KE KIN uhdahn kesempwalki soangen kisakis tohto me Siohwa ketikihong uhk, oh ke kalahnganki me e ketin mweidohng uhk en pilada ia duwen omw pahn perenki kisakis pwukat. Nin duwen me Paipel mahsanih, wain wia kisakis ehu sang rehn Koht. E pil mahsanih: “Kamadipw kin kaperenihiuk, oh wain kin kansenamwahwihiuk.” (Ekl. 10:19; Mel. 104:15) Ahpw ele ke kin kilang me ekei aramas kin ahneki kahpwal ni arail nim sakau en wai. Pil ehu, madamadau en aramas akan nan sampah pwon me pid sakau kin wekpeseng. Eri, dahme kak sewese Kristian kan en wiahda pilipil loalokong me pid nim sakau en wai?

Ni atail kin wiahda pilipil kan, kitail anahne likih sapwellimen Koht kaweid, a kaidehn dahme aramas akan kin medewe. Ma kitail wia met, kitail pahn nsenamwahu.

Ele ke kin kilang me aramas tohto kin kalapw niminim oh pil kin nim sakau laud. Ekei kin nim sakau pwehki mwein e kin kahrehiong irail en kommoal mwahu. Ekei kin nim pwehn sohla pwunodki arail kahpwal kan. Oh nan ekei wasa, aramas akan kin medewe me en nim sakau laud kin kasalehda me e koahiek de kehlail.

Ahpw Kristian kan kin ale kaweid mwahu sang Sounkapikparail limpoako. Karasepe, e ketin mahsanihong kitail duwen imwila suwed me kohsang sakau daulihala. Ele kitail wadekehr nan Lepin Padahk 23:​29-35 duwen aramas sakau men oh kahpwal kan me e kin lelohng. a Daniel, elder men nan Europe, tamanda ia mwomwen eh mour mwohn eh wiahla Kristian mehlel men. E koasoia: “I kin kalapw sakau daulihala. Oh met kahrehiong ie en wiahda pilipil suwed kan. Pwehki met, I lelohng soahng suwed kan oh I kin nsensuwedkihte ni ei kin medewehla ahnsou ko.”

Ia duwen Kristian kan ar kak wiahda pilipil mwahu oh soikala kahpwal kan me sakau daulihala kak kahrehda? Kitail anahne mweidohng sapwellimen Koht madamadau en kaweid atail pilipil oh wiewia kan.

Kitail pahn tehkpene dahme Paipel mahsanihki duwen sakau oh ekei kahrepe kan me aramas kin nim sakau.

Paipel sohte mahsanih me e suwed en nim ekis sakau. Ni mehlel, Paipel mahsanih me nim wain kak wia mehkot kansenamwahu. E mahsanih: “Tungoatungoale omw tungoal kisin mwenge kan oh pereperen; niminim wain oh nsensenamwahu.” (Ekl. 9:7) Ekei pak, Sises ketin tungoale wain, oh ekei sapwellimen Siohwa ladu lelepek kan pil kin wia met.—Mad. 26:​27-29; Luk 7:34; 1 Tim. 5:23.

Ahpw Mahsen en Koht kasalehda ni sansal wekpeseng en ekis nim sakau oh en sakaula. E mahsanih: “Dehr sakaukihla wain.” (Ep. 5:18) E pil mahsanih me “me kin kamamsakau . . . sohte pahn sohsohki Wehin Koht.” (1 Kor. 6:10) Ei, Siohwa ketin kehkehlingki me e suwed en sakau daulihala oh kamamsakau. Kitail en dehr pwakihte dahme aramas akan nan atail wasa kin wia, ahpw kitail en wiahda pilipil kan me poahsoankihda dahme pahn kaperenda Koht.

Ekei medewe me re kak nim sakau laud oh sohte sakaula. Ahpw met uhdahn keper. Paipel kasalehda ni sansal me en “kin wia lidun wain” kak kahrehiong emen en wiahda sapwung laud oh kauwehla eh nanpwungmwahu rehn Siohwa.  (Taitus 2:3; Lep. Pad. 20:1) Sises pil ketin kaweidki me “sakau laud” kak kauhdi emen sang eh pahn pedolong nan sapwellimen Koht sampah kapwo. (Luk 21:​34-36) Eri, dahme kak sewese Kristian men en soikala kahpwal kan me kak mwadang wiawi pwehki sakau laud?

