1. Dahme ohl Kristian men anahne wia pwehn pweida mwahu?

 NANMWARKI Depit padahkihong Solomon: “Kehlail oh kasalehda me kowe ohl emen.” (1 Nan. 2:​1-3, NW) Kaweid wet kesempwal ong ohl Kristian koaros. Pwehn wia met, irail anahne sukuhlki en peikiong sapwellimen Koht kosonned oh kaweid en Paipel kan nan arail mour rahnwet. (Luk 2:52) Dahme kahrehda e uhdahn kesempwal ong brother pwulopwul kan en wiahla Kristian koahiek?

2-3. Dahme kahrehda e kesempwal ong brother pwulopwul men en wiahla Kristian koahiek men?

² Ohl Kristian men ahneki pwukoa kesempwal tohto nan peneinei oh nan mwomwohdiso. Brother pwulopwul kan, ele kumwail kin medemedewe pwukoa kan me kumwail kak alehdi ni ahnsou kohkohdo. Ele kumwail men wiahla emen pioneer, wiahla emen sounsawas, oh mwuhr wiahla elder men nan mwomwohdiso. Ele kumwail pil men pwopwoudla oh naineki seri. (Ep. 6:4; 1 Tim. 3:1) Pwehn lel mehn akadei pwukat oh pweida, kumwail anahne wiahla Kristian koahiek kei. b

³ Dahme kak sewesei kumwail pwehn wiahla Kristian koahiek kei? Mie koahiek kesempwal kan me kumwail anahne esehla oh koahiekla wia. Eri, dahme kumwail kak wia ahnsou wet pwehn kaunopadahng pwukoa kan me kumwail kakete alehdi ni ahnsou kohkohdo, pwe kumwail en kak pweida?

4. Ia wasa ke kak diar mehn kahlemeng mwahu pwehn alasang? (Pil kilang kilel.)

⁴ Pilada mehn kahlemeng mwahu kan pwehn alasang. Mie mehn kahlemeng mwahu nan Paipel ong ohl pwulopwul kan en alasang. Ohl pwukat sang mahso kin poakohng Koht oh apwalih  sapwellime aramas akan ni soangsoangen ahl akan. Ke pil kak diarada mehn kahlemeng mwahu kan rehn ohl Kristian koahiek kan nan omw peneinei oh nan omw mwomwohdiso. (Ipru 13:7) Oh ke pil kak alasang mehn kahlemeng unsek en Sises Krais. (1 Pit. 2:21) Ni omw onopki mwahu mehn kahlemeng pwukat, medewehla arail irair kaselel kan. (Ipru 12:​1, 2) Kowe eri pilada ia duwen omw pahn alasang ohl pwukat.

5. Ia duwen omw kak kakairada koahiek en madamadau, oh dahme kahrehda met kesempwal? (Melkahka 119:9)

⁵ Kakairada oh “pere . . . koahiek en madamadau.” (Lep. Pad. 3:​21, NW) Ohl emen me ahneki koahiek en madamadau kin medewe mahs mwohn eh pilada dahme e pahn wia. Eri esehla ia duwen omw pahn wia met oh doulahte kapwaiada. Dahme kahrehda? Pwehki pali laud en me pwulopwul kan rahnwet kin wiahda pilipil kan me poahsoandahsang arail madamadau de pepehm. (Lep. Pad. 7:7; 29:11) Patehng met, TV, kasdo kan, Internet oh social media kak kamwakid mwomwen omw madamadau oh wiewia. Ahpw ia duwen omw kak kakairada koahiek en madamadau? Keieu, sukuhlki nan Paipel ia sapwellimen Siohwa madamadau oh pepehm oh eri medewe dahme kahrehda e mwahu en wia dahme e ketin mahsanih. Mwuri doadoahngki soahng kan me ke sukuhlki pwehn seweseiuk wiahda pilipil me pahn kaperenda Siohwa. (Wadek Melkahka 119:9.) Ma ke kakairada koahiek kesempwal wet, e pahn seweseiuk ken wiahla Kristian koahiek. (Lep. Pad. 2:​11, 12; Ipru 5:14) Medewehla ia duwen koahiek en madamadau eh pahn seweseiuk ni irair riau: (1) mwomwen omw wiewia ong sister kan oh (2) omw pilipil ong dahme ke pahn likawih oh omw kapwat.

