1. Nan soangen irair dahieu me kitail kin kaudokiong Siohwa, oh dahme kitail en koasoanehdi teng en wia?

 NAN sampah rahnwet, mie paradais ehu ni lokaiahn karasaras me aramas tohtohie kin soupisengki arail wiewia soahng mwahu tohto. Aramas rar rar kei me mi loale kin ahneki popohl mehlel. Irail kan me mieier nan soangen paradais wet koasoanedier teng en dehr kohkohsang. Irail pil men aramas tohtohie en iang irail mi nan soangen irair tohrohr wet. Irair dahieu me? Iei irair en popohl oh minimin me rasehng paradais ehu me kitail kin kaudokiong Siohwa. Nan soangen irair wet, kitail kin ahneki nanpwungmwahu meleilei rehn Siohwa oh rehn emenemen.

2. Dahme kapwuriamwei duwen irair en popohl oh minimin me rasehng paradais ehu?

² Ni ahl kapwuriamwei ehu, Siohwa ketin wiahda irair en popohl ehu nan ahn Sehdan sampah me diren suwed, keper oh kailok. (1 Sohn 5:19; Kaud. 12:12) Atail Koht limpoako ketin mwahngih duwen koasoandi en mwehi wet eh kin kamedekihala aramas akan oh eri ketikihong kitail perepatail pwe kitail en kak pousehlahte papah ih ni peren. Sapwellime Mahsen kawehwehda irair en popohl oh minimin wet me rasehng paradais nin duwen ‘wasahn ruk’ oh “mwetuwel ehu me diren pihl.” (Ais. 4:6; 58:11) Pwehki sapwellimen Siohwa kapai, irail kan me mi nan soangen paradais wet kin nsenamwahu oh sohte perki mehkot erein imwin rahn apwal pwukat.—Ais. 54:14; 2 Tim. 3:1.

3. Ia duwen kokohpo nan Aiseia irelaud 65 eh tepin pweida?

³ Siohwa ketin doadoahngki soukohp Aiseia pwehn kohpada ia pahn mwomwen mour ong irail kan me pahn mi nan soangen paradaiso. Ke kak kilang duwen kokohp wet nan Aiseia irelaud 65, me tepin pweida nan pahr 537 Mwohn Krais. Ni ahnsowo,  mehn Suhs kan me koluhla saledeksang arail sensel nan Papilon oh pwurala nan uhdahn sapwarail. Siohwa ketin kapaiahda sapwellime aramas ako oh sewese irail en onehda sapahl kahnimw en Serusalem me ohlahr pwehn pwurehng kaselella oh tehnpas sarawio en pwurehng wiahla arail wasahn kaudok ong Siohwa nan Israel.—Ais. 51:11; Sek. 8:3.

4. Ia duwen kokohpo nan Aiseia irelaud 65 eh pweida nan atail ahnsou?

⁴ Keriaun ahnsou me kokohpo pweida tepida nan pahr 1919 ni ahnsou me sapwellimen Siohwa tohnkaudok kan nan atail ahnsou saledekla sang Papilon Lapalap. Irair en popohl oh minimin me rasehng paradais eri tepida ekisekis kohpeseng nan sampah pwon. Sounkalohki Wehio ngoang kan wiahda mwomwohdiso tohto oh kasalehda irair kaselel kan en Kristian. Ohl oh lih akan me mahso kin lemei oh kin wia tiahk samin kan “pwuhriong nan mour kapw me wiawihda nin duwen kupwuren Koht.” (Ep. 4:24) Tohtohn kapai kan me Aiseia kohpada pahn uhdahn pweida ni ahnsou kohkohdo nan sampah kapwo. Ahpw pil ahnsou wet, kitail kin paiekihda kapai tohto. Kitail pahn koasoiapene ia duwen atail kin mwekidki paradais wet oh dahme kahrehda kitail en dehr kohkohsang.

IA PEPEHM EN IRAIL KAN ME MI NAN PARADAIS NI KARASARAS

5. Nin duwen me Aiseia 65:13 inoukihda, dahme kitail kin paiekihda nan paradais ni karasaras?

⁵ Medla oh tihnainda. Kokohp en Aiseia kasalehda wekpeseng laud nanpwungen soangen mour me irail me mi nan paradais ni karasaras oh soangen mour me irail kan me mi liki ahneki. (Wadek Aiseia 65:13.) Ni sapan, Siohwa ketikihong sapwellime tohnkaudok kan soahng koaros me irail anahne pwehn karanihte ih. E ketikihong kitail sapwellime manaman, sapwellime Mahsen, oh sawasepen Paipel kan pwe kitail en kak “paieki kisin tungoal oh pihl tohto, . . . [oh] pereperen.” (Pil kilang Kaudiahl 22:17.) Weksang met, irail kan me mi liki kin “duhpekla oh men nimpilda . . . , [oh] sarohdi.” Irail sohte ahneki nanpwungmwahu rehn Koht.—Eimw. 8:11.

