1, 2. (a) Ia duwen kokohp en Aiseia 60:22 eh pweida ni imwin rahn pwukat? (b) Anahn dah kan me mie ahnsou wet nan sapwellimen Siohwa pwihn nin sampah?

 “ME KEIEU tikitik oh sohte wede rehmwail pahn lapalapala rasehng wehi lapalap ehu.” (Ais. 60:22) Kokohp wet wie pweipweida ni imwin rahn pwukat. Erein pahr en kalohk en 2015, sapwellimen Siohwa ladu meh welirar rielopw rienen epwiki limen (8,220,105) kalohki duwen Wehio nin sampah pwon! Koht mahsanih duwen kekeirdahn sapwellime aramas akan: “I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me KAUN-O!” Eri kedekedeo, atail doadoahk pahn wie lalaudla. Ia duwe, kitail kin wia uwen atail kak pwehn kalohki duwen rongamwahwo ni ahnsou wet? Tohto riatail Kristian kan kin papah nin duwen pioneer de sawaspen pioneer kei. Ekei keseula wasa teikan pwehn sewese doadoahk en kalohk, oh meteikan kin doadoahk laud kauwada atail Wasahn Kaudok kan.

² Sounpar koaros, mpen mwomwohdiso 2,000 kin wiawihda, eri anahnepen tohndoadoahk kan kin lalaudla. Karasepe, mwomwohdiso pwukat anahne elder oh sounsawas kan. Sounpar koaros, sounsawas kid kid kei anahne wiahla elder kei oh brother kid kid kei anahne  wiahla sounsawas kei. E sansal me mie “soahng tohto nan doadoahk en Kauno,” oh met kaidehn ongete brother kan, ahpw pil ong sister kan.​—1 Kor. 15:58, NW.

3, 4. Me pid kekeirda nan omw papah Siohwa, ia wehwehn met ong uhk?

³ Wadek 1 Timoty 3:1, NW. * Wahnpoaron Pohl kin kapinga rie Kristian ko me kin “nantihong ale pwukoa” en sounapwalih kei. Pwe aramas emen en kak ale mehkot me apwal en ale, e pahn anahne nantihong oh ele kapahwei peho pwehn ale. Nna medewehla brother men me men wiahla sounsawas men. E pohnese me e anahne nantihong kakairada eh irair en Kristian. Eri, ni eh wiahla sounsawas men, e kin pousehlahte doadoahk laud pwe en kak wiahla sounapwalih men.

⁴ Ekei riatail Kristian kan kin wiahda wekidekla kan nan arail mour pwehki re men kalaudehla arail papah Siohwa. Karasepe, ele re men pioneer, doadoahk nan Pedel, de sewese kauwada Wasahn Kaudok kan. Kitail pahn kilang ia duwen Paipel eh kak sewese kitail koaros en pousehlahte kekeirda nan atail papah Siohwa.

5. Ia duwen me pwulopwul kan ar kin doadoahngki ar kehl nan doadoahk en Wehio?

⁵ Me pwulopwul kan kak wia soahng tohto nan arail papah Siohwa pwehki irail kehlail oh ahneki roson. (Wadek Lepin Padahk 20:29.) Ekei brother pwulopwul kan nan Pedel kin sewese wiahda Paipel oh sawaspen Paipel kan. Tohto Kristian pwulopwul kan kin iang doadoahk en kauwada oh apwalih Wasahn Kaudok kan. Ekei kin toukihda pein irail en sawas ni ahnsou me kahpwal kan en melimel, rerrer en sahpw de iloak laud ape kin wiawi. Oh tohto pioneer pwulopwul kan kin esehla lokaiahki ehu lokaia tohrohr de keseula sahpw teikan pwehn kalohki rongamwahwo.

6-8. (a) Ia duwen mwahnakapw men eh wekidala eh madamadau ong sapwellimen Koht doadoahk, oh ia imwilahn met? (b) Ia duwen atail kak “rapahki ia uwen kalahngan en KAUN-O”?

⁶ Kitail kin poakohng Siohwa oh men patohwanohng uwen atail kak koaros. Mendahki met, ele kitail ahneki soangen pepehmohte me brother men me adaneki Aaron ahneki. E men papah Koht ni peren ahpw e sohte peren. Mendahki Aaron kin iang towehda mihting kan oh kohla kalohk ni eh pwulopwulo, e nda, “I kin sangatki mihting kan oh pil kalohk.” Eri, dahme e wia?