Ni atail kin wiahda pilipil kan me pid nim sakau, e keper en medewehte dahme pali laud en aramas akan kin wia. Ni loalokong, Kristian kan kin pilada en kaperenda Siohwa ni soahng kan me pidada dahme re pahn kang oh nim. Paipel katamankihong kitail: “Mehnda ma kumwail kin kang de nim, de wia mehkot tohrohr, kumwail wia mehkoaros ong ni kalinganpen Koht.” (1 Kor. 10:31) Iet akan ekei peidek oh ire mehlel kan en Paipel me kitail en medewe:

I kin nim sakau pwe meteikan en perenkin ie? Eksodus 23:2 mahsanih: “Dehr idawehn pali moron en aramas.” Wasaht Siohwa ketin mahsanihong mehn Israel kan en dehr alasang aramas akan me sohte kin kaperenda ih. Met pil wia kaweid mwahu ong Kristian kan rahnwet. Ma kitail mweidohng meteikan en wekidala atail madamadau oh pilipil me pid nim sakau, kitail kak kedekedeo uhdihsang idawehn sapwellimen Siohwa koasoandi kan oh sohla ahneki nanpwungmwahu reh.—Rom 12:2.

I kin nim sakau pwehn kasalehda uwen ei kehlail? Nan ekei tiahk, me tohto pwungki en kin kalapw niminim oh sakaula. (1 Pit. 4:3) Ahpw tehk dahme 1 Korint 16:13 kangoange kitail en wia: “Kumwail pepehd, kesihnenda teng ni pwoson, kumwail kommwad oh kehlailla.” Ia duwe, sakau uhdahn kak sewese emen en kehlailla? Soh. Sakau kak kaluwetehla ahn emen koahiek en medewe mwahu soahng kan oh wiahda pilipil mwahu. Eri, sakau laud sohte kin kadehdehda me emen kehlail. Ahpw e kin kadehdehda me e pweipwei. Aiseia 28:7 kawehwehda duwen emen me sakaula oh kin wasasseli oh dipekelekel.

Kehl me kitail anahne pwehn wia dahme pwung kin kohsang rehn Siohwa, oh met kin pidada atail en pepehd oh kesihnenda teng ni pwoson. (Mel. 18:32) Kitail kin wia met sang ni atail kin soikala keper kan oh wiahda pilipil kan me sohte pahn kauwehla atail nanpwungmwahu rehn Siohwa. Sises sapwellimanki nanpwungmwahu keren rehn  Siohwa, oh me tohto kin wauneki ih pwehki e kin ketin eimah oh nantihong en wia dahme pwung.

I kin nim sakau pwe I en dehr pwunodki ei kahpwal kan? Sounmelkahka men ntingihedi: “Ni ahnsou me I kin pwunodada oh pahtoula, komw [Siohwa] kin ketin kansenamwahwihiehla oh kapereniehda.” (Mel. 94:19) Ma ke kin pwunodki mehkot, likih Siohwa en ketin kansenamwahwihukala, a kaidehn sakau. Ehu ahl mwahu me pahn seweseiuk en dehr nohn pwunod iei en kalapw kapakap ong Siohwa. Pil ehu, me tohto diarada me re kin paiekihda arail ale kaweid mwahu sang kompoakparail koahiek men nan mwomwohdiso. Ni mehlel, en nim sakau pwehn powehdi kahpwal kan kak kaluwetehla ahn emen ineng en wia dahme pwung. (Os. 4:11) Daniel, me kitail koasoiapene mwoweo, koasoia: “I kin ahneki pwunod laud oh pehm me I wiahda sapwung laud. I kin nim sakau pwe I en dehr nohn pwunod, ahpw met kalaudehla ei kahpwal kan, oh sohla kompoakepahi kan oh sohla wahupei.” Dahme sewese Daniel? E koasoia: “I esehda me I anahne sapwellimen Siohwa sawas, a kaidehn sakau. Pwehki sawas sang rehn Siohwa, I kakehr dadaur pahn ei kahpwal kan oh powehdi.” Dahme mehlel iei me Siohwa kin ahnsou koaros ketin kupwurki sewese kitail, mehnda ma atail irairo mwomwen sohte kak mwahula.—Pil. 4:​6, 7; 1 Pit. 5:7.