6. Ia duwen Soel 2:​21-24 eh kawehwehda ekei kisakis kan me Siohwa ketikihong kitail, oh ia duwen atail kin paiekihda?

⁶ Nan eh kokohpo, Soel doadoahngki soahng kan me aramas kin anahne pwehn mour, duwehte krein, wain, oh lehn olip pwehn kasalehda me Siohwa kin ketikihong kitail soahng koaros me kitail anahne pwehn kakehlailih atail pwoson, iangahki kaweid kan sang Paipel. (Soel 2:​21-24) Karasepe, e ketikihong kitail Paipel oh sawasepen Paipel kan, neitail website, atail mihting kan, oh mihting tohrohr kan. Kitail kak paiekihda soahng pwukat rahn koaros, oh met kahrehda kitail kin medla oh tihnainda ni karasaras.

7. Dahme kin kihong kitail “irair mwahu en mohngiong”? (Aiseia 65:​14, NW)

⁷ Peren oh nsenamwahu. Sapwellimen Koht aramas akan kak “wer ni peren” pwehki irail uhdahn kalahngan ong Siohwa. (Wadek Aiseia 65:​14, NW.) a Padahk mehlel kan oh inou kangoang kan nan Paipel oh atail koapworopwor ong ahnsou kohkohdo pwehki sapwellimen Krais meirong en pweipwei sapahlo kin kihong kitail “irair mwahu en mohngiong.” Atail koasoiaiong riatail Kristian kan duwen soahng pwukat kin kahrehiong kitail peren laud.—Mel. 34:8; 133:​1-3.

8. Irair kesempwal riau dah me kin keieu pwarada nan paradaiso me kitail koasoia ni karasaras?

⁸ Soangen irair riau me kin keieu pwarada nan paradais wet me kitail koasoia ni karasaras  iei limpoak oh minimin me mi nanpwungen sapwellimen Siohwa aramas akan. Irair riau pwukat me kin “kapatapene mehkoaros” pahn sewese kitail en medewehla ia pahn mwomwen mour nan sampah kapwo, wasa me sapwellimen Siohwa ladu kan pahn kin limpoakpene oh miniminpene laudsang ahnsou wet. (Kol. 3:14) Emen sister koasoiahda dahme e tehkada duwen sapwellimen Siohwa aramas akan ni ahnsou me e tepin tuhwong irail. E koasoia: “I kin sehse ia duwen ei pahn kasalehda peren, pil nan ei peneineio. Tepin ei kilang aramas akan ar kasalehda limpoak mehlel ong emenemen iei ahnsou me I tuhwong Sounkadehdehn Siohwa kan.” Mehmen me men ahneki peren oh nsenamwahu mehlel anahne mi nan paradais wet ni karasaras. Sohte lipilipil dahme sampah wet kin medewehki sapwellimen Siohwa ladu kan, irail ahneki adamwahu rehn Siohwa oh rehn koaros me kin kaudokiong ih.—Ais. 65:15.

9. Dahme Aiseia 65:​16, 17 inoukihda pahn wiawihong soahng kan me kin kahrehiong kitail medek oh lokolok?

⁹ Meleilei oh kommoal mwahu. Aiseia 65:14 (NW) koasoia me irail kan me pilada en mi likin paradais ni karasaras pahn kin “sengiseng pwehki medek en mohngiong [oh] mwahiei pwehki madamadau en sohla koapworopwor.” Ahpw dahme pahn wiawihong soahng kan koaros me kin kahrehda medek oh lokolok ong sapwellimen Koht aramas akan? Ehu rahn, soahng pwukat “pahn sohrala oh manokonokla.” (Wadek Aiseia 65:​16, 17.) Siohwa pahn ketikihsang atail kahpwal kan, oh kedekedeo kitail sohla pahn douluhl tamanda soahng pwukat.

10. Dahme kahrehda ke kin uhdahn kalahnganki omw kin patehng riomw Kristian kan? (Pil kilang kilel.)

¹⁰ Pil ahnsou wet, kitail kin pehm meleilei ni atail towehda mihting kan, wasa me kitail kak kommoal mwahu oh kihsang kapwunod kan en sampah suwed wet. Kitail pil kin sewese riatail Kristian kan en meleilei ni atail kin kasalehda limpoak, peren, popohl, kadek, oh mpahi, me wia kisehn wahn sapwellimen Koht manaman. (Kal. 5:​22, 23) Ia uwen eh wia pai kaselel ehu en iang kisehn sapwellimen Koht pwihn! Irail kan me kin mi nan soangen paradais wet ni karasaras pahn kilang ahnsowo me Koht pahn ketin kapwaiada ni unsek sapwellime inou en wiahda “sampah kapw ehu oh lahng kapw ehu.”

