Wahnpoaron Pohl ntinglahng Kristian kan nan Deselonika, koasoia: “Ma emen sohte kin peikiong dahme se koasoia nan kisinlikou kiset, kilelehdi aramas menet.” (2 Des. 3:14) Mahso, kitail kin nda me kaweid wet kowohng elder kan. Elder kan ele kin wia padahk ehu ong mwomwohdiso ma emen nan mwomwohdiso kin pousehlahte sapeikiong kaweid kan sang Mahsen en Koht. Mwurin mwo, emenemen sounkalohk sohla pahn iang me kileldio mwemweit de wia soahng teikan, ahpw en iangete ih ni mihting kan de kalohk.

Ahpw wekidekla ehu ong ire wet anahne wiawi. Met kitail wehwehki me ahn Pohl kaweido kin dokedoke pilipil ehu me emenemen Kristian anahne wiahda pwehki soangen irair kan. Eri elder kan sohla anahne wia padahk ehu me pid en kilelehdi emen. Dahme kahrehda wekidekla wet anahne wiawi? Medewehla dahme Pohl koasoakoasoia ni ahnsou me e kihda kaweid wet.

Pohl tehkada me ekei nan mwomwohdisou “sohte kin weweid ni pwung.” E kihongehr irail kaweid me poahsoankihda Mahsen en Koht ahpw re sohte kin peikiong. Erein ehu eh mwemweit en mwoweo, e kihong irail kaweid wet: “Ma emen sohte men doadoahk, a en dehr mwenge.” Ahpw, ekei sohte mwahn kin doadoahk pwehn apwalih pein irail, mendahte irail kak wia met. Irail pil kin kedirepwki soahng kan me sohte arail ong. Ia pahn ahn Kristian kan ar wiewia ong soangen aramas pwukat?—2 Des. 3:​6, 10-12.

Pohl koasoia: “Kilelehdi aramas menet.” Lokaiahn Krihs me kawehwehdiong lepin lokaia pwukat kak wehwehki en kasawihada soangen aramaso oh kanahieng en dehr mweidohng eh wiewia kan en kamwakid kitail. Pohl kihda kaweid ong koaros nan mwomwohdiso, kaidehn ongete elder kan. (2 Des. 1:1; 3:6) Eri emenemen Kristian me ele tehkada me ienge Kristian men kin sapeikiong kaweid kan sang Mahsen en Koht pahn pilada en ‘uhdihsang werekiong’ soangen aramaso.

Ia duwe, met wehwehki me mwomwohdiso en wiahki aramaso emen me mwomwohdiso kihsang nanpwungarail? Soh, pwehki Pohl pil koasoia: “Pousehlahte panawih ih nin duwen riatail men.” Eri emenemen Kristian pahn werekiongete me kileldi men ni mihting kan oh nan kalohk, ahpw irail pahn pilada en dehr iang ih mwemweit de wia soahng teikan. Dahme kahrehda? Pohl koasoia: “Pwe en namenekla.” Ni atail uhdihsang werekiong riatailo ni ahl wet, ele e pahn namenengkihda dahme e wiewiao oh wekila.—2 Des. 3:​14, 15.

Ia duwen Kristian kan ar ese iahd me ren kilelehdi emen? Keieu, kitail anahne ese ni mehlel ma aramaso “sohte kin weweid ni pwung,” nin duwen me Pohl kawehwehda. Pohl sohte koasoakoasoia duwen aramas akan me ele wia soahng kan me sohte uhwong kaweid de kosonned en Paipel ahpw me uhwong dahme kadeikpen loalatail pwungki, de dahme re mwahuki weksang dahme kitail mwahuki. E pil sohte koasoakoasoia duwen irail kan me kamedekihkitailla. Ahpw, Pohl kin koasoakoasoia duwen irail kan me aleier kaweid sang Mahsen en Koht ahpw pilada en kin doulahte sapeikiong.

Rahnwet, ma kitail tehkada me iengatail Kristian men kin pousehlahte sapeikiong kaweid sang Mahsen en Koht, a kitail pahn pein pilada en dehr iangih mwemweit de wia soahng teikan. Pwehki met ahn emenemen pilipil, kitail sohte pahn koasoiaiong meteikan likin atail peneinei tikitik. Oh kitail pahn iangete aramaso ni atail mihting kan oh nan kalohk. Ni ahnsou me e wekidala eh madamadau oh wiewia kan, kitail pahn pwurehng werekiong ih.