1. Ia duwen pwutako eh kasalehda eh koapworopwor en kaiasada?

 PWUTAK emen me adaneki Matthew ahneki soumwahu laud ehu oh e anahne ale pwal tohto. Ni ahnsou me e sounpar isuh, ih oh eh peneineio kilikilang ehu prokram en JW Broadcasting^®. Ni imwin prokramo, irail rong koul ehu duwen irail kan me kasamwo me melahr kan. b Mwurin prokramo, Matthew kohla rehn eh pahpa oh nohnou, koledi pehra ko oh nda: “Ino, Ipa, kumwa kilang? Mehnda ma I mehla, I pahn iasada. Kumwa kak awih ie, soahng koaros pahn mwahu.” Ke kak medewehla ia uwen peren en pahpao oh nohnou ni ara esehda me neira pwutako uhdahn pwoson koapworopwor en kaiasada?

2-3. Dahme kahrehda e mwahu kitail en medemedewe koapworopwor en kaiasada?

² E mwahu en kin medewe duwen inou en Paipel me pid kaiasada ong ahnsou kohkohdo. (Sohn 5:28, 29) Dahme kahrehda? Pwehki kitail sohte ese ma kitail kakete ahnekihda soumwahu laud ehu, de emen me kitail poakohng mehla ni atail sohte kasik. (Ekl. 9:11; Seims 4:13, 14) Atail koapworopwor en kaiasada kak sewese kitail en dadaur pahn kahpwal pwukat. (1 Des. 4:13) Paipel pil kamehlelehiong kitail me Samatailo nanleng uhdahn ketin mwahngih oh poakohng kitail. (Luk 12:7) Siohwa Koht anahne uhdahn ketin mwahngih duwen kitail pwe en kak ketin kaiaskitailda en ahnekihte atail irair kan oh tamatamante soahng kan. Oh Siohwa uhdahn ketin poakohng kitail oh ketin kahrehiong kitail en kak mour kohkohlahte! Ma kitail pil mehla, e pahn ketin kaiaskitailda.

³ Nan iren onop wet, keieu kitail pahn koasoiapene dahme kahrehda kitail kak kamehlele duwen inou en kaiasada. Oh kitail pahn koasoiapene koasoiepen iren Paipelo me iren onop wet  poahsoankihda: “Riomw pwutako pahn pwurehng mourda.” (Sohn 11:23) Ni kaimwisekala, kitail pahn sukuhlki ia duwen atail pahn kalaudehla atail kamehlele koapworopwor en kaiasada.

4. Pwehn kamehlele inou ehu, dahme kitail anahne kamehlele? Menlau kihda ehu karasaras.

⁴ Pwehn kamehlele inou ehu, kitail uhdahn anahne kamehlele me mehmeno me wia inowo uhdahn men wia oh pil ahneki manaman, de koahiek, en kapwaiada inowo. Karasepe: Medewehla me imwomwo ohkihla melimel ehu. Kompoakepahmw men kohdo rehmw oh inoukihong uhk, ‘I pahn seweseiuk kauwada imwomwo.’ E uhdahn mehlel oh ke kamehlele me e uhdahn men seweseiuk. Ma e koahiek en wia ihmw oh mie nah kepwehn doadoahk kan me anahn, ke ese me e kak seweseiuk. Eri ke kamehlele dahme e inoukihda. Ahpw, ia duwen sapwellimen Koht inou en kaiasada? Ia duwe, e uhdahn ketin kupwurki oh pil sapwellimanki manaman en ketin kapwaiada inou wet?

5-6. Dahme kahrehda kitail kak kamehlele me Siohwa ketin kupwurki kaiasada me melahr kan?

⁵ Ia duwe, Siohwa ketin kupwurki kaiasada me melahr kan? Ei uhdahn, e ketin kupwurki wia met. E ketin doadoahngki sounnting en Paipel tohto pwehn ntingihedi sapwellime inou me pid kaiasada ni ahnsou kohkohdo. (Ais. 26:19; Dan. 12:2; Kaud. 20:11-13) Oh ni Siohwa eh kin ketin wiahda inou ehu, ahnsou koaros e kin ketin kapwaiada. (Sos. 23:14) Ni mehlel, Siohwa ketin kupwurki kaiasada me melahr kan. Dahme kahrehda kitail kak ndahki met?

⁶ Medewehla dahme Sohp nda. E kamehlele me ma e pahn mehla, Siohwa pahn ketin kupwurki kaiasada ih. (Sohp 14:14, 15) Siohwa ketin kupwurki kaiasada sapwellime tohnkaudok kan koaros me melahr. E ketin kupwurki kaiasirailda pwe irail en kak ahneki roson mwahu oh nsenamwahu. Ahpw ia duwen irail kan koaros me melahr ahpw sohte ahneki ahnsou mwahu en sukuhlki me mehlelo duwen ih? Atail Koht limpoako pil ketin kupwurki kaiasirailda. (Wiewia 24:15) E ketin kupwurki irail en wiahla kompoakepah oh mour kohkohlahte nin sampah. (Sohn 3:16) E sansal me Siohwa ketin kupwurki kaiasada me melahr kan.

