1. Dahme kitail kin kamehlele?

 NIN duwen sapwellimen Siohwa aramas kei, kitail ese me e ketin poakohng kitail oh kupwurki kitail en ahneki mour me keieu mwahu. (Rom 8:35-39) Kitail pil kamehlele me kaweid kan en Paipel kin ahnsou koaros wia kamwahu ong kitail ni atail kin kapwaiada. (Ais. 48:17, 18) Ahpw, ia duwen ma kitail lelohng kahpwal kan me kitail sohte kasik?

2. Kahpwal dah kan me ele kitail kin lelohng, oh dahme kahpwal pwukat kak kahrehiong kitail en medewe?

² Sapwellimen Siohwa ladu kan koaros kin ahneki kahpwal. Karasepe, emen nan atail peneinei kakete kansensuwedihkitailla. Ele kitail ahneki soumwahu laud me irehdi dahme kitail kak wia nan sapwellimen Siohwa doadoahk. Mwein kitail lelohng kahpwal en melimel de rerrer en sahpw ape. De mwein kitail lelohng kalokolok pwehki atail pwoson. Ni atail kin lelohng soangen kahpwal pwukat, ele kitail medewe: ‘Dahme kahrehda met wiawihong ie? I wiahda mehkot sapwung? Met wehwehki me Siohwa sohte kin ketin kapaiehda?’ Mie pak me ke medewe soahng pwukat? Ma ei, dehr mworusala. Sapwellimen Siohwa ladu loalopwoat tohto pil kin medewe soahngkohte.—Mel. 22:1, 2; Apak. 1:2, 3.

3. Dahme kitail kak sukuhlkihsang Melkahka 34:19?

³ Wadek Melkahka 34:19. Tehk ire kesempwal riau nan melkahka wet: (1) Aramas mwahu, de pwung kan, kin lelohng kahpwal. (2) Siohwa kin ketin doareikitailsang atail kahpwal  kan. Ia duwen eh kin ketin wia met? Ehu ahl iei sang ni eh kin ketin sewese kitail en ahneki madamadau pwung ong mour nan sampah wet. Siohwa ketin inoukihda me kitail pahn ahneki peren ni atail papah ih, ahpw e sohte ketin inoukihda me kitail sohte pahn lelohng kahpwal kan ahnsou wet. (Ais. 66:14) E ketin kangoange kitail en medemedewehte duwen ahnsou kohkohdo, ahnsou me kitail pahn ahneki soangen mour me e ketin kupwurki kitail en ahneki kohkohlahte. (2 Kor. 4:16-18) Ahpw ahnsou wet, e kin ketin sewese kitail en pousehlahte papah ih rahn koaros.—Koul Ked. 3:22-24.

4. Dahme kitail pahn koasoiapene nan iren onop wet?

⁴ Kitail pahn koasoiapene dahme kitail kak sukuhlkihsang mehn kahlemeng en sapwellimen Siohwa tohnkaudok lelepek kan, nan Paipel oh pil nan atail ahnsou. Kitail pahn tehkpene duwen atail kakete lelohng kahpwal me kitail sohte kasik. Ahpw ni atail kin koapworopworki Siohwa, e pahn ahnsou koaros ketin sewese kitail. (Mel. 55:22) Ni atail pahn koasoiapene mehn kahlemeng pwukat, pein idek rehmw: ‘Dahme I pahn wia ma I lelohng soangen irairohte? Ia duwen mehn kahlemeng pwukat eh kakehlaka ei likih Siohwa? Mehn kasukuhl dah kan me I kak doadoahngki nan ei mour?’

