1. Dahme kahrehda kitail kin pasapeng nan mihting kan?

 DAHME kahrehda kitail kin iang towehda mihting en mwomwohdiso kan? Kahrepe keieu, pwe kitail en kapinga Siohwa. (Mel. 26:12; 111:1) Kitail pil kin towehda mihting kan pwe kitail en kak kangoange emenemen ni ahnsou apwal pwukat. (1 Des. 5:11) Ni atail kin kauwada pehtail kan oh pasapeng, kitail kin wia soahng riau pwukat.

2. Ahnsou mwahu dah me kitail kak iang pasapeng nan mihting kan?

² Ehuehu wihk, kitail ahneki ahnsou mwahu en pasapeng nan atail mihting kan. Karasepe, ni imwin wihk kan, kitail kin iang pasapeng ni onop en Kahn Iroir. Nan atail mihting en nan wihk kan, ele kitail kin iang pasapeng nan padahk en Ire Kesempwal kan, Onop en Paipel en Mwomwohdiso, oh pil nan padahk teikan me mie peidek oh pasapeng.

3. Kahpwal dah kan me kitail kakete lelohng, oh ia duwen Ipru 10:24, 25 eh kak sewese kitail?

³ Kitail koaros men kapinga Siohwa oh kangoange iengatail tohnkaudok kan. Ahpw ni atail kin pasapeng, ele kitail kin apwalki soahng kei. Ele kitail kin salohki pasapeng, de kitail kin uhdahn men pasapeng pak tohto ahpw ekei pak brother kan sohte kin pilkitailda ni atail kauwada pehtail. Dahme kak sewese kitail? Dahme Pohl ntingkilahng mehn Ipru ko kak sewese kitail en diar pasapengpen met. Ni eh koasoia kesempwalpen en iang towehda mihting, e koasoia me kitail anahne medemedewehte en “kangoange emenemen.” (Wadek Ipru 10:24, 25.) Kitail pahn sohla nohn saloh en kihda pehtail ma kitail tamataman me kitail kak kangoange meteikan sang atail wia pasapeng mengei ehu me  kasalehda atail pwoson. Oh ma kitail sohte kin kalapw likwerda, kitail kak perenki me meteikan nan mwomwohdiso kak pasapeng.—1 Pit. 3:8.

4. Soahng siluh dah me kitail pahn koasoiapene nan iren onop wet?

⁴ Nan iren onop wet, keieu kitail pahn koasoiapene ia duwen atail kak kangoange emenemen nan kisin mwomwohdiso me aramas malaulaute kin iang pasapeng. Mwuri, kitail pahn koasoiapene ia duwen atail kak kangoange emenemen nan mwomwohdiso laud me aramas tohto kin kauwada pehrail pwehn pasapeng. Kitail eri pahn koasoiapene ia duwen atail kak kangoange meteikan sang ni dahme kitail kin nda ni atail pasapeng.

5. Ia duwen atail kak kangoange emenemen ma malaulau me iang towehda mihting?

⁵ Nan kisin mwomwohdiso de pwihn ehu, malaulau me kin iang pasapeng pwe brother me wia onopo en likwerih. Ekei pak, ele brothero anahne awih ahnsou werei lao emen kihda peh pwehn pasapeng. Mihtingo ele mwomwen kasangatla, oh met sohte kangoang. Dahme ke kak wia? Ken kin men kalapw kauwada pehmwen. Sang ni omw wia met, ele ke pahn kamwakid meteikan en kalapw iang pasapeng.

6-7. Ia duwen atail kak katikala atail pwunodki wia pasapeng?

⁶ Dahme ke kak wia ma ke kin uhdahn salohki pasapeng? Me tohto kak wehwehki omw pepehm. Rapahki ahl akan en katikala omw salohki pasapeng pwe ken kak wia kangoang laud ong riomw Kristian kan. Ia duwen omw kak wia met?

⁷ Ele ke pahn diarada me e pahn sawas en kilang mehn sawas kan me mi nan Kahn Iroir en mwowe ko. b Karasepe, kaunopada mwahu. (Lep. Pad. 21:5) Uwen laud en omw esehla mwahu iren onopo, ih uwen laud en omw pahn sohla salohki iang pasapeng. Patehng met, wia pasapeng me mwotomwot. (Lep. Pad. 15:23; 17:27) Ke sohte pahn pwunodki ma ke wia pasapeng mwotomwot. Doadoahngki sendens ehu de riau nan omw pasapengo, ele e pahn mengei ong riomw Kristian kan en wehwehki sang pasapeng reirei kan. Ni omw wia pasapeng mwotomwot ni pein omw lokaia, ke pahn kasalehda me ke kaunopada mwahu oh wehwehki mwahu audepen onopo.