7-8. Dahme kahrehda kitail kak kamehlele me Siohwa ketin sapwellimanki manaman en kaiasada me melahr kan?

⁷ Ia duwe, Siohwa pil ketin sapwellimanki manaman en kaiasada me melahr kan? Ei uhdahn! Ih me “Keieu Manaman.” (Kaud. 1:8) Eri e sapwellimanki manaman me uhdahn laud me kahrehda e kak ketin kalowehdi imwintihti koaros, pil mehla. (1 Kor. 15:26) Atail ese met kin kakehlakahda oh kansenamwahwihkitailla. Medewehla dahme wiawihong sister Emma Arnold. Erein Mahwen Keriau en Sampah, ih oh eh peneineio lelohng kasongosong laud pwehki arail pwoson. Pwehn kansenamwahwih nah serepeino pwehki mehlahn me e poakohng kan nan imweteng en Nazi, Emma nda: “Ma me melahr kan sohte kak pwurehng mourda, eri met wehwehki me atail imwintihtio kehlailsang Koht. Ahpw met sohte mehlel.” Uhdahn sohte mehkot kehlailsang Siohwa! Atail Koht me keieu manamano me ketin kapikada mour kak ketin kaiasada me melahr kan.

⁸ Ehu kahrepe me kitail esehki me Koht kak ketin kaiasada me melahr kan iei pwehki sohte irepen dahme e kin ketin tamataman. E kin ketin malipehki ehuehu usu kan adarail. (Ais. 40:26) E pil ketin tamataman irail kan koaros me melahr. (Sohp 14:13; Luk 20:37, 38) E mengei ong ih en kak ketin tamataman ire pisetik koaros duwen irail kan me e pahn ketin kaiasada, iangahki mwomwarail, arail irair, dahme kin wiawi nan arail mour, oh dahme irail kin taman.

9. Dahme kahrehda ke kamehlele sapwellimen Siohwa inou duwen kaiasada ong ahnsou kohkohdo?

 ⁹ E sansal me kitail kak kamehlele sapwellimen Siohwa inou me pid kaiasada ni ahnsou kohkohdo pwehki kitail ese me e ketin kupwurki oh pil sapwellimanki manaman en kapwaiada met. Medewehla ehu kahrepen atail kak kamehlele sapwellimen Koht inou en kaiasada: Siohwa ketin wiahier met. Nan Paipel, e ketikihong ohl lelepek kei, pil iangahki Sises, manaman pwehn kaiasada me melahr kan. Kitail pahn koasoiapene ehu kaiasada me Sises ketin wia me kileldi nan Sohn irelaud 11.

10. Dahme wiawi ni Sises eh ketin kalokalohk palio Sordan sang Pedani, oh dahme e ketin wia? (Sohn 11:1-3)

¹⁰ Wadek Sohn 11:1-3. Medewehla dahme wiawi nan Pedani ni imwilahn pahr 32. Mie kompoakepahn Sises keren kei me kin mi wasao—Lasarus oh rie lih riemen, Mery oh Marda. (Luk 10:38-42) Ahpw Lasarus soumwahuda, oh rie lih ako pwunodkihda. Ira kadarala pakair ehu ong Sises me ketiket palio Sordan, me dohki mpen rahn riau ma sounkairo sapalsang Pedani. (Sohn 10:40) E kansensuwed me Lasarus mehla mpen ahnsowo me sounkairo lella rehn Sises. Mendahki Sises mwahngih me kompoakepaho ahpwtehn mehla, e ketikette wasao rahn riau oh eri ketila Pedani. Ni Sises eh ketin lella Pedani, Lasarus melahr rahn pahieu. Sises pahn ketin wia mehkot me pahn wia kamwahupen kompoakepah ko oh kalinganahla Koht.—Sohn 11:4, 6, 11, 17.

11. Mehn kasukuhl dahieu duwen kompoakepahnki meteikan me kitail kak sukuhlkihsang koasoiepen Paipel wet?

¹¹ Kitail sukuhlki mehn kasukuhl ehu duwen kompoakepahnki meteikan sang koasoiepen Paipel wet. Medewehla met: Ni Mery oh Marda ara kadarala pakairo rehn Sises, ira sohte peki Sises en ketila Pedani. Ira ndahte me kompoakepaho soumwahu. (Sohn 11:3) Ni ahnsou me Lasarus mehla, Sises kak ketin kaiasada, mendahki e ketiket wasa doh. Ahpw Sises ketin pilada en ketila Pedani pwehn mi rehn kompoakepah ko, Mery oh Marda. Ia duwe, mie kompoakepahmw men me pahn seweseiuk mehnda ma ke sohte peki reh? Eri ke ese me ke kak koapworopworki ih, oh me e pahn seweseiuk “ni ahnsou apwal.” (Lep. Pad. 17:17) Duwehte Sises, kitail en wia soangen kompoakepaho ong meteikan! Met kitail pahn kilang koasoiepen Paipelo oh kilang dahme wiawi mwuri.

