1. Ia pepehm en ekei ni arail kin koasoiong aramas akan nan kalohk? (Pil kilang kilel.)

 NIN duwen sapwellimen Siohwa aramas kei, kitail kin kalohk ong meteikan pwehki kitail poakohng Samatailo nanleng oh kitail men sewese irail en esehla ih. Sounkalohk tohto kin uhdahn perenki doadoahk en kalohk. Ahpw ekei kin apwalki perenki doadoahk en kalohk. Dahme kahrehda? Ele ekei kin uhdahn namenek oh medewe me irail soakoahiek. Ekei kin soansuwedki kohla imwen aramas akan me sohte luke irail. Ele ekei kin perki me aramas akan pahn lingeringerda pahrail. Aramas ele padahkihong ekei en dehr kin kahrehiong meteikan en lingeringerda. Mendahki irail uhdahn poakohng Siohwa, riatail Kristian pwukat kin apwalki koasoiaiong aramas akan me re sehse duwen rongamwahwo. Ahpw, irail wehwehki uwen kesempwal en doadoahk wet, oh irail kin kaukaule wia met. Ia uwen met eh kin kaperenda Siohwa!

2. Ma ekei pak ke sohte perenki kalohk, dahme kahrehda ken dehr mworusala?

² Ia duwe, ekei pak ke kin apwalki kasalehda peren nan kalohk pwehki ke ahneki soangen pepehm ko? Ma iei, dehr mworusala. Omw sohte likih pein omw koahiek kasalehda me ke aktikitik oh sohte men aramas en nohk tehk uhk. E pil kasalehda me ke sohte men akamaiong aramas akan. Sohte emen men kansensuwedihada meteikan, ahpw mehlel ma re songosong en wia mwahu ong irail. Semomwo nanleng ketin mwahngih omw pepehm oh kupwurki ketikihda sawas me ke anahne. (Ais. 41:13) Nan iren onop wet, kitail pahn koasoiapene  iren sawas limau me pahn sewese kitail en powehdi soangen pepehm pwukat oh ia duwen atail en ahneki peren nan kalohk.

MWEIDOHNG MAHSEN EN KOHT EN KAKEHLAKAIUHKADA

3. Dahme sewese soukohp Seremaia en kalohk ong meteikan?

³ Pil mahso, mahsen en Koht kin kakehlakahda sapwellime ladu kan ni arail kin apwalki kapwaiada arail pwukoa kan. Medewehla mehn kahlemeng en soukohp Seremaia. E ekis pweiek ni ahnsou me Siohwa ketikihong ih pwukoa en kalohk. Seremaia koasoia: “I sohte kin ese pato; I me nohn pwulopwul.” (Ser. 1:6) Dahme sewese ih en ahneki eimah nan kalohk? Mahsen en Koht kin kakehlakahda ih. E koasoia: “Sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.” (Ser. 20:​8, 9) Mendahki ahn Seremaia wasahn kalohko apwal, rohng me e anahne kalohki kin kakehlakahda ih pwehn wia doadoahko.

4. Dahme kin wiawi ni atail wadek Mahsen en Koht oh doudouloale? (Kolose 1:​9, 10)

⁴ Kristian kan kin ale kehl me re anahne sang sapwellimen Siohwa mahsen me mi nan Paipel. Ni wahnpoaron Pohl eh ntinglahng mwomwohdisohn Kolose, e koasoia me arail kalaudehla arail esehla kupwuren Siohwa pahn sewese irail en “kapwarehda wah nan doadoahk mwahu koaros” oh ni ahl wet, “weweid ni ahl me Siohwa ketin kupwurki.” (Wadek Kolose 1:​9, 10.) Doadoahk mwahu wet kin pidada kalohki rongamwahwo. Eri ni atail kin wadek Mahsen en Koht oh doudouloale, atail pwoson Siohwa kin kehlailla oh atail wehwehki kesempwalpen rongamwahwo kin laudla.

