Ke wadekala mwahu Kahn Iroir pwukat? Kitail kilang ma ke kak sapengala peidek kan me kileldi pah:

Ia duwen atail pahn paiekihda ma kitail kin wiahda ahnsou en kapakap ong, rong, oh medemedewe duwen Siohwa?

Kitail pahn wiahda pilipil mwahu kan, wiahla sounpadahk mwahu, atail pwoson pahn kehlailla, oh atail poakohng Siohwa pahn wie lalaudla.—w22.01, pali 30-31.

Ia duwen eh pahn sewese kitail ma kitail sukuhlki en likih Siohwa oh irail kan me wia wiliepe?

Met iei ahnsoun sukuhlki en likih sapwellimen Koht wiewia kan oh dehr peikasalki kaweid oh pilipil kan me elder kan wiahda. Ni ahnsoun kahn kamakam kowahlapo, kitail pahn mwadang en peikiong kaweid kan me kitail alehdi mehnda ma e mwomwen ehusoahng de sohte pwung.—w22.02, pali 4-6.

Ia wehwehn en tohnlengo ndaiong Sekaraia duwen “mehn sosohngo nan pehn [Kepina] Serupapel”? (Sek. 4:8-10, NW)

Kaudiahl wet kamehlelehiong sapwellimen Koht aramas akan me tehnpas sarawio me mwomwen sohte kaselel pahn kaneknekla oh pahn pahrekiong kupwuren Koht.—w22.03, pali 16-17.

Ia duwen atail kak wia “mehn kahlemeng ehu . . . ni lokaia”? (1 Tim. 4:12)

Kitail kin lokaia kadek oh wahu nan kalohk, koul sang mohngiongitail, kaukaule iang pasapeng nan mihting kan, lokaia mehlel oh kangoange meteikan, oh dehr doadoahngki lokaia kamedek.—w22.04, pali 6-9.

Dahme kahrehda mwomwen mahn lawalo pahmen ko (wehi kan) me kileldi nan Daniel irelaud 7 sansalda rehn mahn lawalo tehmen me kileldi nan Kaudiahl 13:1, 2?

Mahn lawalou nan Kaudiahl 13 sohte karasaraskihong kaundahn wehi ehute, duwehte wehin Rom. Ahpw, e karasaraskihong koperment koaros me kaundahier aramas akan sangete mahs leledo met.—w22.05, pali 9.

Ia ahl me keieu mwahu en kasalehda atail likih sapwellimen Koht pwung pahrek?

Ma emen kasarowe, kauwe, de wiahda dihp ong kitail, kitail kin nantihong en sohla nsensuwed pah, oh mweidohng Siohwa en ketin apwalihala irairo. E pahn ketikihsang soahng suwed koaros me dihp kin kahrehda.—w22.06, pali 10-11.

Dahme brother men anahne tamataman ni ahnsou me e kapakap ni mihting ehu?

Kapakap kaidehn ahnsoun kapwungala mwomwohdiso de wia pakair kan. E sohte anahne ‘kapakap reirei,’ ahpw mehlel ni tepin mihting kan. (Mad. 6:7)—w22.07, pali 24-25.

Ni ahl dah me “irail me wiewia me suwed” pahn “iasadahng kadeik”? (Sohn 5:29)

Kadeik me irail pahn alehdi sohte pahn poahsoankihda arail mour en mahs. Ahpw mie me pahn kasawih oh tetehk arail wiewia kan mwurin arail iasada.—w22.09, pali 18.

Kangoang laud dah me J. F. Rutherford kihda ni mihting tohrohro nan September 1922?

Ni mihting tohrohr ehu nan Cedar Point, Ohio, U.S.A., e koasoia: “Nanmwarkio kaundahr! Kumwail iei sapwellime sounkadehde kan. Eri, pakairki, pakairki, pakairki duwen Nanmwarkio oh sapwellime Wehi!”—w22.10, pali 3-5.

Nin duwen me Aiseia irelaud 30 kasalehda, ahl siluh dah kan me Koht kin ketin sewese kitail en dadaur?

Irelaud wet kasalehda me e kin ketin (1) karonge oh sapengala atail kapakap kan, (2) ketikihda kaweid ong kitail, oh (3) kapaikitailda met oh pil ahnsou kohkohdo.—w22.11, pali 9.

Dahme kahrehda kitail kak nda me mahsen kan nan Melkahka 37:10, 11, 29 pweidahr mahso oh pil pahn pweida ahnsou kohkohdo?

Dahme Depit koasoia kawehwehda mwahu duwen irair mwahu me wehin Israel ahneki, duwehte erein kaundahn Solomon. Sises mahsanih duwen paradais ehu ahnsou kohkohdo oh doadoahngki iretikitik 11. (Mad. 5:5; Luk 23:43)—w22.12, pali 8-10, 14.