1. Mwohnte Sises pwoula, dahme e mahsanihong loallap men me langalang limwah? (Luk 23:39-43)

 SISES oh loallap riemeno me langalang limwah wie lokolok ni arail pahn kereniong mehla. (Luk 23:32, 33) Ira koaros kepikepitki Sises, eri e sansal me kaidehn ira sapwellime tohnpadahk kei. (Mad. 27:44; Mark 15:32) Ahpw emen ira wekidala eh madamadau. E patohwan: “Sises, komw ketin taman ie ni omwi pahn ketilong nan sapwellimomwi Wehi.” Sises sapeng mahsanih: “I ndaiong uhk ni mehlel rahnwet, ke pahn iang ie mi nan Paradais.” (Wadek Luk 23:39-43.) Sohte mehn kadehde me loallap menet alehdi rohngo duwen “Wehin nanleng,” me Sises ketin kalokalohki. Oh Sises sohte mahsanih me ohlo pahn pedolong nan Wehio. (Mad. 4:17) Sises mahmahsanih duwen paradais ehu nin sampah ni ahnsou kohkohdo. Dahme kahrehda kitail kak ndahki met?

2. Dahme kasalehda me loallap me koluhlao wia mehn Suhs men?

² Loallap me koluhlao ele wia mehn Suhs men. E ndaiong loallap teio: “Ke sohte mwahn masak Koht? Pwe ahnsou wet ke alehdier kadeikohte.” (Luk 23:40) Mehn Suhs kan kin kaudokiong Koht tehmen, ahpw mehn liki kan kin kamehlele koht tohto. (Eks. 20:2, 3; 1 Kor. 8:5, 6) Ma kaidehn ira mehn Suhs, ele loallapo pahn idek, “Ke sohte mwahn masak koht akan?” Pil ehu, Sises pekederdo ongete “sihpw salongala kan en wehin Israel,” a kaidehn ong mehn liki kan. (Mad. 15:24) Koht ketin kasalehiongehr mehn Israel kan me e pahn ketin kaiasada me melahr kan. Loallap me koluhlahro ele ese duwen met, oh nin duwen me e koasoia, e leme me Siohwa pahn ketin kaiasada Sises pwehn kaun nan Wehin Koht. E sansal me ohlo  koapworopworki me Koht pahn pil ketin kaiasada ih.

3. Dahme loallap me koluhlao ele medewe duwe ahnsou me Sises mahsanih duwen Paradais? Menlau kawehwehda. (Senesis 2:15)

³ Pwehki loallap me koluhlao wia mehn Suhs men, e ese duwen Adam oh Ihp oh Paradaiso me Siohwa ketikihirahdi loale. Eri loallapo kamehlele me Paradais me Sises mahsanih duwe pahn wia mwetuwel kaselel ehu nin sampah.—Wadek Senesis 2:15.

4. Dahme mahsen en Sises ko ong emen loallap ko pahn kamwakid kitail en medewe?

⁴ Dahme Sises mahsanihong loallapo pahn kamwakid kitail en medewe ia pahn mwomwen mour nan Paradais. Ni mehlel, kitail kak sukuhlki mehkot duwen Paradais sang ni kaunda mwahu en Nanmwarki Solomon. Oh kitail kak kasik me Sises, me ketin lapalap sang Solomon, pahn iang irail kan me pahn iangih kaunda kaparadaisihala sampah. (Mad. 12:42) E sansal me “sihpw teikan” pahn men ese dahme re anahne wia pwe ren kak mour kohkohlahte nan Paradais.—Sohn 10:16.

5. Dahme ke kin medewe ni omw medewehla duwen Paradais?

⁵ Dahme ke kin medewe ni omw medewehla duwen Paradais? Mwein ke medewehla mwetuwel kaselel ehu, duwehte mwetuwel en Ihden. (Sen. 2:7-9) Ele ke tamanda kokohpo me kileldi nan Maika me sapwellimen Koht aramas akan pahn mwohd “pahn mwetehn arail tuhkehn wain de tuhke pik kan.” (Maika 4:3, 4) Mwein ke pil tamanda iren Paipel kan me kasalehda duwen reken mwenge. (Mel. 72:16; Ais. 65:21, 22) Eri, mwein ke medewehla pein kowe nan mwetuwel kaselel ehu, mwomwohd ni tehpel ehu me diren mwenge iou. Ele ke pil ned pwohmwahu en tuhke kan oh rohs kan. Oh mwein ke rong ngilen omw peneinei oh kompoakepahmw kan—iangahki me iasada kan—ar kokouruhr oh pereperenpene. Soahng pwukat koaros kaidehn ouraman ehu. Kitail kak kamehlele me soahng pwukat koaros pahn wiawi nin sampah. Ahpw nan Paradais, kitail pil pahn wia doadoahk kaperen kan.