5. Soangen kahpwal dah me Seikop lelohng pwehki Lapan? (Menlau kilang kilel ni kilin Kahn Iroir wet.)

⁵ Sapwellimen Siohwa ladu kan nan Paipel kin lelohng kahpwal kan me irail sohte kasik. Medewehla Seikop. Eh pahpao kehkehlingkihong en pwoudikihda emen nein Lapan serepein ko, emen kiseh me kin kaudokiong Koht, oh eh papaho kamehlelehiong ih me Siohwa pahn uhdahn ketin kapaiahda ih. (Sen. 28:1-4) Eri Seikop wia dahme pwung. E kohkohsang sapwen Kenan oh seiloakla imwen Lapano, me naineki serepein riemen—Lia oh Resel. Seikop mwahukihda nein Lapan serepein tikitiko, Resel, oh pwungki en doadoahk ong eh pahpao sounpar isuh mwohn eh pwoudkihla. (Sen. 29:18) Ahpw kaidehn ih met me wiawi. Lapan pitihedi kahrehda e pwoudkihla nah serepein laudo, Lia. Lapan mweidohng Seikop en pwoudkihla Resel wihk ehu mwuhr, ahpw ihte ma Seikop doadoahk ong ih pil sounpar isuh. (Sen. 29:25-27) En Lapan eh wiewia kan pil sohte pahrek ni eh wia pesines ong Seikop. Eri, Lapan kin mwersuwedih Seikop erein sounpar 20!—Sen. 31:41, 42.

6. Kahpwal dah teikan me Seikop lelohng?

⁶ Seikop pil lelohng kahpwal teikan. E ahneki peneinei laud ehu, ahpw nah pwutak ko sohte kin ahnsou koaros ehupene. Irail pil netikihla pein riarail pwutako Sosep pwehn wiahla lidu. Nein Seikop pwutak riemeno, Simion oh Lipai, kihsang wahu en ara peneineio oh mwaren Siohwa. Patehng met, ahn Seikop pwoudo me e kin poakohng, Resel, mehla nin doken eh naitikihedi neira seri keriemeno. Oh pwehki lehk laud ehu, Seikop anahne keseula nan sapwen Isip ni eh mahlahr.—Sen. 34:30; 35:16-19; 37:28; 45:9-11, 28.

7. Ia duwen Siohwa eh ketin kasalehiong Seikop me e ketin kupwurperenki ih?

⁷ Mendahki kahpwal pwukat koaros, Seikop kin pwosonte Siohwa oh sapwellime inou kan. Oh Siohwa ketin kasalehiong Seikop me E ketin kupwurperenki ih. Karasepe, mendahki Lapan kin pitih Seikop, Siohwa ketikihong ih soahng tohto. Oh Seikop uhdahn kalahngankihong Siohwa ni eh pwurehng kilang nah pwutako Sosep. E medewe Sosep mehla  wereilahr! Ahn Seikop nanpwungmwahu keren rehn Siohwa kahrehiong ih en kak dadaur pahn eh kahpwal kan. (Sen. 30:43; 32:9, 10; 46:28-30) Ni atail kin kolokolete nanpwungmwahu keren rehn Siohwa, kitail pil kak pweida ni atail lelohng kahpwal kan me kitail sohte kasik.

8. Dahme Nanmwarki Depit men wia?

⁸ Nanmwarki Depit sohte kak wia soahng koaros me e men wia nan sapwellimen Siohwa doadoahk. Karasepe, Depit uhdahn men kauwada tehnpas sarawi ehu ong eh Kohto. E padahkihong soukohp Nadan me e men wia met. Nadan sapengki: “Komw ketin wiahda dahme komw ketin kupwukupwure, pwe KAUN-O kin ketin ieiang komwi.” (1 Kron. 17:1, 2) Kitail kak medewehla ia duwen mahsen pwukat ar kangoange Depit. Mwein e mwadangete tepida pilahn ong doadoahk laud wet.

9. Ia duwen Depit eh mwekidki rohng kansensuwed?

⁹ Mwurin met, sapwellimen Siohwa soukohpo pwurala rehn Depit oh padahkihong rohng kansensuwed ehu. “Nipwongo,” Siohwa ketin mahsanihong Nadan me kaidehn Depit me pahn kauwada tehnpas sarawio; ahpw, emen nah pwutak ko me pahn wia met. (1 Kron. 17:3, 4, 11, 12) Dahme Depit wia ni eh rong rohng wet? E wekidala eh mehn akadeio. E uhd medemedewehte en kihpene mwohni oh kepwe kan me nah pwutako Solomon pahn anahne ong doadoahk laudo.—1 Kron. 29:1-5.

