Kristian kan uhdahn laudla.” E uhdahn kalahnganki me e iang towehda mihtingo. E koasoia: “Ih wasa me kitail kak diar ie sawas, iei nan Wasahn Kaudok.” Kitail kak kamehlele me Siohwa ketin mwahngih oh kesempwalki pil soahng tikitik kan me kitail kin wia pwehn kasalehda atail poakehla irail kan me “sohla ar koapworopwor.”—Mel. 34:18.

17. Dahme kitail sukuhlki nan iren onop wet?

¹⁷ Kitail kak uhdahn ale kangoang ni atail onopki koasoipen sapwellimen Sises manaman kan nan Paipel. Manaman ko padahkihong kitail me Siohwa oh Sises uhdahn ketin poakohng kitail, me Sises sapwellimanki manaman en kamwahwihala ahn aramas akan kahpwal koaros, oh kitail kak kamehlele me inou kaselel kan ong ahnsou kohkohdo pahn pweida ni ahnsou keren, ahnsou me Wehin Koht pahn kaunda sampah pwon. Ni atail medemedewe duwen manaman ko, kitail kak doudouloale ia duwen atail kak alasang sapwellimen Sises irair kaselel kan. Mwein ke kak koasoanehdi en pein onopki, de koasoiapene nan omw Kaudok en Peneinei duwen sapwellimen Sises manaman teikan. Kilang dahme ke kak sukuhlki oh mwuri ehukihong meteikan. Ma ke wia met, ke pahn koasoia soahng tohto me kak kangoange irail!—Rom 1:11, 12.

18. Dahme kitail pahn koasoiapene nan iren onop en mwuhr?

¹⁸ Kerenlahng kaimwiseklahn sapwellime doadoahk en kalohk, Sises ketin wiahda kesiluhn kaiasada me Paipel kasalehda. Met iei kaimwiseklahn kaiasada me e ketin wia. Ahpw kaiasada wet weksang kaiasada teiko pwehki e ketin kaiasada kompoakepah keren men, oh met wiawi ni ahl kapwuriamwei ehu. Dahme kitail kak sukuhlkihsang pwuhken Rongamwahwo duwen manaman wet? Ia duwen atail kak kakehlaka atail pwoson koapworopwor en kaiasadao? Iren onop en mwuhr pahn sapengala peidek pwukat.