I SOUNPAR 12 ahnsou me I esehda me mie mehkot kesempwal rehi me I kak toukihda. Nan mihting tohrohr ehu, brother men idek rehi ma I men iang kalohk. Mendahki saikinte pak ehu I iang kalohk, I nda, “Ei.” Se kohla ni wasahn kalohko oh e kihong ie kisin pwuhk kei duwen Wehin Koht. E ndaiong ie: “Ke pahn kohla rehn aramas ako apali ahlo, a I pahn kohla apali.” I saloh ahpw I tepida kohla ihmw lel ihmw, oh pwuriamweikihla me sohte pwand, I kihlahr kisin pwuhk ko koaros. E sansal me aramas tohto men ale dahme I kihong irail.

I ipwidi nan pahr 1923 nan Chatham, Kent, England, oh I tikida wasa ehu me diren aramas nsensuwed. Mahwen lapalapo sohte kapwaiada inou me dene e pahn kahrehiong sampah en mwahula sang mwoweo. Ei pahpa oh nohno pil nsensuwedkihla kaunen pelien lamalam en Baptist ko arail kin nsenohkihte arail pahn paiamwahula. Ni ei sounpar 9, ei nohno tepida kohla wasahn tuhpene en tohnsukuhl kan en Paipel (International Bible Students Association), wasa me aramas akan me adanekihla Sounkadehdehn Siohwa kan kin wia arail “kasukuhl,” de mihting kan. Emen sister ko kasukuhlih kiht seri kan iren mehn kasukuhl en Paipel oh pil pwuhk ehu me adaneki The Harp of God. I perenki dahme I sukuhlkio.

Ni ei pwulopwul, I perenki ehukihong aramas akan koapworopwor sang Mahsen en Koht. I kin kalapw kelehpw kohla ihmw lel ihmw, ahpw I pil ale kasukuhl sang ei iang meteikan kalohk. Karasepe, rahn ehu ni ei iang brother mah men pwaisikel kohla wasahn kalohko, se daulih kaunen pelien lamalam men oh I nda, “Kilang kuhto.” Brothero kauhdi were pwaisikelo oh nda sen kohla mahs mwohndi pohn lepin tuhke ehu. E ndaiong ie: “Ihs me kihong uhk manaman en kadeik emen ma ih kuht men? Kita en itarkihte ata kin ehukihong aramas akan rongamwahwo oh mweidohng Siohwa en ketin kadeik aramas.” Ni ahnsou ko, I sukuhlki soahng tohto duwen en perenki kihkihwei.​—Mad. 25:31-33; Wiewia 20:35.

Pil emen brother padahkihong ie me kitail anahne kanengamah ni atail dadaurete pahn kahpwal kan pwe kitail en diar peren ni atail kin kihkihwei. Eh pwoudo kaidehn emen Sounkadehdehn Siohwa. Ehu pak, brothero lukei ie en iang ih kohla ni imweo oh nim tea. Eh pwoudo inenen lingeringerkihda brothero eh kohla kalohk, oh tepida katehkin kiht tea ko. Brothero sohte lingeringerda oh pelianda, ahpw e kapwurehla tea ko nan dewerail ni peren. Sounpar kei mwuhr, brothero ale ketingpen eh kanengamah ni eh  pwoudo papidaisla wiahla emen Sounkadehdehn Siohwa.

Ei inengieng ehukihong meteikan koapworopwor en ahnsou kohkohdo kin doulahte wie kekeirda, oh ngehi oh ei nohno papidaisla nan Dover nan March 1940. Britain tepida mahweniong Sehmen nan September 1939 ahnsou me I sounpar 16. Nan June 1940, I kesihnen ni at wenihmwo oh kilang weren sounpei sidohsa kan daulih imwato oh wa sounpei kid kid kei me mesen pahtou laud. Irail iang pitla nan Mahwen en Dunkirk. I kilang ni meserail ko me solahr arail koapworopwor oh I uhdahn men padahkihong irail duwen Wehin Koht. Mwuhr nan sounparohte, Sehmen tepida pakudangih Britain. Ni pwong koaros I kin kilang weren mehn Sehmen ko wararail sompihr en mahwen ko ar pihr pohn at wasao. Ke kak rong ngilen kuwai ni pakudang ko ar wie pwumpwumdi, oh met kalaudehla ei masepwehk. Manda ni menseng, ni at kohieila liki, se kin diar lapalahn wasa kei me ihmw tohto ohla. Met kalaudehla ei kamehlele me Wehin Koht iei ihte koapworopwor ong ahnsou kohkohdo.

