1. Ia duwen atail paiekihda atail kin koasoia duwen atail esehla “me mehlelo”?

 “IA DUWEN omw esehla padahk mehlel?” Ele pak tohto ke kin sapeng peidek wet. Ih ehu peidek me kitail kin tepin idek rehn riatail Kristian men ma kitail men esehla mwahu ih. Kitail kin perenki rong ia duwen riatail kan ar esehla oh poakohngala Siohwa, oh kitail pil perenki padahkihong irail kahrepen atail kesempwalki padahk mehlel. (Rom 1:11) Atail koasoia soahng pwukat pil sewese kitail en medemedewe ia uwen atail perenki wia emen Sounkadehdehn Siohwa. E pil kalaudehla atail men koasoanehdi teng en “pousehlahte weweid ni me mehlelo,” me iei en momourte ni ahl ehu me Siohwa pahn ketin kapaiahda oh pwungki.​—3 Sohn 4.

2. Dahme kitail pahn koasoiapene nan iren onop wet?

² Nan iren onop wet, kitail pahn kousapahlih ekei kahrepen atail poakohngki padahk mehlel. Kitail eri pahn koasoiapene ia duwen atail kak pousehlahte kasalehda atail kesempwalki kisakis kesempwal wet. Atail kousapahlih ire pwukat pahn kalaudehla atail kalahnganki Siohwa eh ketin kakerenihkitaildo ong padahk mehlel. (Sohn 6:44) E pil pahn kakehlailihala atail men ehukihong meteikan duwen padahk mehlel.

3. Ia kahrepe keieu kesempwal me kitail kin poakohngki me mehlelo?

³ Mie kahrepe tohto me kitail kin poakohngki me mehlelo. Keieu kesempwal, kitail kin poakohng Siohwa Koht me wia Utupen me mehlelo. Sang sapwellime Mahsen, Paipel, kitail esehla me e sohte ketin wiahte Sounkapikpen lahng oh sampah me keieu manaman, ahpw e pil ketin wia Samatail limpoak  nanleng me kin ketin nsenohkin kitail. (1 Pit. 5:7) Kitail ese me atail Koht kin ketin “kadek kalahngan oh kupwurkalahngan, sohte kin mwadang lingeringerda, oh diren limpoak loalopwoat oh mehlel.” (Eks. 34:6, NW) Siohwa ketin poakohng dahme pwung. (Ais. 61:8) E kin kamedek ong ih en mahsanih atail kin lokolok, oh e ketin kasikasik ahnsowo me e pahn ketikihsang soangen lokolok koaros. (Ser. 29:11) Kitail pil kin kasikasik ahnsou kaselelo! Ihme kahrehda kitail uhdahn poakohng Siohwa!

4-5. Dahme kahrehda wahnpoaron Pohl koasoia me atail koapworopwor rasehng angke ehu?

⁴ Ia pil ehu kahrepen atail poakohng me mehlelo? Kitail kin paiekihda laud me mehlelo. Medewehla karasaras wet. Padahk mehlel en Paipel kin pidada atail koapworopwor en ahnsou kohkohdo. Pwehn kasalehda kesempwalpen koapworopworo, wahnpoaron Pohl ntingihedi: “Kitail ahneki koapworopwor wet me rasehng angke ehu ong atail mour, me likilik oh teng.” (Ipru 6:19) Duwehte angke me kin katengehdi pwoht, atail koapworopwor me poahsoankihda Paipel kak katengekitaildi ni atail kin lelohng kahpwal.

⁵ Wasaht Pohl kin koasoakoasoia koapworopwor en mour nanleng me Kristian keidi kan ahneki. Ahpw dahme e koasoia pil kadoadoahk ong Kristian kan me kasikasik en mour kohkohlahte nan paradais nin sampah. (Sohn 3:16) Ei, atail esehla duwen koapworopwor en mour kohkohlahte kin kahrehiong atail mour en miehla katepe.

6-7. Ia duwen Yvonne eh paiekihda eh sukuhlki padahk mehlel duwen ahnsou kohkohdo?

⁶ Medewehla koasoipen sister men me adaneki Yvonne. E sohte tikida nan padahk mehlel, oh ni ahnsou me e seri, e kin masak mehla. E taman eh wadek lepin lokaia kei me e sohte kak manokehla. Lepin lokaia ko koasoia: “Ehu rahn e sohla pahn mie lakapw.” E koasoia: “Lepin lokaia pwukat kahrehiong ie en kin pepehd ni pwong oh medemedewe duwen ahnsou kohkohdo. I kin medewe, ‘E uhdahn pahn mie kahrepen mour. Dahme kahrehda I miehki?’ I sohte men mehla!”

⁷ Mwuhr, ni ahnsou me e sounpar eisek samwa, Yvonne tuhwong Sounkadehdehn Siohwa kan. E koasoia: “I tepida kamehlele me I kak ahneki koapworopwor en mour kohkohlahte nan Paradais nin sampah.” Ia duwen sister menet eh paiekihda eh sukuhlki padahk mehlel? E koasoia: “I sohla kin pepehd ni pwong oh pwunupwunodki duwen ahnsou kohkohdo de mehla.” E sansal me Yvonne kin poakohng padahk mehlel en Paipel, oh uhdahn perenki ehukihong meteikan duwen eh koapworopwor ong ahnsou kohkohdo.​—1 Tim. 4:16.

