IREN ONOP 33
Siohwa Kin Ketin Sinsile Sapwellime Aramas akan
“KAUN-O kin ketin sinsile irail me kin peikiong.”—MEL. 33:18.
KOUL 4 “Siohwa Iei Silepei”
AUDEPEN ONOP *
1. Dahme kahrehda Sises patohwan peki rehn Siohwa en ketin sinsile nah tohnpadahk kan?
PWOHNGO mwohn eh pwoula, Sises ketin wia pekipek tohrohr ehu ong Semeo nanleng. E patohwan peki rehn Siohwa en ketin sinsile sapwellime tohnpadahk kan. (Sohn 17:15, 20) Ei mehlel, Siohwa kin ketin ahnsou koaros sinsile—apwahpwalih oh pere—sapwellime aramas akan. Ahpw Sises mwahngih me Sehdan pahn uhwong sapwellime tohnpadahk kan ni lemei. Sises pil mwahngih me irail pahn anahne sapwellimen Siohwa sawas pwehn pelian ahn Tepilo uhwong kan.
2. Nin duwen me Melkahka 33:18-20 mahsanih, dahme kahrehda kitail sohte anahne masak kahpwal kan?
2 Ahn Sehdan sampah kin kahrehda kahpwal tohto ong Kristian mehlel kan rahnwet. Kitail kin lelohng kahpwal kan me kak kamworuseikitailla oh pil kasonge atail loalopwoat ong Siohwa. Ahpw kitail pahn kilang nan iren onop wet me kitail sohte anahne masak mehkot. Siohwa kin ketin apwahpwalih kitail—e ketin mwahngih kahpwal kan me kitail ahneki, oh kupwurki sewese kitail en dadaur. Kitail pahn koasoiapene karasaras riau nan Paipel me kasalehda ia duwen Siohwa eh “ketin sinsile irail me kin peikiong.”—Wadek Melkahka 33:18-20.
NI ATAIL PEHM ME KITAIL KELEHPW
3. Ahnsou dah me kitail kakete pehm me kitail kelehpw?
3 Mendahki mie riatail Kristian tohto nan mwomwohdiso, ekei pak kitail kin pehm me kitail kelehpw. Karasepe, me pwulopwul kan kin pehm me re kelehpw ni arail kawehwehda dahme re kamehlele mwohn iengarail tohnsukuhl kan de ni arail keseula nan ehu mwomwohdiso kapw. Ekei kitail ele kin nsensuwed de mworusala oh medewe me pein kitail me anahne dadaur pahn soangen pepehm pwukat. Ele kitail kin pweiek en koasoiaiong meteikan atail pepehm pwehki kitail medewe me re sohte pahn kak wehwehki. Oh ekei pak, ele kitail pil kin medewe ma mie me uhdahn nsenohki. Ahpw sohte lipilipil kahrepeo, ekei pak kitail pil kin pwunod oh pehm me sohte sawaspatail. Siohwa sohte mwahn ketin kupwurki kitail en ahneki pepehm wet. Dahme kahrehda kitail kak ndahki met?
4. Dahme kahrehda soukohp Elaisa koasoia: “Ngehite me luhwehdi”?
4 Medewehla mehn kahlemeng en ohl lelepeko Elaisa. Sesepel nda me e pahn kemehla, eri e tangatangki daulih rahn 40. (1 Nan. 19:1-9) Ni eh kelehpwla nan pwoaren paip ehu, e patohwanohng Siohwa: “Ngehite me luhwehdi.” (1 Nan. 19:10) Miehte soukohp teikan nan sahpwo. Karasepe, Opadaia doarehsang Sesepel soukohp 100. (1 Nan. 18:7, 13) Eri, dahme kahrehda Elaisa pehm me e kelekelehpw? Ia duwe, e medewe me soukohp ko koaros me Opadaia doarehla melahr? De ele e pehm me e kelehpw pwehki sohte me iangih papah Siohwa, pil mwurinte Siohwa eh ketin kadehdehda me Ih me Koht mehlel pohn Nahna Karmel? De ele e pehm me sohte emen ese uwen keper me e mi loale de sohte me nsenohki? Paipel sohte uhdahn kasalehda ia ahn Elaisa pepehm. Ahpw dahme kitail ese iei me Siohwa ketin mwahngih dahme kahrehda Elaisa pehm me e kelehpw, oh E pil ketin mwahngih ia duwen eh pahn sewese ih.