Nan pahr 1941, I uhdahn tepida mourki mour ehu me kahrehiong ie peren laud. I kin doadoahk nin duwen tohnsukuhl men ni wasahn wiahda de kamwahwihala sohp kan ni Royal Dockyard nan Chatham. Me tohto kin men doadoahk wasao pwehki mie kamwahu laud me re kak alehdi. Erein ahnsou reirei, sapwellimen Siohwa ladu kan kin wehwehki me Kristian men sohte anahne iang wehi kan mahwenpene. Nan pahr 1941, se ekisekis wehwehkihla me se sohte anahne doadoahk nan wasa kan me kin wiahda dipwisoun mahwen. (Sohn 18:36) Pwehki wasahn doadoahko kin wiahda soangen sohp me kin mi pahn sehd (submarines), I koasoanehdi ahnsowo me I anahne kohkohsang ei doadoahko oh kihong pali laud en ei ahnsou ong papah Koht. Tepin pwukoa me I alehdi iei en kohla Cirencester, kahnimw kaselel ehu nan Cotswolds.

Ahnsou me I sounpar 18, I selidi erein sounpwong duwau pwehki I sohte men iang sounpei. Ni ahnsou me I rong wenihmwen ei imwetengo eh ritidi oh I kelehpwla, I uhdahn nsensuwed. Ahpw sohte pwand, tohndoadoahk oh tohn kalapwuhs ko tepida idek rehi dahme kahrehda I mihmihki mwo, oh I perenki kawehwehiong irail dahme I kin kamehlele.

Mwurin ei lapwada, brother ko peki I en iang Leonard Smith * kalohk nan kahnimw kan nan Kent wasa me I tikida ie. Tepida pahr 1944, sompihr daulih kid kei me misihn me katanga oh audaudki pakudang kin pwupwudi Kent. Se mihte pahn wasao me sompihr ko kin pihr powe, nanpwungen wasa me mehn Nazi kan  mi ie nan Iurop oh London. Re kin kahdaneki sompihr pwukat doodlebugs. E uhdahn kamasepwehk, pwehki ma ke rong ngilen sompihro eh kunla, oh se kin kalapw rong, ke ese me seken kei mwuhr sompihro pahn pwupwudi oh pospeseng. Se onop Paipel rehn pwopwoud ehu me naineki seri silimen. Ekei pak, se kin mwohd pahn tehpel ehu me peneineio wiahkihda mete pwehn pere irail ma ihmwo pwupwudi. Mwuhr, peneineio pwon papidaisla.

Mwurin mahweno, I pioneer sounpar riau ni palieir en Ireland. Se sehse uwen Ireland eh weksang England. Se kin kohla ihmw lel ihmw oh peki rehn aramas ako wasa me se kak kousoan ie. Se kin nda me kiht misineri kei oh se kin kihla nait makasihn kan pohn ahlo. Nan wasa ieu me tohto mehn Kadolik, dahme se wia kin mwomwen “pweipwei”! Ni emen ohl eh lemeiong kiht, I kohla kaulim ong pilismen men, me ndaiong ie, “Pwe dahme ke kasik?” Se uhdahn sehse uwen manaman me padre ko ahneki wasao. Ma aramas ako ale nait pwuhk kan, padre ko pahn kihsang arail doadoahk. Padre ko pil kauskihtsang wasa me se kin kousoan ie.

