1. Ia duwen Siohwa eh kin ketin kalapw sapengala ahn sapwellime ladu kan kapakap?

 KE ESE me Siohwa kak ketin doadoahngkin uhk pwehn sapengala ahn emen kapakap ngidingid? Ke kak sawas ma kowe elder men, sounsawas men, pioneer men, de sounkalohk men. Ke pil kak sawas ma ke pwulopwul de mah de ma kowe brother men de sister men. Ni emen me kin poakohng Siohwa eh peki sapwellime sawas, atail Kohto kalapw ketin doadoahngki elder kan oh ladu lelepek teikan pwehn wia “utupen nsenamwahu laud” ong aramaso. (Kol. 4:11) Ia uwen eh wia pwais kaselel en papah Siohwa oh riatail Kristian kan ni ahl wet! Ele kitail kak sewese oh kansenamwahwih riatail kan ni ahnsou me mie soumwahu lusulus, melimel ape, de kalokolok.

2. Dahme kahrehda e kakete apwal en sewese meteikan erein soumwahu lusulus ehu?

² Soumwahu lusulus ehu kak kahrehiong en apwal ong kitail en sewese meteikan. Karasepe, ele kitail men mwemweitla rehn kompoakepatail kan, ahpw e keper en wia met. Ele kitail men luke irail kan me ahneki kahpwal en mwohni en iang kitail mwenge, ahpw met sohte kak. Ele kitail men sewese meteikan, ahpw met kakete apwal ma pein atail peneineio iang soumwahu. Ahpw, kitail men sewese riatail kan, oh Siohwa kin ketin kupwurperenki ni atail kin wia dahme kitail kak ong irail. (Lep. Pad. 3:27; 19:17) Dahme kitail kak wia?

3. Dahme kitail sukuhlkihsang mehn kahlemeng en elder kan nan ahn Desi mwomwohdisou? (Seremaia 23:4)

³ Dahme elder kan kak wia. Ma kowe elder men, ken esehla mwahu sihpw kan. (Wadek Seremaia 23:4.) Desi, sister men me kitail koasoiapene nan iren onop en mwoweo koasoia, “Elder kan nan ei pwihnen kalohko kin ahnsou koaros iang ie oh  meteikan nan kalohk oh wia soahng teikan.” b Met kahrehiong en mengeiong elder ko en sewese Desi mwurin soumwahu lusulus en COVID-19 eh tepida wiawi oh ekei tohn eh peneineio mehla.

4. Dahme kahrehda elder kan kak sewese Desi, oh ia mehn kasukuhlo?

⁴ Desi koasoia, “Pwehki I wiahki elder kan kompoakepahi, e mengeiong ie en padahkihong irail ia ei pepehm oh dahme I kin pwunodki.” Ia mehn kasukuhl ong elder kan? Apwalih irail kan me ke pwukoahki mwohn kahpwal ehu pwarada. Wia kompoakparail. Ma mie soumwahu lusulus ehu me kahrehda en apwal ong uhk en mwemweitla rehrail, wia soahng teikan me ke kak wia. Desi koasoia: “Ekei pak elder teikan kin delepwohndo de textih ie ni rahn ehute. Iren Paipel ko me re kin ehukihong ie kin sair ie, mendahki I eseier ire ko.”

5. Ia duwen elder kan ar kak esehda dahme riarail Kristian kan anahne oh sewese irail?

⁵ Ehu ahl me ke kak ese dahme riomw Kristian kan anahne iei sang ni omw idek rehrail peidek kan me sohte pahn kanamenekihirailla. (Lep. Pad. 20:5) E itar kanarail mwenge, wini, oh soahng teikan? E kakete sohla ar doadoahk de pil imwarail? Irail anahne atail sawas en audehda doaropwe ong sawas sang koperment? Desi ale sawas sang rie Kristian kan. Ahpw limpoak oh kangoang me elder kan kihong ih sang nan Paipel me keieu sewese. E koasoia: “Elder kan iang ie kapakap. Mendahki I sohte kak taman dahme re uhdahn koasoia, I taman ia ei pepehm. Met duwehte Siohwa ketin mahmahsanih, ‘Ke sohte kelekelehpw.’”—Ais. 41:10, 13.