Ni atail kin pehm me kitail kelehpw, mehn kasukuhl dah kan me kitail kak sukuhlkihsang Siohwa eh ketin sewese Elaisa? (Menlau kilang parakrap 5-6)
5. Ia duwen Siohwa eh ketin kamehlelehiong Elaisa me e sohte kelehpw?
5 Siohwa ketin sewese Elaisa ni soangen ahl kei. E ketin kangoange Elaisa en koasoi. Pak riau e keinemwe rehn Elaisa: “Dahme ke wiewia wasaht?” (1 Nan. 19:9, 13) Ni ahnsou pwuko, Siohwa ketin karonge Elaisa eh padahkihong ih eh pepehm. Siohwa ketin sapeng Elaisa ni eh kasalehiong me e ketin ieiang ih oh me E uhdahn ketin manaman. E pil ketin kamehlelehiong Elaisa me mie mehn Israel tohto teikan me kin papahte ih. (1 Nan. 19:11, 12, 18) Elaisa nsenamwahula mwurin eh padahkihong Siohwa eh pepehm oh rong Eh ketin sapeng ih. Siohwa ketikihong Elaisa pwukoa kesempwal kei. E ketin padahkihong en idihada Asael en wiahla nanmwarki en Siria, Sehu en wiahla nanmwarki en Israel, oh Elisa en wiahla soukohp. (1 Nan. 19:15, 16) Ni eh ketikihong Elaisa pwukoa pwukat, Siohwa ketin sewese ih en medemedewehte soahng mwahu kan. Koht pil ketikihong emen ienge, Elisa. Ia duwen omw kak alehdi sapwellimen Siohwa sawas ni omw pehm me ke kelehpw?
6. Dahme ke kak kapakapki ni omw pehm me ke kelehpw? (Melkahka 62:8)
6 Siohwa ketin lukeiuk ken kapakap ong ih. E ketin mwahngih kahpwal kan me ke ahneki, oh ketin kamehlelehiong uhk me e pahn ketin karonge omw kapakap kan ahnsou koaros. (1 Des. 5:17) E ketin kupwurki karonge sapwellime aramas akan. (Lep. Pad. 15:8) Dahme ke kak kapakapki ni omw pehm me ke kelehpw? Padahkihong Siohwa ia omw pepehm, duwehte me Elaisa wia. (Wadek Melkahka 62:8.) Padahkihong omw pwunod kan oh dahme met kin wiahiong uhk. Peki Siohwa en ketin seweseiuk ken ese dahme ke pahn wia ni omw pehm me ke kelehpw de nsensuwed. Karasepe, ma ke pehm me ke kelehpw oh masepwehk ni iengomw tohnsukuhl kan idek dahme ke kin kamehlele, peki Siohwa en ketikihong uhk eimah en kawehwehda. Ke kak pil peki reh erpit pwe ken kawehwehda dahme ke kamehlele ni kadek. (Luk 21:14, 15) Ma ke kin nsensuwed laud de mworus, peki Siohwa en ketin seweseiuk koasoiaiong emen Kristian koahiek. Ke kak peki Siohwa en ketin sewese me ke koasoiongo en kak rong uhk oh wehwehki omw pepehm. Padahkihong Siohwa omw pepehm, kilang ia duwen eh ketin sapengala omw kapakap kan, oh ale sawas sang meteikan. Ma ke wia met, ke sohte pahn pehm me ke kelehpw.
Ke kin rapahki ahl teikan en kalaudehla omw doadoahk en kalohk oh iang meteikan nan doadoahk wet? (Menlau kilang parakrap 7)