11. Nin duwen me Aiseia 65:​18, 19 mahsanih, ia duwen atail kin mwekidki soangen paradaiso me Siohwa ketin wiahda ong kitail?

¹¹ Kalahnganki oh uhdahn perenki. Aiseia doula kawehwehda kahrepen atail en “nsenamwahukihla oh pereperenki” atail irair en popohl oh minimin me rasehng paradais. Siohwa  me ketin wiahda soangen paradais wet. (Wadek Aiseia 65:​18, 19.) Eri e sohte kapwuriamwei me Siohwa kin ketin doadoahngki kitail en sewese aramas akan en pedoisang pwihn kan nin sampah wet me sohte kin padahkihong irail dahme mehlel duwen Koht, oh sewese irail en iang kitail mi nan soangen paradais kaselel wet. Kitail kin uhdahn perenki kapai kan me kitail ahneki pwehki kitail mi nan padahk mehlel, oh kitail kin men ehukihong meteikan duwen kapai pwukat.—Ser. 31:12.

12. Ia omw pepehm duwen inou kan me kileldi nan Aiseia 65:​20-24, oh dahme kahrehda?

¹² Kitail pil kin kalahnganki oh perenki duwen koapworopworo me kitail ahneki pwehki atail nanpwungmwahu meleilei rehn Siohwa. Song medewehla soahng koaros me kitail pahn kilang oh wia nan sapwellimen Koht sampah kapwo! Paipel inoukihda: “Solahr seri pwelel pahn mehla ni ar pwelel, ahpw koaros pahn kaunsekala irepen ahnsoun ar mour.” Kitail pahn ‘kauwada imwatail kan oh kousoanla loale’ [oh] ‘wiahda atail mwetuwel en wain oh pahn kin nsenamwahuki wahn wain kan.’ Atail doadoahk kan pahn kin pweida mwahu, pwehki Siohwa pahn ketin “kupwuramwahwih” kitail. E ketin inoukihong kitail mour ehu me mie katepe, me kansenamwahu oh sohte keper. “Pil mwohn arail pahn kaimwisekala arail kapakap akan,” e pahn ketin mwahngih ahn emenemen anahn oh “kaitarala ar anahn akan koaros.”—Ais. 65:​20-24; Mel. 145:16.

13. Ia duwen Aiseia 65:25 eh kawehwehda wekidekla kan me aramas akan wiahda nan arail mour ni ar tepida papah Siohwa?

¹³ Popohl oh sohte perki mehkot. Pwehki sawas sang sapwellimen Koht manaman, me tohto me mahso kin uhdahn lemei oh likamw wiadahr wekidekla laud kan nan arail mour. (Wadek Aiseia 65:25.) Irail kin doadoahk laud pwehn kihsang irair suwed kan me re ahneki. (Rom 12:2; Ep. 4:​22-24) Ei mehlel, sapwellimen Koht aramas akan sohte unsek, eri kitail pahn pwurupwurehng wiahda sapwung kan. Ahpw Siohwa ketikipenehier “soangen aramas koaros” me kin poakohng ih oh pil emenemen, oh pwehki met, irail kin ahneki popohl oh minimin mehlel. (Taitus 2:11) Koht me keieu manaman me kak kelehpw ketin wiahda soahng kapwuriamwei wet!

14. Ia duwen dahme wiawihong brother men eh kasalehda mehlelpen Aiseia 65:25?

¹⁴ Ia duwe, aramas akan kak uhdahn wekidala arail irair ko? Medewehla dahme wiawihong mwahnakapw men. Ni ahnsou me e lel sounpar 20, e selidier nan imweteng pak tohto oh kin mourki mour en tiahk samin oh lemei. E kin selikihdi eh pirap sidohsa, pirapa soahng teikan, oh wia tiahk mwersuwed laud teikan. E kin men pei ahnsou koaros. Ni ahnsou me e tepin rong padahk mehlel sang nan Paipel oh tepida towehda mihting en Sounkadehdehn Siohwa kan, e uhdahn kamehlele me e diaradahr mour ehu me mie katepe, me iei en kaudokiong Siohwa nan irair en popohl oh minimin me rasehng paradais. Mwurin e papidaisla, e kin kalapw medewe ia duwen Aiseia 65:25 eh dokedoke ih. Mahso e kin lemei duwehte laion men, ahpw e wekila wiahla aramas meleilei men, duwehte sihmpwul men.

