Ke wadekala mwahu Kahn Iroir pwukat? Kilang ma ke kak sapengala peidek kan me kileldi pah:

Dahme kitail anahne wia pwehn ‘wekidala elen atail madamadau’? (Rom 12:2)

Met kin pidada laudsang en wia soahng mwahu kante. Kitail en pil medewe soangen aramas dah kei kitail oh wiahda wekidekla kan pwe kitail en kak peikiong sapwellimen Siohwa koasoandi kan ni uwen atail kak.—w23.01, pali 8-9.

Ia duwen atail kak kasalehda toupahrek ni atail kin tetehk mwekid kan en sampah?

Kitail kin men ese ia duwen mwekid kan en sampah ar kin kapwaiada kokohp kan. Kitail en dehr song kasarki dahme pahn wiawi, pwe met kakete kahrehda saminimin, ahpw atail koasoi en kin poahsoankihda dahme mi nan neitail sawasepen Paipel kan me sapwellimen Siohwa pwihn wiahda. (1 Kor. 1:10)—w23.02, pali 16.

Ia duwen sapwellimen Sises papidais eh weksang ahn sapwellime tohnpadahk kan?

Pwehki e ketin ipwidiong nan wehi ehu me inouiong Koht, e sohte anahne ketin inoukihong Siohwa eh mour, duwehte kitail. Sises ketin wia ohl unsek men oh sohte dipe. E sohte anahne ketin koluhkihla dipe.—w23.03, pali 5.

Ia duwen atail kak sewese meteikan en iang pasapeng nan mihting kan?

Kitail kak wia pasapeng mwotomwot oh mweidohng meteikan en iang pasapeng. Kitail pil kak soikala koasoia ire tohto. Met pahn kahrehda en miehte dahme meteikan pahn koasoia.—w23.04, pali 23.

Dahme “Ahl en Sarawi” me Aiseia 35:8 mahsanih kin dokedoke?

Keieu, ahl wet ni karasaras kin dokedoke ahl me mehn Suhs kan keid ie sang Papilon kolahng sapwarailo. Ia duwen ong atail ahnsou? Pahr kan mwohn pahr 1919, kaunopadahn ahlo wiawi, me iei kawehwe oh wiawidahn Paipel kan, oh pil soahng teikan. Sapwellimen Koht aramas akan kin kekeidte nan “Ahl en Sarawi,” doulahte kaudokiong Siohwa me kin imwikihla kapai kan pahn kaundahn Wehio.—w23.05, pali 15-19.

Kaweido nan Lepin Padahk irelaud 9 kin poahsoankihda karasaras en lih riemen dah kei?

Lepin Padahk kin koasoia duwen “lih pweipwei” men me kin luke aramas oh kahluwairaillahng mehla oh pil lih emen me karasaraskihong “kupwurokong” me eh luhk kin kolahng “ahl en loalokong.” (Lep. Pad. 9:​1, 6, 13, 18)—w23.06, pali 22-24.

Ia duwen sapwellimen Siohwa aktikitik oh madamadau toupahrek eh sansalda nan sapwellime wiewia kan ong Lohd?

Siohwa ketin mahsanihong Lohd en tangasang Sodom oh tangala ni nahna kan. Ni Lohd eh peki me ih oh eh peneineio en kohla Soar, Koht ketin mweidada.—w23.07, pali 21.

Dahme lih emen kak wia ma eh pwoudo kin kilang kilel suwed?

Liho en tamataman me kaidehn ih me pwukoahki sapwungo. E anahne medemedewehte eh nanpwungmwahu rehn Koht oh doudouloale koasoipen lih akan nan Paipel me ahneki kahpwal ahpw nsenamwahula ni arail kapakap ong Siohwa. Liho kak sewese eh pwoudo en soikala irair keper kan.—w23.08, pali 14-17.

Ni emen eh peidengki dahme kitail kin kamehlele, ia duwen loalokong eh sewese kitail en mpahi?

Kitail kak medewe ia duwen eh peideko eh kak sewese kitail en esehda dahme e kin medemedewe de kesempwalki. Eri met pahn sewese kitail en sapeng aramaso ni elen mpahi.—w23.09, pali 17.

Dahme kitail kak sukuhlkihsang Mery duwen en ale kehl?

Ni eh esehda me e pahn wiahla inen Mesaiao, Mery ale kehl sang meteikan. Kapriel oh Elisapet kihong ih mehn kangoang kan sang nan Paipel. Kitail pil kak ale kehl sang iengatail tohnkaudok kan.—w23.10, pali 15.

Ia duwen Siohwa eh kin ketin sapengala atail kapakap kan?

E ketin inoukihda en karonge atail kapakap kan oh pil ketin medewe ia duwen atail kapakap eh pidada kupwureo. (Ser. 29:12) Ele e pahn ketin sapengala kapakap kan me duwepenehte ahpw ni ahl me wekpeseng, ahpw e pahn ahnsou koaros ketin sewese kitail.—w23.11, pali 21-22.

Rom 5:2 koasoia duwen “koapworopwor,” eri dahme kahrehda iretikitik 4 pil pwurehng koasoia duwen met?

Ni emen eh kin rong rongamwahwo, ele e ahnekihda koapworopwor en mour kohkohlahte nan paradais nin sampah. Ahpw ni eh lelohng kahpwal kan, kin dadaurete, oh kehn sapwellimen Koht kupwuramwahu, eh koapworopworo kin kehlailla oh uhdahn mehlella ong ih.—w23.12, pali 12-13.