Ma ekei pak ke kin nim sakau, ke sou kasawih ma ke anahne wiahda wekidekla kan ong iahd oh ia uwen me ke pahn nim? Pein idek rehmw: ‘Mie emen nan ei peneinei de kompoakepahi keren men me kasalehda eh pwunodki ei kin nim sakau?’ Ma ei, met kakete kasalehda me ke ahneki kahpwal ehu me ke sehse. ‘I kin nim sakau laudsang mahso?’ Ele met iei irair en emen me ele sohte kin kamamsakau ahpw e kakete tepida sohla kak uhdihsang. ‘I kin apwalki en dehr nim sakau erein rahn kei de wereisang?’ Ma ei, eri met wehwehki me e wialahr tiahk ehu rehmw oh ke sohte kak uhdihsang. E kak wehwehki me ke anahne sawas sang toahkte de me saman kan pwehn powehdi kahpwal wet.

Pwehki nim sakau kak kahrehda kahpwal tohto, ekei Kristian kan pilada en dehr nim. Ekei ele pilada en dehr nim pwehki re sohte iouki. Ma emen  iengomw wiahda soangen pilipil pwukat, ke kak kasalehda omw kadek sang ni omw wauneki eh pilipilo oh sohte kauwe.

Mwein ke esehda me e wia elen loalokong en irehdi ia uwen me ke pahn nim. De ele ke pahn koasoanehdi iahd me ke pahn nim, ele pak ehu nan wihk ehu de ekis nim ni ahnsoun mwenge. Ekei kin koasoanehdi soangen sakau dah me re pahn nim, duwehte en nim ekis wain de pihru, ahpw sohte sakau kehlail, de pil me doal. Ni emen eh koasoanehdi teng uwen me e pahn nim, e pahn mengei ong ih en idawehn. Oh Kristian koahiek men sohte anahne pwunodki dahme meteikan ele medewehki ih pwehki e wiahda soangen pilipilo oh nantihong en idawehn.

Ni atail kin pilada ma kitail pahn nim sakau de soh, kitail pil anahne medewe pepehm en meteikan. Rom 14:21 mahsanih: “Me keieu mwahu iei en dehr kang uduk de nim wain de wia mehkot me pahn kahrehiong riomw men en dipekelekel.” Ia duwen omw kak doadoahngki kaweid wet? Kasalehda limpoak en pirien. Ma ke medewe me en nim sakau kakete kansensuwedihala emen, limpoak sou pahn kamwakid uhk en dehr nim sakau nan soangen irairo? Omw wia met pahn kasalehda me ke wauneki oh poakohng meteikan oh ke kin nsenohkin irail laudsang pein uhk.—1 Kor. 10:24.

Patehng met, ele mie kosonned en koperment me pid sakau. Kristian kan uhdahn pahn peikiong kosonned pwukat. Kosonned ko ele nda me ke anahne lel uwen sounpar ehu mwohn omw kak nim sakau en wai. De kosonned ko ele sohte mweidada aramas akan en nim sakau oh tangahki werennansapw kan de koadoahke soangen misihn teikan.—Rom 13:​1-5.

Siohwa ketikihong kitail soangen kisakis kaselel tohto, oh ehu iei saledek en pilada ia duwen atail pahn doadoahngki kisakis pwukat. Met iangahki en pilada dahme kitail pahn kang oh dahme kitail pahn nim. Atail pilipil kan en kasalehda me kitail kin kesempwalki saledek wet sang ni atail doadoahngki ni ahl me pahn kaperenda Samatailo nanleng.