5. Ia duwen atail kak paiekihda laud atail onop oh wadek Paipel?

⁵ Pwehn paiekihda laud Mahsen en Koht, kitail en dehr karuwaru ni atail kin wadek, onopki, oh doudouloale. Kihong ahnsou. Ma ke wadek iren Paipel ehu me ke apwalki wehwehki, dehr pohnsehsehla. Doadoahngki Sawas ong Wia Roporop en Sounkadehdehn Siohwa kan, de Watch Tower Publications Index pwehn diar wehwehn iren Paipelo. Ma ke sohte kin karuwaru nan omw onop, ke pahn kakehlakahda omw likih mehlelpen Mahsen en Koht. (1 Des. 5:21) Uwen laud en omw kamehlele met, ih uwen laud en omw pahn perenki ehukihong meteikan dahme ke sukuhlki.

 KAUNOPADA MWAHU ONG KALOHK

6. Dahme kahrehda kitail anahne kaunopada mwahu ong kalohk?

⁶ Ma ke kaunopada mwahu ong kalohk, ke sohte pahn nohn saloh ni omw koasoiong aramas akan. Sises ketin sewese sapwellime tohnpadahk ko ren kaunopada mwohn e poaronehirailla nan kalohk. (Luk 10:​1-11) Pwehki irail kapwaiada dahme Sises ketin padahkihong irail, irail kak wia soahng mwahu tohto oh met kahrehiong irail en uhdahn peren.—Luk 10:17.

7. Ia duwen atail kak kaunopada ong kalohk? (Pil kilang kilel.)

⁷ Ia duwen atail kak kaunopada ong kalohk? Kitail anahne medewe duwen dahme kitail men koasoia oh eri koasoi ni pein atail lokaia. E pahn sawas en medewehla ia duwen aramas akan ar pahn mwekidki met oh ia duwen atail kak sapeng irail. Oh ni atail kin koasoiong aramas akan, kitail en meleilei, sirei, oh kasalehda kadek.

8. Ni ahl dah me Kristian kan duwehte sah pwehl kan me wahnpoaron Pohl karasaraski?

⁸ Wahnpoaron Pohl padahkihong rie Kristian kan: ‘Kitail ahneki pai kesempwal wet nan sah pwehl kan.’ (2 Kor. 4:7) Pai kesempwal dahieu met? Met iei doadoahk en kalohki rongamwahu en Wehio me kin kamourala aramas akan. (2 Kor. 4:1) Soangen sah pwehl dah kei me? E kin karasaraskihong sapwellimen Koht ladu kan me kin padahkihong meteikan rongamwahwo. Ni mwehin Pohl, soun pesines kan kin doadoahngki sah pwehl pwehn audehiong kepwe kesempwal kan duwehte mwenge, wain oh mwohni, oh kadarpeseng. Duwehte met, Siohwa ketikihong kitail pwukoahn kihpeseng rongamwahwo. Pwehki sapwellimen Siohwa sawas, kitail kak ahneki kehl me anahn pwehn pousehlahte kalohk.

KAPAKAPKI EIMAH

9. Ia duwen atail kak powehdi masak aramas? (Pil kilang kilel.)

⁹ Ele ekei pak kitail kin masak aramas. Ia duwen atail kak powehdi met? Medewehla kapakap en wahnpoaron ko ni ahnsou me me lapalap ako ruwese irail en dehr kalohk. Irail sohte masepwehkada oh uhdihsang kalohk ahpw irail peki Siohwa en ketin sewese irail en “eimah oh usehlahte kalohki [sapwellime] mahsen.” Siohwa ketin sapengala arail kapakapo  ni ahnsowo. (Wiewia 4:​18, 29, 31) Ma masak aramas kin kahrehiong kitail en saloh nan kalohk ekei pak, kitail pil anahne kapakapki sapwellimen Siohwa sawas. Peki Siohwa en ketin kalaudehla omw limpoak ong aramas akan pwehn powehdi omw masak aramas pwe ken kak padahkihong irail duwen rongamwahwo.