10. Ia duwen Siohwa eh ketin kapaiahda Depit?

¹⁰ Mwurinte Siohwa ketin padahkihong Depit me kaidehn ih me pahn kauwada tehnpas sarawio, e ketin wiahda inou lap ehu reh. Siohwa ketin inoukihong Depit me emen kadaudoke ko pahn kaunda kohkohlahte. (2 Sam. 7:16) Nan sampah kapwo, ia uwen Depit eh pahn perenki ese me e mihmi pahn Kaundahn Pahr Kid me Nanmwarki Sises, emen kadaudoke, ketin kakaun! Met sewese kitail en kilang me mehnda ma kitail sohte kak wia soahng koaros me kitail men wiahiong Siohwa, atail Kohto kakete ketikihong kitail soahng mwahu teikan me kitail sohte kasik.

11. Soahng mwahu dah kan me tepin Kristian ko lelohng mendahki Wehin Koht saikinte pweida ni ahnsou me re kasik? (Wiewia 6:7)

¹¹ Tepin Kristian ko lelohng kahpwal kei me re sohte kasik. Karasepe, irail uhdahn men Wehin Koht en pweidahr, ahpw irail sehse iahd. (Wiewia 1:6, 7) Eri dahme irail wia? Irail pousehlahte soupisengki doadoahk en kalohko. Ni arail doadoahk en kalohko eh lella wasa tohto, irail kin kilang ia duwen Siohwa eh ketin sewese irail.—Wadek Wiewia 6:7.

12. Dahme tepin Kristian ko wia erein lehk laud ehu?

¹² Ehu ahnsowo, lehk laud wiawi “nan sahpwo pwon.” (Wiewia 11:28) Tepin Kristian ko pil lelohng kahpwal wet. Medewehla ia uwen ar lokolok pwehki lehk laud wet. Pahpa nohno kan uhdahn pwunodki ia duwen ar pahn kak diar kenen arail peneineio mwenge. Ahpw ia duwen me pwulopwul kan me pilahn en kalaudehla arail doadoahk en kalohk? Mwein irail medewe me re en awih lao lehk laudo sohla wiawi? Mendahki ar mi nan soangen irairo, Kristian ko wiahda wekidekla kan. Irail pousehlahte kalohk ni ahl sohte lipilipil, oh perenki ehukihong riarail Kristian kan nan Sudia dahme re ahneki.—Wiewia 11:29, 30.

13. Kapai dah kan me Kristian ko ahneki erein lehk laudo?

¹³ Kapai dah kan me Kristian ko ahneki erein lehk laudo? Irail kan me alehdi soahng kan me re anahne kin kilang duwen Siohwa eh ketin sewese irail. (Mad. 6:31-33) Ele re  karanihala riarail Kristian kan me sewese irail. Oh irail ko me kihda sawas en mwohni de iang sawas ni soangen ahl teikan, ahneki peren me kohsang arail kin kihkihwei. (Wiewia 20:35) Siohwa ketin kapaia irail koaros pwehki re wiahda wekidekla kan nan soangen irairo.

14. Dahme wiawihong Parnapas oh wahnpoaron Pohl, oh ia imwilahn met? (Wiewia 14:21, 22)

¹⁴ Tepin Kristian ko kin kalapw lelohng kalokolok, ekei pak ni ahnsou me re sohte kasik. Medewehla dahme wiawihong Parnapas oh wahnpoaron Pohl erein ara kalokalohk nan wasa ehu nan Listra. Nin tapio, aramas ako kasamwo oh rong ira. Ahpw mwuhr, sounuhwong kan “kamwakid pokono,” oh ekei irail kate Pohl oh kohkohsang pwehn mehla. (Wiewia 14:19) Ahpw Parnapas oh Pohl pousehlahte kalohk ehu wasa tohrohr. Ia imwilahn met? Ira “katohnpadahkihala me tohto,” oh ara koasoi ko oh mehn kahlemeng kakehlaka riara Kristian ko. (Wadek Wiewia 14:21, 22.) Me tohto paiekihda pwehki Parnapas oh Pohl sohte uhdihsang kalohk mendahki ira lelohng kalokolok kan. Ma kitail sohte uhdihsang wia doadoahk me Siohwa ketin kupwurki kitail en wia, e pahn ketin kapaikitailda.