6. Dahme me tohto nan mwomwohdiso kan kak wia pwehn sewese meteikan? (Menalu kilang kilel.)

⁶ Dahme meteikan kak wia. Kitail kasik me elder kan pahn apwalih riatail Kristian kan nan mwomwohdiso. Ahpw Siohwa ketin kupwurki kitail koaros en kangoange oh sewese meteikan. (Kal. 6:10) Pil ni atail kin wia mehkot tikitik pwehn sewese emen me soumwahu, e kak uhdahn kangoange irail. Kisin seri men kak kadarala card ehu de mahlen ehu pwehn kangoange brother men. Me pwulopwul men kak netinet de wia ehu soahng tohrohr ong sister men. Ele meteikan nan mwomwohdiso kak kukihada mwenge ehu ong emen me soumwahu oh wahla ni imweo. Ni mehlel, ni soumwahu lusulus ehu eh kohpeseng,  koaros nan mwomwohdiso anahne mehn kangoang. Mwein mwurin mihting kan, kitail kak mihmi ekis werei pwehn koasoiong riatail kan, mehnda ma nan wasahn kaudok de nan videoconference. Oh elder kan pil anahne mehn kangoang. Ekei Sounkadehde kan kin kadarala kisinlikou en kalahngan ong elder kan me kin kalapw wia soahng tohto ong riarail Kristian kan erein soumwahu lusulus ehu. Ia uwen mwahu ni atail kin wia uwen atail kak pwehn “kangkangoange oh kangkakehlailih emenemen”!—1 Des. 5:11.

7. Dahme kakete apwal mwurin kahpwal ehu?

⁷ Melimel ehu kak kahpwalihala mouren emen ni eh sohte kasik. Ekei aramas kin sohla ar kepwe, imwarail, de pil irail kan me re poakohng. Soahng suwed pwukat pil kin wiawihong riatail Kristian kan. Dahme kitail kak wia pwehn sawas?

8. Dahme elder oh tapwin peneinei kan kak wia mwohn kahpwal ehu eh wiawi?

⁸ Dahme elder kan kak wia. Elder kan, kumwail sewese riamwail Kristian kan en kaunopada mwohn kahpwal ehu wiawi. Tehk mwahu me koaros nan mwomwohdiso ese dahme re pahn wia pwehn dehr lelohng apwal oh pwe ren call elder kan. Margaret, me kitail koasoiapene nan iren onop en mwoweo koasoia: “Elder kan kihda padahk ong anahn en at wasao oh padahkihong kiht me keperpen kisiniei saikinte uhdi. Irail nda me ma pwolihs kan kaweidkin kiht en kohkohsang imwat ko, de irairo uhdahn keper, se anahne mwadang kohkohla.” Brother ko kihda kaweid ni ahnsou me konehng pwehki kisiniei laud keper wiawi wihk limau mwuri. Erein kaudok en peneinei, tapwin peneinei kan kak koasoiapene dahme emenemen tohn peneineio anahne wia. Ma kowe oh noumw seri kan kaunopada, ele ke pahn ahneki meleilei ma kahpwal ehu wiawi.

9. Ia duwen elder kan ar kak koasoanehdi dahme re anahne wia mwohn oh mwurin kahpwal eh wiawi?

⁹ Ma ke kin apwalih pwihn en kalohk ehu, tehk mwahu me mie rehmw nein irail koaros me kin iang omw pwihnen kalohko neirail nempehn delepwohn oh adres. Oh wia met mwohn kahpwal laud wiawi. Ntingihedi nempe pwukat oh kin tetehk ma e pwung. Eri ke pahn kak call emenemen sounkalohk pwehn kilang dahme e anahne ma mie kahpwal ehu wiawi. Mwadang padahkihong soun koasoanehdi pwihn en elder kan duwen met, oh e pahn padahkihong sounapwalih me kin seiloak. Ni elder kan ar kin doadoahkpene, irail kak sawas ni ahl me keieu mwahu. Mwurin kisiniei laudo, sounapwalih me kin seiloako nan ahn Margaret mwomwohdiso pepehdki awa 36, kedikedirepwki ahn elder ko doadoahk erein arail songosong en call oh apwalih riarail Kristian meh 450 me anahne kohkohsang imwarail kan. (2 Kor. 11:27) Eri, koaros me anahne wasahn kousoan alehdi wasa me re kak mi ie.