⁷ Aaron nantihong en kin wadek Paipel rahn koaros, kaunopada ong mihting kan, oh iang pasapeng. E pil tepida kaukaule kapakap. Mepwukat koaros sewese ih en kekeirda nan eh papah Siohwa. E kalaudehla eh ese duwen Siohwa oh eh limpoak ong Siohwa pil laudla. Pwehki met, Aaron ahneki peren laud. E wia doadoahk en pioneer, sewese meteikan ni kahpwal laud duwehte melimel, rerrer en sahpw ape ar kin pwarada, oh kohla kalohk ehu sahpw tohrohr. Met e wia elder men oh kin papah nan Pedel. Ia eh madamadau ong eh mour? E nda: “I kilang ‘ia uwen kalahngan en Siohwa.’ Pwehki sapwellime kapai kan, I pehm me mie ei pweipwand ong ih oh met kamwakid ie en kalaudehla ei wia sapwellime doadoahk, oh met kin wahdo kapai tohto.”

⁸ Sounmelkahkao nda: “Kumwail pein rapahki ia uwen kalahngan en KAUN-O.” E pil nda: “Irail koaros me kin peikiong pahn ahneki soahng koaros me re anahne.” (Wadek Melkahka 34:8-10.) Ei, ni atail patohwanohng Siohwa dahme keieu mwahu rehtail, kitail kin uhdahn peren pwehki kitail ese me kitail kin kaperenda ih. Oh  e pahn ketin kolokol sapwellime inou en ketin apwalih kitail.

9, 10. Dahme kahrehda e kesempwal en “koapworopwor awiawih”?

⁹ Kitail ele kin inengieng kalaudehla atail papah nan sapwellimen Siohwa doadoahk. Ahpw ia duwen ma kitail kin awih ahnsou werei pwehn alehdi soangen pwais ehu nan mwomwohdiso de atail irair kan kin wekila? Kitail ele anahne kanengamah. (Maika 7:7) Oh mehnda ma Siohwa ele ketin mweidohng kitail en doulahte mi nan atail irairo, kitail kak kamehlele me e pahn ahnsou koaros ketin sewese kitail. Kitail kak sukuhlkihsang mehn kahlemeng en Eipraam. (Ipru 6:12-15) Siohwa ketin inoukihong me e pahn nainekihda pwutak men, ahpw e anahne awih sounpar tohto lao Aisek ipwidi. Erein ahnsowo, Eipraam kanengamah oh sohte uhdihsang eh pwoson Siohwa.​—Sen. 15:3, 4; 21:5.

¹⁰ Ei mehlel, e sohte mengei en kin awih. (Lep. Pad. 13:12) Ma kitail kin kalapw medemedewe duwen atail irairo oh ia uwen atail nsensuwedla, kitail pahn uhdahn mworusala. Ahpw, kitail kak doadoahngki atail ahnsou pwehn kamwahwihala irair kan me kitail anahne pwehn apwalihala pwukoa kan nan mwomwohdiso.

11. Soangen irair dah kan me kitail kak kakairada, oh dahme kahrehda mepwukat kesempwal?

¹¹ Kakairada irair kaselel kan oh koahiek me ke anahne. Sang ni omw wadek Paipel oh doudouloale, ke kak sukuhlki ia duwen omw kak ahneki erpit, en medemedewe mwahu irair kan ni toupahrek, oh wiahda pilipil mwahu kan. Brother kan anahne irair kan duwehte met pwehn apwalih mwomwohdiso. (Lep. Pad. 1:1-4;  Taitus 1:7-9) Ni atail onopki Paipel, kitail kak esehla ia sapwellimen Siohwa madamadau ong irair tohto. Eri rahn koaros, kitail kak doadoahngki dahme kitail sukuhlki pwehn wiahda pilipil kan me kin kaperenda Siohwa. Karasepe, kitail pahn esehla ia pahn atail wiewia ong meteikan, ia duwen atail pahn doadoahngki mwohni, oh ia duwen atail pahn pilada mehn kamweit oh likou kan.