15. Dahme ke sukuhlkihsang mehn kahlemeng en Brother A. H. Macmillan?

¹⁵ Mwohn 1914, sapwellimen Siohwa aramas akan kin kasik me soahng kei pahn wiawi. Karasepe, medewehla Brother A. H. Macmillan. Duwehte me tohto teikan nan ahnsowo, Brother Macmillan medewe me e pahn kereniong kohdahla nanleng. Nan padahk me e wia nan September 1914, e koasoia: “Mwein met iei kaimwiseklahn kapahrek en wehipokon me I pahn wia.” Ahpw kaidehn eh lahsen padahko mwo. Brother Macmillan ntingihedi mwuhr: “Mwein ekei kiht mwadang en medewe me se pahn kohdalahr nanleng.” E pil koasoia: “Dahme se anahne wia iei en soupisengki doadoahk en Kauno.” Ih met me Brother Macmillan wia. E kin uhdahn ngoangki doadoahk en kalohko. E ahneki pwais kaselel en kangoange rie Kristian tohto me selidi pwehki arail soupoupali. Oh ni lelepek, e kin iang towehda mihting en mwomwohdiso kan pil ni eh mahlahr. Ia duwen Brother Macmillan eh paiekihda eh soupisengki papah Siohwa erein eh awiawih ketingpeo? Mwohnte eh mehla nan 1966, e ntingihedi: “Ei pwoson sohte luwetala.” Kitail koaros uhdahn men kahlemengih eh madamadauo—ahpw mehlel ma kitail kin dadaur pahn kahpwal kan wereisang me kitail kasik!—Ipru 13:7.

16. Kahpwal dah me Herbert Jennings oh eh pwoudo lelohng ni soh kasikpe? (Seims 4:14)

¹⁶ Tohtohn sapwellimen Siohwa aramas akan kin lelohng kahpwal en soumwahu me re sohte kasik. Karasepe, koasoipen Brother Herbert Jennings b koasoiahda duwen ih oh eh pwoudo ara perenki ara pwukoahn misineri kei nan Ghana. Ahpw kedekedeo, e ahnekihda soumwahu laud ehu. Brother Jennings doadoahngki Seims 4:14 oh kawehwehda me eh irair kapwo iei “‘lakapw’ me kitail sohte kasik.” (Wadek.) E ntingihedi: “Se anahne pohnese met, eri se koasoanehdi en kohkohsang Ghana oh kompoakepaht keren tohto oh pwurala Canada [pwehn ale epwelpen wini].” Siohwa ketin sewese Brother Jennings oh eh pwoudo en pousehlahte papah ih ni lelepek mendahki kahpwal me ira lelohng.

17. Ia duwen riatail Kristian kan ar paiekihda ahn Brother  Jennings mehn kahlemeng?

 ¹⁷ Dahme Brother  Jennings koasoia uhdahn sewese meteikan. Emen sister ntingihedi: “I uhdahn mwekidkihda ei wadek artikel wet. . . . Ei wadek duwen Brother  Jennings eh anahne kohkohsang eh pwukoa pwehn apwalihala eh soumwahwo sewese ie en kilangwohng ei irairo ni toupahrek.” Duwehte met, brother men ntingihedi: “Mwurin ei wia elder men nan mwomwohdiso erein sounpar eisek, I anahne pwilikihdi ei pwukoau pwehki I ahnekihda soumwahu en madamadau. Ei pepehm en sohte pweida uhdahn laud me kahrehiong ie kalapw nsensuwed laud oh apwalki wadek koasoipen riatail Kristian kan. . . . Ahpw en Brother Jennings eh nannanti kin kangoange ie.” Met katamankihong kitail me kitail kak kangoange meteikan ni atail kin dadaur pahn kahpwal kan me kitail sohte kasik. Mendahki soahng kan sohte kin wiawi nin duwen me kitail kasik, kitail kak wiahte mehn kahlemeng mwahu en pwoson oh dadaur.—1 Pit. 5:9.