8-9. (a) Nan ehu sapwellimen Sises karasaras ko, ia uwen laud en ohl emen eh kesempwalki dipwisou kesempwalo me e diarada? (b) Ia uwen omw kin kesempwalki padahk mehlel?

⁸ Padahk mehlel en Paipel pil kin pidada rongamwahwo duwen Wehin Koht. Sises ketin kapahrekiong padahk mehlel duwen Wehio dipwisou kesempwal ehu me ekiekla. Nan Madiu 13:44, Sises mahsanih: “Wehin nanleng rasehng dipwisou kesempwal ehu me ekiekla nan mwaht ehu. Ohl emen ahpw diarada oh ekihla; oh pwehki eh peren, e kohla oh netikihla mehkoaros me e ahneki oh pwainda mwahto.” Tehk me ohlo sohte rapahki dipwisou kesempwalo. Ahpw ni eh diar, e wiahda tounmetei laud pwehn kak alehdi. Ni mehlel, e netikihla soahng koaros me e ahneki. Dahme kahrehda? Pwehki e ese ia uwen kesempwal en dipwisouwo. E kesempwalsang soahng koaros me e tounmeteikihla.

⁹ Ia duwe, ke pil ahneki soangen pepehm wet ong padahk mehlel? Ei uhdahn! Kitail ese  me sohte mehkot me sampah wet kin kihda me kak pahrekiong peren me kitail ahneki en papah Siohwa ahnsou wet, oh pil koapworopwor en mour kohkohlahte ni ahnsou kohkohdo pahn kaundahn Wehio. Atail pai kaselel en ahneki nanpwungmwahu keren rehn Siohwa kin kesempwalsang tounmetei koaros me kitail wiahda. Atail peren me keieu laud iei “en uhdahn kaperenda ih.”​—Kol. 1:10.

10-11. Dahme kamwakid Michael en wekidala mwomwen eh mour?

¹⁰ Tohto rehtail kin wiahda tounmetei laud kan pwehn alehdi sapwellimen Siohwa kupwuramwahu. Ekei pwilikihdi arail doadoahk en mwohni me uhdahn wad. Ekei uhdihsang raparapahki en kepwehpwehla. Oh ekei pil wiahda wekidekla laud kan nan arail mour ni arail sukuhlki duwen Siohwa. Ih met me Michael wia. E sohte tikida nan padahk mehlel. Ni ahnsou me e mwahnakapw, e kin sukuhlki karate. E koasoia: “I kin uhdahn kesempwalki me paliwereie en uhdahn kehlail oh roson. Ekei pak I kin medewe me sohte me kak kaluhsihie.” Ahpw ni eh tepida onopki Paipel, Michael esehda ia sapwellimen Siohwa madamadau ong tiahk lemei. (Mel. 11:5) E ndahki pwopwoudo me kin onop Paipel reh, me wia Sounkadehde kei: “Sohte pak ehu me ira ndaiong ie en uhdihsang karate; ira kin doulahte padahkihong ie padahk mehlel en Paipel.”

¹¹ Ni Michael eh kalaudehla eh sukuhlki duwen Siohwa, eh poakohng Ih pil laudla. Dahme keieu sair ih iei en Siohwa kin ketin poakehla sapwellime tohnkaudok kan. Kedekedeo, Michael wehwehki me e anahne wiahda wekidekla laud nan eh mour. E koasoia: “I ese me en uhdihsang karate pahn uhdahn apwal ong ie. Ahpw I pil ese me met pahn kaperenda Siohwa, oh I uhdahn kamehlele me ei papah ih uhdahn kesempwalsang soangen tounmetei koaros.” Michael wehwehki kesempwalpen padahk mehlel me e diarada, oh met kamwakid ih en wiahda wekidekla laud kan nan eh mour.​—Seims 1:25.

12-13. Ia duwen padahk mehlel en Paipel eh sewese Mayli?

¹² Pwehn kasalehda kesempwalpen padahk mehlel, Paipel kapahrekiong padahk mehlel lamp ehu nan wasa rotorot. (Mel. 119:105; Ep. 5:8) Mayli, sang Azerbaijan, uhdahn kalahnganki sawas me e alehdi sang Mahsen en Koht. E tikida nan peneinei ehu me arail pelien lamalam wekpeseng. Eh pahpao kin iang Muslim, oh eh nohnou kin iang pelien lamalam en mehn Suhs. E koasoia: “I sohte kin peikasalki me mie Koht, ahpw miehte ahi peidek tohto. I kin idek, ‘Dahme kahrehda Koht ketin kapikada aramas, oh dahme kahrehda emen anahne lokolok erein eh mour oh mwuhr pil ale kalokolok nan ehl?’ Pwehki aramas nda me soahng koaros kin wiawi pwehki kupwuren Koht, I medewe, ‘Ia duwe, Koht ketin kaunda aramas oh kupwurperenki mahsanih arail wie lokolok?’”