8. Ia duwen Siohwa eh kin ketin kilengwohng atail kin wia uwen atail kak?

⁸ Ahpw ia duwen ma ke song ekei mehn sawas pwukat ahpw ke pil kin salohkihte pasapeng tohtohsang pak ehu de riau? Kamehlele me Siohwa pahn ketin kupwurperenki omw nanti laud en wia dahme ke kakohng. (Luk 21:1-4) Siohwa sohte ketin kupwurki kitail en wia laudsang dahme kitail kak. (Pil. 4:5) Koasoanehdi dahme ke kak wia, wiahda mehn akadei en wia met, oh kapakapki en dehr saloh. Nin tapio, mwein ke koasoanehdi en wia pasapeng ehu me mwotomwot.

9. Kahpwal dah me kakete pwarada nan mwomwohdiso laud kan?

⁹ Ma mie sounkalohk tohto nan omw mwomwohdisou, ele omw kahpwalo weksang mehn mwowe ko. Mwein me tohto kin kihda pehrail pwehn pasapeng kahrehda  brothero sohte kin piluhkada. Karasepe, Danielle kin perenki pasapeng nan mihting kan. c E kin wiahki met kisehn eh kaudok, en kangoange meteikan, oh ahl en kakehlaka pein eh pwoson dahme Paipel kin padahngki. Ahpw ni ahnsou me e keseula nan mwomwohdiso laud ehu, e sohte kin kalapw pilipilda en pasapeng—ekei pak pil ni erein mihting ehu pwon. E koasoia: “I uhdahn nsensuwedla. I pehm me I sohla ahneki pwais kaselel en iang pasapeng. Ma met kin pwurupwurehng wiawi, ke pahn tepida medewe ma e koasoandier ken dehr iang pasapeng.”

10. Ia duwen atail kak kalaudehla atail ahnsou en iang pasapeng?

¹⁰ Ke pil kak wehwehki ahn Danielle pepehm? Ma ei, ke kakete sohla pasapeng oh mwomwohdete rongorong. Ahpw dehr uhdihsang song en pasapeng. Dahme ke kak wia? Mwein ke diarada me e sawas en kaunopada ekei pasapeng ong ehuehu mihting. Eri ma ke sohte pilipilda en pasapeng ni tepin onopo, ke pahn ahnekihte ahnsou mwahu en pasapeng ni erein mihtingo. Ni omw kaunopada noumw Kahn Iroir, medemedewe ia duwen ehuehu parakrap eh dokedoke oaralap en iren onopo. Ma ke wia met, ele e pahn mie pasapeng mwahu kan me ke kak wia erein onopo. Patehng met, ke kak kaunopada en pasapeng ni parakrap kan me koasoia padahk loal kan me apwal en kawehwehda. (1 Kor. 2:10) Dahme kahrehda? Pwehki e kakete malaulau me pahn pasapeng wasa ko. Ahpw ia duwen ma ke doadoahngki iren sawas pwukat oh ke diarada me mwurin mihting kei, ke pil saikinte ahneki ahnsou mwahu en iang pasapeng? Ke kak koasoiong brother me pahn wia Kahn Iroiro mwohn mihtingo oh padahkihong mehnia peidek me ke men sapeng.

11. Dahme Pilipai 2:4 kangoange kitail en wia?

¹¹ Wadek Pilipai 2:4. Pahn sapwellimen Koht kaweid, wahnpoaron Pohl kangoange Kristian kan en rapahki kamwahupen meteikan. Ia duwen atail kak doadoahngki kaweido erein mihting kan? Sang ni atail tamataman me meteikan, duwehte kitail, kin men iang pasapeng.

12. Ia ahl mwahu en kangoange meteikan nan mihting kan? (Menlau pil kilang kilel.)

 ¹² Medewehla met. Ni omw koasoakoasoiong kompoakepahmw kan, ke pahn koasokoasoitohr me kahrehda sohla arail ahnsoun koasoi? Uhdahn soh! Ke men irail en iang koasoi. Duwehte nan mihting kan, kitail men mweidohng me tohto en iang pasapeng. Ni mehlel, ehu ahl me keieu mwahu en kangoange riatail Kristian kan iei en kihong irail ahnsou mwahu en kasalehda arail pwoson. (1 Kor. 10:24) Kitail pahn koasoiapene ia duwen atail kak wia met.

13. Ia duwen atail kak mweidohng meteikan en iang pasapeng?

¹³ Pil ehu, kitail kak wiahiong atail pasapeng kan en mwotomwot pwehn mweidohng meteikan en iang pasapeng. Elder oh sounkalohk koahiek kan kak wiahda mehn kahlemeng ong met. Mehnda ma ke wia pasapeng mwotomwot, dehr koasoia ire tohto. Ma ke koasoia soahng koaros nan parakrapo, e pahn tikitikla dahme meteikan pahn koasoia. Karasepe, nan parakrap wet, iren sawas riau kohda me iei kitail en wiahiong atail pasapeng en mwotomwot oh dehr nohn koasoia ire tohto. Ma kowe me tepin pilipilda en pasapeng nan parakrap wet, ke sou koasoia ehute ire pwukat?