6. Ia duwen koahiek en madamadau eh pahn sewese brother pwulopwul men en kasalehda wahu ong sister kan?

⁶ Koahiek en madamadau pahn seweseiuk en wauneki lih akan. Karasepe, ele brother pwulopwul men pahn men esehla sister pwulopwul men, oh met sohte sapwung. Ahpw, brother pwulopwul men me ahneki koahiek en madamadau sohte pahn nda, ntingihedi, de wia mehkot me pahn kahrehiong sister men en medewe me e men date ih, ma e sohte men pwoudiki. (1 Tim. 5:​1, 2) Ma e kin date sister  men, e pahn pere adamwahu en sistero ni eh sohte pahn kelehpwla reh ihte ma mie me iang ira.—1 Kor. 6:18.

7. Ia duwen koahiek en madamadau eh pahn sewese brother pwulopwul men ni eh pilada dahme en likawih oh kapwat?

⁷ Ehu ahl me brother pwulopwul men kin kasalehda me e kin kakairada koahiek en madamadau iei sang ni soangen likou kan me e pilada en likawih oh sidail en pitenmoange. Pali laud en irail me kin wiahda oh netiki sidail en likou kapw kan sohte kin wauneki Siohwa. Patehng met, ele irail kin mourki tiahk samin. Eri likou kan me re kin wiahda kak uhdahn it de kak kahrehiong ohl akan en mwomwen duwehte lih. Ni eh kin pilada dahme e pahn likawih, brother pwulopwul men me kin nantihong en wiahla Kristian koahiek men pahn mweidohng kaweid en Paipel oh mehn kahlemeng mwahu kan nan mwomwohdiso en kahluwa ih. E kak pein idek reh: ‘Ei pilipil kan kin kasalehda ei madamadau pwung oh me I wauneki meteikan? Mwomwen ei likou kin kahrehiong en mengeiong meteikan en kamehlele me I uhdahn kin papah Koht?’ (1 Kor. 10:​31-33; Taitus 2:6) Brother pwulopwul men me ahneki koahiek en madamadau sohte pahn alehdihte wahu sang rie Kristian kan ahpw pil sang rehn Semeo nanleng.

8. Ia duwen brother pwulopwul men eh kak sukuhlki en kin likilik?

⁸ En kin likilik. Brother pwulopwul men me likilik kin pwerisek en apwalih eh pwukoa kan koaros. (Luk 16:10) Medewehla mehn kahlemeng mwahu en Sises. E kin ketin nsenohki apwalih eh pwukoa kan. E ketin kapwaiada pwukoa kan me Siohwa ketikihong, mehnda ma e apwal en wia met. E ketin poakohng aramas akan—ahpw mehlel sapwellime tohnpadahk kan—oh e kupwurki ketikihda moure ong irail. (Sohn 13:1) Pwehn alasang Sises, doadoahk laud pwehn kapwaiada pwukoa kan me ke alehdi. Ma ke sehse ia duwen omw pahn wia met, kin aktikitik oh peki sawas rehn brother koahiek kan. Dehr pohnkahke. (Rom 12:11) Ahpw, kapwaiada omw pwukoa kan, “wiahiong Siohwa, a kaidehn aramas.” (Kol. 3:23) Ei mehlel, ke sohte unsek, eri kin aktikitik oh pohnese sapwung kan me ke wiahda.—Lep. Pad. 11:2.

9. Dahme kahrehda brother pwulopwul men anahne kakairada koahiek kan me katapan?

⁹ Pwehn wiahla ohl Kristian koahiek men, ke anahne esehla koahiek kan me katapan. Soahng pwukat pahn seweseiuk pwehn alehdi pwukoa kan nan mwomwohdiso, pwehn ahneki doadoahk me pahn apwalihiuk oh omw peneinei, oh seweseiuk en ahneki nanpwungmwahu rehn meteikan. Medewehla ekei koahiek pwukat.

10-11. Ia duwen brother pwulopwul men eh esehla mwahu wadawad oh nting eh pahn wia kamwahu ong pein ih oh mwomwohdiso? (Melkahka 1:​1-3) (Pil kilang kilel.)

¹⁰ Esehla mwahu wadawad oh nting. Paipel mahsanih me ohl emen me kin peren oh pweida  kin wadek Paipel ehuehu rahn oh kin doudouloale. (Wadek Melkahka 1:​1-3.) Sang ni eh kaukaule wadek Paipel, e pahn esehla sapwellimen Siohwa madamadau, me pahn sewese ih en ahneki koahiek en madamadau oh esehla ia duwen eh pahn kapwaiada kaweid en Paipel. (Lep. Pad. 1:​3, 4) Ohl akan me kak wia met kin anahn nan mwomwohdiso. Dahme kahrehda?