7. Dahme ke sukuhlkihsang mehn kahlemeng en Mauricio?
7 Siohwa ketikihong kitail koaros doadoahk kesempwal kan. Ke kak kamehlele me e ketin mwahngih oh kesempwalki soahng koaros me ke kin wia nan mwomwohdiso oh nan doadoahk en kalohk. (Mel. 110:3) Ia duwen soupisengki doadoahk wet eh kak seweseiuk ni omw pehm me ke kelehpw? Medewehla dahme wiawihong brother pwulopwul men me adaneki Mauricio. * Mwurinte Mauricio papidaisla, emen kompoakepah keren tepida kesehla padahk mehlel. Mauricio koasoia: “Ni ei kilang eh kohkohsang Siohwa, I sohla eimah. I medewe ma I pahn kak kapwaiada ei inou en papah Siohwa oh ma I pahn kak mihmihte nan sapwellimen Siohwa pwihn. I pehm me I kelehpw oh medewe me sohte emen pahn wehwehki ei pepehm kan.” Dahme sewese Mauricio? E koasoia: “I kalaudehla ei ahnsoun kalohk. Met sewese ie en dehr medemedewehte pein ngehi oh ei nsensuwed. I kin peren oh sohte pehm me I kelehpw ni ei iang meteikan nan kalohk.” Ei, mendahki kitail sohte kak uhdahn iang irail kohla kalohk, atail iang irail nting kisinlikou oh kalohk nan delepwohn kin kakehlaka kitail. Dahme pil sewese Mauricio? E koasoia: “I pil kalaudehla ei doadoahk nan mwomwohdiso. I kin nantihong kaunopada oh wia padahk kan nin duwen tohnsukuhl. Pwukoa pwukat kahrehiong ie en pehm me Siohwa oh meteikan kesempwalkin ie.”
NI ATAIL TOUTOUKIHLA KAHPWAL LAUD KAN
8. Dahme kahpwal laud kan kak wiahiong kitail?
8 Kitail kin kasik kahpwal kan ni erein imwin rahn akan. (2 Tim. 3:1) Ahpw ele kitail sohte kasik iahd de soangen kahpwal dah me pahn wiawi. Mwein sohla neitail mwohni, mwein toahkte padahkihong kitail me kitail ahneki soumwahu laud ehu, de mwein emen me kitail poakohng mehla. Ni soangen ahnsou ko, ele kitail kin uhdahn pwunodada, ahpw mehlel ma ehu kahpwal kin wiawi mwurinte ehu kahpwal de kahpwal ko kin wiawi erein ahnsou ehute. Ahpw, tamataman me Siohwa kin ketin mwahngih atail irair kan, oh sang ni sapwellime sawas kitail kak dadaur pahn kahpwal kan ni eimah.
9. Menlau kawehwehda ekei kahpwal kan me Sohp lelohng.
9 Medewehla ia duwen Siohwa eh ketin sewese ohl lelepeko Sohp. Sohp lelohng kahpwal laud kan nan erein ahnsou kis. Nan rahn ehute, e esehda me nah mahn ko koaros pirapala de kamakamala, oh me nah ladu ko oh nah seri ko kamakamala. (Sohp 1:13-19) Mwurinte mwo, nindoken eh pahtouki kahpwal ko, e ahnekihda soumwahu ehu me kamedek oh suwed. (Sohp 2:7) Eh irairo uhdahn suwed me kahrehda e nda: “Solahr ei koapworopwor; I pwangadahr momour.”—Sohp 7:16.
Pwehn kamehlelehiong Sohp me E pahn ketin poakohng oh apwalih ih, Siohwa ketin padahkihong Sohp duwen Eh kin ketin apwalih kepikipik kan (Menlau kilang parakrap 10)
10. Ia duwen Siohwa eh ketikihda dahme Sohp anahne pwehn dadaur pahn eh kahpwal kan? (Menlau kilang kilel ni kilin Kahn Iroir wet.)
10 Siohwa kin ketin apwahpwalih Sohp. Pwehki Siohwa ketin poakohng Sohp, e ketikihong dahme e anahne pwehn dadaur pahn eh kahpwal kan oh lelepekte. Siohwa ketin mahseniong Sohp, katamankihong duwen sapwellime erpit poatopoat oh duwen eh kin ketin apwalih sapwellime kepikipik kan. E ketin mahsanih kapwuriamwei en soangsoangen mahn kan. (Sohp 38:1, 2; 39:9, 13, 19, 27; 40:15; 41:1, 2) Siohwa pil ketin doadoahngki mwahnakapwo me adaneki Elihu pwehn kakehlaka oh kansenamwahwih Sohp. Elihu kamehlelehiong Sohp me Siohwa kin ketin ahnsou koaros katingiheki sapwellime tohnkaudok kan ar kin dadaurete. Ahpw Siohwa pil ketin kamwakid Elihu en kihong Sohp ekei kaweid. Elihu sewese Sohp en uhdihsang medemedewehte pein ih sang ni eh katamankihong ia uwen atail tikitiksang Siohwa, Sounkapikpen lahng oh sampah. (Sohp 37:14) Siohwa pil ketikihong Sohp pwukoa ehu, me iei en kapakapki ienge meh silimeno me dipada. (Sohp 42:8-10) Ia duwen Siohwa eh kin ketin sewesei kitail rahnwet ni atail lelohng kahpwal laud kan?