Se mwadang en wehwehkihla me ni at pahn lella wasahn kalohk kapw ehu, e pahn keieu mwahu ma se pwaisikel lao se dohsang wasa me se kousoan ie, oh kalohk ongete aramas akan me ahneki emen padre tohrohr. Mwurin mwo, se kin kohla tuhwong aramas akan me karanih wasao. Nan Kilkenny, se onop rehn mwahnakapw men pak siluh nan wihk ehu mendahki pwihnen aramas ehu kin lemeiong ih. I uhdahn perenki padapadahngki padahk mehlel en Paipel kahrehda I pilada en audehda doaropwehn iang kasukuhl en misineri ni Sukuhl en Kilead.

Mwurin kasukuhl en Kilead erein sounpwong limau nan New York, kiht meh pahmen me iang kesepwil, oh se pekederla nan kisin deke kan nan Sehden Caribbean. Nan November en pahr 1948, se mweselsang New York City oh dake sohp serek ehu (schooner) me reireiki piht 59 me adaneki Sibia. Sohte pak ehu I iang sohp serek, eri I uhdahn peren. Emen reht, Gust Maki, kin koahiek en katanga sohp. E padahkihong kiht soahng kei duwen katanga sohpo, duwehte ia duwen at pahn apihada oh kaiedi serek ko, mwomwen at idawehn kampos, oh ia duwen omw pahn katanga sohpo pangapang pelian kisiniengo. Ni koahiek, Gust katanga sohpo erein rahn 30, pil nan kisinieng laud kan, lao se lel Bahamas.

Mwurin at kalokalohk erein sounpwong kei nan deke tikitik kan nan Bahamas, se mwesella Leeward Islands oh Windward Islands, daulih mwail 500 sang Virgin Islands me karanih Puerto Rico oh douluhlla karanih Trinidad. Erein sounpar limau, se kalokalohk nan deke doh kan me sohte Sounkadehdehn Siohwa kan mi ie. Ekei pak se sohte kak kadar de ale nait kisinlikou erein wihk tohto. Ahpw ia uwen kaperen en at kin lohkiseli mahsen en Siohwa nan deke ko!​—Ser. 31:10.

Ni at peidi limwahn oaroahr ehu, tohn wasao pwuriamweikihla at lella mwo, oh re pokondohng wasahn peidio pwehn kilang ihs kiht. Ekei irail saikinte kilang soangen sohp me se dakeo de pil kilang mehn wai. Tohn deke ko kin kadek oh poadidiong arail pelien lamalam oh re ese mwahu duwen Paipel. Re kin kalapw kihong kiht kanat mwahmw, avocado, oh peanut. Sohte itar wasahn meir, kuk, de lopwolopw pohn warat sohpo, ahpw se kak wia soahng pwukat.

Se kin seila ni oaroahro oh kalohk ong aramas akan rahno pwon. Se kin padahkihong irail me se pahn wia padahk ehu sang nan Paipel. Eri ni soutik se kin leser pehl en sohpo. E uhdahn kaperen en kilang tohn  wasao ar kin kohdo. Neirail kisin lamp ko kin rasehng lingaling en usu kan ni ar kin aluhdihsang pohn kumwukumw kan. Ekei pak aramas epwiki kei kin kohdo, oh re kin mihmi werei oh idihdek peidek kan. Re perenki koul, eri se daipiada ekei koul kan sang neitail pwuhken koul en kaping ong Siohwa oh kihong irail. Ni kiht pahmeno at koulki koul ko, aramas ko iang kiht oh ngilarail ko uhdahn kaselel oh pahrekpene. Ia uwen kaperen en ahnsou ko!

Mwurin at kin wia onop en Paipel ehu, ekei tohnsukuhl en Paipel ko kin iang kiht kohla rehn peneinei me se pahn uhd onop rehrail pwehn iang kiht onop. Se kin mi wasa ehu erein wihk keite, eri se kin kalapw peki rehn irail kan me uhdahn perenki rong ren pousehlahte onop ong meteikan lao se pwurodo wasao. E kin mwahu en kilang ni ekei irail ar uhdahn nsenohki pwukoa me se kihong irail en wia.