6. Dahme kitail pahn wia nan Paradais? (Menlau kilang kilel.)

⁶ Siohwa ketin kapikkitailda en perenki atail doadoahk. (Ekl. 2:24) Kitail pahn uhdahn soupisek erein Kaundahn Krais Pahr Kido. Irail kan me pitsang kahn kamakam kowahlapo, iangahki me rar rar kan me iasada, pahn anahne likou, mwenge, oh wasahn kousoan. Pwehn apwalihala soangen anahn pwukat, kitail pahn wia soangen doadoahk kaperen tohto. Duwehte Adam oh Ihp me anahne koadoahkihada ara mwetuwelo, kitail pahn ahneki pwais kaselel en kaparadaisihala  sampah. Pil medewehla uwen kaperen en iang kasukuhlih me rar rar kan me iasada me sohte nohn ese duwen Siohwa oh kupwure, oh en sewese me lelepek kan me mour mwohn mwehin Siseso pwe ren ese dahme wiawi mwurin arail mehla!

7. Dahme kitail kak uhdahn kamehlele, oh dahme kahrehda?

⁷ Kitail kak kamehlele me nan Paradais, kitail pahn ahneki popohl, paiamwahu, oh soahng koaros pahn soandi mwahu. Dahme kahrehda? Pwehki Siohwa ketin kasalehdahr karasepen mour me pahn mi pahn kaundahn sapwellime Ohlo. Kitail kak kilang duwen met sang ni mwomwen kaundahn nanmwarki Solomon.

8. Ia duwen mahsen kan nan Melkahka 37:10, 11, 29 ar pweida mwurin Nanmwarki Depit ntingihedi? (Menlau kilang “Peidek kan Sang Sounwadawad kan” nan Kahn Iroir wet.)

⁸ Nanmwarki Depit ntingihedi duwen mwomwen mour me mi pahn kaundahn nanmwarki erpit oh lelepek men. (Wadek Melkahka 37:10, 11, 29.) Kitail kin kalapw wadek Melkahka 37:11 ong meteikan ni atail kin koasoia duwen Paradais. Kitail ahneki kahrepe mwahu en wia met pwehki Sises ketin doadoahngki ireohte nan sapwellimen Kapahrek en Pohn Dohl, me kasalehda me met pahn pweida ahnsou kohkohdo. (Mad. 5:5) Ahpw dahme Depit koasoia pil kasalehda ia pahn mwomwen mour pahn kaundahn Nanmwarki Solomon. Ni ahnsou me Solomon kaunda Israel, sapwellimen Koht aramas akan ahneki popohl oh paiamwahu nan sahpw ehu me “rekiki kisin tungoal.” Koht ketin mahsanih: “Ma kumwail pahn kin momourki ei kosonned akan . . . , I pahn kihong kumwail popohl nan sapwamwail, kumwail pahn kin memeir oh sohte masak mehmen.” (Lip. 20:24; 26:3, 6) Inou pwukat pweida erein kaundahn Solomon. (1 Kron. 22:9; 29:26-28) Oh aramas suwed kan pahn “sohrala.” (Mel. 37:10) Eri, dahme Melkahka 37:10, 11, 29 mahsanih pweidahier mahso oh pil pahn pweida ni ahnsou kohkohdo.

9. Dahme lih nanmwarkio Sipa koasoiahki duwen kaundahn Nanmwarki Solomon?

 ⁹ Lih nanmwarki Sipa karongehda duwen mehn Israel kan ar ahneki popohl oh paiamwahu pahn kaundahn nanmwarki Solomon. E seiloakla Serusalem sang wasa doh pwehn pein kilang duwen irairo. (1 Nan. 10:1) Mwurin eh kilang wehin Solomon, e koasoia: “Me I rongo, elep en me I kilangehr. . . . Ia uwen paien omwi likend kan! Oh ia uwen paien sapwellimomwi ladu kan, me kin patopato pahn kupwuromwi ahnsou koaros oh kin patohwan rongorong sapwellimomwi mahsen erpit kan!” (1 Nan. 10:6-8) Ahpw irair mwahu kan pahn kaundahn Solomon wiahte karasepen dahme Siohwa pahn ketin wiahiong aramas akan pahn kaundahn Sapwellime Ohlo, Sises.