18. Nin duwen me kilelo kasalehda, dahme ke sukuhlkihsang mehn kahlemeng en liohdi men nan Nigeria?

¹⁸ Kahpwal laud kan me duwehte soumwahu lusulus en COVID-19 lelohng sapwellimen Siohwa aramas tohto. Karasepe, liohdi men nan Nigeria sohla itar kene mwenge oh nah mwohni. Ehu nimensengo, nah serepeino idek reh dahme re pahn kang mwurin arail kukihada lahsen kanarail raiso. Riatail sistero ndaiong nah serepeino me solahr neirail mwohni de kanarail mwenge me luhwe, ahpw irail en alasang liohdi en Sarepado —ren kaunopada kanarail lahsen mwenge oh likih Siohwa ni unsek. (1 Nan. 17:8-16) Ahpw mwohn arail tepida medemedewe dahme re pahn kang ni souwas en rahno, irail alehdi kepwe kei sang riarail Kristian kan. Nan kepwe ko, mie mwenge me pahn itarohng daulih  wihk riau. Sistero nda me e sohte medewe me Siohwa uhdahn ketin karonge dahme e ndaiong nah serepeino. Ei mehlel, ni atail kin koapworopworki Siohwa, kahpwal kan nan atail mour me kitail sohte kasik kak uhdahn kahrehiong kitail en karanihala ih.—1 Pit. 5:6, 7.

19. Kalokolok dah me Aleksey Yershov lelohng?

¹⁹ Nan sounpar neklahr ko, riatail Kristian tohto kin lelohng kahpwal kan me re sohte kasik. Medewehla Brother Aleksey Yershov me kin mi Russia. Sapwellimen Siohwa aramas akan ahneki ekis saledek ni ahnsou me Brother Aleksey Yershov papidaisla nan 1994. Ahpw nan pahr kan mwuhr, irairo nan Russia wekila. Nan 2020, polihs kei kohdo ni imwen Brother Aleksey Yershov oh rapahki soahng kei oh kihsang kepwe tohto. Sounpwong kei mwuhr, kopermento karaunehki me e kauwehla kosonned. Suwedsang met, karaun ko poahsoandahsang kisin kasdo ehu me aramas emen wiahda me mwomwehda perenki onopki Paipel daulih sounpar ehu. Dahme e wiao uhdahn suwed!

20. Ia duwen Brother Yershov eh kakehlakahda eh nanpwungmwahu rehn Siohwa?

²⁰ Ia duwe, kalokolok me Brother Yershov’s lelohng imwila mwahu? Ei. Eh nanpwungmwahu rehn Siohwa laudla. E koasoia: “Ngehi oh ei pwoudo kin kalapw ehupene oh kapakap. I esehda me I sohte pahn kak dadaur pahn irair wet ma sohte sapwellimen Siohwa sawas.” E pil koasoia: “Wia pein ei onop Paipel kin sewese ien dadaur pahn ei nsensuwed. I kin doudouloale mehn kahlemeng en ladu lelepek kan mahso. Mie mehn kahlemeng tohto me kileldi nan Paipel me kasalehda uwen kesempwal en ahnekihte meleilei oh likih Siohwa.”

21. Dahme kitail sukuhlki nan iren onop wet?

²¹ Dahme kitail sukuhlki sang iren onop wet? Nan koasoandi wet, ekei pak kitail kin lelohng kahpwal kan me kitail sohte kasik. Mendahki met, Siohwa kin ahnsou koaros ketin sewese sapwellime ladu kan me kin likih ih. Nin duwen me iren Paipel me iren onop wet poahsoankihda koasoia: “Apwal tohto kin lelohng aramas mwahu men, ahpw KAUN-O kin ketin doarehsang nan eh apwal akan koaros.” (Mel. 34:19) Kitail en doulahte medemedewe, kaidehn atail kahpwal kan, ahpw sapwellimen Siohwa manaman me kin sewesei kitail. Eri duwehte wahnpoaron Pohl, kitail kak nda: “I kakohng mehkoaros pwehki I ahneki kehl sang rehn me ketikihong ie manaman.”—Pil. 4:13.