Rahnwet, pali laud en deke ko wiahla wasahn tourist, ahpw mahso wasa pwukat wia wasa kei me aramas sohte kalapw kohla ie oh sehdo, pihk oaroahr, oh nih ko uhdahn kaselel. Se kin kalapw sereklahng ehu deke lel ehu deke nipwong kan. Laidiniki kan kin mwadong oh pap keilen warat sohpo, oh ke kak rong ngilen sehdo eh kin pwurasang mwohn sohpo ni at tangatang kohwei. Maramo daker pohn sehdo me mwele oh e rasehng ahl silper ehu me mi mwoht.

Mwurin at kalokalohk nan deke kan erein sounpar limau, se seiloakla Puerto Rico pwehn wilianda warat sohpo ong pwoat me mie misihn. Ni at lella mwo, I tuhwong Maxine Boyd, sister kaselel men me wia misineri wasao, oh I mwahukihda oh poakepoakehla. E kin ngoangki kalohki rongamwahwo sangete ni eh tikitik. Mwuhr, e wia misineri men nan Dominican Republic lao koperment en wasao, me mi pahn manaman en Kadolik, kadarasang ih wasao nan pahr 1950. Pwehki I iang sohp, I naineki doaropwe me mweidohng ie en mihmi Puerto Rico sounpwong ehute. I pahn kereniong seiloakla ni deke ko oh mihmi sounpar kei. Eri I ndaiong pein ngehi, ‘Ronald, ma ke mwahuki serepeino, ke anahne mwadang wiahda omw pilipil.’ Wihk siluh mwuri I peki en pwoudkin ie, oh mwurin wihk weneu se pwopwoudla. Ngehi oh Maxine wiahla misineri kei nan Puerto Rico, eri I sohte iang pwoat kapwo.

Nan pahr 1956 se tepida mwemweitla ni mwomwohdiso kan nin duwen sounapwalih me kin seiloak. Pali laud en brother ko semwehmwe, ahpw se perenki mwemweitla rehrail. Karasepe, nan kousapw en Potala Pastillo, mie peneinei riau me iang Sounkadehdehn Siohwa me naineki seri tohto, oh I kin kesengkiong irail flute. I idek rehn emen kisin serepein ko, Hilda, ma e men iang kiht kalohk. E nda: “I men iang, ahpw I sohte kak. Sohte ahi suht.” Se pwainda eh suht oh e iang kiht kalohk. Sounpar tohto mwurin mwo, nan pahr 1972, ahnsou me ngehi oh Maxine mwemweitla Pedel en Brooklyn, sister men me ahpwtehn kesepwil sang Sukuhl en Kilead aluhdo reht. E pahn kereniong pekederlahng Ecuador, oh e nda: “Kumwa sehseiehla? Ngehi kisin serepeino nan Pastillo me sohte ah suht.” Hilda mwo! Se uhdahn perenda kahrehda se sengiseng!

Nan pahr 1960 brother kan ndaiong kiht en kohla oh papah nan ohpis en Sounkadehdehn Siohwa kan nan Puerto Rico me poasoake riau nan Santurce, San Juan. Nin tapio, ngehi oh Lennart Johnson kin wia pali laud en doadoahko. Ih oh eh pwoudo iei tepin Sounkadehdehn Siohwa kan nan Dominican Republic, oh re kohdo Puerto Rico nan pahr 1957. Mwuhr, Maxine kin wiahda oaht en makasihn kan, daulih meh kid kei nan wihk ehu. E perenki wia doadoahk wet pwehki e kin medewe duwen aramas akan koaros me kin aliale padahk mehlel.