14. Dahme kak sewese kitail en pilada ia uwen tohtohn atail pahn kihda pehtail kan? (Menlau pil kilang kilel.)

¹⁴ Medewe mwahu ni omw pilada ia uwen tohtohn omw pahn kihda pehmw. Ma kitail kin nohn kalapw kihda pehtail ka, mwein kitail kakete kahrehiong brother me wia onopo en medewe me e anahne pwurupwurehng likwerih kitail mendahki meteikan saikinte iang pasapeng. Met kak kamworusehla meteikan en kihda pehrail.—Ekl. 3:7.

15. (a) Ia duwen atail pahn mwekidki ma kitail sohte likwerda pwehn pasapeng? (b) Ia duwen brother me wia peidek oh pasapeng eh kak kasalehda me e nsenohki koaros? (Menlau kilang koakono “ Ma Kowe me Wia Peidek oh Pasapeng.”)

¹⁵ Ma sounkalohk tohto kin kauwada  pehrail erein onop ehu, ele kitail sohte pahn kak pasapeng pak tohto ni uwen me kitail men. Ekei pak, me wia peidek oh pasapeng kakete sohte likwerihkitailda douluhl. Met kak kamworuseikitailla, ahpw kitail anahne song en dehr nsensuwedla ma adatail kan sohte likwerda.—Ekl. 7:9.

16. Ia duwen atail kak kangoange meteikan me pasapeng?

¹⁶ Ma ke sohte kak pasapeng ni uwen me ke mwahuki, ke sou rong kanahieng ni meteikan ar pasapeng oh mwurin mihtingo kalahnganki arail pasapengo? Omw kalahnganki ahn riomw Kristian kan arail pasapeng pahn kangoange irail duwehte omw wia pasapeng kangoang kan. (Lep. Pad. 10:21) En kalahnganki ahn meteikan pasapeng iei pil ehu ahl me kitail kak kangoange emenemen.

17. (a) Ia duwen pahpa nohno kan kak sewese neirail seri kan en kaunopada pasapeng mwahu kan? (b) Nin duwen me kisin kasdou kasalehda, kahk pahieu dah me pahn sawas en kaunopada pasapeng? (Menlau pil kilang nting tikitik kan.)

¹⁷ Ia duwen atail pil kak kangoange meteikan nan atail mihting kan? Ma kowe pahpa de nohno men, sewese noumw me pwulopwul kan en kaunopada arail pasapeng me mwahuong arail sounpar. (Mad. 21:16) Ekei pak, kitail kin koasoiapene nan iren onop ehu ire kesempwal kan duwen kahpwal en nan pwopwoud  de kaweid kan me pid tiahk. Ahpw e kakete mie parakrap ehu de riau me seri men kak iang sapeng. Pil sewese noumw seri kan en ese me ekei pak irail sohte kak iang pasapeng mehnda ma irail kihda pehrail. Omw kawehwehda met kak sewese irail en dehr mworusala ni meteikan kan ar pasapeng ahpw kaidehn irail.—1 Tim. 6:18. d

18. Ia duwen atail kak soikala koasoakoasoiahte pein kitail ni atail pasapeng? (Lepin Padahk 27:2)

¹⁸ Kitail koaros kak kaunopada pasapeng kangoang kan me kin kawauwih Siohwa oh kangoange riatail Kristian kan. (Lep. Pad. 25:11) Kitail kak wia pasapeng mwotomwot duwen soahng kan me wiawihong kitail, ahpw kitail en dehr nohn koasoakoasoia duwen pein kitail. (Wadek Lepin Padahk 27:2; 2 Kor. 10:18) Ahpw, kitail en nantihong koasoiahte duwen Siohwa, sapwellime Mahsen, oh sapwellime aramas akan. (Kaud. 4:11) Mehlel, ma peidek ong parakrapo nda kitail en koasoia duwen pein kitail, e konehng en wia met. Karasepen met mi nan parakrap en mwuri.

19. (a) Dahme pahn wiawi ma kitail kasalehda me kitail nsenohki koaros me iang towehda mihting? (Rom 1:11, 12) (b) Dahme ke perenki duwen en iang pasapeng nan mihting kan?

¹⁹ Mendahki sohte kosonned ong ia duwen atail pahn pasapeng, kitail koaros kak song en kangoange emenemen. Met kakete wehwehki me kitail en iang pasapeng tohtohsang pak ehu. De e kak wehwehki me kitail en itarki ahnsou mwahu en kak iang pasapeng oh perenki me meteikan ahneki ahnsou mwahu en iang pasapeng. Ni atail medemedewe kamwahupen meteikan nan mihting en mwomwohdiso kan, kitail koaros kak perenki “kangoange emenemen.”—Wadek Rom 1:11, 12.