10. Ni ahl dah kan me Sises ketin lapalapasang Solomon?

¹⁰ Sises ketin lapalapasang Solomon ni soahng koaros. Solomon wia ohl soh unsek men me wiahda sapwung laud kan me mwuhr kahpwalihala sapwellimen Koht aramas akan. Ahpw Sises iei Kaun unsek men me sohte kin ketin wiahda sapwung. (Luk 1:32; Ipru 4:14, 15) Sises ketin lelepekte ong Koht mendahki kasongosong laud sang Sehdan. Krais ketin kadehdehda me e sohte pahn ketin wiahda dihp de wia mehkot me pahn kauwehla irail kan me pahn mi pahn eh kaunda. E uhdahn wia pai kaselel ehu en wiahki ih atail Nanmwarki.

11. Ihs me pahn sewese Sises kakaun?

¹¹ Irail meh 144,000 kan pahn iang Sises doadoahkpene pwehn apwalih aramas akan oh pwehn kapwaiada kupwuren Siohwa ong sampah. (Kaud. 14:1-3) Irail pwukat lelohng kahpwal oh lokolok tohto ni ahnsou me irail mi ni sampah, eri re pahn wehwehki aramas akan. Dahme irail pahn wia?

12. Doadoahk dahieu me Siohwa pahn ketikihong 144,000 ko?

¹² Pwukoa me Sises oh ienge kaun kan ahneki uhdahn laudsang pwukoa me Solomon ahneki. Nanmwarki Solomon kin apwalih aramas rar rar kei nan sahpw tehieu. Ahpw irail kan me pahn wia kaun kei nan Wehin Koht pahn apwalih aramas lik lik kei nan sampah pwon. Ia uwen kaselel en pwais wet me Siohwa ketikihong meh 144,000 ko!

13. Pwukoa tohrohr dahieu me iengen Sises kaun kan pahn ahneki?

¹³ Duwehte Sises, meh 144,000 ko pahn papah nin duwen nanmwarki oh samworo kei. (Kaud. 5:10) Pahn Kosonned en Moseso, samworo kan kin keieu pwukoahki apwalih aramas ako en ahnekihte roson mwahu oh karanih Siohwa. Kosonnedo wia “mwetehn soahng mwahu kan me pahn kohdo,” eri e pwung en nda me iengen Sises kaun akan pahn sewese sapwellimen Koht aramas akan en ahnekihte roson mwahu oh karanih Siohwa. (Ipru 10:1) Kitail pahn awih oh kilang ia duwen nanmwarki oh samworo pwukat ar pahn kapehse ong irail kan nin sampah me mi pahn kaundahn Wehio. Sohte lipilipil dahme Siohwa ketin koasoanehdi, kitail kak kamehlele me nan Paradais, irail kan nin sampah pahn alehdi kaweid me irail anahne.—Kaud. 21:3, 4.

14. Nanpwungmwahu dahieu me “sihpw teikan” oh rien Krais kan ahneki?

¹⁴ Sises ketin kahdaneki ienge kaun kan “kisin pwihn sihpw.” (Luk 12:32) E pil mahsanih duwen ehu pwihn tohrohr me e ketin kahdaneki “sihpw teikan.” Pwihn riau pwukat pahn wia pelin sihpw teieu. (Sohn  10:16) Koaros me iang pwihn riau pwukat kin doadoahkpene rahnwet. Oh re pahn doulahte doadoahkpene ni ahnsou me sampah pahn wiahla paradais. Ni ahnsowo, irail “kisin pwihn sihpw” pahn mi nanleng oh irail “sihpw teikan” pahn ahneki koapworopwor en mi nin sampah kohkohlahte. Ahpw mie soahng kan me “sihpw teikan” anahne wia ahnsou wet pwe ren kak mi nan Paradais.

15. (a) Ia duwen “sihpw teikan” ar kin iang rien Krais kan doadoahk? (b) Ia duwen omw kak alasang mehn kahlemeng en brothero nan sidohwao? (Menlau kilang kilel.)