10. Dahme kahrehda ahn elder kan mwamwaitih riarail kan wia mehkot kesempwal? (Sohn 21:15)

¹⁰ Elder kan pwukoahki kihong riarail Kristian kan kangoang sang nan Paipel oh sewese irail kan me mworusala. (1 Pit. 5:2) Ni kahpwal laud ehu eh wiawi, elder kan anahne tehk mwahu me emenemen riarail Kristian kan sohte lelohng apwal oh mie kanarail mwenge, likou, oh wasa me ren kousoan. Ahpw mwurin sounpwong tohto, ele riarail ko pahn anahnehte kangoang sang nan Paipel oh mehn kamweitparail. (Wadek Sohn 21:15.) Harold, me kin papah nin duwen Pwihn me Kin Apwalih Ohpis en Sounkadehdehn Siohwa kan oh me tuhwongehr Kristian tohto me  lelohng kahpwal laud kan, koasoia: “Ahnsou kin anahn pwe emen en kak nsenamwahula. Mwein irail kakete tepida sohla nsensuwedki dahme wiawihong irail, ahpw irail kin tamatamante emen me re poakohng me mehla, kepwe me re kin kesempwalki, de keper ehu me re lelohng kin kahrehiong irail en pwurehng tamanda dahme wiawi. Ele soahng pwukat kak pwurehng kahrehda nsensuwed. Met sohte wehwehki me omw pwoson tikitik, ahpw koaros kin ahneki soangen pepehmo.”

11. Soangen anahn dah kan me peneinei kan pahn anahne?

¹¹ Elder kan kin kapwaiada kaweido en “sengiseng rehn irail kan me kin sengiseng.” (Rom 12:15) Elder kan anahne kamehlelehiong irail kan me lelohng kahpwal ehu me Siohwa oh riarail Kristian kan kin poakepoakeirailte. Elder kan pahn men sewese peneinei kan en pousehlahte wia soahng kan duwehte kapakap, onop, iang towehda mihting kan, oh kalohk. Elder kan pil kak kangoange papah nohno kan en sewese neirail seri kan en medemedewe soahng kan me kahpwal laud ehu sohte kak kauwehla. Pahpa nohno kan, katamankihong noumwail seri kan me Siohwa pahn ketin ahnsou koaros wia Kompoakparail oh me e pahn ahnsou koaros sewese irail. Oh kawehwehiong irail me re pahn ahnsou koaros wiahte kisehn peneinei en Kristian nan sampah pwon me kin onopada en sewese irail.—1 Pit. 2:17.

12. Dahme meteikan kak wia pwehn sewese wasa ehu me ohkihla kahpwal ehu de melimel ape? (Menlau kilang kilel.)

¹² Dahme meteikan kak wia. Ma kahpwal ehu wiawi wasa keren, peki rehn elder kan ia duwen omw kak sawas. Mwein ke kak mweidohng irail kan me kohkohsang imwarail kan de irail kan me kin sewese wasa ehu me ohkihla melimel ape en mi nan imwomwo erein ahnsou kis. Ele ke kak wahla mwenge oh soahng teikan me sounkalohk kan anahne. Ma kahpwal laud ehu wiawi wasa me doh, ke kakete sawas. Ia duwen? Ni omw kapakapki irail kan me lelohng kahpwal. (2 Kor. 1:8-11) Ele ke kak sewese doadoahko sang ni omw kihda sawas en mwohni pwehn utung doadoahk en sampah pwon. (2 Kor. 8:2-5) Ma ke kak seiloakla wasa me kahpwal ehu wiawi, idek rehn elder kan dahme ke kak wia pwehn sawas. Ma ke alehdi luhk en sawas, ele ke pahn alehdi ekei kaiahn pwe ken kak sawas ni ahl me keieu mwahu.

13. Kahpwal dah kan me riatail kan ahneki nan sahpw kan me atail doadoahko keinapwidi?

¹³ Nan sahpw kan me atail doadoahko keinapwidi, kalokolok kin kahrehiong atail mour en apwal. Brother kan nan sahpw ko kin ahnekihte kahpwal en mwohni, soumwahuda, oh irail me re poakohng mehla. Ahpw pwehki keinapwidio, ele elder kan sohte kak kohla oh mwemweitla de koasoiong ni saledek irail kan me anahne kangoang. Ih met me wiawihong Andrei, me kitail koasoiapene nan iren onop en mwoweo. Sister men nan eh pwihnen kalohko kin ahneki kahpwal en mwohni. Eri e iang sidohsa oh aksident. E anahne ale ekei pwal oh e sohte kak doadoahk. Pwehki keinapwidio oh soumwahu lusuluso, rie Kristian kan wia dahme re kak pwehn sawas oh Siohwa ketin mwahngih dahme wiewiawi.