15. Dahme kahrehda kitail men luke meteikan en iang kitail mi nan paradais ni karasaras, oh ia duwen atail kak wia met?

¹⁵ Ire tikitik kan nan Aiseia irelaud 65 kasalehda me Siohwa iei me ketin mahmahsen. Sapwellime mahsen kan kin ahnsou koaros pweida. (Ais. 55:​10, 11) Paradaiso ni karasaras miehier ahnsou wet. Siohwa ketin wiahda peneinei ehu me uhdahn tohrohr me kin kaudokiong ih. Pwehki kitail wia kisehn peneinei wet, kitail kin ahneki meleilei laud ahnsou wet oh sohte perki mehkot nan sampah lemei ehu.  (Mel. 72:7) Pwehki kahrepe pwukat, kitail men sewese aramas tohto en pil wiahla kisehn peneinei wet. Kitail kak wia met sang ni atail kin wiewiahte atail doadoahk en katohnpadahk.—Mad. 28:​19, 20.

IA DUWEN ATAIL KAK SEWESE METEIKAN EN IANG KITAIL MI NAN PARADAIS NI KARASARAS

16. Dahme kak sewese aramas akan en men iang mi nan paradais ni karasaras?

¹⁶ Emenemen kitail ahneki pwukoa kesempwal en sewese meteikan en men iang kitail mi nan paradais ni karasaras. Pwehn wia met, kitail anahne kahlemengih Siohwa. E sohte kin ketin idingkihong aramas akan en wiahla kisehn sapwellime pwihn. Ahpw ni kadek, e kin ketin ‘kakerenihedo’ reh aramas akan. (Sohn 6:44; Os. 11:4) Aramas mwahu kan me sukuhlki duwen sapwellimen Siohwa limpoak oh irair kaselel teikan kin men karanihala ih. Sang atail tiahk mwahu kan, ia duwen atail kak sewese aramas akan en men iang mi nan paradais ni karasaras?

17. Ia duwen atail kak sewese meteikan en iang mi nan paradais ni karasaras?

¹⁷ Ehu ahl me kitail kak sewese meteikan en iang mi nan soangen paradais wet iei sang ni atail kin poakohng oh kadekohng riatail Kristian kan. Ni ahnsou me me kapw kan kin towehda atail mihting kan, kitail men irail en pil ahneki soangen madamadauohte me irail kan me kaidehn Kristian ahneki ni arail towehda mihting kan en mwomwohdisohn Korint mahso. Irail kin nda: “Koht uhdahn ketiket nanpwungamwail.” (1 Kor. 14:​24, 25; Sek. 8:23) Eri, kitail anahne doulahte peikiong kaweido en “ahneki popohl nanpwungatail.”—1 Des. 5:13.

18. Dahme kakete kamwakid aramas akan en men wiahla kisehn atail pwihn?

¹⁸ Kitail en kin ahnsou koaros song en kilangwohng riatail kan ni ahlohte me Siohwa kin ketin wia. Kitail kin wia met sang ni atail kilikilangete  arail irair kaselel kan a kaidehn arail soh unsek kan, me pahn ehu rahn sohrasang irail. Kitail kak kapwungala iren sawehwe kan nanpwungatail ni elen limpoak ma kitail kin ahnsou koaros “kadekpene, poakpene, oh mahkpene ni mehlel.” (Ep. 4:32) Eri aramas akan me kin men meteikan en wiahiong irail wiewia mwahu pwukat pahn men mi nan irair en popohl oh minimin me rasehng paradais. b

MIHMIHTE NAN SOANGEN PARADAISO

19. (a) Nin duwen me koakono “ Irail Kohkohla Ahpw Re Pwurodo” kasalehda, dahme ekei nda mwurin arail pwurodo nan paradais ni karasaras? (b) Dahme kitail en koasoanehdi teng en wia? (Pil kilang kilel.)

¹⁹ Kitail kin uhdahn kalahnganki atail irair en popohl oh minimin me rasehng paradais! E uhdahn kaselel sang mahs, oh tohnkaudok kan en Siohwa kin wie tohtohla sang mahs. Kitail men doulahte kalahnganki soangen paradais wet me Siohwa ketin wiahda ong kitail. Mehmen me men tihnainda, nsenamwahu, meleilei, oh sohte perki mehkot anahne iang mi nan soangen paradais wet oh dehr kohkohsang! Ahpw kitail anahne uhdahn kanahieng pwehki Sehdan kin wia soahng koaros me e kak pwehn pitihkitaildi pwe kitail en sohla mi loale. (1 Pit. 5:8; Kaud. 12:9) Kitail en dehr mweidohng ih en kana. Kitail anahne doadoahk laud pwehn pere lingan, mwakelekel, oh meleilei en atail irair en popohl oh minimin me rasehng paradais.