12. Ia duwen tohnmwomwohdiso ar kak kadehdehda me irail wia aramas likilik kei?

¹² Doadoahk laud nan pwukoa koaros me ke alehdi. Ni ahnsou me sapwellimen Koht aramas akan onohne sapahl tehnpas sarawio, Nehmaia anahne ohl akan en apwalih soangsoangen pwukoa kan. E pilada irail kan me adamwahu rehn aramas. E ese me ohl pwukat poakohng Koht oh me re pahn doadoahk laud nan soangen doadoahk koaros me kohwohng irail. (Neh. 7:2; 13:12, 13) Pil duwehte rahnwet, irail kan me lelepek oh kin doadoahk laud pahn adamwahula oh ele pahn alehdi pwukoa tohto. (1 Kor. 4:2) Eri mehnda ma kitail brother de sister kei, kitail anahne ahnsou koaros wia uwen atail kak nan doadoahk koaros me kitail alehdi.​—Wadek 1 Timoty 5:25.

13. Ia duwen omw kak idawehn mehn kahlemeng en Sosep ma meteikan kasalehiong uhk wiewia sapahrek?

¹³ Likih Siohwa. Dahme ke kak wia ma meteikan kasalehiong uhk wiewia sapahrek? Ele ke kak kawehwehiong irail ia omw pepehm. Ahpw ma ke kalapw uhki pein uhk oh ngihtehtehki me kowe me pwung, ke kak kahrehiong irairo en suwedla. Kitail kak sukuhlki laud duwen mehn kahlemeng en Sosep. Rie pwutak ko wiekauwe ih. Aramas akan nda soahng likamw kan duwen ih, oh e selikihdi mehkot me e sohte wiahda. Ahpw Sosep likih Siohwa. E kin medewe duwen sapwellimen Siohwa inou kan oh kin kolokol eh lelepek. (Mel. 105:19) Nan soangen ahnsou apwal ko, e kakairada irair kaselel tohto me mwuhr sewese ih ni eh alehdi pwukoa kesempwal kan. (Sen. 41:37-44; 45:4-8) Ma ahn aramas akan wiewia ong uhk sapahrek, kapakapki erpit sang Siohwa. E pahn ketin seweseiuk en kanengamah oh koasoiong meteikan ni ahl kadek.​—Wadek 1 Piter 5:10.

14, 15. (a) Dahme kahrehda kitail anahne “kanakanahieng” mwomwen atail kin kalohk? (b) Ia duwen omw kak wekidala omw wiepen kalohk nan soangsoangen irair kan? (Menlau kilang tepin kilel oh koakon me oaralape “ Ke Kak Song Ehu Wiepe Tohrohr?”)

¹⁴ Pohl ndaiong Timoty en pousehlahte kakairada mwomwen eh kin kawehwe Paipel. Pohl nda: “Kanakanahieng pein kowe oh pil kanahieng omw padahk kan.” (1 Tim. 4:13, 16) Timoty kalokalohkehr erein sounpar tohto. Ahpw dahme kahrehda e anahne kamwahwihala met? Timoty ese me aramas oh irair kan kin wekila. E sohte men aramas akan en uhdi rong ih, ihme kahrehda e anahne pousehlahte kamwahwihala oh wekidala mwomwen eh kin padahkih irail. Rahnpwukat, kitail pil anahne wia duwehte.

¹⁵ Nan ekei wasa, ni atail kin kalohk ihmw lel ihmw, kitail sohte kalapw tuhwong aramas akan ni imwarail. Nan wasa teikan, ele aramas akan mi imwarailo, ahpw kitail sohte kak lellahng ni arail wenihmw ko, ele pwehki kitail sohte kak pedolong nan wasa me re mi loale. Ia duwe, ma met kin wiawi nan omw wasahn kalohk, ke kak song ehu wiepe tohrohr pwehn tuhwong aramas akan?

16. Ia duwen kalohk ong wehipokon eh kak wia wiepen kalohk ehu me kin pweida?

¹⁶ Riatail Kristian tohto kin perenki wia kalohk ong wehipokon. Karasepe, re kin kohla ni wasahn kisa oh bus kan, ni wasahn netinet oh mwemweit kan pwehn koasoiong aramas akan. Ele Sounkadehde men kak tepida koasoiong emen duwen ripoht en nuhs kapw ehu. De Sounkadehdeo kak nda mehkot mwahu duwen nein aramaso seri ko de idek reh duwen eh doadoahko. Ma  aramaso mwomwen perenki ara koasoakoasoipeneo, sounkalohko ele kak koasoia duwen ehu iren Paipel oh idek ia eh madamadau ong ireo. Aramas akan kin kalapw men kalaudehla arail ese duwen Paipel.