14. Ia duwen elder kan kak wia mehn kahlemeng mwahu sang ni arail kin likih Siohwa?

¹⁴ Dahme elder kan kak wia. Andrei kapakap oh wia dahme e kak. Ia duwen Siohwa eh ketin mwekidki met? E kamwakid meteikan nan mwomwohdiso me kak uhdahn sewese sistero. Ekei kin sewese wahla sistero ong ah rahnen pwurala imwen wini. Meteikan sewesehki ih mwohni. Siohwa ketin kamwakid irail en wia dahme re kak, oh ketin kapaia arail miniminpene oh nanti laud pwehn sewese sistero. (Ipru 13:16) Elder kan, ni doadoahko eh keinapwidi, peki meteikan en sawas. (Ser. 36:5, 6) Laudsang met, likih Siohwa. E kak ketin seweseiuk apwalih riomw Kristian kan.

15. Ia duwen atail kak miniminiongete riatail Kristian kan ni atail lelohng kalokolok?

¹⁵ Dahme meteikan kak wia. Erein keinapwidi, ele kitail anahne tuhpene ni pwihn tikitik. Eri e kesempwal en kalaudehla atail kolokol popohl nanpwungatail. Pelianda Sehdan, kaidehn emenemen. Pohnsehse ahn riomw Kristian kan sapwung, de dehr awih ahnsou reirei pwehn song en kamwahwihala kahpwalo. (Lep. Pad. 19:11; Ep. 4:26) Onopada en sewese emenemen. (Taitus 3:14) Sawas me meteikan kihong sistero kamwakid laud eh pwihnen kalohko. Irail karanihala emenemen, duwehte peneinei ehu.—Mel. 133:1.

16. Nin duwen me Kolose 4:3, 18 mahsanih, ia duwen atail kak sewese riatail Kristian kan me lelohng kalokolok? 

¹⁶ Riatail Kristian kid kid kei kin papah Siohwa mendahki koperment kan kin keinapwihdi  atail doadoahk. Ekei irail kin selidi pwehki ar pwoson. Kitail kak kapakapkin irail, arail peneinei, oh irail kan me kin tounmeteikihla pein ar saledek pwehn kangoange Kristian kan en pousehlahte likih Siohwa, kihong irail dahme re anahne, oh utung irail nan mwoalen kopwung. c (Wadek Kolose 4:3, 18.) Dehr manokehla me omw kapakap kan kak sewese riomw Kristian kan koaros!—2 Des. 3:1, 2; 1 Tim. 2:1, 2.

17. Ia duwen omw kak kaunopada ahnsou wet ong kalokolok?

¹⁷ Kowe oh omw peneineio kak kaunopada ahnsou wet ong kalokolok. (Wiewia 14:22) Dehr song en medewehla soahng suwed koaros me kakete wiawi. Ahpw, kakehlaka omw nanpwungmwahu rehn Siohwa oh sewese noumw seri kan en wia duwehte. Ma ke kin pwunod ekei pak, padahkihong Koht audepen omw mohngiong. (Mel. 62:7, 8) Nin duwen peneinei ehu, koasoiapene kahrepe kan koaros me ke kak likih ih. d Ni kahpwal laud ehu eh wiawi, omw kaunopada oh likih Siohwa pahn sewese noumw seri kan en eimah oh meleilei.

18. Dahme kitail kasikasik ahnsou kohkohdo?

¹⁸ Sapwellimen Koht popohl kin pere kitail. (Pil. 4:6, 7) Pwehki met, Siohwa kin ketin kameleileidi loalatail mendahki soumwahu lusulus ehu, melimel ape, oh kalokolok kan me kitail kin lelohng rahnwet. E kin ketin doadoahngki elder kan me kin doadoahk laud pwehn apwalih kitail. Oh e ketikihong kitail koaros pai kaselel en sewese emenemen. Erein atail ahneki popohl ahnsou wet, kitail kak kaunopada ong kahpwal laud kan me pahn wiawi, pil iangahki ‘kahn kamakam kowahlapo.’ (Mad. 24:21) Ni ahnsowo, kitail pahn anahne kolokolete atail popohl oh sewese meteikan en wia soahngohte. Ahpw mwurin mwo, kitail sohte pahn lelohng kahpwal kan me kin kahrehiong kitail en pwunod. Kitail pahn perenki dahme Siohwa kin ketin ahnsou koaros kupwurki ong kitail me iei popohl mehlel me pahn poatopoat.—Ais. 26:3, 4.