Soh. Dahme e ntingihedi mehlel.

Tehk dahme e ntingihedi nan iretikitiko oh ire kan me duwehte: “I ahpw pahn koulki koulen kaping kan ong mwaromwi kohkohlahte ni ei kin kapwaiada ei kahula kan ehuehu rahn.” “Maing ei Kaun oh ei Koht, I pahn patohwan kapinga komwi sang nan kapehdiet; I pahn kin kalohki sapwellimomwi roson lapalap kohkohlahte.” “I pahn kin patohwan kapinga komwi ahnsou koaros kohkohlahte.”—Mel. 61:8, NW; 86:12; 145:1, 2.

Ni Depit eh ntingihedi iretikitik pwukat, e sohte medewe me e sohte pahn mehla. E ese me Siohwa ketin mahsanih me aramas akan pahn mehla pwehki irail dipan, oh e pil ese me e pil dipan. (Sen. 3:3, 17-19; Mel. 51:4, 5) E ese me ohl kan me Koht ketin kupwurki, duwehte Eipraam, Aisek, oh Seikop, irail pil mehla. Depit pil ese me e pahn mehla ehu rahn. (Mel. 37:25; 39:4) Ahpw dahme e ntingihedi nan Melkahka 61:8 kasalehda eh inengieng en koasoanehdi teng en kapinga Koht kohkohlahte, me iei, erein eh mour.—2 Sam. 7:12.

Depit kin ekei pak ntingihedi dahme wiawihong ih mahso, duwehte me kitail kilang ni nting kan me mi pohn irelaud 18, 51, oh 52 en Melkahka. Nan Melkahka 23, Depit koasoia me Siohwa ketin rasehng sounsilepen sihpw men me kin ketikihda kaweid, kamweit oh perepatail. Depit pil duwehte soangen sounsilepen sihpwo. Oh e men papah Koht ‘erein eh mour.’—Mel. 23:6.

Pil taman me Siohwa me ketin kaweid Depit en nting. Dahme Depit ntingihedi pil iangete kokohp kan me pahn pweida mwuhr. Karasepe, nan Melkahka 110, Depit ntingihedi duwen ahnsou ehu me eh Kaun pahn ‘ketidiong ni palimaun en Koht’ nanleng oh ale manaman laud. Pwehn wia dah? Pwehn ketin kalowehdi sapwellimen Koht imwintihti kan oh “ketin kadeikada wehi kan” nin sampah. Mesaiao wia kadaudok en Depit, oh e pahn ketin kaunda sang nanleng oh pahn ketin “wiahla samworo sang met kohkohlahte.” (Mel. 110:1-6) Sises mahsanih me kokohpo me mi nan Melkahka 110 kin pidada ih oh pahn pweida ni ahnsou kohkohdo.—Mad. 22:41-45.

Ei, Siohwa ketin kaweid Depit en ntingihedi duwen eh ahnsowo oh pil ahnsou kohkohdo, ni ahnsou me e pahn iasada oh kak kapinga Siohwa kohkohlahte. Eri, Melkahka 37:10, 11, 29 kak kadoadoahk ong ahnsou me e ntingdi oh pil ong ahnsou kohkohdo. Iretikitik ko pweidahr mahso nan Israel oh pil pahn pweida ni ahnsou me Koht pahn ketin kapwaiada sapwellime inou kan.—Menlau kilang parakrap 8 en iren onopo “Ke Pahn Iang Ie Mi nan Paradais” nan Kahn Iroir wet.

Eri, Melkahka 61:8 oh iretikitik teikan me duwehte met kasalehda me Depit men kapinga Siohwa nan Israel mahso lao e mehla. Oh iretikitik pwukat pil kasalehda dahme Depit pahn wia ni ahnsou kohkohdo, ahnsou me Siohwa pahn ketin kaiasada ih.