17, 18. (a) Ia duwen omw kak kalaudehla omw eimah ni omw kalohk ong wehipokon? (b) Ni omw kin kalohk, dahme kahrehda ahn Depit eh kapinga Siohwa wia mehkot kesempwal ong uhk?

¹⁷ Ele ke kin apwalki tepida koasoiong aramas akan nanial kan me ke sehse. Ih soangen pepehm wet me Eddie, pioneer men nan kahnimw en New York, ahneki. Ahpw e diarada mehkot me sewese ih en kalaudehla eh eimah. E nda: “Erein at kaudok en peneinei, ngehi oh ei pwoudo kin wia roporop pwehn diarada pasapeng kan ong dahme aramas akan kin uhkihong kiht oh soangen madamadau kan me re kin kasalehda. Se pil kin peki sawas sang Sounkadehde teikan.” Met Eddie kin kasikasik ahnsoun kalohk ong wehipokon.

¹⁸ Ni atail perenki atail doadoahk en kalohk oh kamwahwihala mwomwen atail kin koasoiong aramas akan duwen rongamwahwo, meteikan pahn tehk atail kekeirda nan atail nanpwungmwahu rehn Siohwa. (Wadek 1 Timoty 4:15.) Oh ele kitail pil pahn sewese emen en wiahla sapwellimen Siohwa ladu. Depit nda: “I pahn patohwan kapingkalahngan ong KAUN-O ahnsou koaros; I sohte pahn tokedihsang ei kapikapinga. I pahn kin patohwan kapingahki wiepen nin lime kan; kumwail me toutoulahr akan, kumwail rong oh nsenamwahula!”​—Mel. 34:1, 2.

19. Dahme kahrehda sapwellimen Siohwa ladu lelepek men anahne peren, mehnda ma eh irair kan kin kahrehda en apwal ong ih en wia met?

¹⁹ Depit pil nda: “Maing KAUN, wiepen nin limomwi kan koaros pahn kapinga komwi, oh sapwellimomwi aramas akan pahn kasapahlkalahngan ong komwi. Re pahn koasoia duwen lingan en sapwellimomwi wehi, oh pil duwen sapwellimomwi manaman, Pwe aramas koaros en dehdehkihla duwen wiepen nin limomwi manaman akan oh pil duwen roson lingan en sapwellimomwi wehi.” (Mel. 145:10-12) Koaros me kin poakohng Siohwa oh loalopwoatohng ih kin uhdahn inengieng padahkihong meteikan duwen ih. Ahpw ia duwen ma pwehki omw soumwahu de mahla, ke sohte kak doadoahngki uwen ahnsou me ke mwahuki en kalohk ihmw lel ihmw? Ahnsou koaros tamataman me ke kin kapikapinga Siohwa ahnsou koaros me ke kin koasoiaiong meteikan duwen ih, duwehte ong nurse de toahkte kan. Ma ke mi nan imweteng pwehki omw pwoson, ke kakete padahkihong meteikan duwen Siohwa, oh met kin uhdahn kaperenda Siohwa. (Lep. Pad. 27:11) E pil kin uhdahn ketin peren ma ke kin papah ih mehnda ma tohn omw peneinei sohte wia met. (1 Pit. 3:1-4) Pil pahn irair kan me inenen apwal, ke kak kapinga Siohwa, pousehlahte karanihala ih, oh kekeirda nan omw papah ih.

20, 21. Ma tohtohla omw pwukoa kan nan sapwellimen Siohwa pwihn, ia duwen omw kak wia kapai ehu ong meteikan?

²⁰ Siohwa uhdahn pahn ketin kapaia iuk ma ke pousehlahte karanihala ih oh wia uwen omw kak pwehn papah ih. Ele ni omw wiahda ekei wekidekla kan nan omw koasoandi de omw mour, ke pahn ahneki ahnsou mwahu tohto en sewese aramas akan en esehla duwen sapwellimen Koht inou kaselel kan. Ele ke pil kak kalaudehla omw sewese riomw Kristian kan. Oh medewehla ia uwen riomw Kristian kan ar pahn poakohng uhk ni arail kilang me ke kin doadoahk laud nan mwomwohdiso.

²¹ Sohte lipilipil uwen werei atail papah Siohwa, kitail koaros kak pousehlahte karanihala ih oh kekeirda nan atail papah ih. Nan iren onop en mwuhr, kitail pahn koasoiapene ia duwen atail kak sewese meteikan en kekeirda nan arail papah Siohwa.