¹³ Mayli pousehlahte rapahki pasapengpen eh peidek kan. Kedekedeo, e pwungki en onop Paipel oh eri wiahla emen Sounkadehdehn Siohwa. E koasoia: “Mahsen mehlel kan en Paipel sewese kamwahwihala mwomwen ei kilangwohng ei mour. Kawehwehn ire pwukat uhdahn mwahu oh kin kahrehiong ie nsenamwahu mehlel.” Duwehte Mayli, kitail koaros kin kapinga Siohwa, “Meno me ketin malipei [kitail] sang nan rotorot ong nan sapwellime marain kaselel.”​—1 Pit. 2:9.

14. Ia duwen atail kak kalaudehla atail poakohng padahk mehlel? (Pil kilang koakono “ Pil Dahme Padahk Mehlel en Paipel Kin Duwehte.”)

¹⁴ Mepwukat wiahte ekei karasaras duwen  kesempwalpen padahk mehlel. Ele ke pil ese me tohto likin mepwukat. Dahme ke seu wiahda pein omw koasoandi en onop pwehn rapahki kahrepe teikan me kitail kin poakohngki padahk mehlel? Uwen laud en atail poakohng padahk mehlel, ih pil uwen laud en atail pahn diar ahl akan en kasalehda met.

15. Ia ehu ahl me kitail kak kasalehda atail poakohng padahk mehlel?

¹⁵ Kitail kak kasalehda me kitail poakohng padahk mehlel sang ni atail kin kaukaule onopki Paipel oh sawasepen Paipel kan. Met pwehki sohte lipilipil ia uwen werei me kitail miher nan padahk mehlel, e kin ahnsou koaros miehte soahng kan me kitail en sukuhlki. Tepin Kahn Iroir me wiawihda koasoia me ‘padahk mehlel kin rasehng kisin rohs ehu nanpwungen dihpw suwed tohto. Pwehn diarada soangen rohso, ke anahne rapahki ni keneinei. . . . Ma ke men diarada ke anahne nantihong. Oh ni omw diarada, dehr itarkihte ehu. . . . Pousehlahte rapahki pwehn diarada rohs tohto.’ Onop wia doadoahk laud ehu, ahpw e uhdahn mie katepe.

16. Soangen wiepen onop dah me kin keieu sewese iuk? (Lepin Padahk 2:4-6)

¹⁶ Kaidehn kitail koaros kin perenki wadawad oh onop. Ahpw Siohwa ketin luke kitail en  ‘rapahki uwen atail kak’ pwe kitail en kalaudehla atail wehwehki padahk mehlel. (Wadek Lepin Padahk 2:4-6.) Ni atail wia met, kitail kin ahnsou koaros paiekihda. Corey koasoia me ni eh kin wadek Paipel, e kin wadek iretikitik ehute oh kihong ahnsou en medemedewe. E koasoia: “I pahn wadekala nting tikitik kan koaros (footnote), kilang iren Paipel koaros me pahrekiong iretikitiko (cross-reference), oh pil wia roporop. . . . Wiepen onop wet kin sewese ie en sukuhlki soahng tohto!” Sohte lipilipil ma kitail doadoahngki wiepe wet de wiepe teikan, kitail kin kasalehda atail kalahnganki padahk mehlel ni atail wiahda ahnsou oh kehl pwehn onopki.​—Mel. 1:1-3.

17. Ia wehwehn en idawehn padahk mehlel? (Seims 1:25)

¹⁷ Ei mehlel, kitail ese me e sohte itar en onopkihte padahk mehlel. Pwehn uhdahn paiekihda, kitail anahne idawehn padahk mehlel, me iei en kapwaiada nan atail mour dahme kitail sukuhlki. Ihete ni ahl wet me padahk mehlel pahn wadohng kitail nsenamwahu mehlel. (Wadek Seims 1:25.) Ia duwen atail kak tehk mwahu me kitail kin idawehn padahk mehlel? Emen brother koasoia me kitail en kasawih mwomwen atail mour pwehn kilang ma kitail kin kapwaiada dahme kitail sukuhlki oh wasa kan me kitail men kamwahwihala. Wahnpoaron Pohl koasoia: “Nin duwen atail kekeirdahr, kitail en pousehlahte kekeid ni pwung ni soangen ahl wet.”​—Pil. 3:16.

18. Dahme kahrehda kitail kin wia uwen atail kak en “pousehlahte weweid ni me mehlelo”?

¹⁸ Song medewehla duwen kapai kan me kohsang atail kin wia uwen atail kak en “pousehlahte weweid ni me mehlelo”! Kitail sohte kin kamwahwihalahte atail mour ahpw kitail pil kin kaperenda Siohwa oh riatail Kristian kan. (Lep. Pad. 27:11; 3 Sohn 4) Ih kahrepe me keieu mwahu me kitail kin poakohngki oh idawehn padahk mehlel.