¹¹ Riatail Kristian kan anahne sawas sang ohl akan me kak kihda padahk oh sawas sang Paipel. (Taitus 1:9) Ma ke esehla mwahu wadawad oh nting, ke pahn kak kaunopada padahk oh pasapeng kan me meteikan kak paiekihda oh kakehlaka arail pwoson. Ke pil pahn kak ntingihdi soahng kan me kak sawas ni omw onop oh rong padahk kan nan mihting kan oh mihting tohrohr kan. Soahng kan me ke ntingihdi pahn sewese kakehlaka omw pwoson oh kangoange meteikan.

12. Dahme pahn seweseiuk en wiahla emen me kin rong mwahu oh koasoi ni kadek?

¹² Esehla en rong mwahu oh koasoi ni kadek. Ohl Kristian men anahne esehla en kin rong mwahu oh koasoi ni kadek. Met wehwehki me e anahne rong oh wehwehki pepehm oh madamadau en meteikan. (Lep. Pad. 20:5) E kak esehla aramas emen sang ni mwomwen ngilen aramaso, mwomwen pohn meseo, oh mwomwehu. Ke sohte kak esehla met ma ke sohte wiahda ahnsou en patehng aramaso. Ma ke kin kalapw doadoahngki email, text, oh soahng teikan, eri e pahn apwal ong uhk en tuhwong aramaso oh koasoiong. Eri song en diarada ahl teikan en tuhwong oh koasoiong meteikan.—2 Sohn 12.

13. Dahme brother pwulopwul men anahne pil esehla? (1 Timoty 5:8) (Pil kilang kilel.)

¹³ Esehla pein apwalihiuk. Ohl Kristian koahiek men anahne pein kak apwalih pein ih oh eh peneinei. (Wadek 1 Timoty 5:8.) Nan ekei sahpw, brother pwulopwul kan kak sukuhlki ekei soangen doadoahk kan sang arail pahpa de arail peneinei. Nan ekei sahpw, mwahnakapw men kak sukuhlki soangen doadoahk ehu ni eh iang high school. E kin ahnsou koaros mwahu en esehla doadoahk ehu me kak seweseiuk diarada omw doadoahk. (Wiewia 18:​2, 3; 20:34; Ep. 4:28) Doadoahk laud oh tehk mwahu me ke kanekehla dahme ke tapiada. Meteikan pahn tehk met oh re pahn wauneki omw doadoahk. Ma ke wia met, ke kakete alehdi doadoahk ehu oh kolokolete. Irair oh koahiek kan me kitail koasoiapenehr pil kesempwal ong ohl Kristian men pwehn kak apwalih pwukoa teikan ni ahnsou kohkohdo. Kitail pahn koasoiapene ekei pwukoa pwukat.

14. Ia duwen brother pwulopwul men eh kak kaunopada mwahu pwehn wiahla emen me kin doadoahngki pali laud en eh ahnsou en papah Siohwa?

¹⁴ Doadoahngki pali laud en omw ahnsou en papah Siohwa. Ohl Kristian tohto kin tepida kihong pali laud en arail ahnsou nan kalohk ni ahnsou me re pwulopwul. Doadoahk en pioneer kin sewese brother pwulopwul men en esehla ehuiong soangsoangen aramas akan. E pil kin sewese en esehla mwahu doadoahngki nah mwohni oh dehr doadoahngkihla laudsang dahme e naineki. (Pil. 4:​11-13) Ahl keieu mwahu en tepida doadoahngki pali laud en omw ahnsou en papah Siohwa, iei doadoahk en sawasepen pioneer. Erein ahnsou kis, me tohto kin papah nin duwen sawasepen pioneer kei, met kin sewese irail en tepida pioneer. Mwurin arail tepida pioneer, mwuhr ele irail kak alehdi soangen pwukoa teikan, me duwehte iang kauwada wasahn kaudok kan oh doadoahk nan Pedel.

15-16. Dahme pahn sewese brother pwulopwul men pwehn wiahla sounsawas men de elder men?

¹⁵ Papah nin duwen sounsawas men de elder. Ohl Kristian koaros anahne akadeiong en kak papah riarail Kristian kan nin duwen elder men nan mwomwohdiso. Paipel mahsanih me ohl akan me kin nantihong alehdi pwukoa wet kin “inengieng doadoahk mwahu ehu.” (1 Tim. 3:1) Mwohn eh wiahla elder men, brother men anahne wiahla sounsawas men. Sounsawas kan kin sewese elder kan ni ahl tohto. Elder oh sounsawas kan kin ni aktikitik papah riarail Kristian kan oh ngoangki doadoahk en kalohk. Brother pwulopwul kan kak papah nin duwen sounsawas kei pil mwohn arail lel sounpar 20. Oh souwas men me uhdahn koahiek me sounpar 20 samwa kak wiahla emen elder.