12. Dahme Sises ketin inoukihong Marda, oh dahme kahrehda Marda kak kamehlele inou wet? (Sohn 11:23-26)

¹² Wadek Sohn 11:23-26. Marda esehda me Sises ketiket kohdo karanih Pedani. E mwadangete kohieila oh tuhwong ih oh nda: “Maing Kaun, ma komw ketikette met, riei pwutako sohte pahn mehla.” (Sohn 11:21) Mehlel, Sises kakete ketin kamwahwihala Lasarus. Ahpw e kupwurki wia mehkot me uhdahn mwahusang. E ketin inoukihong: “Riomw pwutako pahn pwurehng mourda.” E pil ketikihong Marda kahrepe ehu en kamehlele sapwellime inowo, ni eh mahsanih: “Ngehi me kaiasada oh ngehi me mour.” Ei, Koht ketikihong Sises manaman  en kaiasada me melahr kan. Mwoweo, Sises ketin kaiasada serepein pwulopwul men mwurinte serepeino mehla, oh e pil ketin kaiasada mwahnakapw men, mwomwen rahnohte me mwahnakapwo mehla. (Luk 7:11-15; 8:49-55) Ia duwe, e kak ketin kaiasada emen me melahr erein rahn pahieu oh paliwaro tepidahr ohla?

13. Nin duwen me Sohn 11:32-35 mahsanih, ia duwen Sises eh ketin mwekidki ni eh mahsanihada Mery oh meteikan ar wie sengiseng? (Menlau pil kilang kilel.)

¹³ Wadek Sohn 11:32-35. Medewehla dahme wiawi mwuhr. Mery, rien Lasarus lih teio, kohieila pwehn tuhwong Sises. E pwurehng nda dahme rie serepeino nda: “Maing Kaun, ma komw ketikette met, riei pwutako sohte pahn mehla.” Ih oh meteiko me iangih uhdahn nsensuwed. Ni Sises eh mahsanih oh karonge ar wie sengiseng, e uhdahn kupwur toutoula. Pwehki eh uhdahn ketin poakehla kompoakepah ko, e tepida tentenihr. E mwahngih ia uwen kamedek ni emen me aramas kin poakohng eh mehla. E uhdahn kupwurki ketikihsang dahme kin kahrehda arail sengiseng!

14. Dahme kitail kak sukuhlki duwen Siohwa sang mwomwen Sises eh mwekidki ahn Mery sengisengo?

¹⁴ Sises eh ketin mwekidki ahn Mery sengisengo padahkihong kitail me Siohwa iei Koht emen me kin ketin poakehla aramas. Dahme kahrehda kitail kak ndahki met? Nin duwen me kitail koasoiapene nan iren onop en mwoweo, Sises kin ni unsek kahlemengih madamadau oh pepehm en Semeo. (Sohn 12:45) Eri ni atail wadek me Sises tentenihrki eh uhdahn poakehla kompoakepah ko me pahtoula, kitail kak nda me Siohwa pil kin uhdahn ketin poakeikitailla ni eh ketin mahsanih atail kin sengiseng. (Mel. 56:8) Met sou kin kahrehiong uhk en men karanihala atail Koht limpoako?

15. Nin duwen me Sohn 11:41-44 mahsanih, dahme wiawi ni ahn Lasarus sousowo? (Menlau pil kilang kilel.)

¹⁵ Wadek Sohn 11:41-44. Sises ketila ni ahn Lasarus sousowo oh mahsanih ren pwekasang takaio. Marda song en kauhdi Sises ni eh nda me paliwaro ele pwohsuwedlahr ni ahnsowo. Sises ketin sapengki: “I soh ndaionguhkehr me ke pahn kilang sapwellimen Koht lingan ma ke pahn pwoson?” (Sohn 11:39, 40) Sises eri ketin sarada oh loulou mwohn pokono.  E men patohwanohng Siohwa wahu koaros pwehki dahme pahn wiawi mwurin mwo. Sises eri kapitie laudida mahsanih: “Lasarus, pedoido!” Lasarus eri pedoisang nan sousowo! Sises ketin wiadahr dahme ekei medewe uhdahn sohte kak wiawi.