10. Ia duwen Siohwa eh ketin sewese kitail en kapwaiada atail pwukoa nin duwen sapwellime Sounkadehde kei? (Aiseia 43:​10-12)

¹⁰ Siohwa ketin idihada kitail en wia sapwellime Sounkadehde, oh ketin inoukihda me e pahn sewese kitail en eimah. (Wadek Aiseia 43:​10-12.) Medewehla ahl pahieu me e kin ketin wia met. Keieu, Sises kin ketin ieiang kitail ahnsou koaros me kitail kalohki rongamwahwo. (Mad. 28:​18-20) Keriau, Siohwa ketin idihada tohnleng kan pwehn sewese kitail. (Kaud. 14:6) Kesiluh, Siohwa ketikihong kitail sapwellime manaman pwehn sewese kitail en tamataman dahme kitail sukuhlki. (Sohn 14:​25, 26) Kapahieu, Siohwa ketikihda riatail Kristian kan en sewese kitail. Pwehki sapwellimen Siohwa sawas oh utuht sang riatail Kristian kan sampah pwon, kitail ahneki soahng koaros me anahn pwehn eimah oh pousehlahte kalokalohk.

TOUPAHREK OH AHNEKI MADAMADAU PWUNG

11. Ia duwen omw kak diar aramas tohto nan kalohk? (Pil kilang kilel.)

¹¹ Ia duwe, ke kin mworusala ni omw kin tuhwong aramas keite ni imwarail kan? Ke seu pein idek rehmw: ‘Ia wasa aramas akan kohla ie?’ (Wiewia 16:13) ‘Irail kohla doadoahk de netinet?’ Ma ih met me wiawi, ia duwen omw kak diar aramas tohto ni omw wia doadoahk en kalohk nanial? Brother men me adaneki Joshua koasoia: “I diarada ahnsou mwahu en kalohk ni ei kin aluseli nan wasahn netinet kan oh wasa me aramas akan kin mihmiseli.” Ih oh eh pwoudo Bridget kin diarada aramas tohto nan imwarail ni ara kin kalohk ni soutik kan oh mwurin souwas en Rahn Sarawi kan.—Ep. 5:​15, 16.

12. Ia duwen atail kak esehda dahme aramas akan kin kamehlele oh medemedewe?

¹² Ma nin tapio, emen me ke koasoiong sohte perenki rong rongamwahwo, song esehda dahme e kin kamehlele oh medemedewe.  Joshua oh Bridget doadoahngki peidek me mi nan ehu tract ko ni ara koasoiong aramas akan. Karasepe, ni ara doadoahngki tracto Dahme Ke Kin Medemedewehki Paipel? ira kin nda: “Ekei aramas kin medewe me Paipel kohsang rehn Koht, ahpw ekei soh. Ia omw madamadau?” Met kin kalapw kahrehda ira en kak koasoiong aramas akan.

13. Dahme kahrehda kitail kak pweida mehnda ma aramas akan sohte men rong? (Lepin Padahk 27:11)

¹³ Mendahki aramas akan sohte kin rong ni atail kin kalohk, kitail kin kapwaiadahte atail mehn akadei. Dahme kahrehda? Pwehki kitail kin kapwaiada dahme Siohwa oh sapwellime Ohlo kupwurki kitail en wia—en kadehde. (Wiewia 10:42) Mendahki ma kitail sohte koasoiong emen de sohte me men rong, kitail kak ahnekihte peren pwehki kitail ese me kitail kin kaperenda Samatailo nanleng.—Wadek Lepin Padahk 27:11.