¹⁵ Loallap me koluhlao mehla mwohn eh ahneki ahnsou mwahu en kasalehda eh kalahnganki dahme Krais ketin wiahda ong ih. Weksang ih, kitail “sihpw teikan” ahneki ahnsou mwahu tohto met pwehn kasalehda uwen atail kalahnganki Sises. Karasepe, kitail kin kasalehda atail poakohng ih sang ni mwomwen atail wiewia ong rie me keidi kan. Sises mahsanih me e pahn ketin kadeikada sihpw kan poahsoankihda met. (Mad. 25:31-40) Kitail kak utung rien Krais kan sang ni atail kin ngoangki sewese irail nan doadoahk en kalohk oh katohnpadahk. (Mad. 28:18-20) Pwehki met, kitail men doadoahngki mwahu sawasepen Paipel kan me irail kin kihda, duwehte pwuhken Pereperenki Mour Kohkohlahte! Ma ke saik onop Paipel rehn emen, ke seu akadeiong wia met rehn uwen aramas tohto me ke kakohng?

16. Dahme kitail kak wia ahnsou wet pwehn kak wia towe mehlel en Wehin Koht?

¹⁶ Kitail sohte anahne awih lao kitail mi nan Paradais pwehn wiahla soangen aramas me Siohwa ketin kupwurki en mi wasao. Met kitail kak nantihong en kin mehlel ni koasoi oh wiewia, oh atail wiewia en kin toupahrek. Oh kitail kak loalopwoatohng Siohwa, atail pwoud, oh riatail Kristian kan. Ma met kitail kin peikiong Siohwa nan sampah suwed wet, e pahn mengei ong kitail en peikiong ih nan Paradais. Kitail pil kak kakairada soangen koahiek kan pwehn kasalehda me kitail kin onohnop en kousoan ahnsowo. Menlau kilang oaralapo “Ke Onopadahr en ‘Sohsohki Sampah’?” me mi nan Kahn Iroir wet.

17. Kitail anahne mworumworuskihte dihp kan me kitail wiahda mahso? Menlau kawehwehda.

 ¹⁷ Kitail pil anahne uhdihsang atail mworuskihla dihp laud kan me kitail wiahda mahso. Mehlel, kitail en dehr medewe me kitail kak “nsenki wiewia dihp” pwehki pweinen pweipwei sapahlo. (Ipru 10:26-31) Ahpw kitail kamehlele me ma kitail uhdahn koluhkihla dihp laud ehu, peki sawas sang Siohwa oh elder kan, wekidala atail wiewia kan, e ketin mahkohngehr kitail douluhl. (Ais. 55:7; Wiewia 3:19) Taman dahme Sises mahsanihong Parisi ko: “Kaidehn me pwung kan me I kodohng luke, ahpw me dipan akan.” (Mad. 9:13) Meirong en pweipwei sapahlo uhdahn kak pwaindi dipatail kan koaros.

18. Dahme ke men koasoiaiong loallapo me mehla limwahn Sises?

¹⁸ Ke kak medewehla pein kowe nan Paradais koasoakoasoiong loallapo me koasoiong Sises? Ele kumwa koaros pahn koasoia uwen amwa kalahnganki sapwellimen Sises meirongo. Ke kak peki reh en padahkihong uhk dahme wiawi mwohnte Sises pwoula, oh ia eh pepehm ni Sises eh ketin sapengala eh pekipeko. Ele e pahn pil idek rehmw ia mwomwen mour ni imwin rahn akan en ahn Sehdan koasoandi. E pahn uhdahn wia pwais kaselel ehu en onopki Mahsen en Koht rehn aramas akan me duwehte ohlo!—Ep. 4:22-24.

19. Dahme kahrehda mour nan Paradais sohte pahn kasangat? (Menlau kilang kilel ni kilin Kahn Iroir wet.)

¹⁹ Mour nan Paradais sohte pahn kasangat. E pahn ahnsou koaros mie aramas kaperen kan me kitail pahn tuhwong oh pil doadoahk kaperen kan. Ahpw kesempwal sang met, rahn koaros kitail pahn kak kalaudehla atail esehla Samatailo nanleng oh perenki dahme e ketikihda. Ahnsou koaros pahn mie soahng tohto me kitail pahn sukuhlki duwen ih, oh pil duwen sapwellime kepikipik kan. Uwen werei en atail mour, ih uwen laud en atail pahn poakohngala Koht. Ia uwen atail kalahngankihong Siohwa oh Sises ara ketin inoukihong kitail me kitail kak mour kohkohlahte nan Paradais!