16. Ia duwen koasoipen Paipel me kileldi nan Sohn 11 eh kakehlakahda atail pwoson koapworopwor en kaiasada?

¹⁶ Koasoipen Paipel me mi nan Sohn Irelaud 11 kin kakehlakahda atail pwoson koapworopwor en kaiasada. Ia duwen? Sises ketin inoukihong Marda: “Riomw pwutako pahn pwurehng mourda.” (Sohn 11:23) Duwehte Semeo, Sises kupwurki oh pil sapwellimanki manaman en kapwaiada inou wet. Ni Sises eh tentenihr, met kasalehda me e uhdahn kupwurki kaiasada aramas akan oh ketikihsang mehla oh pahtou me kin kahrehiong aramas akan en nsensuwed. Oh ni ahnsou me Lasarus pedoisang nan sousowo, Sises pil pwurehng ketin kasalehda me e sapwellimanki manaman en kaiasada me melahr kan. Pil medewehla dahme Sises ketin katamankihong Marda: “I soh ndaionguhkehr me ke pahn kilang sapwellimen Koht lingan ma ke pahn pwoson?” (Sohn 11:40) Kitail ahneki kahrepe mwahu en kamehlele me sapwellimen Koht inou en kaiasada pahn uhdahn wiawi. Ahpw dahme kitail kak wia pwehn kalaudehla atail kamehlele inou wet?

17. Dahme kitail en tamataman ni atail kin wadek koasoiepen kaiasada kan nan Paipel?

¹⁷ Wadek oh doudouloale kaiasada kan me wiawi mahso. Nan Paipel, mi koasoiepen aramas welimen me iasada. c Ke sou onopki mwahu koasoiepen kaiasada pwukat? Ni omw wia met, tamataman me ohl, lih oh seri pwukat me iasada, uhdahn aramas kei me duwei kitail. Tehk mehn kasukuhl kan me ke kak sukuhlkihsang. Medemedewe ia duwen ehuehu karasaras pwukat ar kasalehda duwen Koht eh ketin kupwurki oh sapwellimanki manaman en kaiasada  me melahr kan. Kesempwalsang kaiasada pwukat, medemedewe kaiasadahn Sises. Tamataman me me tohtohie me kilang eh ketin iasada oh met wia poahsoan mwahu ehu ong atail pwoson.—1 Kor. 15:3-6, 20-22.

18. Ia duwen omw kak doadoahngki mwahu koul kan duwen koapworopwor en kaiasada? (Pil kilang nting tikitik kan me mi pah.)

¹⁸ Rong oh medemedewe “koul sarawi kan” duwen koapworopwor en kaiasada. d (Ep. 5:19) Koul pwukat kin kalaudehla atail kamehlele kaiasada oh kakehlakahda atail pwoson koapworopwor kaselel wet. Rong koul ko, praktiski oh koasoiapene wehwehn lokaia ko nan koul ko nan omw kaudok en peneinei. Wadlikihala lokaia ko oh doudouloale ia duwen ar kak kakehlakahda atail pwoson oh sair mohngiongitail. Eri, ma ke lelohng kahpwal laud ehu de emen me ke poakohng mehla, sapwellimen Siohwa manaman pahn seweseiuk en tamanda koul pwukat pwehn kansenamwahwih oh kakehlakaiuk.

19. Dahme kitail kin ele medewehla duwen kaiasada? (Menlau kilang koakono, “ Dahme Ke Pahn Idek Rehrail?”)

¹⁹ Medewehla. Siohwa ketikihong kitail koahiek en medewehla pein kitail nan sampah kapwo. Emen sister koasoia: “I kin doadoahngki ahnsou laud en medewehla pein ngehi nan sampah kapwo me kahrehda e mwomwen me I kak ned wahn rohs kan ar masmasal nan Paradais.” Medewehla omw pahn tuhwong ohl oh lih lelepek kan nan Paipel. Ihs me ke kasikasik en tuhwong? Peidek dah me ke pahn idek reh? Pil medewehla omw pahn pwurehng tuhwong me ke poakohng kan me mehla. Medewehla dahme ke pahn tepin ndaiong irail, duwen omw pahn pwoaleiraildi, oh ia uwen kaperen en kilang irail.

20. Dahme kitail en koasoanehdi teng en wia?

²⁰ Kitail uhdahn kalahnganki sapwellimen Siohwa inou en kaiasada! Kitail kak uhdahn kamehlele me inou wet pahn pweida pwehki Siohwa ketin kupwurki oh pil sapwellimanki manaman en kapwaiada met. Kitail en koasoanehdi teng en kakehlakahda atail pwoson koapworopwor kesempwal wet. Ni atail wia met, kitail pahn uhdahn karanihala Kohto me ketin inoukihong emenemen kitail, ‘Irail kan me ke poakohng pahn iasada!’