11. Ia duwen Paipel eh kin sewese kitail nan atail kahpwal kan?
11 Siohwa sohte kin ketin mahseniong kitail duwehte me e ketin wiahiong Sohp, ahpw e kin ketin doadoahngki Paipel pwehn mahseniong kitail. (Rom 15:4) E kin ketin kansenamwahwih kitail sang ni eh ketikihong kitail koapworopwor ong ahnsou kohkohdo. Medewehla ekeite ire sang nan Paipel me kak kansenamwihkitailla ni atail lelohng kahpwal kan. Nan Paipel, Siohwa ketin kamehlelehiong kitail me sohte mehkot—pil iangahki kahpwal laud kan—‘pahn kak katohreikitailsang [sapwellime] limpoak.’ (Rom 8:38, 39) E pil ketin kamehlelehiong kitail me e kin “ketiket limwahn irail kan me kin likweriong” ni kapakap. (Mel. 145:18) Siohwa mahsanihong kitail me ma kitail likih ih, kitail pahn kak dadaur pahn kahpwal kan oh pil ahneki peren ni atail kin lokolok. (1 Kor. 10:13; Seims 1:2, 12) Mahsen en Koht pil katamankihong kitail me atail kahpwal kan kin ongete ahnsou kis oh weksang douluhl keting poatopoat me e ketikihda ong kitail. (2 Kor. 4:16-18) Siohwa ketikihong kitail koapworopwor me e pahn ketin kasohrehla irail kan me kin kahrehiong kitail kahpwal, me iei Sehdan me Tepil oh irail me suwed kan me duwehte ih. (Mel. 37:10) Mie iren Paipel kan me ke wadlikihlahr pwehn seweseiuk dadaur pahn kahpwal kan me pahn wiawi?
12. Dahme Siohwa ketin kasik kitail en wia ma kitail men uhdahn paiekihda sapwellime Mahsen?
12 Siohwa ketin kupwurki kitail en wiahda ahnsou en kaukaule onopki Paipel oh doudouloale dahme kitail wadek. Ni atail kin doadoahngki dahme kitail sukuhlki, e kin kakehlailihala atail pwoson oh atail karanihala Samatailo nanleng. Pwehki met, kitail pahn kehlailla pwehn dadaur pahn kahpwal kan. Siohwa pil kin ketikihda sapwellime manaman ong irail kan me kin likih sapwellime Mahsen. Oh manaman wet kak kihong kitail “kehl me laudsang dahme aramas ahneki” pwe kitail en dadaur pahn kahpwal koaros.—2 Kor. 4:7-10.
13. Ia duwen sawasepen Paipel kan me ‘ladu lelepek oh loalokongo’ kin kihda eh sewese kitail en dadaur pahn kahpwal kan?
13 Sang ni sapwellimen Siohwa sawas, ‘ladu lelepek oh loalokongo’ kin kihda neitail pwuhk kan, kisin kasdo kan, oh koul tohto me kak sewese kakehlaka atail pwoson oh mihmihte karanih Siohwa. (Mad. 24:45) Kitail en isaneki oh doadoahngki soahng koaros me Siohwa ketikihong kitail. Me keren, sister men sang Wehin Amerika koasoia me e uhdahn kalahnganki sawasepen Paipel koaros. E koasoia: “Erein sounpar 40 me I papahkiher Siohwa, ei pwoson kin pwurupwurehng lelohng songosong.” E lelohng kahpwal laud kei—aramas sakau men tangahki sidohsa oh doakoahdi oh kemehla eh pahpa kahlapo, eh papah nohno mehkihla soumwahu keper ehu, oh pak riau, e ahnekihda soumwahu en kanser. Dahme sewese ih en dadaurete? E koasoia: “Siohwa kin ketin ahnsou koaros apwalih ie. E ketin doadoahngki ladu lelepek oh loalokong en kihda padahk kan me kin sewese ie en dadaur. Pwehki met, I kak nda dahme Sohp nda: ‘I sohte pahn kesehla ei loalopwoat lao I mehla!’”—Sohp 27:5, NW.