¹⁶ Ia duwen omw kak warohng pwukoa pwukat? Paipel kihda irair kan me ke anahne. Ahpw, tamataman me irair pwukat koaros poahsoandahsang Paipel, omw poakohng Siohwa, omw peneinei, oh mwomwohdiso. (1 Tim. 3:​1-13; Taitus 1:​6-9; 1 Pit. 5:​2, 3) Nantihong wehwehki ehuehu irair pwukat. Kapakapki sapwellimen Siohwa sawas pwehn alehdi pwukoa pwukat. c

17. Ia duwen brother pwulopwul men eh kak kaunopada pwehn wiahla ohl pwopwoud men oh tapwin peneinei men? (Pil kilang kilel.)

¹⁷ Ohl pwopwoud oh tapwin peneinei. Duwehte me Sises mahsanih, ekei ohl Kristian koahiek kan kin kiripwte. (Mad. 19:12) Ahpw, ma ke pilada en pwopwoudida, ke pahn wia pwukoa teikan en ohl pwopwoud oh tapwin peneinei.  (1 Kor. 11:3) Siohwa ketin kasik ohl pwopwoud men en poakohng eh pwoud oh apwalih eh anahn kan, wia kompoakepah mwahu, oh sewese en mihmihte karanih Siohwa. (Ep. 5:​28, 29) Irair oh koahiek kan me kitail koasoiapene mwoweo nan iren onop wet, me duwehte kakairada koahiek en madamadau, wauneki lih akan, oh en kin likilik, pahn seweseiuk en wia ohl pwopwoud mwahu men. Ke pahn onopada mwahu en kapwaiada omw pwukoa nin duwen ohl pwopwoud oh tapwin peneinei.

18. Ia brother pwulopwul men eh kak kaunopada pwehn wiahla pahpa men?

¹⁸ Pahpa men. Mwurin omw pwopwoudla, ke kakete wiahla pahpa men. Dahme ke kak sukuhlkihsang Siohwa duwen en wia pahpa mwahu men? Mie mehn kasukuhl tohto. (Ep. 6:4) Siohwa ketin mahsanihong sapwellime Ohlo, Sises, me e ketin poakohng oh kupwurki ih. (Mad. 3:17) Ma ke wiahla pahpa men, tehk mwahu me ke kin kalapw kamehlelehiong noumw seri kan me ke poakohng irail. Kalapw kapingahkin irail soahng mwahu kan me re wia. Pahpa kan me kin alasang sapwellimen Siohwa mehn kahlemeng kin sewese neirail seri kan en wiahla Kristian koahiek. Ke kak kaunopada ahnsou wet en wia pahpa mwahu ni omw kasalehda limpoak ong irail kan nan omw peneinei oh nan mwomwohdiso oh apwalih mwahu irail. Oh sukuhlki en padahkihong irail me ke poakohng irail oh me re kesempwal ong uhk. (Sohn 15:9) Met pahn seweseiuk en wiahla ohl pwopwoud mwahu men oh pahpa mwahu men ni ahnsou kohkohdo. Ahpw met, ke pahn wia emen me kesempwal ong Siohwa, omw peneinei, oh mwomwohdiso.

19-20. Dahme pahn sewese brother pwulopwul kan en wiahla ohl Kristian koahiek kei? (Menlau kilang kilel ni kilin Kahn Iroir wet.)

¹⁹ Brother pwulopwul kan, kumwail pahn anahne nanti laud pwehn wiahla ohl Kristian koahiek men. Kumwail anahne pilada mehn kahlemeng mwahu kan pwehn alasang, kakairada koahiek en madamadau, en kin likilik, esehla koahiek kan me katapan, oh kaunopada ong pwukoa kan me kumwail kakete alehdi.

²⁰ Ni amwail medewe duwen soahng kan me kumwail anahne esehla wia, ele ke pahn pehm me e nohn apwal. Ahpw kumwail kak pweida. Tamataman me Siohwa uhdahn ketin kupwurki sewesei kumwail. (Ais. 41:​10, 13) Ei mehlel, riomw Kristian kan nan mwomwohdiso pahn pil sewesei kumwail. Ni amwail wiahla soangen ohl me Siohwa ketin kupwurki, amwail mour pahn peren oh nsenamwahu. Se poakohng kumwail brother pwulopwul kan! Siohwa en ketin kapaikumwailda laud ni amwail nannanti en wiahla ohl Kristian koahiek kei.—Lep. Pad. 22:4.