14. Dahme kahrehda kitail kin peren ni emen sounkalohk eh diar emen me perenki rong nan atail wasahn kalohk?

¹⁴ Kitail pil kak perenki ni emen sounkalohk eh diar emen me perenki rong nan atail wasahn kalohk. Kahn Iroir kin kapahrekiong atail doadoahk duwehte atail kin raparapahki seri men me salongala. Tohto kin iang rapahki serio sang ehu wasa lel ehu wasa. Ni ahnsou me serio dierek, koaros, kaidehn me diaradaohte, kin perenda. Pil duwehte met, koaros nan mwomwohdiso kak sewese emen en wiahla sapwellimen Sises tohnpadahk. Kitail anahne koaros nan mwomwohdiso en sewese kalohk ong aramas koaros nan atail wasahn kalohk, oh koaros kin perenki ni emen eh tepida towehda mihting kan.

MEDEMEDEWEHTE OMW POAKOHNG SIOHWA OH ARAMAS AKAN

15. Ia duwen atail medemedewe Madiu 22:​37-39 eh kak sewese kitail en kalaudehla atail perenki kalohk? (Pil kilang kilel ni Kahn Iroir wet.)

¹⁵ Kitail kak kalaudehla atail ngoangki kalohki rongamwahwo sang ni atail medemedewehte atail poakohng Siohwa oh aramas akan. (Wadek Madiu 22:​37-39.) Song en medewehla uwen Siohwa eh ketin kupwurperenda ni eh mahsanih atail kin wia atail doadoahk oh uwen aramas akan ar pahn peren ni arail tepida onopki Paipel! Pil tamataman me irail kan me rong rongamwahwo oh pilada en papah Siohwa kak mour kohkohlahte.—Sohn 6:40; 1 Tim. 4:16.

16. Ia duwen atail kak diar peren ni atail kin mihmihte nan imwatail? Menlau kihda karasaras kan.

 ¹⁶ Ke kin mihmihte nan imwomw pwehki soangen kahrepe kei? Ma ei, medemedewehte dahme ke kak wia pwehn kasalehda omw poakohng Siohwa oh aramas akan. Erein soumwahu lusulus en COVID-19, Samuel oh Dania kin mihmihte nan imwarao. Erein ahnsou apwal ko, ira kin kalapw kalohk nan delepwohn, nting kisinlikou, oh wia onop en Paipel nan Zoom. Samuel kin kalohk ong irail kan me e tuhwong nan imwen winio, wasa me e kin aliale epwelpen eh soumwahu en kanser. E koasoia: “Ni atail kin lelohng ahnsou apwal, ele kitail kin pwunodada oh pwangada, oh atail pwoson kakete lelohng songosong. Kitail anahne peren ni atail kin papah Siohwa.” Patehng eh kahpwalo, Dania pwupwudi oh anahne wonohn tohr nan peht erein sounpwong siluh. E anahne mi nan wheelchair erein sounpwong weneu. E koasoia: “I song en wia uwen me ei irairo kakohng. I koasoiong nurse men me kin mwemweitdo rehi, oh I pil koasoiong irail kan me kin wahdo soahng kei ni imwato. I pil koasoiong emen lih nan delepwohn me kin doadoahk ong kompani ehu me kin netiki wini.” Mendahki Samuel oh Dania sohla kak wia uwen laud duwehte mahso, ira wia dahme ira kakohng oh uhdahn perenki ara doadoahko.

17. Ia duwen omw kak uhdahn paiekihda iren sawas limau ko nan iren onop wet?

¹⁷ Song en kapwaiada iren sawas limau ko me mi nan iren onop wet. Ehuehu iren sawas ko kin duwehte mehn doal kan me anahn pwehn wiahda soangen mwenge ieu. Ni mehn doal ko koaros ar patpene, mwengeo pahn uhdahn iou. Ni atail doadoahngki iren sawas pwukat koaros, kitail pahn kak powehdi madamadau sapwung oh kalaudehla atail peren nan doadoahk en kalohk.