Ia duwen atail kak sewese meteikan nan mwomwohdiso? (Menlau kilang parakrap 14)
14. Ia duwen Siohwa eh kin ketin doadoahngki riatail Kristian kan en sewesei kitail nan atail apwal kan? (1 Deselonika 4:9)
14 Siohwa ketin kaiahnehda sapwellime aramas akan en limpoakpene oh kansenamwahwih emenemen ni ahnsou apwal akan. (2 Kor. 1:3, 4; wadek 1 Deselonika 4:9.) Duwehte Elihu, riatail Kristian kan kin men sewese kitail en lelepekte ni atail lelohng kahpwal kan. (Wiewia 14:22) Karasepe, medewehla ia duwen mwomwohdiso me Diane kin iango eh kangoange oh sewese ih en karanihete Siohwa mwurin eh pwoudo ahnekihda soumwahu laud ehu. E koasoia: “Met apwal. Ahpw se pehm sapwellimen Siohwa limpoak oh kehl erein ahnsou apwal ko. Aht mwomwohdisou wia soahng tohto pwehn sewesei kiht. Arail mwemweitdo, delepwohndo, oh pwoaleikitdi, kin sewesei kiht en dadaurete. Pwehki I sehse diraip, riei Kristian kan kin tehk kanahieng me I kak iang towehda mihting kan oh iang kalohk ni ahnsou me I kak.” Ia uwen eh wia pai kaselel en iang kisehn pirien en Kristian limpoak ehu!
KALAHNGANKI SAPWELLIMEN SIOHWA EPWEL MWAHU
15. Dahme kahrehda kitail kamehlele me kitail kak dadaur pahn kahpwal kan?
15 Kitail koaros pahn lelohng soangsoangen kahpwal kan. Ahpw duwehte me kitail sukuhlkiher, kitail sohte anahne kelehpwki atail kahpwal kan. Duwehte sahm limpoak men, Siohwa kin ketin ahnsou koaros apwahpwalih kitail. E kin ketin karanih kitail, onopada en ketin karonge atail pekipek kan oh kupwurki sewese kitail. (Ais. 43:2) Kitail kamehlele me kitail kak dadaur pahn kahpwal kan pwehki e kin ketikihong kitail soahng koaros me kitail anahne pwehn dadaur. E ketikihong kitail kisakis en kapakap, Paipel, oh sawasepen Paipel tohto, oh riatail Kristian limpoak kan pwehn sewese kitail ni ahnsou me kitail anahne.
16. Ia duwen atail kak mihmihte pahn sapwellimen Siohwa epwel mwahu?
16 Kitail uhdahn kalahnganki me Samatailo nanleng kin ketin apwahpwalih kitail! “Kitail kin pereperen pwehki ih.” (Mel. 33:21) Kitail kak kasalehiong Siohwa me kitail kalahnganki sapwellime epwel mwahu sang ni atail isaneki mehkoaros me e ketikihda pwehn sewesei kitail. Kitail pil anahne wia dahme anahn pwehn mihmihte pahn sapwellime epwel. Met wehwehki me ma kitail pousehlahte wia uwen atail kak en peikiong Siohwa oh wia dahme pwung mwohn silangi, e pahn ketin apwahpwalih kitail kohkohlahte!—1 Pit. 3:12.
KOUL 30 Semei, Ei Koht oh Kompoakepahi
^ Kitail anahne sapwellimen Siohwa sawas pwehn powehdi kahpwal kan me kitail ahneki rahnwet. Iren onop wet pahn kamehlelehiong kitail me Siohwa kin ketin apwahpwalih sapwellime aramas akan. E ketin mwahngih kahpwal kan me emenemen kitail ahneki, oh kin ketikihda dahme kitail anahne pwe kitail en powehdi.
^ Ekei ahd kan me pwarada wasaht kaidehn uhdahn adarail.