I kin perenki doadoahk nan Pedel pwehki e kin pidada mouren kihkihwei. Ahpw mie kahpwal kan. Karasepe, ni tepin mihting tohrohr laud me wiawi nan Puerto Rico nan pahr 1967, I ahnekihda diren pwukoa kan. Nathan Knorr, me wia president en Sounkadehdehn Siohwa kan, kohdo Puerto Rico. E medewe me I sohte nsenohki koasoanehdi mehn peidaid ong misineri kan me kohdo wasao. Ahpw eh madamadawo sapwung pwe I wiahdahr soahng koaros. Mwuhr, e kihong ie kaweid kehlail duwen wiahda koasoandi kan oh nda me e sapwungkin ie. I sohte men akamaiong, ahpw I pehm me e kadeikiehda ni ahl me sapwung oh I nsensuwedkihla met erein ahnsou kis. Ahpw, mwuhr ni ngehi oh Maxine pwurehng tuhwong Brother Knorr, e lukekihtlahng nan eh pereo oh wiahda kanat mwenge.

Sang Puerto Rico, se kin mwemweitla ekei pak rehn at peneinei nan England. Ei pahpao sohte perenki padahk mehlel ahnsou me ngehi oh ei nohno tepida  onop. Ahpw ahnsou me sounwia padahk kan sang Pedel kin kohdo mwemweit, ei nohno kin kalapw luke irail en mihmi ni imwato. Ei pahpao kilang uwen aktikitik en sounapwalih pwukat sang Pedel oh duwen ar weksang kaunen pelien lamalam ko me sounpar tohto e kin sapwungki. Mwuhr nan pahr 1962, e papidaisla oh wiahla emen Sounkadehdehn Siohwa.

Ei pwoudo, Maxine mehla nan pahr 2011. I uhdahn kasikasik en pwurehng kilang ih ahnsou me e pahn iasada. Ia uwen kaperen! Erein sounpar 58 me se mihpene, ngehi oh Maxine kilang sapwellimen Koht aramas akan nan Puerto Rico ar kekeirda sang mpen meh 650 lao lel meh 26,000! Mwuhr, nan pahr 2013, ohpis en Sounkadehdehn Siohwa kan nan Puerto Rico iangala ohpis en Amerika, oh re peki I en iang doadoahk nan Wallkill, New York. Sounpar 60 me I mihki nan deke ko kahrehiong ie en leme me ngehi emen pwilidak en Puerto Rico, duwehte kisin kairu en wasao me adaneki coquí, me kin wie kokoul ni soutik kan ndinda ko-kee, ko-kee. Ahpw e lelehr ahnsou me I pahn kohkohla.

I perenkihte ei kin papah Koht nan Pedel. Met I daulih sounpar 90, oh ei doadoahk iei en kin kangoange tohnpeneinei en Pedel nin duwen emen me kin apwalih arail nanpwungmwahu rehn Siohwa. Irail ndaiong ie me I sewesehier tohn Pedel daulih meh 600 sangete ahnsou me I kohdo Wallkill. Ekei me kohdo tuhwong ie kin men koasoia pein arail kahpwal de kahpwal en peneinei. Ekei kin peki kaweid ong ia duwen arail pahn pweida nan arail doadoahk nan Pedel. Pil meteikan me ahpwtehn pwopwoudla kin rapahki kaweid ong arail mouren pwopwoud. Ekei irail pwuralahng doadoahk en kalohk. I kin rongorong irail koaros me kin koasoiong ie, oh ni ahnsou me konehng, I kin kalapw ndaiong irail: “‘Koht kin ketin poakohng me kin perenki kihwei.’ Eri perenki omw doadoahk. Doadoahk wet ong Siohwa.”—2 Kor. 9:7.

Duwehte wasa teikan, en ahneki peren nan Pedel kin ekis apwal: Ke anahne medemedewehte dahme kahrehda doadoahk me ke wiewia kin kesempwal. Soahng koaros me ke kin wia nan Pedel kin wia sapwellimen Koht doadoahk. E kin sewese utung “ladu lelepek oh loalokongo” en kihda padahk mehlel me rasehng kisin tungoal ong riatail Kristian kan nan sampah pwon. (Mad. 24:45, NW) Sohte lipilipil wasa me kitail kin papah Siohwa ie, e wia ahnsou mwahu en kapinga ih. Kitail en perenki wia dahme e kupwurki kitail en wia, pwehki “Koht kin ketin poakohng me kin perenki kihwei.”