Rapahki Mehkot me Mwahusang Kohl
Mie pak ke diarada kohl? Aramas malaulaute me diar. Ahpw, me rar rar kei diaradahr mehkot me mwahusang met. Iei erpit sang rehn Koht, me “sohte me kak pwainkihda . . . kohl.”—Sohp 28:12, 15.
NI SOANGEN ahlohte, tohnsukuhl mehlel kan en Paipel kin duwehte irail kan me kin raparapahki kohl. Soangen tohnsukuhl pwukat anahne doadoahk laud oh pousehlahte raparapahki nan Paipel pwehn diarada erpit me sohte kak pweipweida. Nin duwen tohnsukuhl en Paipel kei, dahme kitail kak sukuhlkihsang atail koasoiapene ahl siluh me kohl kin dierek?
KE DIARADA KOHL!
Medewehla me ke alialu kohla limwahn pillap ehu oh kilangada mehkot me mwomwen takai tikitik medendel ehu me ketipino daker. Ke pengidihla oh perenkihda me ke diarada kohl ehu. E tikitiksang moangen masis ehu oh kesempwalsang daimon me uhdahn mwahu. Kowe eri ahpw kilangseli pwehn kilang ma ke kak pil diarada ekei.
Pil duwehte, ke tamanda rahno me emen sapwellimen Siohwa ladu ele kohdo kalohk imwomwo pwehn koasoia duwen rohng en koapworopworo me dierek nan Paipel. Ele ke taman ni sansal ahnsowo me ke tepin diarada padahk mehlel me rasehng kohl. Met mwein wiawi ni ahnsou me ke tepin kilang mwaren Koht, Siohwa, nan Paipel. (Mel. 83:18) De mwein ni omw diarada me ke kak wiahla kompoakepahn Siohwa. (Seims 2:23) Ke ese ahnsowohte me ke diarada mehkot kesempwalsang kohl! Oh ele ke kin ngoangki kalaudehla omw rapahki padahk mehlel kan me rasehng kohl.
KE DIARADA TOHTOHSANG!
Ekei pak kisin diper en kohl kan kin kohpene nan pillap tikitik oh pillap laud kan. Erein ahnsou ehu, sounrapahki kohl kan me kin doadoahk laud ele kin diarada nan wasa pwukat paunen kohl tohtohie, me kin lella tala kid kid kei.
Ni omw tepida onop Paipel rehn Sounkadehdehn Siohwa kan, ele ke duwehte sounrapahki kohl men me diar diren kohl nan eh kisin pahn meteo. Omw kin nantihong doudouloale ehuehu iren Paipel kan uhdahn pahn kalaudehla omw loalokongla, mehkot me pahn kamwahwihala omw nanpwungmwahu rehn Siohwa. Ni omw doudouloale padahk kesempwal mehlel pwukat en Paipel, ke sukuhlki ia duwen omw kak karanihala Siohwa oh dadaurete nan sapwellime limpoak oh ahneki koapworopwor en mour soutuk.—Seims 4:8; Sud 20, 21.
Duwehte sounrapahki kohl me kin nantihong en diarada kohl, ke kin doadoahk laud pwehn sukuhlki padahk kesempwal kan en Paipel?
DOULAHTE RAPARAPAHKI!
Sounrapahki kohl men ele kin diarada kisin kohl nan takai kan. Mie kohl laud nan ekei takai pwukat me kahrehda ren weirada oh pwalangpeseng takaio pwehn kihsang kohlo. Tepin omw kilang takaio, kohlo sohte kin nohn sansal. Dahme kahrehda? Pwehki nan ehu takai mwahu, ele mpen ounce 0.3 te (10 g) en kohl me ke kak kihsang nan ehu takai me paun 2000! Ahpw mendahki met, ong sounrapahki kohlo mie katepen eh nannanti en weirada.
Nanti laud pil anahn mwurin emen doula sang tepin padahk kan. (Ipru 6:1, 2) Ke anahne nanti laud pwe ken kak alehdi soahng kan me kapw oh mehn kasukuhl mwahu kan nan omw onop en Paipel. Eri, dahme ke kak wia pwe omw onop en Paipel en pweida mwahu, mehnda ma ke kin onopki Paipel erein sounpar tohto?
Doulahte ngoangki ale kasukuhl. Tehk kanahieng oaritik kan. Pousehlahte nannanti, oh ke pahn diarada iren Paipel kesempwal kan en erpit oh kaweid me rasehng kohl. (Rom 11:33) Pwehn kalaudehla omw loalokongkihla Paipel, isaneki neitail sawaspen Paipel kan me mie nan omw lokaia pwehn wia roporop. Kanengamah oh rapahki kaweid me ke anahne oh rapahki pasapengpen omw peidek en Paipel kan. Idek rehn meteikan mehnia iren Paipel de oaralap me re diarada me keieu sawas oh kangoang. Ehukihong meteikan ire kan me ke diarada nan omw onop Mahsen en Koht.
Ke sohte kin akadeiong en kalaudehlahte omw esehla ire mehlel kan. Wahnpoaron Pohl katamanki me “soangen marain wet kin kahrehda aklapalap.” (1 Kor. 8:1) Ihme kahrehda, ken doadoahk laud pwe ken kolokolte omw aktikitik oh kehlail nan pwoson. Omw kaukaule wia kaudok en peneinei oh pein onop Paipel pahn seweseiuk en mour pahrekiong sapwellimen Siohwa koasoandi kan oh pahn kamwakid uhk en sewese meteikan. Laudsang met, ke pahn peren pwehki ke diaradahr mehkot me mwahusang kohl.—Lep. Pad. 3:13, 14.